Luka 4

Satan Nkǝrti Yɛsu

(Mat 4:1-11; Mar 1:12-13)

1Yɛsu ghǝi-ghǝi aka Mambǝl Kartǝ, whaltsǝni ka tǝra ka ngyar Urdun ba Mambǝl ni ka mwari aka dza akwa ntaku, 2akwanda tǝ Satan tara nkǝrti tǝni nǝr vǝr fwaɗǝthlani. Dzǝ ta sǝm mima wɛ akwa vǝr yarnda, ba ata dǝnta mi ka kal tǝni.

3Ani Satan ni ka nkǝrɛ alari, “Ma apǝri gǝ Zǝr Hyal dzá, nkǝrɛ ala paya ni ka dzǝ 'ya mantsǝkǝl.”

4 # Mab 8:3 Yɛsu ka sǝnau, “Rǝbwa-rǝbwa apǝri: ‘Ndǝ adi ata ndzai ka mantsǝkǝl ɗiɗi wɛ.’ ”

5Satan ni mwari aka dza ata vui nam ati dzǝgam, ba dzǝ ka tsanti alari ata saka duku sanga kuhyikur yarɛ nǝr dunya ni. 6Satan ni ka nkǝrɛ alari, “Yi ata la gǝ sanga wada kaka nggakur dar, kadǝbar sanga sǝ yarni ndǝ lai, ba Yi mǝzi ka Yi la kǝlara ndǝ nam tǝ Yi yiɗɛ. 7Ani ma gǝ vǝkǝr sǝlai alai, Sanga sǝ ǝni yarɛ ni ata ndzai nǝngɛ.”

8 # Mab 6:13 Yɛsu sǝnau, “Rǝbwa-rǝbwa, ‘Vǝkǝr sǝlai ala Thlaku Hyalǝr ngɛ, ba ka gǝ 'ya kǝthlǝr alari ɗiɗi.’ ”

9Satan ni ka mwari aka dza akwa Ursalima ba dzǝ ka lǝti aka dza ata vui nam dzǝgam ta sang nǝr fǝr Hyal ni, ba dzǝ ka nkǝrɛ apǝri, “Ma gǝ Zǝr Hyal, ɗǝghǝl tǝ kǝrngɛ asǝgǝl akwani: 10#Zab 91:11,12Akuya rǝbwa-rǝbwa:

“ ‘Dzǝ ata tsau ala ndzǝr hyantǝrni ata kǝra gɛ

ka dar ɓǝla tǝngɛ tǝ hankal;

11ka dar kathlǝti tǝngɛ akwa tsiya dar,

ani ka kura paya awa tsa thlǝla gɛ.’ ”

12 # Mab 6:16 Yɛsu sǝnau, “Labar Hyal nkǝrɛ: ‘Gǝ adi ata hau Hyal Thlakǝr ngɛ akwa nkǝrti wɛ.’ ”

13Sakatǝ Satan tara kurai nkǝrti Yɛsu ata kǝlara palai, ani dzǝ ngyar tǝni ka saka damwa.

Ndǝ Ngǝla Yɛsu akwa Nazarat

(Mat 4:12-17; Mar 1:14-15)

14Ani Yɛsu ka dzakti tǝra si akwa Galili akwa dǝnar Mambǝl Kartǝ ni, ba ndǝ ka ngati ndǝrɛ ata kǝrari akwa sanga vui yarɛ nǝr di ni. 15Dzǝ 'ya ala dar hyipɛ akwa fǝr vǝkǝr sǝlaiyir dar, ani kǝlara ndɛ ada hǝm tǝni.

16Aghǝla ǝni Yɛsu ka mwari akwa Nazarat, vui nam tǝ dzǝ tara kǝli akwa, ba ata vǝr Sǝbdu dzǝ ka mwari akwa fǝr vǝkǝr sǝlaiyir ndzǝr Yahudi ni, apa tǝ dzǝ tara tsǝli. Ani dzǝ ka hyati tǝ dzǝ ata kǝra. 17Ba ndǝ ka lari kakadu pǝrpǝri nǝr nabi Isaya. Dzǝ ka pǝrnta tǝni, dzǝ ka ɓui vui nam tǝ ndǝ rǝbwai:

18 # Isa 61:1,2 “Mambǝlǝr Thlaku ni adai ata kǝrawai,

kadǝbar dzǝ tsarba tǝra kǝi

nkǝr ndǝrǝr Hyal nam sǝɗa ala ndzǝ nam ngudi yarɛ.

