MATIUS 11
11
Kelunan éh tuai sohoo' Yohanes Batis
(Luk. 7:18-35)
1La'o Yésus bara' kekat tebaraa' néh inah ngan irah bakéh Néh éh jah poloo' duah usah nah peleka Éh jin sinah tai kuraa' leboo' déhéé' sinah ke' néh nebaraa' ngan petena' réh. 2La'ah tovoo' inah Yohanes Batis pu'un tong lamin tutup, hun Yohanes menéng rengah tong kekat penganeu' Kristus, iah nyohoo' kuraa' bakéh néh éh kivu éh, tai neteng éh. 3Ka' ha' réh ngan Yésus, Jian ke' bara' ke' ngan améé', séé' ke', ka'au' éh Kristus éh pejajii' Allah juk tuai rai? Kineu', tekep mé' mena kelunan éh jah kepéh, ha' réh.
4Ha' Yésus mipa réh, Jian keh moléé' tai bara' ngan Yohanes tong kekat éh nenéng keh ngan éh ta'an keh siteu' ri'. 5#Yes. 35:5-6, 61:1 Jian keh bara' ngan néh, kelunan éh peseu' omok réh na'at kepéh, irah éh paket omok réh lakau kepéh, irah éh kapéé' pu'un réh ma'o ngan lanyah kulit réh kepéh, irah éh rengen omok réh menéng kepéh, irah éh lepah matai omok réh murip kepéh, ngan Rengah Jian jin Allah benara' néh ngan kelunan kari. 6Murung kenin kelunan éh bé' kurang pengelan tong Akeu', ha' Yésus nah.
7La'o irah éh bakéh Yohanes nah moléé', boh Yésus pané ngan kelunan pinaa' bara' tong Yohanes nah. Ka' ha' néh, Hun keh tai tavin Yohanes tong ahang tana' rai, kineu' éh seneruh keh éh juk ta'an keh? Kineu', bahang éh gusii' neu' kepu éh kei? 8Kineu' éh juk ta'an keh, kelunan éh memakai pakai éh jian mu'un? Kelunan éh memakai pakai kenat, irah mokoo' awah tong umaa' raja'. 9Bang ineu' éh juk ta'an keh mu'un? Jah nabi Tuhan kei? Oo' mu'un pu'un keh lepah na'at jah kelunan éh nabi Tuhan, bang inah Akeu' bara' ngan keh, iah éh ta'an keh nah iah éh pelapah ja'au jin kekat nabi Tuhan. 10Uban Yohanes Batis nah, iah néh éh benara' lem surat Allah ka', Ha' Allah bara', Iteu' éh lawah Ké', Akeu' juk nyohoo' éh tai saa' tenah Ko' ke' néh petenup jalan Ko', kenat ha' lem surat Allah. 11La'ah ka' ha' Yésus, Akeu' bara' ngan keh, bé' pu'un kelunan séé'-séé' tong tana' éh pelapah ja'au ngaran jin Yohanes Batis nah, bang na' péh kenat, belah kelunan éh lem nihau Allah hun néh tuai Pengeja'au, kelunan éh ra' mu'un iah pu'un pelapah ja'au jin Yohanes nah. 12Jin bu'un Yohanes Batis tuai rai pah avéé' dau iteu' péh, mekat mu'un kelunan ngelawan irah éh juk tai lem Pengihau Allah. 13#Luk. 16:16 Kenat péh ha' lem Surat Musa ngan kekat surat irah nabi Tuhan sahau, pah avéé' Yohanes nah tuai, kekat réh béé pu'un bara' tong Pengihau Allah. 14#Mal. 4:5, Mat. 17:10-13, Mrk. 9:11-13 Ngan hun keh juk ngelan ha' tebaraa' réh, Yohanes nah inah éh Elia éh benara' réh juk tuai saa' tenah teka dau savéé' Allah Pengeja'au ngan mihau kekat kelunan. 15Hun keh pu'un kelingen omok menéng, jian keh nesen ha' ké' iteu', ha' Yésus ngan réh.
