Luka 13
13
Tubi Wala Santadzi
1Ata saka nda ndzǝ yarɛ laka adai nam tara nkǝrɛ ala Yɛsu ata kǝra ndzǝr Galili yarɛ nam tǝ Pǝlatus tara hau tǝ ndǝ kurnta tǝ dar sakatǝ tǝ dar ada hamnta kǝdlǝrsu ala Hyal. 2Yɛsu ka sǝnau ala dar, “Gǝri ada ɗǝnga apǝri ndzǝr Galili yarni, dar kwatsǝni sanga ndzǝr Galili aka biku ya, kadǝbar tǝ dar sa bwanai akwa whal ǝni? 3Yi ada gha ala gǝri, adi ahani wɛ! Ama tar ma gǝri tubi, ma adi ahani wɛ gǝri yɛ sang gǝri ata santadzi apa dar. 4Wala kum kapu ntsisu yarnda nam tara nti sakatǝ fǝr nam ngga akwa Silaum tara dlakǝrdzi ala dar—gǝri ada ɗǝnga apǝri dar kwatsǝni sanga ndzǝ nam ada ndzai akwa Ursalima biku ya? 5Yi ada gha ala gǝri, adi ahani wɛ! Ama tar ma gǝri tubi, ma adi ahani wɛ gǝri yɛ sang gǝri ata santadzi apa dar.”
6Antǝ dzǝ nkǝrɛ ala dar karabu apǝri: “Ndǝ laka aka fur kanda, tǝ dzǝ ntsi akwa fwakǝrni, ba dzǝ ka mwari ka bara madar ati, ama dzǝ ta ɓui wɛ. 7Ani dzǝ ka nkǝrɛ ala ndǝ nam ada wul fwaku ǝnda ni, wulɛ, asǝna ‘Fá makǝr tǝ Yi ada si ka bara madar ata fur kanda ni, ama Yi adi ada ɓui wɛ. Ka ndǝ dlǝnta tǝni! Kami tǝ dzǝ ada sǝnya dai ɓǝrtu?’
8“Ani dzǝ ka kalaktsǝni alari, ‘Thlaku, ngyar tǝni nǝr fá pathlu alǝkǝma, ka Yi latǝ kugivari, kǝi pukǝr alari gwaɓa. 9Ma apǝri dzǝ yai madar fá nam ata si datsi, ama ma dzǝ ta yai madar wɛ, ka gǝ dlǝnta tǝni.’ ”
Yɛsu Mbǝti Mwala Mǝtsǝgum Vǝr Sǝbdu
10Vǝr laka Yɛsu ada tsǝlɛ akwa fǝr vǝkǝr sǝlai vǝr Sǝbdu, 11ani nda mwala laka nam tǝ mambǝl kulɗa mǝrti tǝni kura kalang nǝr fá kum kapu ntsisu. Nam tǝ dzǝ ngaidzi, dzǝ adi ada mǝzi ka munta kǝrni wala nkyiɗu laka wɛ. 12Sakatǝ Yɛsu tara wula tǝni, dzǝ ka kǝgati tǝni asi akǝma dzǝ ka nkǝrɛ alari, “Mwala, ndǝ ndǝghǝba tǝngɛ aka kura kalangkur ngɛ.” 13Antǝ dzǝ ka puti tsiyari ata dza, ba kura aka santa saka dzǝ ka mubadzi ba dzǝ ka hǝm Hyal.
14 #
Sǝb 20:9,10; Mab 5:13,14 Ama ndǝ nggar fǝr vǝkǝr sǝlai ndari ɗǝfar ka sǝwa, kadǝbar tǝ Yɛsu tara mbǝtǝ ndɛ vǝr Sǝbdu, Ani dzǝ ka nkǝrɛ ala ndzi yarɛ ni, “Vǝr nkwa adai akuya ka ndǝ 'ya kǝthlǝr. Siyamɛ akwa vǝr ǝnda yarni ka ndǝ mbǝti tǝ gǝri, adi ata vǝr Sǝbdu wɛ.”
15Thlaku ni ka sǝnau alari, “Kǝlikatsaɗǝm yarɛ! Azarɛ, kǝlara ndɛ akwa ntsa gǝri adi ada mpǝli thlarni, wala kwararni ata sǝkwá ka lǝka lar yimi vǝr Sǝbdu wɛ? 16Antǝ adi kal-kal wɛ, mwala ni, nkwar nyavǝr Ibrahim, nam tǝ Satan tara mbwai, asǝna fá kum kapu ntsisu, ka ndǝ mpǝli tǝni vǝr Sǝbdu wɛ?”
17Sakatǝ dzǝ nkǝrɛ ǝni, ani sanga ndzǝr ɓwalnya kaka dzǝ yarɛ nda ka lǝkwa sǝlai, ani sanga ndzǝ nam tara tsaɓtsǝnidzi akwanda dar tsanti mwapukur ɗǝfu ata kǝra sǝr kudǝra yarɛ nam tǝ dzǝ ada 'ya.
Karabu ata Kǝra Munyar Mwalisa ba Thlǝlam
(Mat 13:31-32; Mar 4:30-32)
18Antǝ Yɛsu ka yuwɛ, “Sǝr mi tǝ kuhyikur Hyal tara pa akǝri? Sǝr mi tǝ Yi awa nkǝrti tǝni akǝri? 19Dzǝ apa munya bwala, nam tǝ ndǝ tara kǝtǝ ka thlǝkati akwa fwakǝrni. Dzǝ kǝlí ba dzǝ ka ndzai mamar fwɛ, ba ika yarɛ nam ati ni pati kǝi akwa tsizuwari yarɛ.”
