MATIUS 14
14
Tong pematai Yohanes Batis
(Mrk. 6:14-29, Luk. 9:7-9)
1La'ah tovoo' inah péh raja' Herodis éh pengeja'au tong tana' Galilia, menéng rengah tong kekat penganeu' Yésus. 2La'ah Herodis nah pané ngan irah éh pu'un ngan néh, ka' ha' néh, Yésus nah éh mu'un néh Yohanes Batis betéé' jin patai néh éh, nah ke' néh pu'un penyukat omok maneu' kekat telana' inah, ha' néh.
3Uban hun lepah nah pu'un Herodis nyohoo' kelunan ngamit Yohanes ngan ngejeret éh ngan masek éh lem lamin tutup. Herodis nyohoo' réh maneu' kenat naneu' Herodias éh do Pilipus éh padéé' Herodis nah. 4#Luk. 3:19-20 #Ima. 18:16, 20:21 Pinaa' koléé' Yohanes nah meta' Herodis nah ngan bara' ngan néh, Bé' tekep ke' alaa' do padéé' ko', ha' néh. 5Tovoo' Yohanes pané kenat Herodis juk mematai éh, bang medai éh kelunan Yahudi uban irah Yahudi nah jam Yohanes nah kelunan éh kevéléé' Tuhan ke' néh bara' ha' Tuhan ngan réh.
6Avéé' tong jah dau ja'au, dau réh ngajung Herodis uban réh seruh tong lohoo' néh, anak Herodias éh redo, sayau tong jumen réh béé. Jian kenin Herodis na'at éh, 7ngan iah pesupa jajii' ngan néh, ha' néh, Ineu'-ineu' éh juk nenyat ko' ngan ké', adang ké' mena' éh ngan ko' dat, ha' néh. 8Boh anak inah kivu ha' tinen néh ngan bara' ngan Herodis, Jian ke' tioo mena' ulun Yohanes Batis lem pigan ko' mena' éh ngan ké', ha' néh.
9Tusah mu'un-mu'un kenin raja' Herodis menéng ha' néh kenat, bang bé' éh omok pepiso ha' néh tong jajii' néh ngan redo inah tong jumen kekat kelunan ri'. Inah iah nyohoo' kelunan tai maneu' barei' pengenyat anak inah. 10Iah nyohoo' kelunan tai ngulep ulun Yohanes. 11Pu'un réh alaa' ulun Yohanes lem pigan ngan mena' éh ngan anak inah, boh anak inah patet éh ngan tinen néh. 12La'o inah bakéh Yohanes nah tai alaa' patai néh ke' réh nanem éh, boh réh tai bara' éh ngan Yésus.
Tong Yésus pakan lemah ibu kelunan
(Mrk. 6:30-44, Luk. 9:10-17, Yoh. 6:1-14)
13Hun Yésus menéng rengah réh mematai Yohanes nah, piso éh jin sinah jalan alut tai mokoo' tong tana'. Hun kelunan pinaa' jam Iah lepah tai kenat, tai réh jin siget leboo' lakau jalan tana' tavin éh. 14Musit Yésus jin alut ngan hun Iah na'at kelunan pinaa' nah, penika néh réh, Iah peka'o kelunan éh sakit.
15Sioo' dau tahup inah, irah éh bakéh Yésus nah tuai tavin éh. Ka' ha' réh ngan néh, Tahup dau tam teu' dat, bé' pu'un ineu'-ineu' siteu' jalan réh omok pitah penguman réh. Jian Ke' nyohoo' réh moléé' ke' réh omok tai leboo' melih penguman réh jin irah, ha' réh.
16Ha' Yésus mipa réh, Bé' makat Akeu' juk nyohoo' réh moléé', jian ka'ah mena' penguman réh, ha' néh.
17Ha' irah bakéh néh améé' pu'un, lemah awah roti ngan duah de' ke' usah seluang ha' réh.
18Ha' Yésus ngan réh, Jian keh mena' roti ngan seluang inah ngan ké', ha' néh. 19Boh éh nyohoo' irah pinaa' nah menyun, ngan Iah alaa' lemah roti ngan duah seluang iri' ngan Iah kepuh tai langit sebayang bara' jian kenin tong ka'an inah. La'o inah Iah mutip éh ke' néh mena' éh ngan irah bakéh néh, boh irah petulat éh ngan irah pinaa' nah. 20Irah kelunan pinaa' nah kuman pah avéé' réh beso. La'o réh kuman irah bakéh Yésus nah tipun kekat la'an éh uban kinan réh nah, penoo' jah poloo' duah gaweng neu' néh. 21La'ah kekat irah éh kuman nah lemah ibu irah éh lakei' awah, ngan pu'un irah redo ngan anak kepéh.
Tong Tuhan Yésus lakau bau baa'
(Mrk. 6:45-52, Yoh. 6:15-21)
22La'o inah Yésus nyohoo' irah bakéh néh tai lem alut tai papit baa' Banget inah saa' tenah, ngan Iah nyohoo' irah pinaa' nah tai moléé'. 23La'o réh moléé', Yésus lakau tengéé' tai jah tokong ke' néh sebayang. Avéé' dau tahup Iah tengéé' mokoo' sinah. 24La'ah irah bakéh néh lepah memesai juu' jin dirin baa' ngan pu'un lipak ja'au tong réh neu' kepu. 25Tovoo' dau danii' rema Yésus lakau bau baa' inah tavin alut réh nah. 26Hun inah bakéh Néh na'at éh lakau bau baa' nah medai réh, beru'en ine' ha' réh ngeradau réh Medai éh.
27Yésus tioo pané ngan réh, Mai keh medai, Akeu' itut de', ha' néh.
28Boh Péterus pané ngan néh, O Tuhan, hun néh Ka'au' mu'un, jian ke' nyohoo' akeu' jalan bau baa' iteu' tavin ke', ha' néh.
29Boh Yésus bara' ngan néh, Tuai ke', ha' néh. Péterus tioo tuhun jin alut lakau bau baa' tavin Yésus. 30Bang hun iah nesen kepu pu'un gahang, medai éh, tioo menyet éh. Iah ngeradau, O Tuhan, ko' alaa' ku', ha' néh.
31Pelapah Yésus nyelaka' ojoo' néh ke' néh ngamit éh, ka' ha' néh, Si'ik awah pengelan ko', kineu' ke' bé' ngelan mu'un, ha' néh.
32Boh rawah tai lem alut ngan kepu nah pawah kepéh. 33La'ah irah bakéh Yésus éh pu'un lem alut nah seva' Yésus. Ka' ha' réh, Adang Ka'au' Anak Allah, ha' réh.
Tong Tuhan Yésus peka'o kelunan sakit
(Mrk. 6:53-56)
34La'o réh papit baa' Banget nah, avéé' réh tong tana' Genesaret, 35hun irah tong tana' inah na'at Yésus kejam réh éh iah. Irah tioo tebai kekat kelunan éh sakit jin tutuh tana' inah ngan mihin réh tavin Yésus. 36Gahang mu'un kenin réh menyat éh kejeraa' kelunan sakit ngejeming sapét tapak livah pakai Néh. La'ah kekat kelunan éh ngejeming tapak livah pakai Néh nah, ma'o réh jin kesakit réh.
Markert nå:
MATIUS 14: PNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
