Luka 15
15
Karabu ata Kǝra Tǝma Nam Tara Sa
(Mat 18:12-14)
1 #
Luk 5:29,30 Ndzǝr dlu tsǝmɛ kaka ndzǝr biku nam dzau-dzau dar tsaɓtsǝnidzi adzǝ Yɛsu tǝ dar ada nga tǝni. 2Ama ndzǝr Farisi kaka malǝmǝr mabari yarni, ka baditsǝni whuwhuni tǝ dar ada nkǝrɛ apǝri, “Ndǝ ni, dzǝ ada dlu ndzǝr biku yarɛ har ma dar ada sǝm sǝr sǝmɛ atakǝmaduku!”
3Antǝ Yɛsu ka nkǝrɛ ala dar karabu ǝni apǝri: 4“Ma ndǝ laka akwa ntsa gǝri aka tǝmarni kumthlani, antǝ pathlu akwa ntsa dar ka sá. Dzǝ adi ata ngyar mǝdlǝthlani kapu mǝdlɛ nda ata babal akwa vui ɓǝla ka dzǝ mwar bara duku nam tara sa nda har ka dzǝ ɓui tǝni wɛ? 5Sakatǝ dzǝ ɓui tǝni, dzǝ ata kadlǝtǝ tǝni ata babadlari ka dzǝ si aka dza, tǝ dzǝ ada tsan kutsari. 6Ma dzǝ sivi, ka dzǝ tsaɓtsǝni pazǝrni yarɛ, kaka ntǝwhulɛ ka dzǝ gha ala dar, apǝri mbanamǝ tǝra aka ‘kutsari, kadǝbar Yi ɓui tǝmarna nam tara sa.’ 7Yi ada nkǝrɛ ala gǝri apǝri tsu akwa whal ǝni ndɛ ata kutsari atahyal ata kǝra ndǝr biku duku nam tara tubi, kwatsǝni ata kǝra mǝdlǝthlani kapu mǝdlɛ ndzǝ nam kal-kal ndzǝ nam kura ada bara tubi.”
Karabu ata Kǝra Kwapa Tara Sa
8“Kǝna mwala madi ma dzǝ aka kwapar lipǝla kumɛ ba pathlu ka ɗi. Dzǝ adi ata ngiti u'u, ka dzǝ tsarba kǝi ni sang ka dzǝ bara aka hankal har ka dzǝ ɓui tǝni wɛ? 9Ma apǝri dzǝ ɓui tǝni, ka dzǝ tsaɓtsǝni pazǝrni kaka ntǝwhulǝrni atakǝmaduku ka dzǝ gha ala dar apǝri, ‘Mbanamǝ tǝra aka kutsari, akuya ka Yi ɓui kwaparna nda tara sa ni.’ 10Ani ahani tǝ Yi ada gha ala gǝri, sǝr kutsari ala ndzǝr hyantǝr Hyal, ata kǝra ndǝr biku pathlu tara tubi.”
Karabu ata Kǝra Zǝr Nam Tara Sa
11Dzǝ ɓakta gha ala dar, “Ndǝ ɓui ndǝ laka nam aka madar sǝli sǝɗɛ. 12Ani ba nam nkyiɗari ka nkǝrɛ ala atǝgǝri apǝri, ‘Babá, alai nǝbwarna akwa sǝ nam tǝ gǝ akǝri.’ Ani ba atǝgǝri ka ndǝghǝi ala dar sǝ nam tǝ dzǝ akǝri akwa ɓwanga dar.
13“Aghǝla vǝr nkyiɗǝ laka, ani ba ndǝ nam nkyiɗǝ ndari ka fati sanga kariyirni, ka ngǝzǝ whalǝrni atǝra akwa mǝlmǝ nam pǝɗǝm. Akwanda dzǝ sǝzanta kariyirni akwa whal 'ya sǝ kalalamkur. 14Sakatǝ dzǝ santa sanga su, ani mi ka 'ya akwa di ndari, ba dzǝ ka lǝkwa ngudikur. 15Dzǝ mwar ka kǝɓai aka zǝr mǝlmǝ ndari, dzǝ tsuwɛ dzǝ ka hau tǝni akwa ɓǝla gadu. 16Har tǝ dzǝ ada bara ka dzǝ ghǝiyati kutari aka tsǝfǝr kwasǝr gadu, ama ndǝ ta lar wɛ.