20Dzǝ ɓakta yuwɛ, “Aka sǝr mi tǝ Yi awa nkǝrti kuhyikur Hyal akǝri? 21Dzǝ apa thlǝlam nam tǝ mwala tara kǝtǝ ka hǝrti akwa mpwɛ nam hang tǝ thlǝlam ni ka siya dlǝti sanga mpwɛ nam tǝ ndǝ tara hǝrti ni ka mbihǝtǝdzi.”
Nyavǝr nam Hyɛɗu ni
22Antǝ Yɛsu ka mwari alǝkwa mǝlmɛ yarɛ nam ngga-ngga kaka nam nkyǝnkyiɗu, tǝ dzǝ ada hyipɛ ala dar, tǝ dzǝ ada sǝbǝ Ursalima. 23Ani ndǝ laka ka yuwɛ tǝni, “Thlaku, ndzǝ nam ata ɓui mbatǝdzi ni, dar nkyiɗu laka ya?”
Ani dzǝ ka nkǝrɛ ala dar, 24“Hawamɛ sanga dǝna ka gǝri lǝkwa ata nyavǝr nam hyɛɗu ni, kadǝbar Yi ada nkǝrɛ ala gǝri, ndzǝ hang ata bara ka dar lǝkwa ama dar adi ata mǝzi wɛ. 25Ma apǝri Thlakǝr kǝi kurtaka hyati ka harti nyavǝr, gǝri ata hyati abǝla tǝ gǝri ada tsa nyavǝr ba kǝgyɛ apǝri, ‘Thlaku mburnta ala yar.’
“Ama dzǝ ata sǝnau ala gǝri, ‘Yi ta zǝndi tǝ gǝri wala vui nam tǝ gǝri hyati akwa wɛ.’
26“Aghǝla ǝnda gǝri ata nkǝrɛ, ‘Yar sǝmɛ ba yar sa akǝma gǝ, har tǝ gǝ tara hyipɛ su ata kǝra whalɛ yarɛ akwa mǝlmǝr yar.’
27 #
Zab 6:8
“Ama dzǝ ata sǝnau, ‘Yi ta zǝndi tǝ gǝri wala vui nam tǝ gǝri hyati akwa wɛ. Tǝramɛ adzǝra, sanga gǝri, gǝr ndzǝr 'ya sǝ kulɗa!’
28 #
Mat 22:13; 25:30 #
Mat 8:11,12 “Akwanda ani tǝ gǝri ata tuwa aka ɗǝhyir sakatǝ gǝri wula Ibrahim, ba Isaku, ba Yakubu, kaka sanga nabi yarɛ akwa kuhyikur Hyal, ama gǝri ndǝ ada ɗalba tǝ gǝri. 29Ndzǝ ata si tǝbwar gǝdi aka anǝm, yala aka putai, ka ndzai ka sǝm sǝr sǝmɛ akwa kuhyikur Hyal. 30#Mat 19:30; 20:16; Mar 10:31Dzǝri ndzǝ adai nam tǝ dar aghǝli nam dar ata siya ndzai nǝr tangkǝma, ba ndzǝ nam tangkǝma dar ata siya ndzai aghǝli.”
Sǝngǝlǝr Yɛsu akuya Ursalima
(Mat 23:37-39)
31Ata saka ǝnda ndzǝr farisi yar laka ka si adzǝ Yɛsu ba dar ka nkǝrɛ alari, “Ka gǝ ngyar vui ǝni ka gǝ mwari akwa vui damwa. Kadǝbar Kuhyi Hirudus ada bara ka dzǝ tsi tǝngɛ.”
32Dzǝ ka sǝnau ala dar, “Mwaramɛ ka gǝri gha ala ndǝr zǝla ndɛ ǝnda apǝri, ‘Yi ata kǝdlǝba Mambǝl nam kulɗa ba mbǝti ndzi asǝna ba arpɛ, akwa vǝr makǝrkur Yi ata kurai kǝthlǝrna.’ 33Wala apa madi ma, kǝ ndzai ntsakǝr kǝ Yi lǝkǝma aka buraburarna asǝna aka arpɛ ba arpǝnda—akuya ndɛ adi ada tsai nabi abǝla ta Ursalima wɛ!
34“Ai, Ursalima! Ursalima! Gǝ nam ndǝr tsa nabi yarɛ, ba ɗǝgal ndzǝ nam tǝ ndǝ hyanǝba ala gǝ, ka yiɗau tǝ Yi ada bara ka Yi tsaɓtsǝni madar ngɛ atakǝmaduku, apa tǝ ntǝka ada tsaɓtsǝni madarni akur bǝbǝgari yarɛ, ama gǝ adi ada yiɗɛ wɛ! 35#Zab 118:26Wulɛ, ndǝ ngyar ala gǝri kǝiyir gǝri kura ndǝ akwa. Yi ada nkǝrɛ ala gǝri, gǝr tsu adi ata dzakti wula tǝra wɛ, tar vǝr nam tǝ gǝri gha, ‘Barka kǝ pukǝrdzi ala ndǝ nam ada si akwa thlǝma Thlaku.’ ”
अहिले सेलेक्ट गरिएको:
Luka 13: CKL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2023 Seed Company in collaboration with Language Developers and Bible Translators Association
