Luka 18
18
Karabu ata Kǝra Kuɗǝghum ba Lǝkali
1Antǝ Yɛsu nkǝrɛ ala ndzǝr nuwurni karabu laka ka dzǝ tsanti ala dar apǝri kal-kal ka dar 'ya aduwa kǝlara saka ta dar ta ngyar. 2Dzǝ nkǝrɛ: “Akwa mǝlmɛ laka ndǝ ɓui ndǝr 'ya haka laka nam kura ada hyivǝr Hyal, wala damitsǝni kǝrni ka ndzi. 3Ba akwa mǝlmǝ ndari kuɗǝghum laka adai nam ada si adzǝni tatang aka kǝgyɛ, tǝ dza ada nkǝrɛ alari apǝri, ‘Ka gǝ 'ya kal-kal alai ata kǝra bǝrkwɛ tǝ dǝgunmarna si akǝr ni.’
4“Akwa baditsǝniyari dzǝ ngǝla. Ama ata dǝnta dzǝ nkǝrɛ ala kǝrni, ‘Wala tǝ Yi adi ada hyivǝr Hyal wala damitsǝni kǝrna ka ndzǝ wɛ, 5ama kadǝbar tǝ kuɗǝghum ni dzǝ damitsǝni tǝra Yi ata 'ya ka Yi wula apǝri Yi 'ya alari kal-kal, ani ka ta dzǝ ta ghǝrani tǝra aka si tatang!’ ”
6Antǝ Thlaku ni ka nkǝrɛ, “Ngatamɛ sǝ nam tǝ ndǝr 'ya haka ni nam kura aka dzǝrkur ni ma tara gha. 7Ma apani, Hyal adi ata 'ya sǝ nam kal-kal ala ndzǝrni nam tǝ dzǝ dza tsarba, nam ada tuwa alari vǝri aka tsǝtsi wɛ? Dzǝ awa santa saka akwa mbana tǝ dar ya? 8Yi ada nkǝrɛ ala gǝri, dzǝ ata wuti apǝri dar ɓui sǝ nam kal-kal ba kura aka santa. Ama dzá sakatǝ Zǝr Ndɛ si, dzǝ ata ɓui hamnta dzǝri akwa dunya ya?”
Karabu ata Kǝra Ndǝr Farisi aka Ndǝr Dlu Tsǝmɛ
9Ala ndzǝ nam tara mbǝrsa aka kǝr dar apǝri dar ndzǝ nam kal-kal ba dar rutsǝni mambiya ndzi, Yɛsu nkǝrɛ karabu ǝni: 10“Ndzǝ yarɛ laka sǝɗɛ tara lǝkwa fǝr Hyal ka 'ya aduwa, pathlu ndǝr farisi, ba pathlari dzǝ ndǝr dlu tsǝmɛ. 11Antǝ ndǝr Farisi nda ka hyati ka 'ya aduwa ala kǝrni tǝ dzǝ nkǝrɛ: ‘Hyal, Yi usar tǝngɛ, akuya ka Yi adi apa ndzǝ yarɛ damwa wɛ— ndzǝ nam ada fa whalɛ, ndzǝ nam ada 'ya kulɗakur, ndzǝr 'ya badawikur— wala ma apa ndǝr dlu tsǝmɛ ni. 12Kǝlara kasuku Yi ada 'ya asam ka sǝɗɛ ba kǝlara sǝ nam tǝ Yi ɓui Yi ada kǝlba pathlu akwa ntsa kumɛ.’
13“Ndǝr dlu tsǝm nda tsuwɛ dzǝ ada hyati ata ngwam pǝɗǝm, dzǝ ta yiɗɛ tǝ dzǝ haɓǝti kǝrari atahyal wɛ, dzǝ ada tsa kǝrathlari, tǝ dzǝ ada nkǝrɛ, ‘Hyal, ka gǝ 'ya kǝtǝrdzi alai akuya ka Yi ndǝr biku.’
