MATIUS 13

Ha' tapan tong kelunan tai murat lo'ong parai

(Mrk. 4:1-9, Luk. 8:4-8)

1La'ah dau inah piso Yésus jin lamin inah tai déhéé' baa' Banget ke' néh nebaraa' réh jin sinah. 2#Luk. 5:1-3 Pinaa' kelunan tuai petipun ngan néh sinah, inah Iah mokoo' tong jah alut, irah pinaa' nah nekedéng tong dirin baa'. 3Pinaa' arong-arong éh benara' néh ngan réh palaa' ha' tapan.

Ka' ha' néh ngan réh, Pu'un kelunan murat lo'ong parai. 4Lem néh murat éh nah, jelua' lo'ong parai nah pelohoo' tong dirin jalan, tuai juhit kon éh pah béé. 5Pu'un kepéh lo'ong néh éh pelohoo' tong bateu', éh tong bateu' nah si'ik awah tana' tong néh. Laho éh nyekaa' uban lo'ong inah bé' éh dilem lem tana'. 6Bang hun pétéé' musit, sekaa' parai nah melayeu' éh uban lakat néh bé' dilem lem tana'. 7Pu'un jelua' kepéh pelohoo' tong suha', suha' inah maneu' urip parai inah ngerising awah. 8Bang pu'un jelua' kepéh pelohoo' tong tana' jian, nyekaa' éh pah avéé' néh ngebuaa'. Kebit pungun néh, pinaa' buaa' néh kepéh. Pu'un éh jian mu'un ngan pinaa' lo'ong néh, pu'un éh kepéh éh jian si'ik, kerat awah lo'ong néh, pu'un éh jah kepéh éh sa'at jin inah, kerat mu'un lo'ong néh. Kenat ha' tapan éh benara' Yésus ngan réh.

9La'ah ha' néh kepéh, Kelunan éh pu'un kelingen, jian éh menéng éh mu'un, ha' néh.

Yésus bara' tong jalan néh nebaraa' kelunan palaa' ha' tapan

(Mrk. 4:10-12, Luk. 8:9-10)

10La'o inah tuai irah éh bakéh Yésus neteng éh, ha' réh, Kineu' éh Ko' pané ngan réh lem ha' tapan nah, ha' réh ngan Yésus.

11Ha' néh mipa réh, Ka'ah iteu' pu'un keh jam tong pengihau Allah, uban Allah éh mena' pengejam néh ngan keh, bang irah pinaa' nah bé' réh jam éh kenat. 12#Mat. 25:29, Mrk. 4:25, Luk. 8:18, 19:26 Uban kelunan éh pu'un penesen si'ik awah, Tuhan pepit pengejam néh ke' néh pu'un mutaa' kepéh. Bang kelunan éh bé' keloo' jam, Tuhan mega' pengejam néh éh si'ik inah. 13Kenat éh Ké' nebaraa' réh palaa' ha' tapan, uban pu'un réh na'at bang bé' réh pu'un ta'an. Pu'un réh menéng bang bé' réh jam éh. 14Kenat péh irah barei' ha' éh benara' nabi Yesaya sahau,

ka' ha' Allah pané:

Pu'un keh juk ngenéné' éh mu'un,

bang bé' keh nesen éh.

Pu'un keh juk kepuh éh mu'un,

bang bé' keh pu'un ta'an.

15 # Yes. 6:9-10 Uban kelunan iteu' pu'un réh mahéng kenin,

pu'un réh mapek kelingen réh ngan pu'un réh sidem,

dai réh na'at, dai réh menéng ngan dai réh nesen éh,

ngan moléé' tavin Akeu', ke' ké' peka'o réh, ha' Tuhan.

16Ha' Yésus kepéh, Jian uban Tuhan maneu' ka'ah omok na'at ngan omok menéng. 17#Luk. 10:23-24 Akeu' bara' mu'un ngan keh, pinaa' nabi Tuhan, ngan pinaa' kelunan éh maneu' pengeloo' Allah sahau, keloo' mu'un-mu'un réh na'at éh ta'an keh nah, bang bé' réh omok na'at éh. Kenat péh keloo' mu'un-mu'un réh menéng éh nenéng keh nah, bang bé' réh omok, ha' Yésus ngan réh.

Sin ha' tapan tong kelunan éh mulah parai nah

(Mrk. 4:13-20, Luk. 8:11-15)

