Sioné 20
20
Ko e Toetu‘u ‘a Sīsuú
(Māt 28.1-8; Ma‘ake 16.1-8; Luk 24.1-12)
1KA ‘i he ‘uluaki ‘aho ‘o e uike, Na‘e ha‘u hengihengi ‘a Mele mei Makitala ki he fonualoto, ‘oku kei po‘uli, pea ‘i he‘ene vakai, tā kuo to‘o ‘a e maka mei he fonualoto. 2Pea ne lele ai ‘o ‘alu kia Saimone Pita, pea ki he ako ‘e taha ‘a ia na‘e ‘ofa ai ‘a Sīsū, pea ne pehē kiate kinaua, Kuo nau ‘ave ‘a e ‘Eiki mei he fonualoto, pea ‘oku ‘ikai te mau ‘ilo pē kuo nau tuku ia ki fē.
3Pea ‘alu atu ai kitu‘a ‘a Pita mo e ako ‘e taha, ‘o na kamata ō ki he fonualoto. 4Pea kamata lele ‘a e ongo me‘a ko ia fakataha; pea vave ‘a e lele ‘a e ako ko ia ‘e taha ‘ia Pita, ‘o ne tomu‘a hoko ki he fonualoto. 5Pea ne punou, ‘o ne vakai, tā ‘oku tuku ai ‘a e ngaahi tupenu; ka na‘e ‘ikai te ne hū ki ai ‘e ia. 6Ka ka muimui atu ai pē ‘a Saimone Pita, pea faifai pea ne a‘u ‘o ne hū ki he fonualoto, ‘o ne mo‘uvakaia ‘a e ngaahi tupenu ‘oku tuku na; 7mo e holoholo, ‘a ia na‘e ‘ai ki hono fofonga, kuo ‘ikai tuku fakataha mo e ngaahi tupenu, ka ‘oku fatufatu kehe, ‘o tuku ki ha potu ‘e taha. 8Pea toki hū ki ai mo e ako ko ia ‘e taha, ‘a ia na‘e tomu‘a a‘u ki he fonualoto, pea ne sio ki ai ‘o tui. 9He na‘a mo ‘eni, kuo te‘eki ke mahino kiate kinautolu ‘a e folofola, ‘o pehē, Kuo pau ke ne toe tu‘u mei he pekia. 10Pea toe foki ‘a e ongo ako ki ‘api.
Ko e Hā ‘a Sīsū kia Mele Makitaline
(Māt 28.9-10; Ma‘ake 16.9-11)
11Ka ka tu‘u pē ‘a Mele ‘i he tu‘a fonualoto, ‘o tangi: pea ‘i he‘ene tangi, ‘iloange na‘a ne punou ke sio, ki he fonualoto. 12Pea ne vakai ki ha ongo ‘āngelo kofu hinehina ‘oku na nofo ai, ko e taha mei ‘ulu, mo e taha mei va‘e, ‘i he potu na‘e toka ai ‘a e sino ‘o Sīsū. 13Pea lea ‘e he ongo me‘a kiate ia, ‘o pehē, ‘e fefine, ko e hā ‘oku ke tangi ai?
Pea ne pehē kiate kinaua, Kuo nau ‘ave si‘oku ‘eiki, pea ‘oku ‘ikai te u ‘ilo pē kuo nau tuku ia ‘i fē?
14Pea ‘i he‘ene lea pehē na‘a ne tafoki ki mui, ‘o ne vakai kia Sīsū ‘oku tu‘u mai, ka na‘e ‘ikai te ne ‘ilo ko Sīsū ia. 15Pea na‘e me‘a mai ‘a Sīsū kiate ia, ‘e fefine, ko e hā ‘oku ke tangi ai? ko hai ‘oku ke kumi ki ai?
Pea mahalo ‘e ia ko e tauhi ngoue ia, ‘o ne pehē ki ai, ‘Eiki, kapau ko koe kuo ke ‘ave ia, tala mai ‘a e potu kuo ke tuku ia ki ai, pea te u ‘ave ia ‘e au.
16Folofola ‘a Sīsū ki ai, Mele!
Pea tafoki ange ‘a e fefine, ‘o ne pehē kiate ia ‘i he lea faka-Hepelū, Lāponai! (‘a ia ‘oku tatau mo e pehē, Si‘i Tangata‘eiki!)
17Pea folofola ‘a Sīsū kiate ia, ‘Oua na‘a ala kiate au, he kuo te‘eki ke u ‘alu hake ki he Tamai: ka ke ‘alu ki si‘oku ngaahi tokoua, ‘o lea ki ai ‘o pehē, Ko ‘eku ‘alu hake ‘eni ki he‘eku Tamai pea ko ho‘omou Tamai, pea ki hoku ‘Otua pea ko homou ‘Otua.