14 #
Mat 23:12; Luk 14:11 “Yi ada nkǝrɛ ala gǝri apǝri ndǝ ni, dzǝ tǝrarni alivi kal-kal akǝma Hyal ta dukwa ndǝ ǝnda. Akuya kǝlara ndǝ nam ada haɓǝti kǝrni ndɛ ata tǝrghǝl tǝni, ndǝ nam ada tǝrghǝl kǝrari ndǝ ata haɓǝti tǝni.”
Yɛsu Vǝkǝr Barka ala Madausai
(Mat 19:13-15; mar 10:13-16)
15Ndzǝ ada si aka madausai nam nkyǝnkyiɗu ala Yɛsu akuya ka dzǝ tsǝkwar tǝ dar. Sakatǝ ndzǝr nuwurni wula, dar ka ɗǝmnya ala dar. 16Ama Yɛsu ka kǝgahǝ madausai yarni adzǝni dzǝ ka nkǝrɛ, “Ngyaramɛ ka madausai nam nkyǝnkyiɗu ka dar si adzǝra, ta gǝri ta kanti ala dar. Kadǝbar kuhyikur Hyal ni nǝr dzǝli ǝni yarni. 17Dzǝr dzǝri Yi ada nkǝrɛ ala gǝri, kǝlara ndǝ nam kura ta dlu kuhyikur Hyal apa madausai yarni, dzǝ adi ata saga lǝkwa wɛ.”
Ndǝ Ngga Bǝrba Ni
(Mat 19:16-30; Mar 10:17-31)
18Ndǝ laka nam ngga ata kǝra ndzi ka yu tǝni, “Malǝm nam ɗaku, sǝr mi tǝ Yi awa 'ya ka Yi ɓui mpikǝ nam kura kurkuri?”
19Yɛsu ka sǝnau alari, “Kami tǝ gǝ kǝga tǝra tǝ ndǝ nam ɗaku? Ndǝ nam ɗaku adi wɛ— Si Hyal ɗiɗi. 20#Sǝb 20:14; Mab 5:18; Sǝb 20:13; Mab 5:17; Sǝb 20:15; Mab 5:19; Sǝb 20:16; Mab 5:20; Sǝb 20:12; Mab 5:16Gǝ zǝndi tsau yarɛ: ‘Ta gǝ ta 'ya badawikur, ta gǝ ta tsa ndɛ, ta gǝ ta hǝlɛ, ta gǝ ta ndzai sakǝidar hawi, ka gǝ vǝkǝr sǝlai ala ba aka ma.’”
21Ani dzǝ ka nkǝrɛ, “Sanga sǝ yarɛ ni Yi ɓǝlati tǝng tǝ Yi tsu waza.”
22Sakatǝ Yɛsu tara ngati ahani, dzǝ ka nkǝrɛ alari, “Har kulini su pathlu mbi ala gǝ. Ka gǝ ɗǝgǝlnta sanga sǝ nam tǝ gǝ akǝri, ka gǝ ndǝghǝnta ala ndzǝ nam ngudi yarɛ, gǝ ata ɓui gabaka hang atahyal, aghǝla ǝni ka gǝ siya nu tǝra.”
23Tǝ dzǝ ngati ahani, ani ɗǝfar ka sǝwa, akuya ka dzǝ bǝrba. 24Yɛsu ka wul tǝni ba dzǝ ka nkǝrɛ, “Ata 'ya dzau ala ndzǝr gabaka ka dar lǝkwa kuhyikur Hyal! 25Dzǝri, ata ndzai butu ala dlǝgwam ka dzǝ lǝba ata gulǝr yibǝra, ta tǝ ndǝ bǝrba awa lǝkwa kuhyikur Hyal.”
26Ndzǝ nam tara ngati ndǝr ǝni dar ka yuwɛ, “Ma apǝri apani, wa ani ata ɓui mbatǝdzi dzá?”