18Ha' Yésus kepéh, Hun néh kenat menéng keh ngan nesen keh sin lem ha' tapan tong kelunan éh tai mulah parai nah. 19Kelunan éh menéng rengah tong jalan Allah Pengeja'au bang bé' réh nesen éh, inah éh barei' lo'ong éh pelohoo' tong dirin jalan nah. Tuai iah éh sa'at tioo alaa' lo'ong inah jin lem kenin réh. 20Sin tong lo'ong éh pelohoo' tong bateu', inah éh barei' kelunan éh lepah menéng rengah ké' ngan alaa' éh ngan jian kenin. 21Bang bé' éh masek lem lepok kenin réh mu'un, bé' réh omok ngeretep. Hun pu'un tusah ngan keta kepéh uban rengah inah, irah tioo bet éh awah. 22Sin tong lo'ong éh pelohoo' lem suha', inah éh barei' kelunan éh menéng rengah nah, bang neu' réh kawa' neu' urip réh tong tana', ngan neu' réh pitah pengekaya', inah éh maneu' rengah inah ngerising lem kenin réh, bé' réh omok ngebuaa'. 23Sin tong lo'ong éh pelohoo' tong tana' éh jian, inah éh barei' kelunan éh menéng rengah nah ngan nesen éh. Pu'un réh ngebuaa', jelua' réh pinaa' buaa' réh, jelua' réh kerat awah buaa' réh, jelua' réh kepéh, kerat mu'un buaa' réh. Kenat sin ha' tapan iri' ne', ha' néh.

Ha' tapan tong ureu' éh barei' layan parai

24La'ah Yésus bara' jah ha' tapan kepéh ngan réh. Ka' ha' néh, Tong jaka' Allah tuai Pengeja'au, ha' tapan barei' jah kelunan éh mulah lo'ong parai tong térék néh. 25Bang tovoo' néh pegen tuai ayau néh ngan mulah ureu' éh barei' layan parai nah sinah kepéh, boh éh kelap. 26Tovoo' kekat inah nyekaa' ngan bu'an, boh ureu' nah poléng ureu'. 27Boh kelunan sohoo' kelunan inah tavin éh ke' réh pané ngan néh, ka' ha' réh, O lakei' ja'au, lo'ong parai éh jian éh nulah ko' rai de', kineu' ureu' nah murip tong térék ko' kenat, ha' réh. 28La'ah ha' néh mipa réh, ayau éh mulah éh, ha' néh. Ha' réh kepéh, Kineu' ke', keloo' ke' mé' mavut éh, ha' réh. 29Ha' néh ngan réh kepéh, Bé', uban hun keh mavut ureu' nah barang pavut jelua' parai nah pemung ngan néh. 30Turut ke' parai ngan ureu' nah murip pemung hun iteu', sioo' ajau boh ku' nyohoo' kelunan éh tai majau nah mavut ureu' nah tenah ngan memikah éh ngan bet éh tai luten, ngan nyohoo' réh alaa' parai ngan modoo' éh tong luvung ké', ha' néh.

Ha' tapan tong tulin buaa' kayeu' sesawi

(Mrk. 4:30-32, Luk. 13:18-19)

31La'ah Yésus bara' jah ha' tapan kepéh ngan réh, ka' ha' néh, Inah ha' tapan éh bara' tong jalan Allah pepit kelunan pinaa' éh omok tai lem nihau Néh hun néh tuai Pengeja'au. Inah éh barei' tulin buaa' kayeu' sesawi, tulin buaa' inah si'ik mu'un éh. 32Pu'un jah kelunan alaa' éh ke' néh mulah éh tong térék néh. Bé' lebéé' nyekaa' tulin inah ngan nginan éh, pinaa' juhit omok maneu' sala néh tong paka' kayeu' inah, ha' néh.

Ha' tapan tong tawan-pekevat

(Luk. 13:20-21)

33Jah ha' tapan kepéh éh benara' Yésus ngan réh, ka' ha' néh, Tong jalan kelunan pinaa' pepit ke' néh tai lem nihau Allah hun néh tuai Pengeja'au, inah éh barei' tawan-pekevat éh nalaa' redo ke' néh pekulup éh ngan jah gateng tepong, tawan inah maneu' tepong inah vat ngan ja'au, ha' néh.

Tong Yésus nebaraa' réh palaa' ha' tapan

(Mrk. 4:33-34)

34La'ah pu'un Yésus bara' kuraa'-kuraa' rungen ngan réh palaa' ha' tapan, bé' Iah bara' ineu'-ineu' ngan réh petek ke' bang Iah nebaraa' réh palaa' ha' tapan awah. 35#Msm. 78:2 Pu'un éh maneu' kenat dokoo' néh pesukup ha' éh benara' nabi Tuhan ngan kelunan sahau, ka' ha' néh,

Akeu' juk pané ngan réh palaa' ha' tapan.

Akeu' juk bara' tong kuraa'-kuraa' rungen éh bé' kejam kelunan jin bu'un-bu'un tana' iteu' pu'un, ha' néh.

Sin tapan tong ureu' éh barei' layan parai

36La'o Yésus bara' kuraa'-kuraa' ha' tapan ngan réh, piso éh jin irah pinaa' nah tai lamin. Boh irah bakéh néh tuai neteng éh, ka' ha' réh, Ineu' sin ha' tapan tong ureu' ri', jian Ke' bara' éh ngan améé', ha' réh.

