Luka 12
12
Ɗǝmnya yarɛ ba Dǝnautsǝnidzi
(Mat 10:26-27)
1 #
Mat 16:6; Mar 8:15 Sakatǝ ndzǝ tara tsaɓtsǝnidzi ata 'ya kumthlani ka kumɛ ka hangkurari, har ma tǝ dar ada dlǝdlaɓu kǝma dar tǝ thlǝlɛ, Yɛsu baditsǝni ndǝrɛ tangkǝma ala ndzǝr nuwurni apǝri: “Ka gǝri vǝdzǝ hankal ala thlǝlamǝr ndzǝr Farisi, nam ani kǝlikatsaɗǝmkur dar. 2#Mar 4:22; Luk 8:17Sǝ adai nam harhari kura ata siya mburntadzi wɛ, wala su ɗǝwa-ɗǝwa adai nam kura ata sǝba ata babal wɛ. 3Kǝlara sǝ nam tǝ gǝr nkǝrɛ akwa kuthlɛ, ndɛ ata ngati tǝni abǝla ata paraku nǝr tsǝtsi, ba sǝ nam tǝ gǝri gha ala ndɛ akwa thlǝmɛ ambwa akwa vui ɗǝwa-ɗǝwa, ndǝ ata mangwatsǝni tǝni ati ata kǝra fǝr yarɛ.
4“Yi ada gha ala gǝri, pazǝrna yarɛ, ta gǝr ta hyivǝr ndzǝ nam ata tsai dzǝ ni, aghǝla tǝ dar tsai sǝ damwa nam tǝ dar tsu awa mǝzi 'ya adi wɛ. 5Ama Yi ata tsanti ala gǝr ndǝ nam tǝ gǝri ata hyivǝr tǝni: Ka gǝr hyivǝr ndǝ nam, aghǝla ma dzǝ tsai dzǝ ni, dzǝ aka wada nam tǝ dzǝ ata ɗalu tǝni akwa u'u kura kuri. Dzǝri, Yi ada nkǝrɛ ala gǝri, ka gǝri hyivǝr tǝni! 6Ndǝ adi ada ɗǝlti madar ika ntufu kwapa sǝɗǝ wɛ? wala duku akwa ntsa dar nam tǝ Hyal fwanta adi wɛ. 7Dzǝri! Wala sǝsi nam ata kǝra gǝr ma ndǝ tsǝba tǝ dar. Ta gǝr ta hyivǝr; gǝri aka paida ɓwalta madar ika hangkurari.
8“Yi ada nkǝrɛ ala gǝri, kǝlara ndɛ nam tara tsanti apǝri dzǝ nana akǝma ndzi, Zǝr Ndɛ ata nkǝrɛ apǝri dzǝ nǝni akǝma ndzǝr hyantǝr Hyal. 9Ama ndǝ nam tara ngǝla tǝra akǝma ndzi Yi ata ngǝla tǝni akǝma ndzǝr hyantǝr Hyal. 10#Mat 12:32; Mar 3:29Ba kǝlara ndǝ nam tara labar kulɗa ata kǝra Zǝr Ndɛ ndǝ ata kyifǝnta alari, ama ndǝ nam tara gha sǝ nam kulɗa ata kǝra Mambǝl Kartǝ ni ndɛ adi ata kyifǝnta alari wɛ.
11 #
Mat 10:19,20; Mar 13:11; Luk 21:14,15 “Sakatǝ dar si aka gǝri akǝma ndzǝr haka akwa fǝr vǝkǝr sǝlai, wala akǝma ndzǝr kuhyi yarɛ ba ndzǝr wada yarɛ, ta gǝr ta ɗǝnga ata kǝra whal nam tǝ gǝr ata kǝlba kǝr gǝri akwa haka wala sǝ nam tǝ gǝr ata gha, 12akuya Mambǝl Kartǝ ata hyipti ala gǝri ata saka ǝnda sǝ nam tǝ gǝri ata nkǝrɛ.”
Karabu ata Kǝra Bǝrba Nam Dlang
13Ndǝ laka akwa dlamiyir ndzi ni nkǝrɛ alari, “Malǝm, nkǝrɛ ala zǝr mana ka dzǝ ndǝghǝi ala yar wartar tada yar.”
14Yɛsu ka sǝnau alari, “Sal, wa tara mǝrti tǝra ndǝr haka, wala ka Yi ndzai ndǝr ndǝghǝ warta ala gǝri?” 15Antǝ dzǝ ka nkǝrɛ ala dar, “Ka gǝr vǝdzǝ hankal! Ka gǝr 'ya pǝɗǝm ta kǝlara lambwakur; akuya adi hangkur sǝ nam tǝ gǝ akǝr ani mpikɛ wɛ.”
