MATIUS 10
10
Tong jah poloo' duah usah lawah Tuhan
(Mrk. 3:13-19, Luk. 6:12-16)
1La'ah Yésus tebai jah poloo' duah usah bakéh néh ke' néh mena' penyukat ngan réh ke' réh omok bet balei' ngan peka'o kelunan jin pinaa' arong kesakit. 2La'ah ngaran kekat bakéh Néh éh kevéléé' Néh nah, inah éh, Simon, éh nateng réh kepéh Péterus, ngan padéé' usah néh Anderias, inah kepéh Yakub rawah Yohanes éh anak Sabedeus, 3ngan Pilipus, ngan Bartolomeus, ngan Tomas, ngan Matius éh kereja' alaa' sukai rai, ngan Yakub anak Alpeus, ngan Tadius, 4ngan Simon kelunan Selot, ngan inah kepéh Yudas Iskariot éh memalo Yésus rai.
Tong sohoo' Yésus ngan irah jah poloo' duah usah nah
(Mrk. 6:7-13, Luk. 9:1-6)
5La'ah Yésus nyohoo' irah jah poloo' duah usah nah lakau, ka' ha' néh ngan réh, Mai keh tai tana' irah éh tengéé' pohoo' jin irah Yahudi, ngan mai keh tai leboo' irah Samaria. 6Bang jian keh tai ngan kekat pohoo' Yahudi éh barei' domba éh tawang nah. 7Jian keh bara' ngan réh ka', Danii' jaka' Allah pengeja'au ngan mihau keh, ha' keh ngan réh. 8Jian keh peka'o kelunan éh sakit ngan purip irah éh matai, ngan Peka'o irah éh Sakit Kapéé', ngan bet kekat balei'. Pu'un Tuhan mena' penyukat néh ngan keh, bé' éh nelih keh, kenat péh jian keh pika réh, mai keh menyat ineu'-ineu' jin réh kepéh. 9Mai keh mihin rigit mas ngan pirek ngan temagaa' lem bék keh. 10Mai keh menyat ineu'-ineu' jin kelunan. Mai keh alaa' kerayung keh duah, kenat péh kasut ngan sekot keh. Uban hun kelunan kereja' tekep iah alaa' kekat éh juk penakai néh jin irah éh tenavin néh, ha' néh.
11Ha' Yésus kepéh, La'ah hun keh avéé' barang tong jah leboo' ja'au péh, barang tong leboo' éh kerat péh, jian keh ngelava na'at réh, séé' éh keloo' alaa' keh, tong irah inah keh mokoo' pah avéé' keh peleka jin sinah kepéh. 12Hun keh masek tong lamin réh, jian keh bara' ka' jian Pengepawah pu'un ngan réh. 13Hun irah tong lamin inah jian kenin alaa' keh, jian éh kejian kenin keh inah pu'un pemung ngan irah. Bang hun irah bé' keloo' alaa' keh ngan jian kenin, kejian kenin keh inah moléé' ngan ka'ah ke' kepéh. 14#Peng. 13:51 La'ah séé'-séé' éh bé' keloo' alaa' keh ngan bé' keloo' menéng ha' keh, jian keh piso jin irah ngan nepaga' agaa' tana' éh nyalit tong gem keh. 15#Luk. 10:4-12 #Mat. 11:24, Kej. 19:24-28 Akeu' bara' mu'un ngan keh, tovoo' dau Tuhan ngukum kelunan, pelapah ja'au penika Tuhan ngan irah tong tana' Sodom ngan Gomora jin kelunan éh tong leboo' inah éh bé' keloo' alaa' keh, ha' néh.
Tong Yésus bara' tong pengeketa kelunan Kristén
(Mrk. 13:9-13, Luk. 21:12-17)
16 #
Luk. 10:3
Ha' Yésus kepéh, Jian keh seruh jian-jian, Akeu' nyohoo' ka'ah tai barei'-okoo' domba belah bekuleu'. Uban néh kenat jian keh mesenah barei'-okoo' torok ngan dawai kenin keh barei' juhit punai. 17Mavaa' keh jian-jian, adang irah ngamit keh ngan mihin keh tavin pengeja'au tong lamin besara', ngan mipok keh tong lamin sebayang Yahudi. 18Adang réh pu'un mihin keh tai besara' tong jumen raja' ngan pengeja'au uban keh ngelan tong Akeu', inah éh dokoo' keh omok bara' Rengah Jian ngan irah kepéh, kenat péh ngan irah éh tengéé' pohoo' jin irah Yahudi. 19Bang hun réh mihin keh tai besara' kenat, mai keh medai seruh kineu' jalan keh omok mipa ha' réh da'. Uban tovoo' réh mihin keh tai besara' da', tovoo' inah péh pu'un éh bara' dalem kenin keh tong éh tekep keh pané ngan réh da'. 20#Mrk. 13:9-11, Luk. 12:11-12, 21:12-15 Uban bé' éh ka'ah tengéé' éh pané, bang Sahéé' éh jin Tamen keh, inah éh pané dalem kenin keh, ha' néh.
21 #
Mrk. 13:12, Luk. 21:16 Ha' néh kepéh, La'ah kelunan éh pepadéé' juk mena' padéé' néh ngan réh ke' réh mematai éh, kenat péh tamen mena' anak néh, kenat péh anak tong tamen tinen néh ke' réh mematai éh. 22#Mat. 24:9, 13, Mrk. 13:13, Luk. 21:17 La'ah adang ka'ah keleko kekat kelunan pinaa' uban pengelan keh tong Akeu', bang séé' éh ngeretep pah avéé' ga' néh iah omok alaa' urip. 23Hun irah tong jah tana' peketa keh, kelap keh tai tana' éh jah kepéh. Akeu' bara' ngan keh, bé' jak keh ma'o maneu' kereja' keh tong siget leboo' tong tana' irah Yahudi, pu'un Anak Kelunan tuai kepéh, ha' néh.