18Pea ‘alu ‘a Mele mei Makitala, ‘o ne tala ki he kau ako, ‘o pehē, Kuo u mamata ki he ‘Eiki: mo ne fakahā, Kuo ne folofola pehē mo pehē kiate au.
Ko e Hā ‘a Sīsū ki He‘ene Kau Akó
(Māt 28.16-20; Ma‘ake 16.14-18; Luk 24.36-49)
19Pea ‘i he‘ene efiafi ‘i he ‘aho ko ia, ‘a e ‘uluaki ‘aho ‘o e uike, pea kuo tāpuni ‘a e ngaahi matapā ‘o e fale na‘e nofo ai ‘a e kau ako, ko ‘enau manavahē ki ha‘a Siu, na‘e ha‘u ‘a Sīsū, ‘o tu‘u ki honau lotolotonga, ‘o ne folofola kiate kinautolu, Si‘oto‘ofa atu! 20Pea ‘i he‘ene lea pehē, na‘a ne faka‘ali‘ali kiate kinautolu hono ongo nima mo hono vakavaka. Pea na‘e fiefia ‘a e kau ako ‘i he‘enau mamata ki he ‘eiki. 21Pea ne toe folofola ai kiate kinautolu, Si‘oto‘ofa atu: hangē ne fekau mai au ‘e he Tamai, pehē ‘oku ou tuku atu kimoutolu ‘e au. 22Pea ‘i he‘ene lea pehē, na‘a ne hō kiate kinautolu, ‘o ne folofola, Mou ma‘u Laumālie Mā‘oni‘oni ā. 23Kapau te mou fakamolemole ‘a e hia ‘a e ni‘ihi, kuo fakamolemole; kapau te mou tuku ‘a e hia ‘a ha ni‘ihi, kuo tuku pē.#Māt 16.19; 18.18
Ko Sīsū mo Tōmasi
24Ka ko Tōmasi, ko e toko taha ‘i he kau Hongofulumāua, ‘a ia ‘oku ui ko Titimasi, na‘e ‘ikai te ne nofo mo kinautolu ‘i he ha‘u ‘a Sīsū. 25Ko ia na‘e lea kiate ia ‘e he kau ako ni‘ihi, ‘o pehē, Kuo mau mamata ki he ‘Eiki.
Ka ka pehē ‘e ia kiate kinautolu, Ka ‘ikai te u sio ‘i hono ongo nima ki he mata fa‘o, ‘o u velo hoku tuhu ni ki he mata fa‘o, mo velo hoku nima ki hono vakavaka, ‘e ‘ikai ‘aupito te u tui.
26Pea hili ‘a e ‘aho ‘e valu, na‘e toe nofo ‘i loto fale ‘ene kau ako, pea ne ‘iate kinautolu ‘a Tōmasi. Ha‘u pē ‘a Sīsū, kuo tāpuni ‘a e ngaahi matapā, ‘o ne tu‘u ki honau lotolotonga, ‘o ne pehē, Si‘oto‘ofa atu! 27Pea na‘a ne toki pehē kia Tōmasi, ‘ai mai ho tuhu na, ‘o vakai hoku ongo nima ni; pea ‘ai mai ho nima na, ‘o velo ki hoku vakavaka ni: pea ‘oua te ke hoko ko e ta‘etui, ka ko e tui.
28Tali ‘a Tōmasi, ‘o ne pehē ki ai, Ko hoku ‘Eiki pē, mo hoku ‘Otua!
29Pea folofola ki ai ‘a Sīsū, ‘o pehē, Kuo ke tui koā koe‘uhi kuo ke mamata kiate au? monū‘ia ā ka ko kinautolu ne ‘ikai mamata, ka nau tui pē.
Ko e ‘Uhinga Na‘e Fa‘u ai ‘e Sione ‘ene Tohí
30Pea na‘e lahi foki mo e ngaahi ngāue mana ne feia ‘e Sīsū ‘i he ‘ao ‘o e kau ako, ‘a ia kuo ‘ikai tohi ‘i he tohi ni: 31ka kuo tohi ‘eni koe‘uhi ke mou tui#20.31 ke mou tui: ‘Oku pehē ‘i hono ngaahi hiki fuoloa ‘e ni‘ihi: ke mou tui ai pē. KO SĪSŪ KO E MĪSAIA IA, KO E ‘ALO ‘O E ‘OTUA: pea ‘i ho‘omou tui ke mou ma‘u mo‘ui ‘i hono HUAFA.
Obecnie wybrane:
Sioné 20: TMB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.