16Ba dzǝ ka gha ala dar karabu ǝni: “Fwakǝr bǝrba laka 'ya ɗaku dzǝr dzǝri. 17Ba dzǝ ka nkǝrɛ akwa ɗǝfari apǝri, ‘Yau, mǝmi tǝ Yi ata 'ya dzá? Yi adi aka vui nam tǝ Yi awa pui kariyir fwakǝrna ni akwa wɛ.’
18“Ba dzǝ ɓakta nkǝrɛ, ‘Əni ani sǝ nam tǝ Yi ata 'ya, Yi ata whuzanta biyirna yarɛ ni, ka Yi tsati damwa nam ngga-ngga, ka Yi pu kariyir fwakǝrna sang kaka kariyirna nam damwa akwa. 19Ba Yi ata nkǝrɛ ala kǝrna apǝri, “Dzǝri gǝ aka kari hang ada daɓi, nam tǝ Yi tsaɓtsǝni nǝr fá ka fákǝr. Ngyar ka Yi ghǝrbadzi, ka Yi sǝmɛ, ka Yi sa, ba ka Yi nga sǝɗa.” ’
20“Ama Hyal ka nkǝrɛ alari, ‘Gǝ ndǝ nam dlang! Akwa kuta vǝr ǝni ndɛ ata dlutsi mpika gǝ. Antǝ kari yarɛ nam tǝ gǝ tsaɓtsǝni ala kǝrngɛ ni ata ndzai nǝr wa?’
21“Əni ani apani ata ndzai aka kǝlara ndǝ nam tara tsaɓtsǝni gabaka ala kǝrni ama dzǝ adi aka gabaka adzǝ Hyal wɛ.”
Ta Gǝr ta Damitsǝnidzi
(Mat 6:25-34)
22Antǝ Yɛsu ka nkǝr ala ndzǝr nuwurni: “kadǝbar ǝni Yi ada nkǝrɛ ala gǝri, ta gǝr ta damitsǝnidzi ata kǝra mpika gǝri ata kǝra sǝ nam tǝ gǝri awa sǝmɛ, wala ata kǝra dzá gǝri, sǝ nam tǝ gǝri awa ɓui ka hati. 23Kadǝbar mpikɛ kwatsǝni sǝr sǝmɛ, ba dzɛ kwatsǝni kariyir ha. 24Wulamɛ zǝlaku yarɛ! Dar adi ada thlǝka wɛ, dar adi ada dli wɛ, dar adi aka vui ɗǝwa wala bi wɛ; ama Hyal ada la dar sǝr sǝmɛ. Ka yidau tǝ ɗakur gǝri tara kwatsǝni nǝr ika yarɛ!” 25Wa akwa ntsa gǝri atar damitsǝnidzǝrni awa mǝzi ka dzakti awur duku ala dzǝgamkur mpikari? 26Ma gǝri adi ata mǝzi ka 'yati su nkyiɗu dzǝli ǝni wɛ, kami tǝ gǝr ada damitsǝnidzi ka laka sǝ yarari?
27 #
1Kuh 10:4-7; 2Sǝt 9:3-6 Wulamɛ whal nam tǝ pugǝdlɛ yarɛ ada kǝlí. Dar adi ada kǝthlǝr wala tsaka wɛ, wala apani Yi ada gha ala gǝri, wala Sulaimanu akwa dzǝgu dzǝrni sang dzǝ ta saga 'yati dzǝgudzi dzǝli nǝr duku akwa ntsa dar wɛ. 28Ma apǝri apani tǝ Hyal ada pudzǝ kari ala kusar akwa ntaku, nam asǝna dar adai ata mulɛ, ba arpɛ ndɛ pu tǝ dar akwa u'u, mǝmi hangkur tǝ Hyal ata pudzǝ ala gǝri kari gǝr ndzǝ nam aka hamnta dzǝri nkyiɗu! 29Ta gǝr ta vǝti ɗǝfa gǝri ata sǝ nam tǝ gǝr ata sǝmɛ wala sǝ nam tǝ gǝr ata sa; ta gǝr ta damitsǝnidzi kari. 30Akuya ndzǝr dunya ǝni nam kura ta zǝndi Hyal ma ada bara sanga dzǝli sǝ yarni, ba Tada gǝri zǝndi apǝri gǝr ada bara tǝ dar. 31Ama ka gǝr bara kuhyikurni, ba sǝ ǝni yarni ndǝ ata la gǝri tsuwɛ.
