Luka 14
14
Yɛsu akwa Kǝiyir Ndǝr Farisi Laka
1Vǝr Sǝbdu laka, Sakatǝ Yɛsu mwari ahar nggar ndzǝr farisi laka apǝri ka dzǝ sǝm sǝr sǝmɛ, ndzǝ putǝ ntsɛ ata dza. 2Ani nda ndǝ laka aka kasuwar dzǝ mbimbihǝi si akǝmari. 3Yɛsu ka yuwɛ ndzǝr Farisi ba ndzǝ masǝku akwa mabari ni, “Kǝ ndzai kal-kal ya ka ndǝ mbǝti ndɛ vǝr Sǝbdu kǝna a'a?” 4Ama dar ka ndzi kǝɗǝk. Ani Yɛsu ka ngǝzi ndǝ ni, dzǝ ka mbǝti tǝni, ba dzǝ ka nkǝrɛ alari ka dzǝ tǝrarni.
5 #
Mat 12:11
Aghǝla ǝnda dzǝ ka yu tǝ dar, “Wa akwa ntsa gǝri nam ma dzǝ aka zǝr wala thla tara ɗu akwa kyagha vǝr Sǝbdu kura dzǝ awa kǝlba tǝni bǝtǝbǝtu?” 6Ba dar adi aka sǝ tǝ dar awa gha wɛ.
7Sakatǝ Yɛsu tara wula whal nam tǝ ndzǝ nam tǝ ndǝ kǝga tǝ dar ka hyirdi ni tara tsarba vui ndzai nam ngga-ngga, dzǝ ka gha ala dar karabu ǝni, 8#Kar 25:6,7“Ma ndǝ laka kǝga tǝngɛ ka gǝ si akwa vui gyali kǝldzi, ta gǝ ta ngwatiya ndzai ata sǝr ndzai nam dangaram, akuya bisu ndǝ kǝga ndǝ nam tara kwatsǝni tǝngɛ aka nggakur. 9Ma ahani, ndǝ nam tara kǝga tǝ gǝri gyapu ni dzǝ ata si ka nkǝrɛ ala gǝ apǝri, ‘La vui ndzai ni ala ndǝ ni,’ antǝ, sǝr sǝlai, gǝ ata sǝgǝl ka mwari ata sǝr ndzai nam nkyiɗu ta sang. 10Ama ma apǝri ndǝ kǝga tǝngɛ akwa vui wudzǝr, ka gǝ ndzai akwa sǝr ndzai nam nkyiɗu, ma apǝri thlakǝr wudzǝr ni si dzǝ ata nkǝrɛ ala gǝ, ‘Pazi, azǝrɛ ka gǝ ndzai akwa vui ndzai nam ɗaku.’ Antǝ gǝ ata ɓui nggakur akǝma sanga ndzǝ nam ada ndzai akwanda tǝ gǝri vwam. 11#Mat 23:12; Luk 18:14Kǝlara ndǝ nam ada hǝm kǝrni, ndǝ ata tǝrghǝl tǝni. Ndǝ nam ada tǝrghǝl kǝrari, ndǝ ata haɓǝti tǝni.”
12Antǝ Yɛsu ka nkǝrɛ ala ndǝ nam tara kǝga tǝni ni, “Ma apǝri gǝ ata kǝga ndɛ ka sǝm sǝr sǝmɛ wala gyali, ta gǝ ta kǝga pazǝr ngɛ yarɛ, madar ma yarɛ, wala ndzǝliyir ngɛ, wala ntǝwhulǝr ngɛ yarɛ nam bǝrba, ta dar yɛ ka dar kǝga tǝngɛ ka dar nkyinta ala gǝ. 13Ama ma apǝri gǝ ata kǝga hyirdi, ka gǝ kǝga ndzǝ nam ngudi, kaka kulang, kaka ngurngudi, kaka Ghyang yarɛ. 14Gǝ ata ɓui barka, akuya ka dar adi aka whal nam tǝ dar awa nkyinta ala gǝ wɛ, tar ka ndǝ nkyinta ala gǝ vǝr hyatǝr ndzǝ nam whuya yarɛ.”
Karabu ata Kǝra Wudzǝr Nam Ngga
15Sakatǝ pathlu akwa ntsa dzǝ nam ata tɛbǝr kaka dza ngati ǝni, dzǝ ka nkǝrɛ ala Yɛsu, “Kutsari aka ndǝ nam pathlu akwa ntsa ndzǝ nam ata sǝm sǝr sǝmɛ akwa kuhyikur Hyal.”
16Yɛsu nkǝrɛ alari, apǝri, “Ndǝ laka tara vi vǝr gyaliyirni, ba dzǝ ka ghǝgha ala ndzi hangkurari. 17Sakatǝ vǝr gyali ndari si, ani dzǝ ka hya zǝr kǝiyirni ka dzǝ gha ala ndǝ nam tǝ dzǝ kǝga tǝ dar, ‘Azǝramɛ, akuya kǝlara su kǝ ɗǝmhǝdzi kulini.’
18“Ani ba sanga dar ka si aka sǝr nkǝrɛ, nǝr tangkur ka nkǝrɛ alari apǝri, ‘Yi ɗǝlba fwaku kulini Yi ada bara kǝi lǝka wula. Yi ada kǝgyǝ tǝngɛ ka gǝ ngyar tǝra.’
