Luka 11
11
Hyipǝr Yɛsu ata Kǝra 'ya Aduwa
(Mat 6:9-13; 7:7-11)
1Vǝr laka Yɛsu ata kǝra 'ya aduwa akwa vui laka. Sakatǝ dzǝ tara kurai, antǝ pathlu akwa ntsa ndzǝr nuwurni gha alari, “Thlaku, hyipǝ ala yar 'ya aduwa, tsu apa tǝ Yawhana tara hyipti ala ndzǝr nuwurni.” 2Dzǝ ka nkǝrɛ ala dar, “Sakatǝ gǝri ata 'ya aduwa, ka gǝr nkǝrɛ:
“‘Tada,
ka ndǝ vi sǝlaiyir thlǝma gɛ,
kuhyikur ngɛ ka dzǝ si.
3Ka gǝ la yar kǝlara vǝri sǝr sǝmǝr ɓuktsi yar.
4Ka gǝ kyifǝnta ala yar bikǝr yar yarɛ,
apa tǝ yar yɛ yar ada kyifǝnta ala ndzǝ nam tara 'ya biku ala yar.
Ba ta gǝ ta mwari aka yar akwa vui nkǝrti.’ ”
5Antǝ Yɛsu ka nkǝrɛ ala ndzǝr nuwurni, “Ka ndǝ kǝtǝ apǝri pathlu akwa ntsa gǝri aka pazi ba dzǝ ka mwari adzǝ pazǝrni rakǝndi vǝri ka nkǝrɛ alari ‘Pazi, dǝbati alai takwara ɗǝvɛ makǝr, 6akuya pazǝrna laka nam akwa buraburá si adzǝra kulini, ba Yi adi aka sǝr sǝmɛ nam tǝ Yi ata lari wɛ.’
7“Antǝ pazǝr ngɛ nam tǝ gǝ tara mwari adzǝni ni ata sǝnau ambwa ka gha, ‘Ta gǝ ta ɓwatǝ tǝra mai; Yi kurtaka harti nyavǝr, yar kaka madarna sang ata dǝgǝl. Yi adi ata mǝzi hyati ka la gǝ su wɛ.’ 8Yi ada gha ala gǝri, wala dzǝ adi ata hyati ka lar su kadǝbar tǝ dzǝ pazǝrni, wala ahani kadǝbar tǝ dzǝ ta nga sǝlaiyir faya lǝkǝma aka kǝgyǝ wɛ dzǝ ata hyati ka lari hang apa tǝ dzǝ bara.
9“Ani Yi ada gha ala gǝri: Ka gǝri yuwɛ ndɛ ata la gǝri; ka gǝr bara, gǝri ata ɓui; tsamɛ nyavǝr ndɛ ata mburnta ala gǝri. 10Akuya kǝlara ndǝ nam tara kǝgyɛ dzǝ ata dlutsi; ndǝ nam tara bara dzǝ ata ɓui; ba ala kǝlara ndǝ nam tara tsa nyavǝr ndǝ ata mburnta alari.
11“Wa akwa ntsa gǝri tada yarɛ, ma zǝrǝrni kǝgyǝ kulfa, ka dzǝ lari pwapu ata vuiyari? 12Wala ma dzǝ kǝgyǝ kulfa, ka dzǝ lari pwapu? 13Ma gǝri nam ndzǝ kulɗa, gǝri zǝndi whal nam tǝ gǝri ada la sǝga yarɛ nam ɗaku ala madar gǝri, mǝmi hangkur nam tǝ Tada gǝri nam atahyal ata hamnta Mambǝl Kartǝ ni ala ndzǝ nam kǝgyǝ tǝni!”
Yɛsu ba Bɛlzǝbul
(Mat 12:22-30; Mar 3:20-27)
14Vǝr laka Yɛsu kǝdlǝba mambǝl kulɗa akwa ndǝ laka nam kura ada mǝzi ka mburti nya ka ndǝrɛ. Sakatǝ mambǝl nam kulɗa ni tara lǝba, ndǝ nam kura ada mǝzi ka ndǝr ni baditsǝni ndǝrɛ, ba dlamiyir ndzi ni ndatǝdzi. 15#Mat 9:34; 10:25Ama ndzǝ laka nkǝrɛ apǝri, “Atar Bɛlzǝbul zǝr kuhyir mambǝl yarɛ nam kulɗa, tǝ dzǝ ada kǝdlǝba mambǝl yarɛ nam kulɗa ni.” 16#Mat 12:38; 16:1; Mar 8:11Ndzǝ laka dar ada bara ka dar dzaba Yɛsu, ani dar ka gha alari apǝri ka dzǝ 'ya sǝr ndati nam tara hyati atahyal ka tsanti apǝri Hyal adzǝni.
17Ama akuya tǝ Yɛsu tara zǝndi ɗǝngar dar, dzǝ ka gha ala dar, “Kǝlara kuhyikur nam tara ndǝghǝbadzi tǝ dar ada mpa kǝma dar kuhyikur nda ata 'yantadzi, ba kǝi nam tara ndǝghǝbadzi tǝ dar ada mpa akwa dabwa dar kǝi nda ata whuzantadzi. 18Ma apǝri Satan ndǝghǝbadzi ada mpa kǝrni mǝmi tǝ kuhyikurni awa ndzai? Yi nkǝr ǝni kadǝbar tǝ gǝr kǝtǝ apǝri Yi ada kǝdlǝba mambǝl nam kulɗa ni aka Bɛlzǝbul. 19Kulini ma Yi ada kǝdlǝba mambǝl nam kulɗa yarɛ aka dǝnar Bɛlzǝbul aka dǝnar wa tǝ ndzǝr gǝri ada kǝdlǝba tǝ dar? Ani dzá dar ata ndzai ndzǝr 'ya haka ala gǝri. 20Ama ma Yi ada kǝdlǝba mambǝl nam kulɗa yarɛ atar dǝnar Hyal, antǝ kuhyikur Hyal ni kǝ si ala gǝri.
