MATIUS 12
12
Tebaraa' tong Dau Posot
(Mrk. 2:23-28, Luk. 6:1-5)
1 #
Ula. 23:25
La'ah bé' lebéé' la'o inah, tong jah Dau Posot, Yésus lakau ngelapah térék réh. La'ah uban irah bakéh néh la'au', irah nyepit lo'ong parai ke' réh kuman éh. 2Hun irah éh kivu adet Parisi na'at réh maneu' kenat, pu'un réh pané ngan Yésus, ka' ha' réh, Bé' tekep réh maneu' kenat tong Dau Posot, uban réh maneu' kenat inah irah pu'un ngelapah tong ukum tebaraa' améé', ha' réh.
3Ha' Yésus mipa réh, Kineu', bé' keh pu'un purung tong ineu' neu' Daud hun néh la'au' sahau rai? 4#1 Sam. 21:1-6 #Ima. 24:9 Daud ngan bakéh néh tai réh tong lamin Allah kuman roti éh nena' réh ngan Allah. Éh mu'un néh bé' tekep réh kuman éh, irah imam awah éh omok kuman éh. 5#Bil. 28:9-10 La'ah bé' keh pu'un purung lem Surat Musa tong imam éh maneu' kereja' Tuhan? Siget Dau Posot pu'un irah ngelapah tong éh bé' tekep naneu' réh' tong Dau Posot bang bé' réh sala'. 6Akeu' bara' ngan keh, pu'un éh pelapah jian jin Umaa' Allah. 7#Mat. 9:13, Hos. 6:6 Inah éh, hun keh nesen tong ha' lem surat Allah éh bara' ka', Bé' Akeu' keloo' keh mematai ka'an dokoo' keh seva' Akeu', bang Akeu' keloo' keh pika ngan masi kelunan, kenat ha' lem surat Allah, ngan hun keh nesen éh mu'un bé' keh pesala' kelunan éh bé' maneu' penyala'. 8Uban Anak Kelunan pu'un penyukat bara' tong éh tekep naneu' tong Dau Posot, ha' Yésus nah.
Tong kelunan éh paket ojoo' jebila'
(Mrk. 3:1-6, Luk. 6:6-11)
9La'ah lakau Yésus jin sinah tai lem jah lamin sebayang Yahudi. 10Tong lamin sebayang inah pu'un jah kelunan éh paket ojoo' jebila'. La'ah pu'un kuraa' kelunan sinah éh juk pesala' Yésus, inah irah neteng éh, ka' ha' réh, Kineu', omok lu' peka'o kelunan sakit tong Dau Posot da'? Kineu', bé' lu' ngelapah tong ukum tebaraa' lu' nah da', ha' réh.
11 #
Luk. 14:5
Ha' Yésus mipa réh, Kineu' ka'ah éh pu'un molong domba, hun domba nah pelohoo' lem luvang éh dilem tong Dau Posot, bé' keh tai alaa' éh kei? 12Kelunan pelapah jian éh jin domba nah. Hun néh kenat adang ukum tebaraa' lu' kejeraa' lu' nolong kelunan tong Dau Posot, ha' néh. 13Boh Iah pané ngan kelunan éh paket ojoo' nah, Jian ke' pejat ojoo' ko', ha' néh.
Tioo iah pejat ojoo' néh kenat, tioo ojoo' néh pu'un jian kepéh barei' éh jebila' nah. 14Musit lah kelunan Parisi nah tioo peteteng pitah jalan ke' réh omok mematai Yésus.
Tong kelunan sohoo' éh kevéléé' Allah
15Hun Yésus jam irah juk mematai éh, piso éh jin sinah. Pinaa' kelunan kivu éh. Pu'un éh peka'o kekat kelunan éh sakit, 16ngan iah meta' réh bara' Iah ngan irah éh jah, 17ke' néh pesukup ha' éh benara' nabi Yesaya. Ka' ha' Yesaya nah,
18Ka' ha' Allah, Iteu' néh kelunan sohoo' Ké' éh lepah kevéléé' Ké'
Murung Ku' tong Iah, ngan payoo' kenin Ké' tong néh.
Akeu' juk mena' Sahéé' Ké' ngan néh
ngan Iah juk bara' ukum Ké' ngan kekat kelunan.
19Bé' Iah pepaneu' ngan kelunan.
Bé' Iah pané ngan ja'au ha' mugun kelunan éh lakau tong jalan ja'au.
20Bé' Iah juk memutui bahang éh madaa',
ngan bé' Iah juk memata' ada titui éh bilep-bilep ke' awah,
avéé' Iah nyopéé' kekat éh sa'at ngan mihin kekat éh jian ngan teneng omok pengeja'au réh kepéh.
