Luka 5

Yɛsu Kǝga Ndzǝr Nuwurni yarɛ Nam Tangkǝma

(Mat 4:18-22; Mar 1:16-20)

1 # Mat 13:1,2; Mar 3:9,10; 4:1 Vǝr laka tǝ Yɛsu ada hyati ata nya manda nǝr Ganisarat, aka dlamiyir ndzi ada mwari adzǝni akuya ka dar ngati ndǝrǝr Hyal. 2Antǝ dzǝ ka wula sar yarɛ sǝɗɛ ata nya manda ni; ama ndzǝr tam kulfa kurtaka sǝba ka ngyar sar yarni tǝ dar ada kǝtsɛ sǝr tam kulfar dar. 3Antǝ Yɛsu ka lǝkwa kuta pathla sar ni, nam nǝr Simaun, tǝ dzǝ ka kǝgyǝ tǝni apǝri ka dzǝ mbǝyar sar ni alǝkwa yimi tsaf laka ta nya gar manda ni. Antǝ Yɛsu ka ndzai akwa kuta sar ni ka hyipɛ ala dlamiyir ndzi.

4Aghǝla tǝ Yɛsu tara kurai ndǝr ni, antǝ dzǝ ka nkǝrɛ ala Simaun, “Ɓakta dzakti mbǝya sar ni akwa vui nam zǝlang, ka gǝ ntsǝghǝl sǝr tamur ngɛ akuya ka tamwɛ.”

5 # Yaw 21:3 Simaun sǝnau ka nkǝrɛ alari, “Thlaku, navǝri sanga yar pipiya kǝthlǝr aka dǝna, ama yar ta ngǝti mima wɛ. Ama kadǝbar tǝ gǝ ani tara gha ahani, Yi ata ntsǝghǝl sǝr tamwɛ yarɛ ni.”

6 # Yaw 21:6 Aghǝla tǝ dar tara ntsǝghǝl sǝr tam ni dar ka ngǝtsi kulfa yarɛ hangkurari apa awa thlǝkwanta sǝr fa kulfar darari. 7Ani dar ka kǝga kǝma dar nam akwa sar damwa akuya ka dar siya mbana tǝ dar, ba dar ka si ka ghǝiyati sar yarɛ ni gyapu sǝɗɛ aka kulfa, tǝ dar ada baga ntsǝghǝldzi aghǝl akur yimi.

8Sakatǝ Simaun Bitrusu tara wula sǝ ǝni, dzǝ ka zǝɗi ata ɓungyari akǝma Yɛsu, tǝ dzǝ ka nkǝrɛ, “Dabardzi angyar tǝra, Thlaku; akuya Yi ndǝr biku!” 9Akuya dza ba ndzǝ nam adzǝni, sanga dar 'ya ala dar sǝr kudǝra ata kǝra hangkur kulfa yarɛ nam tǝ dar tara ngǝti ni. 10Kǝ ndzai tsu apani ala Yakubu ba Yawhana, madar Zabadi, nam tǝ dar kǝ ndzai ndzǝr kǝthlǝr vwam atakǝmaduku kaka Simaun.

Antǝ Yɛsu ka gha ala Simaun, “Ta gǝ ta hyivǝr mai; alǝkǝma gǝ ata siya ngǝzǝ ndzi.” 11Ani dar ka ndǝrba sar dar yarɛ asǝba ata dai, dar ka ngyar sanga su ba dar ka nuti Yɛsu.

Sal aka Kasuwar Pǝbai

(Mat 8:1-4; Mar 1:40-45)

12Sakatǝ Yɛsu tsu akwa dukwa mǝlmɛ yarni, ndǝ laka si nam tǝ kasuwar dǝlima tara ɓǝli tǝni. Sakatǝ dzǝ tara wula Yɛsu, dzǝ ka dla tǝ kǝmari ata dai ka kǝgyǝ tǝni, “Thlaku, ma gǝ yiɗɛ, gǝ ata mǝzi mǝrtǝ tǝra kǝtsǝkǝtsi.”

