Luka 6

Thlakǝr Sǝbdu ni

(Mat 12:1-8; Mar 2:23-28)

1 # Mab 23:25 Vǝr Sǝbdu ni nam ani Vǝr Ghǝrbadzi tǝ Yɛsu ata kǝra mwari ka ɓǝlba ata fwakǝr uhyi yarɛ, ba ndzǝr nuwurni yarɛ ka baditsǝni ɓǝgǝl laka zangamǝr uhyi, tǝ dar ada sǝmtɛ akwa tsiya dar ka ɗǝ munyari. 2Ndzǝr Farisi yar laka yuwɛ, “Kami tǝ gǝri ada 'ya sǝ nam tǝ mabari kanti ta ndǝ ta 'ya ata vǝr Sǝbdu ni?”

3Yɛsu ka sǝnau ala dar, “Gǝri ta saga kǝratsǝni sǝ nam tǝ Dauda tara 'ya sakatǝ dzǝ kaka ndzǝrni aka mi wɛ? 4#Fǝr 24:9#1Sam 21:1-6Tǝ dzǝ tara lǝmbwa akwa fǝr Hyal, dzǝ ka kǝtǝ mantsǝkǝl nam tǝ ndǝ tara hamnta ala Hyal, dzǝ ka sǝmɛ sǝ nam tǝ mabari tara nkǝrɛ apǝri fǝrist ɗiɗi ani ata sǝmɛ. Ba dzǝ ka la nakumari ala pazǝr mwarǝrni yarɛ.” 5Antǝ Yɛsu ka nkǝrɛ ala dar, “Zǝr Ndɛ ni ani Thlakǝr vǝr Sǝbdu ni.”

6Ata vǝr Sǝbdu damwa, Yɛsu ka mwari alǝkwa fǝr vǝkǝr sǝlaiyir ndzǝr Yahudi tǝ dzǝ ada hyipǝ su. Ndǝ laka adai akwanda nam aka tsisǝmari ntǝnti. 7Antǝ ndzǝr Farisi kaka malǝmǝr mabari yarni ada bara whal tǝ dar awa bǝrku Yɛsu, ani dar ada wul tǝni ata ntsɛ ata ntsɛ tar dzǝ awa mbǝti ndɛ vǝr Sǝbdu ni. 8Ama Yɛsu kurtaka zǝndi sǝ nam akwa ɗǝfa dar, dzǝ ka nkǝrɛ ala ndǝ nam aka tsiyari ntǝnti ni, “Azǝrɛ ka gǝ hyati akǝma sanga ndzi.” Ani dzǝ ka hyati akǝma dar akwandari.

9Antǝ Yɛsu ka nkǝrɛ ala dar, “Ka Yi yu tǝ gǝri, madi tǝ mabari nkǝrɛ ka ndɛ 'ya vǝr Sǝbdu ni: ka ndǝ 'ya sǝ nam ɗaku kǝna ka ndǝ 'ya sǝ nam kulɗa, ka ndɛ mbati mpikɛ kǝna ka ndɛ 'yanta tǝni?”

10Dzǝ ka ngyǝkǝba tǝ dar sang, ba dzǝ ka nkǝrɛ ala ndɛ ni, “Munta tsiya gǝ.” Dzǝ ka 'ya apa tǝ dzǝ gha, ani tsiyari ni ka ɓakta ndzai kalang kadamwa. 11Ama ɗǝfa dar ka sǝwa; antǝ dar ka baditsǝni sawari kaka kǝma dar ata kǝra sǝ nam tǝ dar ata 'ya ala Yɛsu.

