Luka 17
17
Biku, Hamnta Dzǝri, Sǝr 'Ya
(Mat 18:6-7; 21:22; Mar 9:42)
1Yɛsu ka nkǝrɛ ala ndzǝr nuwurni: “Kǝ ndzai ntsakǝr tǝ sǝ yar nam ada hau ndzi akwa biku ada ɓui dzǝ, ama bwasam ala ndǝ nda nam atarni tǝ dar ada si. 2Ata ndzai kudzǝ alari ka ndǝ ɗalu tǝni akwa manda aka burɛ nam ngga tǝ ndǝ mbau akwa wuyari ta tǝ dzǝ awa hau duku akwa ntsa waza yarni ka 'ya biku. 3#Mat 18:15Ka gǝri wul kǝr gǝri.
“Ma zǝrma 'ya biku, ka gǝ ɗǝmnya alari, Ma dzǝ tubi, ka gǝ kyifǝnta alari. 4Ma dzǝ 'ya ala gǝ biku ka murfwɛ vǝr duku, ba ka murfwɛ tǝ dzǝ ada si adzǝ ngɛ ka nkǝrɛ, ‘Yi tubi,’ ka gǝ kyifǝnta alari.”
5Ndzǝr hya yarɛ ni ka nkǝr ala Thlaku, “Dzakti ala yar hamnta dzǝri!”
6Thlaku ka sǝnau ala dar, “Ma gǝri aka hamnta dzǝri nkyiɗǝ laka apa munyar mwalisa, gǝri ata mǝzi gha ala fur lita ni apǝri, ‘Ngutǝdzi ka gǝ ntsu dzi akwa manda nam ngga ni,’ ani dzǝ ata ngandǝrǝr gǝri.
7“Kǝtǝ apǝri pathlu akwa ntsa gǝri aka zǝr kǝi ada tsǝwhɛ wala ada ɓǝla tǝma alari. Dzǝ awa nkǝrɛ ala zǝr kǝiyari sakatǝ dzǝ si akwa ntaku, ‘Azǝrɛ ka gǝ ndzai ka gǝ sǝm sǝr sǝmɛ’? 8Dzǝ adi awa nkǝrɛ alari, ‘Ɗǝmhǝ alai sǝr sǝmǝr tǝhaku, ka gǝ dzǝkuti kǝrngɛ, ka gǝ wul tǝra ka Yi kurai sǝmɛ kaka sa; aghǝla ǝni gǝ yɛ ka gǝ sǝmɛ ba sa wɛ’? 9Dzǝ awa gwaditsǝni ala zǝr kǝi ni kadǝbar tǝ dzǝ 'yati sǝ nam tǝ ndǝ gha alari ka dzǝ 'ya ya? 10Ani apani gǝr yɛ, sakatǝ gǝri 'yati sanga sǝ nam tǝ ndǝ gha ala gǝri ka gǝri 'ya, ka gǝri nkǝrɛ, ‘Yar madar kǝi nam kura aka paida; Yar 'yati kǝthlǝr yar ɗiɗi.’ ”
Yɛsu Mbǝti Ndzǝr Kasuwar Pǝbai Kumɛ
11Vǝr laka tǝ dzǝ ada mwari atǝra akwa Ursalima, Yɛsu ka nu kǝla diyir Samariya aka Galili. 12Sakatǝ dzǝ angwa lǝkwa mǝlmǝ laka nam nkyiɗu, sǝli kumɛ nam aka pǝbai ka ɓui tǝni. Dar ka hyati tsu ɗar pǝɗǝm 13ba dar ka haɓǝti kuɗahu ngga ka kǝga, “Yɛsu, Thlakǝr kǝi, 'ya kǝtǝrdzi ala yar!”
14 #
Fǝr 14:1-32
Sakatǝ dzǝ wula tǝ dar, dzǝ ka nkǝrɛ, “Mwaramɛ ka gǝri tsanti kǝr gǝri ala fǝrist yarɛ.” Ani apa tǝ dar ada mwari, dar ka kǝtsǝntadzi.
15Pathlu akwa ntsa dar, sakatǝ dzǝ wula apǝri dzǝ kǝ mbǝtǝdzi, dzǝ ka ɓitasi, tǝ dzǝ ada hǝm Hyal aka kuɗahu nam aka dǝna. 16Dzǝ dla akǝma Yɛsu tǝ dzǝ ada usar tǝni—dzǝ tsuwɛ dzǝ ndǝr Samariya.
