MATIUS 9

Tong Yésus peka'o kelunan éh matai keluhat

(Mrk. 2:1-12, Luk. 5:17-26)

1Tai Yésus lem alut kepéh, moléé' kedipa baa' Banget tai leboo' Néh tengéé'. 2Pu'un kelunan tuai tavin Éh mihin jah lakei' pegen tong bisan, kelunan éh matai keluhat. Hun Yésus jam tong pengelan réh kenat, boh éh pané ngan kelunan éh matai keluhat nah, ka' ha' néh. O anak Ké' ngereken kenin ko', penyala' ko' lepah pega', ha' néh.

3La'ah pu'un kuraa' guru éh nebaraa' tong sohoo' lem Surat Musa pané belah irah ke', ka' ha' réh, Sa'at mu'un ha' lakei' inah pané kenat iah pesalut Allah, ha' réh.

4Yésus jam kekat éh seneruh réh, la'ah ha' néh, Uban ineu' keh seruh sa'at éh kenat? 5Éh mah éh lumang bara', penyala' ko' lepah pega', ha' nah, kineu', Betéé' ke' ngan lakau, ha' nah. Éh mah éh lumang seneruh keh? 6Bang dokoo' ka'ah omok jam Anak Kelunan pu'un penyukat bet penyala', inah Iah pané kepéh ngan kelunan éh matai keluhat nah, ka' ha' néh, Betéé' ke' alaa' mak ko', moléé' ke', ha' néh.

7Pelapah kelunan inah betéé' tai moléé'. 8Hun irah pinaa' na'at éh kenat medai réh ngan irah mejing Allah uban Néh mena' penyukat Néh kenat ngan kelunan.

Yésus tebai Matius

(Mrk. 2:13-17, Luk. 5:27-32)

9Lakau Yésus piso jin sinah kepéh, tovoo' néh lakau nah Iah na'at jah kelunan éh alaa' sukai, ngaran néh Matius, iah mokoo' tong lamin éh jalan néh alaa' sukai. Ha' Yésus ngan néh, Jian ke' kivu Akeu', ha' néh.

Matius betéé' tioo tai kivu Yésus.

10 # Luk. 15:1, 2 La'ah tovoo' Yésus kuman tong lamin Matius, pu'un pinaa' kelunan éh jah éh alaa' sukai, ngan pu'un kelunan éh jah éh keleko kelunan péh, tuai kuman pemung ngan Yésus ngan irah bakéh Néh. 11Hun irah Parisi na'at éh kenat boh irah pané ngan irah bakéh Yésus, ha' réh, Uban ineu' guru keh nah kuman ngan kelunan éh alaa' sukai ngan irah éh sa'at ha' réh?

12Yésus menéng ha' réh pané kenat ngan Iah mipa réh, ka' ha' néh, Kelunan éh bé' sakit, bé' éh tai nawan, bang kelunan éh sakit éh tai, ha' néh. 13#Mat. 12:7, Hos. 6:6 Jian keh tai ngan seruh tong sin ha' lem surat Allah éh bara' ka', Bé' akeu' keloo' keh mematai ka'an dokoo' seva' Akeu', bang Akeu' keloo' keh pika kelunan, ha' néh. Bé' Akeu' tuai dokoo' tebai kelunan éh seruh iah éh kelunan éh jian, bang Akeu' tuai dokoo' tebai kelunan éh seruh iah éh kelunan éh sa'at, ha' néh.

Tong kelaset

(Mrk. 2:18-22, Luk. 5:33-39)

14La'ah irah bakéh Yohanes Batis tuai tavin Yésus ke' réh neteng éh, ka' ha' réh, Uban ineu' améé' ngan kelunan Parisi péh ngelayau kelaset awah, bang irah bakéh ko' bé' réh kelaset, ha' réh.

15Ha' Yésus mipa réh, Kineu', omok bakéh kelunan éh kawin nah pelasam kenin kelebéé' lakei' inah to de' ke' ngan réh kei? Bang pu'un jah dau temurei' kepéh hun lakei' inah pu'un piso jin réh, boh irah kelaset, ha' néh.

16Ha' Yésus kepéh, Jah kelunan péh bé' éh pék livah éh maréng tong kerayung éh mupuk dai pék néh nah mejéé' éh mupuk nah pelapah ja'au kepéh. 17Kenat péh bé' kelunan modoo' baa' agun éh maréng dalem telokoo' kulit ka'an éh lepah lebéé', dai telokoo' nah letaa' ngan baa' nah pega' ngan telokoo' nah tasa'. Bang baa' agun éh maréng, pu'un réh modoo' éh lem telokoo' kulit ka'an éh maréng, boh éh pekua jian béé, ha' néh.