13Yɛsu ka harar tsiyari ba dzǝ ka tsǝkwar ndǝ ni. Dzǝ ka nkǝrɛ, “Yi kǝ yiɗɛ. Ka gǝ ndzai kǝtsǝkǝtsi!” Ba tǝkǝma kasuwar dǝlima ni ka kuri.

14 # Fǝr 14:1-32 Antǝ Yɛsu ka tsau alari, “Ta gǝ ta gha ala waima, ama mwari, ka gǝ lǝka tsanti kǝrngɛ ala fǝrist, ka dzǝ wula tǝngɛ akuya ka sanga ndzi zǝndi apǝri gǝ kǝ mbǝtǝdzi, ba ka gǝ 'ya kǝdlǝrsu apa tǝ Musa tara tsau.”

15Ama wala apani tsu ndǝr ata kǝrari ada kikilntadzi akwa kǝlara vui ɓwalta ata baditsǝniyari, ani ka dlamiyir ndzi ka si akuya ka dar ngati ndǝrǝrni, ba ka dar ɓui mbǝtǝdzi aka kasuwa yarɛ nam aka dar. 16Ama saka ka hang Yɛsu ada sǝba ka tǝra akwa vui yarɛ nam kura ndɛ akwa ka lǝka 'ya aduwa.

Yɛsu Mbǝti Ndɛ tǝ Dzari Tara Satǝdzi

(Mat 9:1-8; Mar 2:1-12)

17Vǝr laka sakatǝ Yɛsu ata kǝra hyipɛ, ndzǝr Farisi kaka malǝmǝr Mabari yarni, nam tara hyati akwa kǝlara mǝlmɛ nkyǝnkyiɗu nam akwa diyir Galili ba sanga diyir Yahudiya ba Ursalima, dar ada ndzai akwanda. Ba dǝnar Thlaku ni adzǝni akuya ka dzǝ mbǝti ndzǝ nam kura kalang. 18Sǝli yarɛ laka si tǝ dar ada kǝl ndɛ tǝ dzari tara satǝdzi ada pi ata butsi, dar bara ka dar lǝmbwa aka dza ka dar vi tǝni akǝma Yɛsu. 19Sakatǝ dar ta ɓui whalǝr lǝmbwa aka dza wɛ, akuya ka dlamiyir ndzi ni, dar ka fǝlti aka dza ati ata kǝra fǝr ni, dar ka wakǝta kǝra fǝr ni ka haivi tǝni ata butsǝrni akǝma Yɛsu akwa ntsa dlamiyir ndzi ni.

20Sakatǝ Yɛsu tara wula hamnta dzǝrǝr dar dzǝ ka nkǝrɛ ala ndǝ ni, “Pazi, Yi kyifǝnta ala gǝ bikǝr ngɛ.”

21Antǝ ndzǝr Farisi kaka Malǝmǝr Mabari yarni baditsǝni nkǝrɛ ala kǝma dar apǝri, “Wa ani ndǝ ǝni nam ada gha su kulɗa ata kǝra Hyal ni? Ma adi Hyal wɛ, wa ani ata mǝzi ka kyifǝnta biku yarɛ?”

22Yɛsu kurtaka zǝndi sǝ nam tǝ dar ada ɗǝnga dzǝ ka yuwɛ, “Kami tǝ gǝri ada ɗǝnga sǝ yarɛ ni apani akwa ɗǝfa gǝri? 23Madi ani kǝsǝkai: ka ndǝ nkǝrɛ, ‘Yi kyifǝnta ala gǝ bikǝr yarɛ,’ kǝna ka ndǝ nkǝrɛ, ‘Hyati ka gǝ mwari’? 24Ama ani ka gǝri zǝndi apǝri Zǝr Ndɛ aka wada akwa dunya ka dzǝ kyifǝnta biku yarɛ....” Dzǝ ka nkǝrɛ ala ndǝ ngurngudi ni, “Yi gha ala gǝ, hyati, kǝtǝ butsǝr ngɛ ka gǝ tǝra livi.” 25Tǝkǝma ndǝ ni ka hyati akǝma sanga dar, dzǝ ka kǝtǝ sǝ nam tǝ dzǝ ada pi ati ni, ba dzǝ ka tǝra lǝhǝi tǝ dzǝ ata kǝra hǝm Hyal. 26Sanga dar ka ndatǝdzi ba dar hǝmnti Hyal. Hyivǝr ngǝti tǝ dar ba dar ka nkǝrɛ, “Muri kǝ wula sǝr kudǝra asǝna.”