21 #
Yes. 42:1-4
Avéé' kekat arong kelunan pu'un ngelan tong Iah, ha' néh.
Tong Yésus ngan balei' Beelsebul
(Mrk. 3:20-30, Luk. 11:14-23)
22La'ah pu'un kelunan mihin jah kelunan tavin Yésus. Kelunan inah peseu' maten ngan mameng uban néh nasek balei'. La'ah pu'un Yésus peka'o kelunan inah, omok éh pané ngan omok éh na'at. 23Béé kenin kelunan pinaa' nah. Ka' ha' réh, séé' énéh ke' néh omok maneu' kenat, barang iah éh Anak Daud éh pejajii' Tuhan, ha' réh.
24 #
Mat. 9:34, 10:25 Hun irah éh kivu adet Parisi menéng ha' réh pané kenat, irah tioo bara' ka', Iah mega' balei' neu' kerenget Beelsebul éh pengeja'au balei', ha' réh.
25La'ah Yésus jam kenin réh pané kenat, Iah bara' ngan réh ka', Hun pu'un kelunan tong jah tana' pekelawan belah irah ke', adang kekat irah inah béé pu'un matai. Kenat péh hun pu'un kelunan tong jah leboo' pekelawan belah irah ke', bé' réh pu'un leboo' kepéh. Kenat péh hun kelunan tong jah lamin pekelawan. 26Kenat éh hun irah éh tong kamit Sitan pata pekelawan inah éh pepoléng réh bé' pekua' kenin, inah éh barei' Sitan pata pekelawan ngan Sitan ke'. Hun néh kenat bé' éh omok pengeja'au. 27Ka'ah bara' Akeu' bet balei' neu' kerenget Beelsebul. Hun néh kenat neu' kerenget ineu' irah éh kivu keh bet balei'? Hun keh seruh réh bet éh neu' kerenget balei', adang réh bara' keh sala', uban bé' réh bet éh neu' kerenget balei'. 28Hun Ké' bet balei' Akeu' bet éh neu' penyukat Sahéé' Tuhan, inah éh nelana' Allah pu'un belah keh ke' néh Pengeja'au, ha' néh.
29Ha' Yésus kepéh, Bé' kelunan omok masek lem lamin kelunan éh gahang ngan nyayoh alaa' livah néh hun usah néh bé' kejeret néh tenah. La'o néh kejeret néh boh éh omok alaa' livah tong lamin néh, ha' néh.
30 #
Mrk. 9:40
Ha' Yésus kepéh, Kelunan éh bé' ngebakéh Akeu', seleket néh ayau Ké'. Kelunan éh bé' nolong Akeu' pitah kelunan éh tawang, seleket néh pepurat réh awah. 31Kenat péh Akeu' bara' ngan keh, penyala' ineu'-ineu' éh neu' kelunan, kenat péh tong ha' ané réh éh sa'at, omok Tuhan mega' éh, bang séé'-séé' éh pesalut Sahéé' Ni'ai, bé' penyala' néh inah omok pega'. 32#Luk. 12:10 Séé'-séé' éh pané pesalut Anak Kelunan, omok penyala' néh inah pega', bang séé'-séé' éh pané muau Sahéé' Ni'ai, bé' penyala' néh inah omok pega', lem urip néh hun iteu' kenat péh pah avéé' néh matai, ha' Yésus ngan réh.
Ha' tapan tong jah inan kayeu' buaa'
(Luk. 6:43-45)
33 #
Mat. 7:20, Luk. 6:44 La'ah ha' Yésus kepéh, Hun keh juk alaa' buaa' éh jian ngan méé, adang keh pitah inan éh jian, hun inan néh bé' jian, bé' éh omok ngebuaa' ngan buaa' éh méé. Uban siget-siget inan kayeu' uleu' jam éh hun néh jian ngan bé' péh naneu' buaa' néh. 34#Mat. 3:7, 23:33, Luk. 3:7, 6:45 O ka'ah éh pohoo' anak torok, kineu' keh seruh keh omok pané jian hun kenin keh sa'at awah? Uban barei' kenin lu', kenat péh ha' ané lu'. 35Kelunan éh jian pu'un iah alaa' kekat éh jian jin kekat éh nodoo' néh lem kenin néh éh jian, kelunan éh sa'at iah alaa' kekat éh sa'at jin kekat éh nodoo' néh lem kenin néh éh sa'at, ha' néh.