37Ha' Yésus mipa réh, Kelunan éh mulah lo'ong parai nah, inah éh Anak Kelunan. 38Térék nah, inah éh kekat tana', lo'ong parai nah, inah éh irah éh pu'un lem nihau Allah, ureu' nah inah éh kelunan éh pu'un lem kamit iah éh sa'at. 39La'ah ayau nah éh mulah ureu' nah, inah éh Sitan. Sioo' ajau nah, inah éh tovoo' ga' tana' vam, irah éh majau nah, inah éh meliket Tuhan. 40Pekua' barei' irah tipun ureu' ngan motong éh nah, kenat péh tovoo' ga' tana'. 41Anak Kelunan juk nyohoo' meliket néh tuai alaa' kekat kelunan éh mihin irah éh jah maneu' penyala', ngan alaa' kekat kelunan éh sa'at, 42ngan bet réh lem luten éh pana mu'un, sinah réh mangaa' keta mu'un-mu'un. 43Boh kelunan éh teneng kenin tong jumen Allah pu'un ngada barei' maten dau tong retek Allah Pengeja'au réh. Hun keh pu'un kelingen, jian keh menéng ngan nesen éh, ha' néh.

Ha' tapan tong livah éh ma'an melih éh pelim

44La'ah ha' Yésus kepéh, Inah jah ha' tapan éh bara' tong jalan kelunan pitah ke' réh omok tai lem nihau Allah hun néh tuai Pengeja'au. Inah éh barei' livah éh ma'an melih éh nelim réh tong térék. Pu'un kelunan na'at livah inah, iah tioo petavun éh melim éh kepéh. Murung kenin néh, tai éh melih kekat livah néh ke' néh omok moléé' tai melih térék inah kepéh, ha' néh.

Ha' tapan tong bateu' mutiara

45Ha' Yésus kepéh, Jah ha' tapan éh bara' tong jalan kelunan pitah ke' réh omok tai lem nihau Allah hun néh tuai Pengeja'au. Inah éh barei' kelunan éh pitah bateu' mutiara éh jian mu'un ke' néh omok melih éh. 46Hun néh pu'un jah bateu' mutiara éh jian mu'un ta'an néh, boh éh melih kekat livah néh ke' néh omok melih mutiara inah, ha' néh.

Ha' tapan tong jala'

47Ha' Yésus kepéh, Jah ha' tapan éh bara' tong kelunan éh omok tai lem nihau Allah hun néh tuai Pengeja'au. Inah éh barei' kelunan éh tai ngejala'. Pinaa' arong seluang lem jala' inah. 48Hun jala' inah pinaa' seluang lem, irah menat éh tai tana' boh réh menyun ngan ngevéléé' seluang inah. Éh jian, pu'un réh modoo' éh, éh bé' jian pu'un réh bet éh awah. 49Barei' inah péh tovoo' ga' tana' vam. Pu'un kuraa'-kuraa' meliket juk tuai ke' réh petipun kekat kelunan éh sa'at jin belah irah éh ngepayoo' kenin Allah, 50ngan bet irah éh sa'at nah lem luten éh pana mu'un. Sinah réh mangaa' ngan keta mu'un-mu'un, ha' néh.

Tong éh maréng ngan tong éh lepah

51La'ah ha' Yésus neteng réh, Kineu' keh, pu'un keh nesen ha' Ké' tong kekat ha' tapan inah, ha' néh.

Ha' réh mipa éh, Oo' tesen mé' éh, ha' réh.

52Ha' néh kepéh, siget kelunan éh nebaraa' tong sohoo' lem Surat Musa ngan éh mihau ha' tebaraa' tong Allah éh pengeja'au, inah iah barei' jah pengeja'au tong lamin. Pengeja'au inah pu'un éh alaa' livah éh maréng jin luvung néh ngan pu'un éh alaa' livah éh lepah lebéé' kepéh, ha' néh.

Tong irah leboo' Nasaret bet Yésus

(Mrk. 6:1-6, Luk. 4:16-30)

53La'o Yésus bara' kekat ha' tapan inah ngan réh, piso éh jin sinah 54moléé' tong leboo' néh kepéh. Pu'un éh nebaraa' réh tong lamin sebayang Yahudi, irah éh menéng ha' tebaraa' néh béé kenin réh. Pu'un réh pané belah irah ke', ka' ha' réh, Jin ineu' iah alaa' ha' tebaraa' éh kenat? Kineu' jalan iah jam éh kenat? Kineu' jalan iah omok maneu' telana' éh ja'au kenat, ha' réh. 55Bé' énéh éh anak tukeng kayeu' rai? Kineu', bé' éh Meriam tinen néh, ngan padéé' néh Yakub ngan Yusup ngan Simon ngan Yudas rai? 56Pu'un padéé' néh redo mokoo' tong leboo' tam siteu' nah ne'. Kineu' éh ke' néh omok maneu' kenat, ha' réh. 57#Yoh. 4:44 Inah maneu' réh bet éh awah.

La'ah ha' Yésus ngan réh, Kelunan éh nabi Tuhan, pu'un kelunan sepah éh semah-semah péh, bang tong leboo' néh tengéé' ngan belah irah lua' néh tengéé' bé' réh pu'un sepah éh, ha' néh. 58La'ah bé' Iah maneu' telana' ineu'-ineu' éh ja'au tong leboo' néh tengéé' uban réh bé' ngelan tong Iah.

Markert nå:

MATIUS 13: PNT

Marker

Del

Kopier