16Ha' Yésus kepéh, Ineu' jalan Ké' pepata tong pohoo' urip kelunan, ineu' éh ké' tapan tong réh da'? Irah barei' anak éh seminga' tong jalan pebelih, ha' jelua' réh pané ngan bakéh néh, ka' ha' néh, 17Améé' lepah ngeloréé barei' irah tong kawin bang bé' keh sayau. Améé' pu'un nirau barei' hun kelunan matai bang bé' keh mangaa', bé' ka'ah keloo' pemung seminga' ngan améé', ha' jelua' irah anak nah. 18Barei'-okoo' irah anak nah, kenat péh ka'ah. Yohanes Batis nah lepah tuai ngelayau éh kelaset awah, ngan bé' éh mesep baa' agun, boh ka'ah bara' iah kelunan palui awah. 19La'ah Anak Kelunan, pu'un kuman ngan pu'un mesep, boh ka'ah bara', Na'at kelunan inah, iah kuman nyahan ngan mesep baa' agun ngan pebakéh ngan kelunan éh alaa' sukai ngan kelunan penyala', ha' keh. Bang pengejam éh jin Allah adang irah pepoléng pengejam inah pu'un éh teneng, ha' Yésus ngan réh.
Tong leboo éh bé' ngelan tong Yésus
(Luk. 10:13-15)
20La'ah Yésus pané maneu' kelunan tong kuraa' leboo' éh jalan néh maneu' kuraa'-kuraa' telana' néh, uban na' péh réh na'at telana' néh kenat, bé' réh piso jin penyala' réh. 21#Yes. 23:1-18, Yeh. 26:1—28:26, Yol. 3:4-8, Amo. 1:9-10, Sak. 9:2-4 Ka' ha' Yésus maneu' réh, Tusah mu'un ka'ah éh tong leboo' Kurasin. Kenat péh ka'ah éh tong leboo' Betsaida. Uban pinaa' arong telana' ké' belah keh rai, hun Ké' pu'un maneu' kekat telana' kenat tong leboo' Tirus ngan Sidon, adang irah pu'un piso jin penyala' réh ngan mokoo' petem pakai talun ngan mena' aveu' tong ulun réh dokoo' pepoléng irah pu'un piso jin penyala' réh tenéh. 22Akeu' bara' mu'un ngan keh, Tong dau Tuhan ngukum kelunan, pelapah ja'au penika Néh ngan irah tong leboo' Tirus ngan Sidon, jin penika Néh ngan ka'ah. 23#Yes. 14:13-15, Kej. 19:24-28 Ngan ka'ah éh tong leboo' Kapernaum, kineu', pu'un keh seruh neu' pengejian keh tengéé' omok keh tai seruga? Bé' keh omok kenat. Ka'ah nebet Tuhan tong luten meraka awah. Uban hun Ké' pu'un maneu' telana' éh ja'au kenat tong leboo' Sodom, barei' éh neu' Ké' tong leboo' keh iteu', adang réh pu'un piso jin penyala' réh ngan bé' leboo' réh kenebéé Tuhan. 24#Mat. 10:15, Luk. 10:12 Akeu' bara' mu'un ngan keh, Tong dau Tuhan ngukum kelunan, pelapah ja'au penika Néh ngan irah tong leboo' Sodom, jin penika Néh ngan ka'ah iteu', ha' Yésus ngan réh.
Tong Yésus tebai kelunan éh bii' bahat tavin éh
(Luk. 10:21-22)
25La'ah tovoo' inah Yésus sebayang, ka' ha' néh, O Amam, éh Tuhan tong langit ngan tong tana' péh, Akeu' bara' jian kenin ngan Ko' uban kekat éh nelim Ko' jin irah éh pu'un pengejam, pu'un Ke' pepoléng éh ngan irah éh bé' jam seruh éh barei' anak awah. 26O Amam, pu'un Ke' maneu' éh kenat kivu pengeloo' ngan penika Ko' awah, ha' néh.
27 #
Yoh. 1:18, 3:35, 10:15 La'ah ha' Yésus kepéh, Pu'un Tamen Ké' lepah mena' kekat ineu'-ineu' ngan Ké'. Bé' pu'un séé'-séé' éh jam Akeu' éh Anak Néh, bang Tamen Ké' awah éh jam Akeu' Anak néh. Ngan bé' pu'un séé'-séé' éh jam Tamen Ké', bang Akeu' éh Anak Néh awah éh jam éh, ngan irah éh jah éh keneloo' Ké' pepoléng éh ngan réh, irah awah éh jam éh, ha' néh.
28Tuai tavin Akeu' kekat ka'ah éh mutau bii' bahat, Akeu' omok bet éh bahat nebii' keh nah. 29#Yer. 6:16 Jian keh Kivu sohoo' Ké' ngan alaa' ha' tebaraa' Ké' uban Akeu' dawai Kenin ngan diva' Kenin boh keh bé' pu'un bii' éh bahat kepéh. 30Uban éh nebii' Ké', lumang bii' éh, bé' éh bahat ha' Yésus ngan réh.
Markert nå:
MATIUS 11: PNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
