MATIUS 15
15
Tong ha' tebaraa' pohoo' tepun réh
(Mrk. 7:1-13)
1La'ah pu'un kuraa' irah éh kivu adet Parisi ngan irah guru éh nebaraa' tong sohoo' lem Surat Musa, tuai jin Yérusalem tavin Yésus. Ka' ha' réh neteng Yésus, 2Kineu' bakéh ko' bé' kivu kekat adet ngan ha' tebaraa' jin tepun mé'. Bé' réh kivu adet mé' tong mé' pohéé' ojoo' mé' teka mé' kuman, ha' réh.
3Ha' Yésus mipa réh, Uban ineu' keh ngelapah tong sohoo' Allah ngan kivu kekat adet ka'ah ke' awah, 4#Kel. 20:12, 21:17, Ula. 5:16, Ima. 20:9 Uban ka' ha' Allah, Jian ke' ngerera' tong tamen tinen ko'. Jah ha' Allah kepéh, séé'-séé' éh pané ngesa'at tamen tinen néh, jian mematai éh, ha' néh. 5Bang ka'ah nebaraa' kelunan ka', hun néh pu'un ineu'-ineu' ke' néh omok nolong tamen tinen néh bang hun néh bara' ka', Bé' akeu' mena' iteu' ngan ko' uban néh anah Allah, 6neu' keh nebaraa' kelunan pané kenat, inah maneu' réh bé' ngerera' tong tamen tinen réh. Inah keh bet sohoo' Allah ngan kivu ha' tebaraa' ka'ah ke'. 7Adang keh kelunan éh ngelayoo' sebayang. Teneng mu'un ha' nabi Yesaya tong éh benara' néh tong ka'ah, ka' ha' Yesaya nah,
8Inah ha' éh benara' Allah, Pohoo' kelunan iteu' seva' Akeu' palaa' ha' ujun réh awah,
bang kenin réh juu' jin Akeu'.
9 #
Yes. 29:13
Tuyah-tuyah awah réh seva' Akeu',
uban réh bara' tong ha' tebaraa' éh jin kelunan awah
pekua' barei' éh ha' Ké' mu'un, bang bé' éh ha' Ké', ha' Allah nah.
Tong kekat jalan éh omok ngesa'at kenin kelunan
(Mrk. 7:14-23)
10Boh Yésus tebai kelunan pinaa' ke' néh bara' ngan réh, Jian keh menéng ngan nesen. 11Bé' pu'un ineu'-ineu' éh jin kinan kelunan éh omok ngesa'at kenin néh, bang kekat éh musit jin kenin kelunan, inah éh ngesa'at kenin néh, ha' néh.
12Boh irah bakéh Yésus tuai tavin éh kepéh, ka' ha' réh, Sa'at kenin irah Parisi menéng ha' ko' iri' de', ha' réh.
13Ha' Yésus mipa réh, Siget-siget inan éh bé' nulah Tamen ké' éh tong seruga, adang réh mavut éh da'. 14#Luk. 6:39 Mai keh tusah seruh irah. Mu'un réh pengeja'au bang peseu' maten réh. Hun kelunan peseu' tupat majak bakéh néh éh peseu', rawah béé pata pelohoo' lem luvang, ha' néh.
15Boh Péterus neteng éh, Jian ke' bara' sin ha' tapan ko' inah ngan améé', ha' néh.
16Ha' Yésus ngan néh, Kineu' ke' to bé' nesen éh. 17Bé' ke' jam kekat-kekat éh kinan kelunan tai lem betuken néh awah éh, boh éh pelapah pega' kepéh. 18#Mat. 12:34 Bang kekat-kekat éh musit jin ujun néh, éh mu'un néh, inah éh musit jin kenin néh, kekat inah éh omok ngesa'at kenin néh. 19Uban jin dalem kenin néh inah jalan kekat penyeruh néh éh mihin éh tai mematai kelunan, ngan petuyang, bavah péh, ngan nekau, ngan kenyo, ngan pané ngesa'at ngaran kelunan péh. 20Kekat inah éh ngesa'at kenin kelunan. Bang hun keh kuman, na' péh keh bé' kivu kekat adet réh, bé' inah ngesa'at kenin keh, ha' néh.
Tong pengelan jah redo
(Mrk. 7:24-30)
21Lakau Yésus jin sinah tai tana' déhéé' leboo' Tirus ngan leboo' Sidon. 22La'ah tuai jah redo jin tana' Kana'an tavin éh. Ka' ha' redo inah ngan néh, O lakei' ja'au, Anak Daud, jian ke' pika akeu'. Anak ké' éh redo pu'un éh nasek balei', keta mu'un-mu'un éh neu' balei' inah, ha' néh.