Ndzǝr Hya Kum Kapu Sǝɗɛ

(Mat 10:1-4; Mar 3:13-19)

12Akwa vǝr yarɛ nda Yɛsu ka lǝti ata ngwama paya akuya 'ya aduwa, ba dzǝ ka pi akwanda ata kǝra 'ya aduwa ala Hyal. 13Sakatǝ vǝri kǝ kuri; dzǝ ka kǝgati ndzǝr nuwurni yarɛ asǝngui adzǝni dzǝ ka tsarba kum kapu sǝɗɛ akwa ntsa dar, nam tǝ dzǝ vǝti thlǝma dar ndzǝr hya yarɛ: 14Simaun (nam tǝ Yɛsu tara vǝti alari thlǝmɛ Bitrusu), Andǝrawusu zǝrangǝri, Yakubu, Yawhana, Filibusu, Barthlalaumisu, 15Mata, Tauma, Yakubu zǝr Halfa, Simaun nam tǝ ndɛ ada kǝga tǝni Zailaut, 16Yahuda nam zǝr Yakubu, ba Yahuda Iskaryauti nam tara ndzai ndǝr ɓǝlai tǝni.

Barka ba Sǝr Bwasam yarɛ

(Mat 4:23-25)

17Dzǝ ka tǝra sǝghǝl kaka dar ba dzǝ ka hyati ata vui nam kura gar-gar. Ndzǝr nuwurni yarɛ hangkurari adai akwanda ba dlamiyir ndzǝ nam tara hyati akwa sanga diyir Yahudiya, aka Ursalima, ba akwa di yarɛ akwa diyir nǝr Taya ba Sidaun nam ata nya kyagha, 18dar si akuya ka dar ngati ndǝrǝrni ba ka dar mbǝtǝdzi aka kasuwar dar yarɛ. Ndzǝ nam ada ɗar bwanai aka mambǝlɛ yarɛ nam kulɗa dar ɓui mbǝtǝdzi, 19ba sanga dlamiyir ndzi ni ada bara ka dar tsǝkwar tǝni, kadǝbar dǝna ada sǝba akwa dzari ka mbǝti tǝ dar sang.

20Tǝ Yɛsu ata kǝra wul ndzǝr nuwurni yarɛ, dzǝ ka nkǝrɛ,

“Gǝri aka kutsari, gǝri nam ngudi,

akuya kuhyikur Hyal nǝgǝri.

21Gǝri aka kutsari, gǝri dzǝ nam aka mi kulini,

akuya gǝri ata siya ghǝi.

Gǝri aka kutsari, gǝri nam ada tuwa kulini,

akuya gǝri ata siya ngusi.

22 # 1Bit 4:14 Gǝri aka kutsari sakatǝ ndzi ngǝla tǝ gǝri,

sakatǝ dar ada kǝlba tǝ gǝri akwa ntsa dar ba ngǝngǝl tǝ gǝri

ba ngǝla thlǝma gǝri apa sǝ kulɗa,

kadǝbar ka Zǝr Ndɛ.

23 # 2Sǝt 36:16; 'YaSu 7:52 “Ka gǝri kutsari, akwa vǝr ǝnda ka gǝri fǝgǝli akuya kutsari, kadǝbar wadzǝɓar gǝri adai nam ngga atahyal. Akuya tsu apani tǝ tada dar yarɛ tara 'ya ala nabi yarɛ.

24“Ama bwasam ala gǝri nam bǝrba,

akuya gǝri kurtaka dlutsi nga sǝɗar gǝri.

25Bwasam ala gǝri nam ghǝighǝi kulini,

akuya mi ata siya kal tǝ gǝri.

Bwasam ala gǝri nam ada ngusi kulini,

akuya gǝri ata siya sǝngǝlɛ ba tuwa.

26Bwasam ala gǝri sakatǝ sanga ndzi ada hǝm tǝ gǝri,

akuya tsu apani tǝ tada dar yarɛ tara 'ya ala nabiyir hawi yarɛ.