17“Sakatǝ dzǝ si akwa hankalari dzǝ ka nkǝrɛ, ‘Bwasam alai! Yidau akwa ntsa madar kǝiyir bana nam aka sǝr sǝmɛ apa hai adzǝ dar! Nda yɛ akwani tǝ mi angwa tsi tǝra! 18Yi ata hyati, ka Yi mwari adzǝ bana, ka Yi gha alari apǝri, “Ba, Yi 'ya ala ndǝ nam atahyal biku, ba Yi ɓakta sǝwati ala gǝ. 19Yi ta mǝzi ka ndǝ ɓakta ka tǝra tǝ zǝr ngɛ wɛ; mǝrti tǝra apa pathlu akwa ntsa zǝr kǝiyir ngɛ.” ’ 20Ani dzǝ ka hyati, ka si adzǝ atǝgǝri.
“Ama tsu tǝ dzǝ pǝɗǝm, atǝgǝri ka wula tǝni ba dzǝ ghǝi aka kalhur akuya dza; dzǝ ka whui alǝngui adzǝ zǝrǝrni, ka thlaba tǝni, tǝ dzǝ ada sǝsǝm tǝni.
21“Ani ba zǝrǝrni ka nkǝrɛ alari apǝri, ‘Ba, Yi 'ya ala ndǝ nam atahyal biku, Yi ɓakta sǝwati ala gǝ. Yi ta mǝzi ka ndǝ ɓakta ka tǝra tǝ zǝr ngɛ wɛ.’
22“Ama atǝgǝri ka nkǝrɛ ala madar kǝiyirni yarɛ apǝri, ‘Mwaramɛ ka gǝri si aka lǝkutu nam dangaram, ka gǝri hadzǝ alari ka gǝri hati alari kulum ata gulandari ba ɓǝɓai ata thlǝlari. 23Ka gǝri si aka thla nam tǝkǝsi-tǝkǝsi, ka ndǝ thlakǝr wuya ka muri ɗɛ ka muri 'ya kutsari. 24Akuya ka zǝrna nam tara nti, ama dzǝ ɓakta si aka mpikɛ, watsi dzǝ sa, ama kulini dzǝ ɓuidzi.’ Ani ba dar ka lǝkǝma aka 'ya kutsari.
25“Akwa saka ndari tsuwɛ, zǝrǝrni nam nggari abǝla akwa fwaku, tǝ dzǝ angwada si, kudzǝghɛ adzǝ kǝi, ani ba dzǝ ata nga ndɛ ada tsa su kaka fǝlɛ. 26Ani dzǝ ka kǝga pathlu akwa ntsa zǝr kǝi yarari dzǝ ka yu tǝni sǝ nam ada mwari. 27Dzǝ ka nkǝrɛ alari apǝri, ‘Zǝrma nda ani tara si, ba Babar ngɛ ka ngǝti zǝr thla nam tǝkǝsi-tǝkǝsi ka thlakǝr wuya. Kadǝbar dzǝ ɓui tǝni tǝ dzǝ si lapiya kalang.’
28“Ama zǝr nam ngga ndari ɗǝfar ka sǝwa dzǝ ka ngǝla livi, ani atǝgǝri ka sǝba tǝ kǝgyǝ kǝr akari. 29Ama dzǝ ka sǝnau ala atǝgǝri dzǝ ka nkǝrɛ apǝri, ‘Wul hangkur fá yarni nam tǝ Yi ada vǝkǝr sǝlai ala gǝ. Yi ta saga ɓǝlnta mabariyir ngǝ wɛ. Wala ahanarma, gǝ ta saga lai wala zǝr aba nam tǝ yar awa 'ya kutsari vwam kaka pazǝrna yarɛ wɛ. 30Ama sakatǝ zǝr ngǝ ni nam tara kurai kariyir ngɛ ala zawar yarɛ ka sivi, gǝ ata thlakǝr wuya ala zǝr thla nam tǝkǝsi-tǝkǝsi alari!’
31“Ani ba atǝgǝri ka nkǝrɛ alari apǝri, ‘Zǝgǝna, ai, tatang vǝr mwa vwam aka gǝ, kǝlara sǝ nam tara ndzai nana dzǝ nǝngɛ. 32Kǝ ndzai ntsakǝr ka ndǝ 'ya kutsari ba mwapukur ɗǝfu, kadǝbar zǝrma ǝni nam tara sa, ama kulini dzǝ ɓuidzi.’ ”
अहिले सेलेक्ट गरिएको:
Luka 15: CKL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2023 Seed Company in collaboration with Language Developers and Bible Translators Association