Yɛsu Kǝga Lawi

(Mat 9:9-13; Mar 2:13-17)

27Aghǝla ǝni, Yɛsu lǝba dzǝ ka wula ndǝr dlu tsǝmɛ laka tǝ thlǝmari Lawi, ada ndzai akwa vui dlu tsǝmǝrni. Yɛsu ka nkǝrɛ alari, “Nu tǝra.” 28Ba Lawi ka hyati, ka ngyar sanga su dzǝ ka nuti tǝni.

29Antǝ Lawi ka 'yati wudzǝr nam ngga aharni akuya ka Yɛsu, ba ndzǝr dlu tsǝmɛ hangkurari kaka ndzi yarɛ damwa ada sǝm sǝr sǝm ni atakǝmaduku kaka dar. 30#Luk 15:1,2Ama ndzǝr Farisi kaka malǝmǝr mabari yarni nam nǝdar dar ada whuwhuni ala ndzǝr nuwur Yɛsu ada nkǝrɛ, “Akuya kami tǝ gǝri ada sǝm ka sa atakǝmaduku kaka ndzǝr dlu tsǝmɛ ba ndzǝr biku yarɛ?”

31Yɛsu sǝnau ala dar, “Ndzǝ nam kalang adi ada bara ndǝr kuzugu wɛ, ama ndzǝ kura kalang. 32Yi ta si ka Yi kǝga ndzǝ nam kal-kal wɛ, ama ndzǝr biku yarɛ ka dar tubi.”

Ndǝ Yu Yɛsu ata Kǝra Kǝl Asam

(Mat 9:14-17; Mar 2:18-22)

33Dar ka nkǝrɛ ala Yɛsu apǝri, “Ndzǝr nuwur Yawhana ada kǝl asam ka hang, ba 'ya aduwa, ba ndzǝr nuwur ndzǝr Farisi ma ada 'ya tsu apani, ama ndzǝr nuwur ngɛ dar ada sǝm aka sa tang vǝri.”

34Yɛsu ka sǝnau, “Gǝri awa mǝzi ka hau pazǝr salakambǝl yarɛ ka kǝl asam tǝ dzǝ tsu kaka dar ya? 35Ama saka ata si nam tǝ ndǝ ata siya kǝlnta salakambǝl ni ka ngyar tǝ dar; akwa vǝr yarɛ ǝnda dar ata kǝl asam.”

36Dzǝ ka nkǝrɛ ala dar karabu ǝni: “Ndǝ adi nam ada thlǝkwatsi dzá lǝkutu bǝlin ka dzǝ mbuba lǝkutu nam halhali akǝri wɛ. Ma dzǝ 'ya apani, dzǝ ata thlǝkwanta lǝkutu nam bǝlin ni, ba vui tǝ dzǝ mbu tǝ dina bǝlin ni adi ata kǝɓa aka dzá nam halhali ni wɛ. 37Ba ndǝ adi ada pu yimǝr inabi bǝlin#5:37 yimǝr inabi: Ndǝ ada ɓui akwa madar fwɛ nam tǝ ndǝ ada ɓutsǝba. akwa ngǝrkǝr yarɛ nam hal-hal wɛ. Ma ndǝ 'ya, yimǝr inabi ni ata ndǝlanta ngǝrkǝr yarni, ba yimǝr inabi ni gyapu aka ngǝrkǝr yarni ata sǝwatǝdzi. 38A'á yimǝr inabi bǝlin ntsakǝr ka ndǝ pu akwa ngǝrkǝr yarɛ nam bǝlin. 39Ama ndǝ nam tara kurta sa yimǝr inabi nam halhali ni; dzǝ adi ata yiɗɛ nam bǝlin kǝra wɛ; akuya dzǝ ata nkǝrɛ, ‘Hal-hal ni ani sǝɗa.’ ”

अहिले सेलेक्ट गरिएको:

Luka 5: CKL

हाइलाइट

शेयर गर्नुहोस्

कपी गर्नुहोस्