27Yɛsu ka sǝnau, “Sǝ nam tara kwatsǝni dǝnar ndɛ, dzǝ ani sǝ nam butu ala Hyal.”
28Bitrusu ka nkǝrɛ alari, “Nda yar ngyar sanga sǝ nam tǝ yar akǝr, ka nu tǝngɛ!”
29Yɛsu ka nkǝrɛ ala dar, “Yi ada gha ala gǝri dzǝri, ndɛ adi nam ata ngyar kǝi, wala mwalarni, wala madar angǝri, wala ndzǝr yarni, wala madarni, akuya ka kuhyikur Hyal 30kura dzǝ awa mǝzi ɓui ɗǝru nam hangkurari akwa zaman ǝni, ba akwa zaman nam ata si, mpikǝ nam kura kurkuri wɛ.”
Yɛsu Dzakti Ndǝrɛ ata Kǝra Ntǝrni
(Mat 20:17-19; Mar 10:32-34)
31Yɛsu ka kǝgaba kum kapu sǝɗɛ yarni tǝ ngwam dzǝ ka nkǝrɛ ala dar, “Nda muri ata tǝra lǝti akwa Ursalima, ba sanga sǝ nam tǝ nabi yarɛ rǝbwa ata kǝra Zǝr Ndɛ, ata ghǝiyabadzi. 32Akuya ndɛ ata ɓǝlai tǝni ala ndzǝ kura Yahudi. Dar ata gura tǝni, ngǝngǝl tǝni, kifǝ nkyǝli ata dza, tasǝ tǝni ka tsi tǝni. 33Ata vǝr nǝr makǝrkur dzǝ ata hyati kadamwa.”
34Ndzǝr nuwurni ta ngaba duku akwa ntsa sǝ yarni wɛ, kadǝbar ndǝr ǝnari dzǝ ɗǝwa-ɗǝwa ala dar, dar ta zǝndi sǝ nam tǝ dzǝ ada nkǝrɛ wɛ.
Yɛsu Mbǝti Ghyang ada Kǝgyɛ
(Mat 20:29-34; Mar 10:46-52)
35Tǝ Yɛsu sǝngui kudzǝghɛ adzǝ Dzarikau, ani nda ghyang laka ada ndzai adzǝ nya whalɛ ada kǝgyɛ. 36Sakatǝ dzǝ ngati hangkur ndzi ada kwatsǝni, dzǝ ka yuwɛ sǝr mi ada 'ya. 37Ani dar ka nkǝrɛ alari, “Yɛsu ndǝr Nazarat ani ada kwatsǝni.”
38Dzǝ ka kǝga, “Yɛsu Zǝr Dauda, 'ya kǝtǝrdzi alai!”
39Ndzǝ nam akǝma ada ɗǝmnya alari “Ndzai kǝɗǝk.” Ama dzǝ dzakti haɓǝti kuɗahari ngga-ngga, “Zǝr Dauda, 'ya kǝtǝrdzi alai!”
40Yɛsu ka hyati, dzǝ ka gha apǝri ka ndǝ si aka dza alari. Sakatǝ dzǝ sǝngui kudzǝghɛ, Yɛsu ka yu tǝni, 41“Mǝ tǝ gǝ ada bara ka Yi 'ya ala gǝ?”
Dzǝ ka sǝnau, “Thlaku, Yi ada bara ka Yi wula su.”
42Yɛsu ka nkǝrɛ alari, “Ngyar ka gǝ wula su, hamnta dzǝri ngɛ kǝ mbǝti tǝngɛ.” 43Tsu ata sakari dzǝ baditsǝni wula su ba dzǝ nuti Yɛsu, tǝ dzǝ ada hǝm Hyal. Sakatǝ sanga ndzǝ wula apani dar yɛ dar ka hǝm Hyal.
अहिले सेलेक्ट गरिएको:
Luka 18: CKL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2023 Seed Company in collaboration with Language Developers and Bible Translators Association