Ka Gǝri Yiɗɛ Dawar Gǝri

(Mat 5:38-48; 7:12)

27“Ama Yi ada gha ala gǝri nam ada nga tǝra: Ka gǝr yiɗǝ dawar gǝri, ka gǝri 'ya ɗakur ala ndzǝ nam ada ngǝla tǝ gǝri, 28ka gǝr vǝdzǝ barka ala ndzǝ nam ada ngǝngǝl tǝ gǝri, ka gǝr 'ya aduwa ala ndzǝ nam ada 'ya ala gǝr kulɗakur. 29Ma ndǝ laka tsa tǝngɛ ata pahyima gǝ pathlu, ka gǝ mbalti alari bwa pathlari yɛ. Ma ndǝ dlutsi bulǝr ngɛ, ka gǝ ngudi alari lǝkutu nam tǝ ndǝ ada ha akurari. 30Kǝlara ndǝ nam tara yu sǝ aka gǝ ka gǝ lari, ba ma ndǝ laka kǝtǝ sǝ nam nǝngɛ, ka gǝ ngyar alari. 31#Mat 7:12Ka gǝr 'ya su ala ndzi damwa apa tǝ gǝri ada bara ka ndǝ 'ya ala gǝri.

32“Ma gǝri ada yiɗǝ ndzǝ nam ada yiɗǝ tǝ gǝri ɗiɗi, mǝmi tǝ gǝri awa ɓui barka? Wala ‘ndzǝr biku’ nam kulɗa ma ada yiɗǝ ndzǝ nam ada yiɗǝ tǝ dar. 33Ba ma gǝri ada 'ya ɗakur ala ndzǝ nam ada 'ya ɗakur ala gǝri, mǝmi tǝ gǝri awa ɓui barka? Wala ‘ndzǝr biku’ nam kulɗa ma ada 'ya tsu apani. 34Ba ma gǝri ada la kimbǝl ala ndzǝ nam tǝ gǝri aka mbǝrsa apǝri dar ata siya nkyinta gǝri, mǝmi tǝ gǝri awa ɓui barka? Wala ‘ndzǝr biku’ nam kulɗa ma ada la kimbǝl ala ‘ndzǝr biku’ kǝma dar akuya dar ada ɗǝnga apǝri dar ata ɓakta dlutsi sǝr dar sang. 35Ama ka gǝri yiɗǝ dǝgunmar gǝri, ka gǝri 'ya ɗakur ala dar, dǝbantamɛ kimbǝl kura aka ɗǝnga apǝri ndǝ ata siya nkyinta ala gǝri. Antǝ wadzǝɓar gǝri ata 'ya ngga, ba gǝri ata ndzai madar Hyal nam ati ta sang, kadǝbar dzǝ aka hankal ala ndzǝ nam kura ada gwaditsǝni ba ndzǝ nam kǝmangar. 36Ka gǝri ndzai ndzǝr kǝtǝrdzi, tsu apa tǝ Tada gǝri ma ndǝr kǝtǝrdzi.

'Ya Haka ala Ndzǝ Damwa

(Mat 7:1-5)

37“Ta gǝri ta 'ya haka ala ndɛ, ani Hyal adi ata 'ya haka ala gǝri wɛ; ta gǝri ta vǝkǝr sǝ kulɗa ala ndǝ, ani Hyal adi ata vǝkǝr sǝ kulɗa ala gǝri tsuwɛ; ka gǝri kyifǝnta ala kǝma gǝri, ani Hyal ata kyifǝnta ala gǝr yɛ. 38Ka gǝr hamnta su, ani Hyal ata hamnta ala gǝri sǝ. Auna nam ɗaku, nam tǝ ndɛ tara sǝkǝi, ka kǝngǝri ɗaku, ba har ada puntadzi, ani tǝ Hyal ata puti ala gǝri ata whumɓɛ gǝri. Akuya aka auna nam tǝ gǝr tara pu su ala ndɛ akǝri, tǝ Hyal ata pwɛ ala gǝri akǝri.”