36Ha' Yésus kepéh, Akeu' bara' ngan keh, tong Dau Tuhan ngukum kelunan, siget-siget usah péh kenukum néh tong siget-siget ha' ané réh éh ulak pané awah-awah. 37Uban neu' kekat ha' ané keh inah jalan néh pu'un ngukum keh, uban neu' ha' ané keh inah éh pepoléng hun kenin keh pu'un teneng ngan hun néh sa'at péh, ha' Yésus ngan réh.
Tong irah nyohoo' Yésus maneu' telana' ja'au
(Mrk. 8:11-12, Luk. 11:29-32)
38 #
Mat. 16:1, Mrk. 8:11, Luk. 11:16 Boh irah éh nebaraa' tong Surat Musa ngan irah éh kivu adet Parisi pané ngan Yésus. Ka' ha' réh, O Guru, jian Ke' maneu' jah telana' éh ja'au, ke' mé' omok na'at éh da', ha' réh ngan néh.
39 #
Mat. 16:4, Mrk. 8:12 Ha' Yésus kepéh, Sa'at mu'un pohoo' kelunan iteu', bé' réh petem lem pengelan réh tong Tuhan. Pu'un keh nyohoo' Akeu' maneu' jah telana' ja'au, bé' Akeu' maneu' éh dat. Jah awah telana' éh ja'au éh omok ta'an keh éh barei' tong nabi Yunus sahau rai. 40#Yun. 1:17 Barei' Yunus nah pu'un lem boré seluang ja'au teleu' dau ngan teleu' merem kelebéé', kenat péh Anak Kelunan kepéh juk pu'un lem tana' mu'un teleu' dau ngan teleu' merem kelebéé'. 41#12:41, Yun. 3:5 Tong Dau Tuhan juk ngukum kekat kelunan, irah jin leboo' Niniwé juk nekedéng ngan bara' keh sala', uban hun Yunus bara' ha' Tuhan ngan réh pu'un réh piso jin penyala' réh. La'ah pu'un éh pelapah jian ngan pelapah ja'au jin Yunus nah siteu'. 42#1 Raj. 10:1-10, 2 Taw. 9:1-12 Kenat éh kepéh tong Dau Tuhan juk ngukum kekat kelunan, redo éh Raja' irah tong tana' Syeba, iah pu'un nekedéng ngan bara' keh sala'. Redo inah pu'un éh lakau jin tana' éh juu' mu'un ke' néh menéng ha' tebaraa' éh benara' Raja' Salomo sahau rai, uban Raja' Salomo nah jam éh seruh. La'ah pu'un éh pelapah jian ngan pelapah ja'au jin Salomo nah siteu', ha' Yésus ngan réh.
Tong jah balei' moléé' tong lamin néh bu'un
(Luk. 11:24-26)
43Ha' Yésus kepéh, La'o balei' pega' jin kelunan, lakau éh tong tana' éh bé' pu'un baa' ke' néh pitah jalan néh mokoo'. Hun néh bé' pu'un jalan mokoo', 44boh éh seruh lem kenin néh, Jian ku' moléé' tai lamin ké' bu'un ri', kelem néh. Boh éh moléé' kepéh. Iah jam lamin néh inah usan awah bé' pu'un séé' mokoo' tong néh, jian lamin inah, lepah petenup réh tenéh éh. 45Boh éh mihin tujuu' balei' éh jah kepéh éh pelapah sa'at jin iah ke' néh alaa' réh mokoo' ngan néh tong lamin inah. La'ah kelunan éh jalan balei' inah, ga' néh pelapah sa'at jin bu'un néh ri'. Barei' inah péh tong pohoo' kelunan éh sa'at éh pu'un hun iteu', ga' réh pelapah sa'at jin bu'un réh, ha' Yésus ngan réh.
Tong irah éh tinen ngan padéé' Yésus
(Mrk. 3:31-35, Luk. 8:19-21)
46La'ah lem Yésus to pané ngan irah inah, tuai tinen Néh ngan padéé' Néh juk tavin éh. Pu'un réh nekedéng saa' usit lamin juk pané ngan Néh. 47La'ah pu'un jah kelunan bara' ngan Yésus, ha' néh, Pu'un tinen ngan padéé' Ko' tong usit sinah ne' juk pané ngan Ko', ha' néh ngan Yésus.
48Ha' Yésus mipa éh, séé' éh tinen Ké' ngan padéé' Ké', ha' néh. 49Boh éh nojoo' irah bakéh néh, ka' ha' néh, Inah éh tinen ngan padéé' Ké' mu'un, 50uban séé'-séé' éh kivu pengeloo' Tamen Ké' tong seruga, kelunan inah éh padéé' Ké' jian péh éh lakei' ngan jian péh éh padéé' Ké' redo kenat péh éh tinen Ké', ha' Yésus ngan réh.
Markert nå:
MATIUS 12: PNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