32“Ta gǝr ta hyivǝr mai, gǝri albwar ndzǝr nu tǝra nkyiɗu laka ni, gǝri apa bǝri tǝma, akuya Tada gǝri ada nga sǝɗar la gǝri kuhyikur ni. 33Ɗǝgǝltamɛ sǝ yarɛ nam tǝ gǝr akǝr, ka gǝr la ndzǝ nam ngudi. Ka gǝr ɓui pǝrki ala kǝr gǝri nam kura ada hali, dzǝ ani, gabaka nam kura ada kuri atahyal, vui nam kura ndzǝr hǝlɛ ada tsǝbti ba vui nam kura hǝhǝtu awa sǝwati. 34Akuya vui nam tǝ gǝnar ngɛ akwa, antǝ ɗǝfa gǝ yɛ ata 'ya akwanda.
Ndzai aka Ɗǝmhǝdzi
35 #
Mat 25:1-13
“Ka gǝr ndzai aka ɗǝmhǝdzi akuya ka kǝthlǝr, ba ka gǝr ndzai aka pitǝlar gǝri ngi-ngi, 36#Mar 13:34-36Ka gǝr ndzai apa ndzǝ nam ada sǝkǝ thla kǝma thlakǝr dar tǝ dzǝ hyati akwa vui gyaliyir kǝldzi, ani ka sakatǝ dzǝ si ka tsarar nyavǝr tǝkǝma ka dar mburnta alari. 37Ata 'ya ɗaku ala madar kǝi yarni nam tǝ thlakǝr dar ata siya ɓui tǝ dar ata kǝra sǝkɛ tǝni. Yi ada gha ala gǝri dzǝri, dzǝ ata mbwaba kǝrni ka kǝthlǝr, ka dzǝ nkǝrɛ ala dar ka dar ndzai ata tɛbǝr aghǝla ǝni ka dzǝ nuti kǝlara ndɛ ka dzǝ la dar sǝr sǝmɛ. 38Ata 'ya ɗaku ala madar kǝi yarni nam tǝ thlakǝr dar ata si ka ɓui tǝ dar ɗǝmhǝdzi, wala ma dzǝ si sǝɗɛ wala makǝr nǝr vǝri. 39#Mat 24:43,44Ama ka gǝr zǝndi ǝni: ma thlakǝr kǝi ani awa zǝndi saka nam tǝ ndzǝr hǝlɛ ata si, dzǝ ata ndzai ka ɓǝla, ka dzǝ kanti ala dar livi aharni. 40Ani gǝri yɛ kǝ ndzai ntsakǝr ka gǝri ndzai aka ɗǝmhǝdzi, kadǝbar Zǝr Ndɛ ni ata si ata saka nam kura gǝri ta ɗǝnga tǝni.”
41Bitrusu ka yuwɛ, “Thlaku, gǝ ada gha ala yar karabu ni kǝna ala kǝlara ndɛ?”
42Thlaku ni ka sǝnau, “Wa dza zǝr kǝi nam aka dzǝrkur ba bǝrkawa, nam tǝ thlakǝr kǝiyirni awa lar ngǝzǝ kǝiyirni ka dzǝ lǝkǝma aka la dar sǝr sǝmǝr dar ata saka nam kal-kal? 43Ata ndzai ɗaku ala zǝr kǝi nam tǝ thlakǝr kǝiyirni ɓui tǝni tǝ dzǝ ada 'ya ahani sakatǝ dzǝ si. 44Yi ada gha ala gǝri dzǝri, dzǝ ata vǝkǝr tǝni ala sanga sǝrni nam tǝ dzǝ akǝri. 45Ama ma zǝr kǝi ni ka nkǝrɛ ala kǝrni, apǝri, ‘Thlakǝrna ata kǝtǝ saka hang kama dzǝ si,’ ani ba dzǝ ka baditsǝni dlaɓwɛ madar kǝi yarɛ kaka nkwaiyir kǝi yarɛ ba dzǝ ka lǝkwa sǝm ka sa nam ada ghǝr ka tsi tǝni. 46Thlakǝr zǝr kǝi nda ata si vǝri nam kura dzǝ ta tǝmatsǝni tǝni ba ata saka nam kura dzǝ ta zǝndi ata kǝri. Dzǝ ata dǝgǝlu tǝni dangul-dangul ka ɗalu tǝni akwa vui laka kaka ndzǝ nam kura aka mbǝrsa yarɛ.