17Yɛsu ka yuwɛ, “Adi ndzǝ kumɛ tǝ ndǝ mbǝti tǝ dar wɛ? Ama ndzǝ mǝdlari? 18Ndɛ adi ɓui ndǝ duku tara ɓiti ka si ka hǝm Hyal wɛ, tar mǝthlǝɓi ǝni?” 19Antǝ Yɛsu ka nkǝrɛ alari, “Hyati ka gǝ tǝra; hamnta dzǝri ngɛ mǝrti tǝngɛ kalang.”
Siyir Kuhyikur Hyal
(Mat 24:23-28,36-41)
20Vǝr laka, Farisi yarɛ laka ka yu Yɛsu sakatǝ kuhyikur Hyal ata si, Yɛsu ka sǝnau ala dar, “Kuhyikur Hyal adi ata si akwa whal nam tǝ gǝri ata wula aka ntsɛ wɛ, 21wala tǝ ndzi ata nkǝrɛ, ‘Ani dza,’ wala ‘Anda dza wɛ,’ kadǝbar kuhyikur Hyal akwa ntsa gǝri.”
22Antǝ dzǝ nkǝrɛ ala ndzǝr nuwurni, “Saka ata si nam tǝ gǝri ata mauwɛ ka gǝr wula pathlu akwa ntsa vǝr yarɛ nǝr Zǝr Ndɛ, ama gǝri adi ata wula wɛ. 23Ndzǝ ata nkǝrɛ ala gǝri, ‘Anda dza!’ wala ‘Ani dza!’ Ta gǝri ta whui ka mwari ka dar. 24Akuya Zǝr Ndɛ akwa vǝrǝr ni ata ndzai apa tǝ makǝi, nam ada ngǝti paraku ata dzahyal ata dǝntar bwa ǝni ka la dǝntar ǝnda. 25Ama tangkǝma kǝ ndzai ntsakǝr tǝ dzǝ ata ɗar bwanaiyir sǝ yar hang ba ndzǝr zaman ǝni ata ngǝla tǝni.
26 #
Bad 6:5-8
“Tsu apa akwa zamanǝr Nuhu, ani tsu apani ata 'ya akwa vǝrǝr Zǝr Ndɛ. 27#Bad 7:6-24Ndzǝ ada sǝmɛ, ada sa, ada kǝl mwala ba pwarnta nkwa ala sal, har ka la vǝr nam tǝ Nuhu tara lǝkwa dzǝlkǝiyir yimi. Antǝ afafa ka baditsǝni si, ka santa tǝ dar sang.
28 #
Bad 18:20—19:25
“Ani tsu ahani akwa zamanǝr Lutu. Ndzǝ ada sǝmɛ ada sa, ada ɗǝlba ada ɗǝlnta, ada tsuwhɛ ba tsa kǝi. 29Ama akwa vǝr nam tǝ Lutu tara sǝba akwa Saudaum, u'u kaka barudu tara hyati atahyal ka pughǝl dzǝ ka mbanta tǝ dar sang.
30“Ata ndzai tsu apa ǝni ata vǝrǝr nam tǝ Zǝr Ndɛ ata tsantǝdzi. 31#Mat 24:17,18; Mar 13:15,16Vǝr ǝnda ta ndǝ nam ati ata kǝra fǝr nam tǝ kariyirni ambwa, ta dzǝ ta sǝgǝl ka fa tǝ dar mai. Ani tsu ahani ndǝ nam akwa fwaku, ta dzǝ ta ɓiti ka mima. 32#Bad 19:26Ɗǝngatamɛ mwalar Lutu! 33#Mat 10:39; 16:25; Mar 8:35; Luk 9:24; Yaw 12:25Kǝlara ndǝ nam ada bara ɗǝwa mpikari, dzǝ ada ɗalnta tǝni, ba kǝlara ndǝ nam ada ɗalnta mpikari, dzǝ ada ɗǝwar tǝni. 34Yi ada gha ala gǝri, akwa vǝr ǝnda, gǝri ata wula ndzǝ sǝɗɛ ada pi ata dǝgǝl duku; ndɛ ata kǝtǝ pathlu ka ngyar pathlu. 35Mwahyi sǝɗɛ ada hadlǝ uhyi atakǝmaduku; ndɛ ata kǝtǝ pathlu ka ngyar pathlu. [ 36Ndzǝ sǝɗɛ akwa fwaku, ndɛ ata kǝtǝ pathlu ka ngyar pathlu.]”
37Dar ka yuwɛ, “Amarɛ, Thlaku?”
Dzǝ ka sǝnau, “Vui nam tǝ tsaɗǝngu ati, akwanda tǝ kudǝgkivi yarɛ ata tsaɓtsǝnidzi.”
अहिले सेलेक्ट गरिएको:
Luka 17: CKL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2023 Seed Company in collaboration with Language Developers and Bible Translators Association