Dzǝ hya tǝra ka Yi nkǝrnta ɓui kǝr ala ndzǝ nam akwa fǝrsǝna yarɛ

ba ka Yi mburnta ntsɛ ala ghyang yarɛ,

ka Yi mpǝli ndzǝ nam tǝ ndǝ tara ntsani,

19ka Yi gha ala kǝlara ndɛ saka kǝ 'ya nam tǝ Thlaku ata 'ya maiwakur ala ndzǝrni.”

20Antǝ dzǝ ka pǝrti kakadu pǝrpǝri ni, dzǝ ka la ndǝr wulari dzǝ ka ndzai. Sapǝr ndzǝ nam akwa kuta fǝr vǝkǝr sǝlai ni, puti ntsɛ ata dza, 21ba dzǝ ka baditsǝni aka nkǝrɛ ala dar apǝri, “Asǝna labar yarɛ nam tǝ gǝri tara ngati akwa Labar Hyal ǝni kǝ ghǝiyabadzi.”

22Sanga dar nam akwa vuiyari dar ngati sǝɗarni ka ndatǝdzi ata kǝra dzǝli ndǝr yarɛ nam ɗaku nam ada sǝba akwa nyari, dar ada yuwɛ, “Aya, ǝni adai zǝr Yusufu tǝm wɛ?”

23Yɛsu ka nkǝrɛ ala dar, “Yi zǝndi apǝri gǝri ata gha alai karabu ni: ‘Ndǝr kuzugu, ka gǝ mbǝti kǝrngɛ. Gǝri ata nkǝrɛ alai, 'Yati sǝ yarɛ ǝnda nam tǝ yar tara ngati tǝ gǝ ada mǝrti akwa Kafarnahum akwani akwa diyir ngǝ dzá.’ ”

24 # Yaw 4:44 “Yi ada gha ala gǝri dzǝri,” dzǝ lǝkǝma aka ndǝrɛ, “nabi adi nam tǝ ndǝ ada dlu tǝni akwa mǝlmǝrni wɛ. 25#1Kuh 17:1Ama dzǝri Yi ada nkǝrɛ ala gǝri, akwa zamanǝr nabi Iliya, mwahyi laka yarɛ adai nam tǝ salǝr dar tara kurntadzi hang akwa Izǝraila. Akwa sakatǝ yimi tara ngǝla ntǝɗi fá makǝr aka hya nkwa, ndǝ ka 'ya mi nam dzau akwa kǝlara vui akwa diyari. 26#1Kuh 17:8-16Ama ndǝ ta hyanti nabi Iliya ka dzǝ mwari adzǝ wala ndǝ duku akwa ntsa dar wɛ. Ama adzǝ kuɗǝghum laka akwa Zarifath nam ata diyir Sidaun ani tǝ ndǝ hya tǝni. 27#2Kuh 5:1-14Akwa sakar nabi Ilaisa kasuwar dǝlima adai hangkurari akwa Izǝraila, ama ndǝ ta mbǝti wala duku akwa ntsa dar wɛ—ɗiɗi Na'aman dzǝ nam mǝthlǝɓi ndǝr Siriya ani tǝ ndǝ tara mbǝti.”

28Sakatǝ ndzǝ nam akwa fǝr vǝkǝr sǝlai ni tara ngati ndǝr ni apani, ani sanga dar ɗǝfa dar ka sǝwa. 29Dar ka hyati ka ndǝrba Yɛsu abǝla ta kuta mǝlmɛ, dar ka mwari aka dza ata kǝra paya nam tǝ ndǝ tara tsati mǝlmǝ ni ati. Akuya ka dar mbǝyaghǝl tǝni ka dzǝ ɗǝghǝl. 30Ama dzǝ ka ntai ɓwanga dar dzǝ ka tǝrarni.

Yɛsu Kǝdlǝba Mambǝl nam Kulɗa akwa Dzá Ndɛ

(Mar 1:21-28)

31Antǝ dzǝ ka tǝra akwa Kafarnahum, mǝlmɛ laka akwa kuta Galili, ba dzǝ ka lǝkwa fǝr vǝkǝr sǝlai vǝr Sǝbdu dzǝ ka hyipǝ sǝ ala ndzi. 32#Mat 7:28,29Dar ka ndatǝdzi ata kǝra hyipǝrni, kadǝbar ndǝrǝrni aka wada. 33Akwa fǝr vǝkǝr sǝlai ni, sal laka adai nam aka mambǝl nam kulɗa.