24 #
Luk. 6:40, Yoh. 13:10, 15:20 Ha' néh kepéh, Kelunan éh pekalai bé' éh pelapah ja'au jin guru néh, kenat péh kelunan ripen, bé' éh pelapah ja'au jin pengeja'au néh. 25#Mat. 9:34, 12:24, Mrk. 3:22, Luk. 11:15 Jian kelunan éh pekalai nah sukup kenin hun néh omok jam barei' éh kejam guru néh nah. Kenat péh tong kelunan ripen hun néh omok pekua' barei' pengeja'au néh kepéh. Hun néh pengeja'au tong lamin nateng réh balei' Beelsebul, makin péh la'ah kekat irah éh tong lamin néh pelapah sa'at ngaran réh jin inah kepéh, ha' néh.
Tekep lu' medai Tuhan Allah
(Luk. 12:2-7)
26 #
Mrk. 4:22, Luk. 8:17 Ha' Yésus kepéh, Uban néh kenat mai keh medai kelunan. Uban ineu'-ineu' éh pelim adang néh juk poléng kepéh, ngan ineu'-ineu' éh nelim adang néh pu'un benara' kepéh. 27Ineu'-ineu' éh benara' Ké' ngan keh dalem merem, jian keh bara' éh kepéh dalem rema. Kenat péh ineu'-ineu' éh benara' Ké' ngan keh tengéé', jian keh bara' éh ngan kekat kelunan kepéh. 28Mai keh medai tong kelunan éh mematai usah keh éh bé' pu'un penyukat mematai sahéé' keh. Bang jian keh medai tong Allah éh pu'un penyukat kebéé usah keh ngan sahéé' keh dalem luten meraka. 29Omok kelunan melih duah usah juhit parai palaa' jah tasap sin awah. Bang na' péh éh kenat kemurah, bé' pu'un jah juhit pelohoo' tong tana' hun néh bé' lem pengeloo' Tamen keh. 30La'ah kekat ihat bok keh lepah penurung néh béé. 31Uban néh kenat mai keh medai, uban ka'ah éh pelapah jian jin kekat juhit nah, ha' néh.
Tong lu' ngakun pengelan lu' tong Kristus
(Luk. 12:8-9)
32Séé-Séé éh ngakun pengelan néh tong Akeu' tong jumen kelunan Akeu' péh ngakun bara' iah tong jumen Tamen ké' tong seruga. 33#2 Tim. 2:12 Bang séé-séé éh ngaken bara' iah' bé' jam Akeu' tong Jumen kelunan, Akeu' péh ngaken bara' Akeu' bé' jam iah tong jumen Tamen ké' tong seruga.
Tong pawah ngan tong Po'é
(Luk. 12:51-53, 14:26-27)
34Ha' Yésus kepéh, Mai keh seruh Akeu' tuai mihin kelunan tunuk tong tana' iteu', bé' Akeu' tuai dokoo' mihin kelunan tunuk bang po'é. 35Uban Akeu' tuai dokoo' Ké' pepetat anak lakei' jin tamen néh, ngan pepetat anak redo jin tinen néh, ngan kivan redo jin kivan néh éh redo kepéh. 36#Mik. 7:6 Ngan kekat irah éh panak néh itong éh ayau néh mu'un, ha' néh.
37Ha' néh kepéh, séé'-séé' éh murung tamen tinen néh pelapah ja'au jin néh murung Akeu', bé' iah payoo' tong Akeu'. Ngan séé' éh murung anak néh lakei' ngan murung anak néh redo pelapah ja'au jin néh murung Akeu', bé' iah payoo' tong Akeu'. 38#Mat. 16:24, Mrk. 8:34, Luk. 9:23 Ngan séé'-séé' éh bé' alaa' salib néh ke' néh tuai kivu Akeu', bé' iah payoo' tong Akeu'. 39#Mat. 16:25, Mrk. 8:35, Luk. 9:24, 17:33, Yoh. 12:25 Kelunan éh seruh juk mihau urip néh tong tana' awah, tawang urip néh inah, kenat péh kekat pengeloo' néh kepéh. Bang kelunan éh bet kekat pengeloo' néh tengéé' ke' néh ngajung Akeu' dalem kekat penganeu' néh, kelunan inah éh omok murip mu'un, ha' néh.
Tong kelunan éh alaa' oléé' néh kepéh
(Mrk. 9:41)
40 #
Mrk. 9:37, Luk. 9:48, 10:16, Yoh. 13:20 Ha' Yésus kepéh, séé'-séé' éh alaa' ka'ah, inah éh alaa' Akeu', ngan séé'-séé' éh alaa' Akeu', inah éh alaa' Iah éh nyohoo' Akeu' tuai. 41Séé'-séé' éh alaa' jah kelunan éh sohoo' Tuhan uban pohoo' kereja' néh ngan Tuhan, iah ke' éh omok alaa' oléé' néh kepéh pekua' kelunan éh maneu' kereja' Tuhan nah. Séé' éh alaa' jah kelunan éh jian uban penganeu' néh pu'un jian, iah ke' éh omok alaa' oléé' néh kepéh pekua' ngan kelunan éh jian nah. 42Akeu' bara' mu'un ngan keh, séé'-séé' éh mena' baa' nesep ngan jah bakéh ké' éh si'ik ngaran jin kekat irah éh jah, na' péh éh baa' awa' awah, adang iah pu'un alaa' oléé' néh kepéh, ha' néh.
Markert nå:
MATIUS 10: PNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