47“Zǝr kǝi nam tara zǝndi sǝ nam tǝ thlakǝrni ada bara, ama dzǝ ta ɗǝmhǝdzi wala dzǝ ta 'ya sǝ nam tǝ thlakǝrni ni ada bara wɛ ndɛ ata tasǝ tǝni aka kwangyang hang.” 48Ama ndǝ nam kura ta zǝndi sǝ nam tǝ thlakǝr kǝiyirni ada bara, ba dzǝ ka 'yati sǝ yarɛ nam tara tsǝbti ka ndǝ 'ya alari haka ndɛ ata tasǝ tǝni aka kwangyang nam kura hang. Kǝlara ndɛ nam tǝ ndǝ lar sǝ hang, ndɛ ata tǝmatsǝni sǝ hang akari; ba ndǝ nam tǝ ndǝ hau su hang akwa tsiyari, ndɛ ata bara sǝ hang akari.
Ndzai Lapiya Adi wɛ Ama Ndǝghǝi Nya
(Mat 10:34-36)
49“Yi si ka Yi pukǝr u'u ala dunya, ba ma apa yiɗǝrna, u'u ni ata kǝra mba tǝni! 50#Mar 10:38Ama Yi aka bamtizǝma nam tǝ ndǝ ata 'ya alai, ba Yi damitsǝnidzi akwa ɗǝfawai tar ma ndǝ 'yati tǝni alai! 51Gǝri ada ɗǝnga apǝri Yi si aka ndzai lapiya akwa dunya ya? A'a wɛ, Yi ada nkǝrɛ ala gǝri, Yi si aka ndǝghǝi nya. 52Baditsǝni kulini ka lǝkǝma ata ndzai akwa kǝi duku ndzǝ ntǝfu ama dar ata ndǝghǝbadzi bwa sǝɗɛ, ndzǝ makǝr ata ndzai dǝgunmar sǝɗɛ, ndzǝ sǝɗɛ tsuwɛ ata ndzai dǝgunmar makǝr. 53#Mai 7:6Dar ata ndzai ndǝghǝndǝghǝi, tada ata ndzai dǝgunmar zǝr, zǝr tsuwɛ ata ndzai dǝgunmar tada, mama ata ndzai dǝgunmar nkwarni, nkwa tsuwɛ ata ndzai dǝgunmar angǝri, angǝra sal ata ndzai dǝgunmar mwala zǝrǝrni, mwala zǝr tsuwɛ ata ndzai dǝgunmar angǝra salǝrni.”
Zǝndi 'Yar Saka
(Mat 16:1-4; Mar 8:11-13)
54Yɛsu nkǝrɛ ala hangkur ndzǝ, “Sakatǝ gǝri wula dlamba ada hyati tǝbwar putai, tǝnyi-tǝnyi gǝri ada gha apǝri, ‘Yimi ata ntǝɗi,’ ba yimi ada ntǝɗi. 55Ba sakatǝ gǝri wula sambar anǝm ada padɛ, gǝri ada nkǝrɛ apǝri ‘ndǝ ata 'ya tsǝfɛ’ ba tsǝfari ada 'ya. 56Kǝlikatsaɗǝm yarɛ! Gǝri ada zǝndi parsu nam ata 'ya ata dai ba ata dzahyal. Ama mǝ ada 'ya kura gǝri awa zǝndi sǝ nam ada 'ya akwa saka ǝni?
57“Kami kura gǝri awa 'ya haka ala kǝr gǝri sǝ nam kal-kal? 58Sakatǝ gǝri ata kǝra mwari aka dawar ngɛ akwa vui 'ya haka, 'yamɛ ka gǝr salautsǝnidzi tǝng tǝ gǝri ata whalɛ. Ma gǝ ngǝla, dzǝ ata mwari aka gǝ akǝma ndǝr haka. Ndǝr haka ni ata la tǝngɛ ala ndǝ ngga akwa kwatu. Ndǝ ngga akwa kwatu ni ata ɗalmbwa tǝngɛ akwa fǝrsǝna. 59Yi ada nkǝrɛ ala gǝ, gǝ adi ata sǝba wɛ, tar ma gǝ nkyinta sanga kwapar haka nam tara mbi.”
अहिले सेलेक्ट गरिएको:
Luka 12: CKL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2023 Seed Company in collaboration with Language Developers and Bible Translators Association