Tong anak jah Lakei' pengeja'au tong lamin sebayang Yahudi ngan tong jah redo éh ngejeming seput Yésus

(Mrk. 5:21-43, Luk. 8:40-56)

18Lem Yésus to pané ngan réh nah, inah jah lakei' pengeja'au tong lamin sebayang Yahudi tuai ngejekuu' lep néh tong jumen Yésus ke' néh pané ngan Néh, ka' ha' néh, Pu'un anak ké' redo matai tenéh bang bé' jak éh tenanem réh. Jian Ke' tuai mapai ojoo' Ko' tong néh ke' néh omok murip da', ha' néh.

19La'ah Yésus tai kivu éh pemung ngan irah bakéh néh kepéh.

20La'ah pu'un jah redo éh pega' dahaa' kasi, jah poloo' duah ta'un tenéh éh sakit kenat. Tai éh jin likot Yésus ke' néh ngejeming tapak seput Yésus. 21Uban kelem redo inah, né' akeu' omok ngejeming sapét tapak seput néh nah, adang ké' omok ma'o, kelem néh.

22La'ah Yésus pupah na'at éh ke' néh pané ngan néh, ka' ha' néh, O anak Ké', mai ke' medai, pengelan ko' éh lepah peka'o ke', ha' néh. Redo inah tioo ma'o.

23Hun Yésus avéé' tong lamin pengeja'au inah, Iah na'at kelunan mangaa' ngan ngelumo kivu adet réh tong pematai kelunan, ahoo' lem lamin inah. 24Ka' ha' néh ngan réh, Kelap keh, anak iteu' bé' éh matai, pegen awah éh, ha' néh.

Bang irah mala' muau éh menéng ha' néh kenat. 25Hun réh lepah musit béé, Yésus tai tavin anak inah ke' néh ngamit ojoo' néh, anak inah tioo betéé'. 26La'ah rengah Yésus nah avéé' tong tutuh tana' inah.

Tong Yésus peka'o duah kelunan peseu'

27Lakau Yésus piso jin sinah inah duah kelunan peseu' kivu éh. La'ah rawah ngeradau, ha' roh, O Anak Daud, ko' pika amo, ha' roh.

28Hun Yésus taket tong lamin, boh rawah peseu' nah tai tavin éh. La'ah ka' ha' Yésus pané ngan roh, Kineu', pu'un kawah ngelan Akeu' pu'un penyukat peka'o koh, ha' néh. Ha' roh mipa éh,

Adang amo ngelan ka'au' Tuhan, ha' roh.

29La'ah Yésus mapai ojoo' néh tong maten roh, ka' ha' néh, Pekua' pengelan koh, kenat péh éh pu'un ngan koh, ha' néh. 30Rawah tioo pu'un ta'an. La'ah Yésus Pané meta' roh, bé' buhaa' roh bara' éh ngan kelunan éh jah. Ka' ha' néh, Mai koh bara' tong penganeu' Ké' tong koh nah ngan kelunan séé'-séé' péh da', ha' néh.

31Bang hun roh lakau pu'un roh perengah rengah inah semah-semah péh tutuh tana' inah.

Tong Yésus peka'o kelunan mameng

32La'ah tovoo' rawah inah peleka lakau, pu'un irah mihin jah kelunan éh mameng tavin Yésus, mameng éh uban néh nasek balei'. 33Hun Yésus mega' balei' inah jin kelunan mameng nah, tioo kelunan inah omok pané lah. Béé kenin irah pinaa' nah, ka' ha' réh, Bé' jak kalaa' lu' jam éh kenat belah pohoo' lu', ha' réh.

34 # Mat. 10:25, 12:24, Mrk. 3:22, Luk. 11:15 Bang ha' kelunan Parisi, Iah bet balei' palaa' penyukat pengoloo' balei' nah awah, ha' réh.

Tong Yésus pika kelunan pinaa'

35 # Mat. 4:23, Mrk. 1:39, Luk. 4:44 Lakau Yésus tai siget leboo' ja'au ngan leboo' si'ik péh ke' néh nebaraa' réh tong lamin sebayang Yahudi. Pu'un éh bara' Rengah Jian tong jalan Allah juk pengeja'au réh, ngan pu'un éh peka'o kelunan jin kekat arong kesakit réh. 36#Bil. 27:17, 1 Raj. 22:17, 2 Taw. 18:16, Yeh. 34:5, Sak. 10:2, Mrk. 6:34 Hun Yésus na'at kelunan pinaa' nah, pika mu'un éh na'at réh uban irah tusah mu'un barei' domba éh purat éh bé' pu'un kelunan mihau. 37La'ah ha' Yésus ngan irah bakéh néh, térék inah ja'au mu'un kerat awah kelunan majau éh. 38#Luk. 10:2 Uban néh kenat jian keh sebayang menyat Tuhan éh pu'un térék inah ke' néh omok nyohoo' kelunan kepéh tai majau éh, ha' néh.

Markert nå:

MATIUS 9: PNT

Marker

Del

Kopier