Ani dzǝ ka ndǝri lǝlɛ aka dǝnarni sang ka nkǝrɛ, 34“Mǝ tǝ gǝ ada bara aka yar, Yɛsu ndǝr Nazarat? Gǝ si ka gǝ santa tǝ yar ya? Yi zǝndi wa ani gɛ—gǝ dza Ndǝ Kartǝ nǝr Hyal ni.”

35Yɛsu ntsǝha mambǝl nam kulɗa ni apǝri, “Ndzi kǝɗǝk! Sǝba akwa dzá ndǝ ni!” Antǝ mambǝl nam kulɗa ni ka haɓǝtǝ ndǝ ǝnari ka la dai akǝma dar sang ba dzǝ ka sǝba ka ngyar ndǝ ni kura dzǝ ta 'yanta tǝni.

36Sanga ndzi ka ndatǝdzi ba dar nkǝrɛ ala kǝma dar, “Dzǝli hyipǝ madi ǝni? Aka wada ba dǝna tǝ dzǝ ada tsau ala mambǝl yarɛ nam kulɗa antǝ dar ada sǝba!” 37Sǝni tǝ Yɛsu tara mǝrti ni, kǝ hau tǝ ndzǝ ada faya labarari akwa kǝlara vui akwa diyari.

Yɛsu Mbǝti Ndzǝ Hangkurari

(Mat 8:14-17; Mar 1:29-34)

38Yɛsu sǝba ka ngyar fǝr vǝkǝr sǝlai ni, dzǝ ka tǝra ahar Simaun. Angǝra mwalar Simaun ni dzǝ adi kalang wɛ, ɓwaɓwakur dzɛ ngǝti tǝni kulɗa. Dar kǝgyǝ Yɛsu ka dzǝ mbǝtǝ tǝni. 39Dzǝ mwari ka hyati kudzǝghɛ adzǝni dzǝ ka ngakǝr kǝrni alari ani dzǝ ka ntsǝha ɓwaɓwakur dzǝ ni ka dzǝ ngyar tǝni, kura aka santa saka dzǝ ɓwa-ɓwa ni ka ngyar tǝni, ani dzǝ ka hyati ka 'ya ala dar sǝr sǝmɛ.

40Sakatǝ tsǝtsi tara ɗi, ndzǝ si akǝr ala Yɛsu sapǝr ndzǝ nam kura kalang aka kǝlara dzǝli kasuwa, ba dzǝ ada tsǝkwar kǝlara ndɛ aka tsiyari ba dzǝ ka mbǝti tǝ dar sang. 41Mambǝl nam kulɗa yarɛ kǝ sǝba akwa dzá ndzǝ hangkurari dar ada lǝlɛ tǝ dar ada nkǝrɛ apǝri, “Gɛ ani Zǝr Hyal ni!” Ama Yɛsu tsǝhati tǝ dar, dzǝ ka kanti ala dar ndǝrɛ, kadǝbar dar zǝndi apǝri dzǝ ani Kǝrsti ni.

42Sakatǝ vǝri tara kuri ani Yɛsu ka ngyar mǝlmari tǝ dzǝ ka tǝra akwa vui nam kura waima akwa. Ndzi faya bara tǝni ba sakatǝ dar siya ɓui tǝni, dar 'ya whalɛ nam tǝ dar awa kanti alari kura dzǝ awa tǝra ka ngyar tǝ dar. 43Ama dzǝ nkǝrɛ ala dar, “Kǝ ndzai ntsakǝr alai kǝi nkǝr ala ndzi ndǝrǝr Hyal nam sǝɗa nǝr kuhyikur Hyal ni ala mǝlmɛ damwa yarɛ tsuwɛ, kadǝbar ka ǝni ani tǝ ndɛ tara hyanǝba tǝra.” 44Ani dzǝ ka lǝkǝma aka nkǝr ndǝrɛ akwa fǝr vǝkǝr sǝlai yarɛ akwa diyir Yahudiya.#4:44 Rǝbwar tsai laka yarɛ Galili.

अहिले सेलेक्ट गरिएको:

Luka 4: CKL

हाइलाइट

शेयर गर्नुहोस्

कपी गर्नुहोस्