39 # Mat 15:14 Yɛsu ka gha ala dar karabu ǝni yɛ apǝri, “Ndɛ nam ghyang awa mǝzi ka ndǝr ghyang kǝmani ya? Ma dzǝ 'ya dar gyapu adi ata pudzi akwa kau wɛ? 40#Mat 10:24,25; Yaw 13:16; 15:20Ndǝ nam ada tsǝl su dzǝ adi ngga ta ndǝ nam ada hyipɛ alari wɛ. Ama kǝlara ndǝ nam tǝ ndǝ kuraba tsǝlɛ alari su dzǝ ata ndzai apa malǝmǝr ni.

41“Kami tǝ gǝ ada wul kukutǝr fwɛ nam ata ntsa zǝrma, ama gǝ adi ada ɗǝnga bangǝlang nam ata ntsa gǝ wɛ? 42Mǝmi tǝ gǝ awa gha ala zǝrma, ‘Ngyar ka Yi kǝli ala gǝ kukutǝr fwɛ ata ntsa gɛ,’ sakatǝ gǝ tǝ kǝrngɛ ta wula bangǝlang nam ata ntsa gǝ wɛ? Gǝ nam kǝlikatsaɗǝm, tangkǝma ka gǝ kǝli bangǝlang ni nam ata ntsa gɛ, ba antǝ gǝ ata wula su paraku ka gǝ kǝli kukutǝr fwɛ nam ata ntsa zǝrma.

Fwɛ ba Munyar ni

(Mat 7:16-20; 12:33-35)

43“Fu nam ɗaku adi ada ya munya nam kulɗa wɛ, wala fu nam kulɗa awa mǝzi ka yai munya nam ɗaku wɛ. 44#Mat 12:33Akuya kǝlara fwɛ ada zǝndǝdzi atar yarni; akuya ndɛ adi ada ɗǝm kanda ata fur ntsǝkǝɗa wɛ, wala munyar inabi ata fur mǝlǝla wɛ. 45#Mat 12:34Ndǝ nam ɗaku ada sǝba aka sǝ yarɛ nam ɗaku tǝ dzǝ tsaɓtsǝni ka ɗǝwar akwa ɗǝfari, ba ndǝ nam kulɗa dzǝ ada sǝba aka sǝ yarɛ nam kulɗa tǝ dzǝ tsaɓtsǝni ka ɗǝwar akwa ɗǝfari. Akuya akwa hangkur sǝ nam akwa ɗǝfa ndɛ antǝ nyari ada ghaba.

Ndzǝr Tsa Fǝr Sǝɗɛ Dlang aka Bǝrkawa

(Mat 7:24-27)

46“Kami tǝ gǝri ada kǝga tǝra, ‘Thlaku, Thlaku,’ ama gǝri adi ada 'ya sǝ nam tǝ Yi gha wɛ? 47Yi ata tsanti ala gǝri ndzaiyir kǝlara ndǝ nam tara si adzǝra, ka ngati ndǝrǝrna, ba dzǝ ada lǝkǝma aka 'ya tǝ dar. 48Dzǝ ata ndzai apa ndǝ nam ata kǝra tsa kǝi, tǝ dzǝ tara laba kawur piyartsǝni ni dzǝgam zǝlang dzǝ ka vǝti piyartsǝniyir fǝr ni ata paya; sakatǝ afafar yimi si ka fa kǝi ǝnda, ama ta mǝzi kǝngǝrti tǝni wɛ, akuya dzǝ laidzi ɓaɓal. 49Ama kǝlara ndɛ tara ngati ndǝrǝrna, ama dzǝ ta kǝlǝngkǝr akǝri wɛ, dzǝ ndzai apa ndǝ nam tara lati kǝiyirni kura aka piyartsǝni. Sakatǝ afafa tara si ka fa kǝi ǝnda dzǝ ka dla tǝkǝma, antǝ dlar kǝi ǝnda kǝ 'ya kulɗa tǝm-tǝm.”

अहिले सेलेक्ट गरिएको:

Luka 6: CKL

हाइलाइट

शेयर गर्नुहोस्

कपी गर्नुहोस्