19“Ani ba ndǝ damwa ka nkǝrɛ, ‘Yi ɗǝlba thlar tsǝwhɛ dar kumɛ, Yi ada bara ka Yi salami tǝ dar. Yi ada kǝgyǝ tǝngɛ ka gǝ ngyar tǝra.’
20“Ndǝ laka tsuwɛ ka yu tǝni apǝri, ‘Yi kǝtǝ mwala kadǝbar ǝni Yi adi ata mǝzi mwar wɛ.’
21“Zǝr kǝi ndari ka si ka nkǝrnta ala thlakǝrni sǝ nam tǝ dar gha alari. Ani thlakǝrni ɗǝfar ka sǝwa, dzǝ ka nkǝr ala zǝr kǝiyirni apǝri, ‘Lǝba bǝtu, ka gǝ nu kǝra whalɛ akwa kuta mǝlmǝ ni, kaka giwa-giwa, ka gǝ fatsi alai ndzǝ nam ghǝrghǝri yarɛ kaka ngurngudi, kaka ghyang, kaka kadal yarɛ.’
22“Ani ba zǝr kǝi ndari ka nkǝrɛ apǝri, ‘Thlaku, sǝ nam tǝ gǝ tara gha sang Yi kurai, ama har kulini vui tsu adai.’
23“Ani ba thlakǝr gyali ndari ka nkǝr ala zǝr kǝi ndari, ‘Lǝba ka gǝ nu giwa-giwa, kaka kǝra whalǝr di nam nkyǝnkyiɗu yarɛ, ka gǝ zǝɓatsi ndzi ka dar si, kadǝbar ka ndǝ ghǝiyati kǝiyirna. 24Yi ada nkǝr ala gǝri, wala ndǝ duku akwa ntsa ndzǝ nam tǝ Yi tara kǝga kǝmani nam ata sivi aharna ka dar ɗar sǝɗakur gyali ni adi wɛ.’ ”
Bwanai Nam akwa Nu Yɛsu
25Akwa saka nam tǝ tsaɓtsǝnidzǝr ndzi hang dzǝr dzǝri ada nu tǝni. Ani ba dzǝ ka mbalti kǝmari ka nkǝrɛ ala dar, 26#Mat 10:37“Kǝlara ndǝ nam angwa si adzǝra, ma dzǝ ta yiɗǝ tǝra ka kwatsǝni atǝgǝri ba angǝri, mwalarni ba madarni, madar angǝri ba nkwaiyir angǝri—wala mpikari wɛ, dzǝ adi ata mǝzi ndzai ndǝr nuwurna wɛ.” 27#Mat 10:38; 16:24; Mar 8:34; Luk 9:23Kǝlara ndǝ nam kura ta kǝtǝ undzum kadlǝkadlǝrni ka nu tǝra, dzǝ adi ata mǝzi ndzai ndǝr nuwurna wɛ.
28“Ka kǝtǝ apǝri ndǝ laka akwa ntsa gǝri ada bara ka dzǝ tsa kǝiyir sara aka nam ati, tangkǝma si ma dzǝ ndzai ka tsǝba sǝ nam tǝ dzǝ ata tsai, ka dzǝ wula wala dzǝ aka gǝna nam ata mǝzi kurai alari kǝthlǝrari ya? 29Ta dzǝ ta ndzai apǝri aghǝla tǝ dzǝ kurtaka piyartsǝni tsa kǝiyari, ka kura dzǝ awa mǝzi kurai pǝrta, nam tǝ sanga ndzǝ nam tara wula, ka dar baditsǝni kǝli alari, 30ka dar faya nkǝrɛ alari apǝri, ‘Wulamɛ ndǝ ni, dzǝ baditsǝni tsa kǝi ama dzǝ ta mǝzi kurai pǝrta wɛ.’
31“Kǝna kuhyi madi, nam tǝ ndzǝrni angwa lǝka mpa aka kuhyi damwa, kura dzǝ awa ndzai tangkǝma ka dzǝ 'ya sawari kwataku, ka dzǝ wula, wala ndǝ nam aka ndzi kumthlani kumɛ ka sǝɗǝthlani awa mǝzi kǝltsǝni mpa aka ndǝ nam aka ndzi kumthlani sǝɗǝthlani? 32Ma apǝri dzǝ adi awa mǝzi wɛ, yau, tsu tǝ dzǝ pǝɗǝm ka dzǝ hya ndǝr hya, ka dzǝ yuti whalǝr ndzai lapiyakur. 33Ani ahani ma dzá, kǝlara ndɛ akwa ntsa gǝri ma dzǝ ta sǝntá sang sǝ nam tǝ dzǝ akǝr wɛ, dzǝ adi ata mǝzi ndzai ndǝr nuwurna wɛ.”
34“Kagǝla dzǝ sǝ nam ɗaku, ama ma kagǝla kǝ ndǝghǝi aka sǝɗakurni, aka sǝr mi tǝ ndɛ awa dzǝgu tǝni? 35Dzǝ adi aka paida wɛ akwa fwaku, wala ka gwaɓa, si ka ndǝ punta tǝni ɗiɗi.
“Kǝlara ndǝ nam aka thlǝmǝr ngati ka dzǝ ngati.”
अहिले सेलेक्ट गरिएको:
Luka 14: CKL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2023 Seed Company in collaboration with Language Developers and Bible Translators Association
