Luka 16
16
Nggar Ndǝr Kǝthlǝr Nam Kura aka Dzǝri
1Yɛsu nkǝrɛ ala ndzǝr nuwurni: “Ndǝ bǝrba laka adai nam tǝ ndǝ ada nkǝrɛ apǝri nggar ndǝr kǝthlǝrǝrni ada gyalnta alari gabakarni. 2Ani dzǝ ka kǝga tǝni ka yuwɛ tǝni, ‘Sǝr mi tǝ Yi ada ngati ata kǝra gǝ ni? Azǝrɛ ka gǝ tsǝba alai sǝ yarɛ nam tǝ gǝ 'ya aka kari, kadǝbar gǝ tsu adi ata ndzai nggar ndǝr kǝthlǝrǝrna kǝra wɛ.’
3“Ani ba nggar ndǝr kǝthlǝr ni ka nkǝrɛ ala kǝrni, ‘Mi tǝ Yi awa 'ya kulini? Nda thlakǝrna angwa dlutsi kǝthlǝr akwa tsiyawai. Nda Yi adi aka dǝnar tsǝwhu wɛ, ka Yi ndzai ndǝr kǝgyǝ tsuwɛ Yi ada nga sǝlai— 4Yi zǝndi sǝ nam tǝ Yi ata 'ya, nam ma sakatǝ ndǝ kǝlba tǝra akwa kǝthlǝrna akwani, ndzi ata dlutsi tǝra alivi ahar dar.’
5“Ani dzǝ kǝga ndzǝ nam aka kimbǝlǝr thlakǝrni ni tǝ duku tǝ duku. Dzǝ yu ndǝ nam tangkǝma, ‘Yiɗau tǝ thlaku ada nu tǝngɛ?’
6“Dzǝ ka sǝnau, ‘Mpǝla kumthlani ntsisu nǝr mal.’
“Ndǝ ngga ni ka nkǝrɛ alari, ‘Nda kakadǝr ngɛ, ndzai bǝtu, ka gǝ rǝbwai kumthlani fwaɗu.’
7“Antǝ dzǝ ɓakta nkǝrɛ ala ndǝ nam nǝr sǝɗǝkur, ‘Gǝ tsuwɛ, yiɗau tǝ ndɛ ada nu tǝngɛ?’
“Dzǝ ka sǝnau, ‘Buhu kumthlani kumɛ nǝr lǝkama.’
“Dzǝ ka nkǝrɛ alari, ‘Nda kakadu ka gǝ rǝbwai buhu kumthlani ntsisu.’
8“Thlaku ni ka hǝmnti nggar ndǝr kǝthlǝr nam kura aka dzǝri ni kadǝbar ka bǝrkawakurni. Akuya ndzǝr dunya ǝni dar bǝrkawa akwa mwardzi kaka ndzǝr zamanǝr dar ni aka bǝrkawakur ɓwalta ndzǝr paraku. 9Yi ada nkǝrɛ ala gǝri, ka gǝri 'ya kǝthlǝr aka gabakar gǝri kadǝbar ka gǝri ɓui pazi yarɛ akwa dunya ni, kadǝbar saka nam tǝ gabaka ni kuri, ndɛ ata dlutsi tǝ gǝri akwa kǝi yarɛ ka gǝri ndzai kura kurkuri.
10“Kǝlara ndǝ nam aka dzǝrkur ata kǝra sǝ nam nkyiɗu ndǝ ata mbǝrsa aka dza ata kǝra sǝ nam ngga, ndǝ nam kura aka dzǝrkur akwa sǝ nkyiɗu, dzǝ ndǝ kura aka dzǝrkur akwa sǝ nam ngga. 11Ani ma apǝri ndɛ ta mbǝrsa aka gǝri akwa ngǝzǝ gabakar dunya ni wɛ, wa ani ata hau akwa tsiya gǝri gabaka nam dzǝri? 12Ma apǝri tsuwɛ gǝri ta 'ya aka dzǝrkur ata kǝra sǝr ndǝ laka wɛ, wa ani ata la gǝri sǝ nam nǝgǝri?
13 #
Mat 6:24
“Zǝr kǝi adi nam ata mǝzi ka 'yati kǝthlǝr ala thlakǝr kǝi pam-pam sǝɗɛ wɛ. Si ma dzǝ ngǝla pathlu ka dzǝ yiɗǝ pathlu, wala ka dzǝ tsu pathlu akwa kǝr ba ka dzǝ rutsǝni pathlari. Gǝ adi ata mǝzi kǝthlǝr ala Hyal gyapu aka kwapa wɛ.”
14Ndzǝr Farisi yarɛ ni, dar ndzǝ tara yiɗǝ kwapa, dar ngati sanga sǝ ǝni yarɛ ni ba dar ada dlǝ nkyaku ta Yɛsu. 15Dzǝ ka nkǝrɛ ala dar, “Gǝri ndzǝ nam ada tsanti kǝr gǝri apǝri gǝr ɗaku akǝma ndzi, ama Hyal zǝndi ɗǝfa gǝri. Sǝ nam tǝ ndzi vǝkǝr sǝlai alari dzǝr dzǝri, dzǝ sǝr hyangal akǝma Hyal.