23Bang bé' Yésus pané ineu'-ineu' ngan néh. Boh irah bakéh Yésus nah tai tavin éh ke' réh pané ngan néh, ha' réh, Jian ke' nyohoo' éh moléé', bé' mé' keloo' éh kivu tam ngan pané-pané kenat, ha' réh.
24Boh Yésus mipa ha' réh, ka' ha' néh, Tamen ké' nyohoo' Akeu' tai ngan irah domba éh tawang belah pohoo' Yahudi, bé' iah nyohoo' Akeu' tai ngan kelunan éh tengéé' pohoo', ha' néh.
25Hun redo inah menéng ha' néh pané kenat, redo inah tioo tai ngejekuu' lep néh déhéé' gem Yésus. Ka' ha' néh, O lakei' ja'au, jian ke' nolong akeu', ha' néh.
26Boh Yésus mipa ha' néh ka', Bé' tekep alaa' ka'an jin irah anak ngan mena' éh ngan aseu' awah, ha' néh.
27Ha' redo inah kepéh. O lakei' ja'au, teneng ha' ko' kenat, bang na' péh kenat aseu' éh pu'un éh kuman dek ngan moo' éh pelohoo' tovoo' réh kuman, ha' néh.
28Ha' Yésus mipa éh kepéh, O redo, ja'au mu'un pengelan ko', barei' éh keneloo' ko' tong anak ko' nah, pu'un éh kenat, ha' néh. Tovoo' Yésus pané kenat anak inah pu'un jian ngan ma'o.
Tong Yésus peka'o kelunan pinaa'
29Piso Yésus jin sinah lakau déhéé' baa' Banget Galilia. Tai éh bau jah tokong ngan mokoo' sinah. 30Pinaa' kelunan tuai tavin éh, pu'un réh mihin kelunan éh paket, ngan éh peseu', ngan éh matai keluhat, ngan éh mameng, ngan pu'un irah éh jah kepéh pinaa' arong-arong kesakit réh. Pu'un réh pokoo' réh déhéé' gem Yésus ngan Iah peka'o réh. 31Béé kenin kelunan pinaa' menéng ha' kelunan éh mameng nah omok pané, ngan na'at usah kelunan éh matai keluhat nah pu'un jian, ngan kelunan éh paket nah omok lakau ngan gahang, ngan kelunan éh peseu' nah pu'un ta'an kepéh. Pu'un réh mejing Allah éh kenelan kelunan Israel.
Tong Yésus pakan pat ibu kelunan
(Mrk. 8:1-10)
32La'ah Yésus tebai irah bakéh néh ke' néh bara' ngan réh, ka' ha' néh, Pika lah kelunan pinaa' nah, teleu' dau tenéh réh pu'un ngan Ké' siteu' ne', bé' pu'un ineu'-ineu' kinan réh. Bé' Ku' keloo' nyohoo' réh moléé' awah hun réh bé' sakui kuman dai réh tayen lem réh lakau, ha' néh.
33Boh irah bakéh néh neteng éh, ha' réh, Jin semah uleu' omok alaa' ka'an sukup kelu' pakan kelunan pinaa' iteu', bé' pu'un ineu'-ineu' siteu' ke' mé' omok pakan réh, uban tana' awah siteu', ha' réh.
34Ha' Yésus neteng irah kepéh, Kuraa' kekat roti éh pu'un ngan keh rii' ha' Néh.
Ha' réh, Tujuu' roti mé' ngan pu'un Kuraa' awah usah seluang siik ha' réh.
35Boh Yésus nyohoo' irah pinaa' nah menyun. 36Boh éh alaa' tujuu' roti inah ngan seluang nah, inah Iah sebayang bara' jian kenin ngan Allah, la'o inah Iah mutip éh ke' néh mena' éh ngan irah bakéh néh, irah bakéh néh petulat éh ngan irah pinaa' nah. 37Kekat irah pinaa' nah kuman pah avéé' réh beso. Irah bakéh Yésus nah nyemung kekat la'an uban kinan réh, tujuu' gaweng penoo' neu' néh. 38La'ah irah lakei' éh kuman nah pat ibu kekat réh ngan pu'un irah redo ngan irah anak kepéh.
39La'o inah Yésus nyohoo' kelunan pinaa' nah moléé', Iah tai lem alut lakau tai tana' Magadan.
Markert nå:
MATIUS 15: PNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