Dzagi Ata Kǝra Sǝr Hyipɛ yarɛ
16 #
Mat 11:12,13 “Mabari Musa kaka labar nabi yarɛ ndǝ nkǝrnta har ka la sakar Yawhana. Tǝng ata saka ǝnda, tǝ ndǝ ada nkǝr ndǝrǝr Hyal nam sǝɗa ata kǝra kuhyikur Hyal, ba kǝlara ndɛ ada 'ya ka dzǝ ɓui lǝkwa tǝ dǝna. 17#Mat 5:18Wala ahani ata 'ya butu ala ati aka aghǝli ka dar 'ya kura adai ta tǝ duku akwa bwa nkyiɗu ta sang nǝr rǝbwa akwa mabariyir Musa awa ɗǝnta.
18 #
Mat 5:32; 1Kwa 7:10,11 “Kǝlara ndǝ nam tara ngǝla mwalarni dzǝ ka kǝtǝ damwa dzǝ ada 'ya badawikur, ba ndǝ nam tara kǝtǝ mwala nam tǝ ndǝ ngǝla dzǝ ada 'ya badawikur.
Bǝrba Laka aka Laizǝru
19“Ndǝ bǝrba laka adai ada ha kari dainau-dainau ba lilǝng nam ɗaku ba dzǝ ada nga sǝɗa ka sǝm sǝr sǝmɛ nam ɗaku tatang vǝri. 20Anyatǝfur ni ndǝ vi ndǝr kǝgyǝ laka nam tǝ thlǝmari Laizǝru, ndǝ nam tǝ sanga dzari aka sǝ ya-ya kaka lǝɓu. 21Dzǝ ada bara ka dzǝ ɗǝm sǝr sǝmɛ nam tara ɗǝɗi ata tɛbǝrǝr bǝrba ni, wala tǝ kǝya yarɛ ma ada si ka ntaɗǝ lǝɓu nam ata dzari.
22“Saka si ka 'ya tǝ ndǝr kǝgyǝ ni ka nti ba ndzǝr hyantǝr Hyal ka kǝtǝ tǝni ka mwari aka dza ata ngwama Ibrahim. Ndǝ nam bǝrba ni yɛ ka nti ndǝ ka harnta tǝni. 23Dzǝ akwa vui ndzaiyir ndzǝ ntǝnti, tǝ dzǝ ada sa bwanai, dzǝ ka haɓǝti kǝrari alǝti dzǝ ka wula Ibrahim pǝɗǝm aka Laizǝru ata ngwamari. 24Ani dzǝ ka kǝga tǝni, ‘Ba Ibrahim 'ya kǝtǝrdzi alai, ka gǝ hyanti Laizǝru ka dzǝ ntsu gulandari akwa yimi, ka dzǝ ntathlani alai kanyarawai, kadǝbar Yi ada ɗar bwanai akwa u'u ni.’
25“Ama Ibrahim ka kalaktsǝni alari, ‘Zǝrana, ka gǝ ɗǝngati apǝri akwa ndzaiyir ngɛ akwa dunya gǝ aka sǝ nam ɗaku, Laizǝru tsuwɛ, dzǝ sa bwanai, Ama kulini dzǝ ada nga sǝɗa ba gǝ akwa bwanai. 26Wala ahani akwa ɓwanga muri kaka gǝri kau laka nam dzǝgam zǝlang adai tǝ ndǝ mǝrti, ani ka ta ndzǝ nam ada bara ka hyati akwani ka mwari adzǝ gǝri kura dar awa mǝzi, wala ta ndǝ laka awa mǝzi ka hyati tǝbwa ǝnda ka ngǝmba ka dzǝ si adzǝ yar.’
27“Ani bǝrba ndari ka sǝnau, ‘Yi ada kǝgyǝ tǝngɛ, baba, ka gǝ hya Laizuru ala ndzǝr kǝiyir bana, 28kadǝbar Yi aka madar mama ntǝfu. Ka dzǝ mwar la dar mbari, ani ka ta dar yɛ ta si lǝkwa vui bwanai ǝni.’
29“Ibrahim ka sǝnau, ‘Dar aka Musa ba nabi yarɛ; ngyar ka dar sǝthlǝmɛ ala dar.’
30“ ‘A'a, baba Ibrahim,’ ndǝ dza, ‘ama ma ndǝ nam hyati akwa ntsa ndzǝ ntǝnti ani tara mwari dar ata tubi.’
31“Ibrahim ka nkǝrɛ alari, ‘Ma dar ta sǝthlǝmɛ ala Musa ba nabi yarɛ wɛ, dar adi ata lu wɛ wala ma ndǝ laka hyati akwa ntǝnti ma.’ ”
अहिले सेलेक्ट गरिएको:
Luka 16: CKL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2023 Seed Company in collaboration with Language Developers and Bible Translators Association