21“Sakatǝ ndǝ nam aka dǝna, aka sanga kariyir mparni adzǝni, ada ɓǝla kǝiyirni, sanga kariyirni yarɛ sǝ adi ata ɓui wɛ. 22Ama sakatǝ ndǝ nam aka dǝna ta dza si ka mpa tǝni ka thlǝtǝ tǝni, dzǝ ata fati sanga kariyir mparni yarɛ nam tǝ dzǝ tara mbǝrsa akǝri ni, ka ndǝghǝnta kari yarɛ nam tǝ dzǝ tara fati ni.
23 #
Mar 9:40
“Kǝlara ndǝ nam kura yar atakǝmaduku dzǝ dawarna; ba ndǝ nam yar ada tsaɓtsǝni su kaka yɛ, dzǝ ndǝr kikilnta.
24“Sakatǝ mambǝl nam kulɗa tara sǝba akwa dzá ndɛ, dzǝ ata mwari akwa vui yarɛ nam kura aka yimi, tǝ dzǝ ada bara vui ghǝrbadzi ba ma kura dzǝ ta mǝzi ka ɓui, dzǝ ata gha akwa ɗǝfari apǝri, ‘Yi ata ɓakta ɓiti akwa kǝiyirna nam tǝ Yi tara hyati akwanda.’ 25Sakatǝ dzǝ si, dzǝ ɓui kǝi ni tsartsari, dzǝgudzǝgui tsip. 26Antǝ dzǝ ata mwari ka fatsi mambǝl nam kulɗa yarɛ damwa nam kǝmangar ta dza murfwɛ, ba dar ata si ka ndzai akwa kǝi ni. Ba dǝntar ndzaiyir ndǝ ni ata 'ya kulɗa ta ndziyirni nam tangkǝma ni.”
27Sakatǝ Yɛsu ada nkǝr sǝ yarni, mwala laka akwa dlamiyir ndzǝ ni gha alari, “Mwala nam tara yaba tǝngɛ ka kǝlati tǝngɛ dzǝ aka barka.”
28Ama Yɛsu ka sǝnau, “Barka nam hang ma dzá ala ndzǝ nam ada ngati ndǝrǝr Hyal ka kǝlǝngkǝr akǝri!”
Parsu Tara Ɓui Yunana ni
(Mat 12:38-42)
29 #
Mat 16:4; Mar 8:12 Sakatǝ dlamiyir ndzi ada dzakdzakǝi, Yɛsu nkǝrɛ, “Zaman ǝni ani zaman nam kulɗa. Dar ada yuwɛ parsu nǝr ndatǝdzi, ama ndǝ adai ata la dar par sǝr ndati wɛ tar par sǝr ndati nǝr Yunana. 30#Yun 3:4Akuya apa tǝ Yunana tara ndzai par sǝr ndati ala ndzǝr Niniva, tsu apani Zǝr Ndɛ ata ndzai par sǝr ndati ala zaman ni. 31#1Kuh 10:1-10; 2Sǝt 9:1-12Kuhyimwala nǝr Siba ata hyati akwa vǝr haka kaka sǝliyir zaman ni ba ka dzǝ tsi kǝra dar; akuya dzǝ si akwa dǝntar Dunya ka dzǝ sǝthlǝmɛ ala bǝrkawakur Sulaimanu, ba kulini ndǝ nam ngga ta Sulaimanu ani akwani. 32#Yun 3:5Ndzǝr Niniva ata hyati akwa vǝr haka kaka ndzǝr Zaman ǝni ba ka dar tsi kǝra dar; akuya dar tubi sakatǝ Yunana nkǝrba ala dar ndǝrǝr Hyal, ba kulini ndǝ nam ngga ta Yunana adai akwani.
Ntsɛ ani Pitǝlar Dzɛ
(Mat 5:15; 6:22-23)
33 #
Mat 5:15; Mar 4:21; Luk 8:16 “Ndɛ adi ada ngyu u'u akwa pitǝla ka ɗǝwar wala mbui tǝ kugwa wɛ, ama dzǝ ata hai ata thlǝmthlǝmɛ, akuya ka ndzǝ nam ata livi ka dar wula parakari. 34Ntsa gɛ ani pitǝlar dzá gɛ. Ma ntsa gǝ yarɛ ɗaku, sanga dzá gɛ ata ndzai ghǝi-ghǝi aka paraku tsuwɛ. Ama ma ntsa gǝ adai ɗaku wɛ, sanga dzá gǝ yɛ ata ndzai akwa kuthlɛ. 35Ka gǝ 'ya hankal ta paraku nam tǝ gǝ akǝri ta ndzai kuthlɛ. 36Akuya ma sanga dzá gǝ ghǝi-ghǝi aka paraku, ba bwa nam akwa kuthlɛ adi wɛ, sanga dzá gǝ ni ata ndzai paraku tsu apa tǝ parakǝr pitǝla ada mbǝli ata dzá gǝ.”
Sǝr Bwasam Nkwa
37Sakatǝ Yɛsu tara kurai ndǝrɛ, ndǝr Farisi laka ka kǝga tǝni apǝri ka dar tǝra lǝka sǝm sǝr sǝmɛ aharni; antǝ dzǝ ka mwari ka ndzai akwa vui sǝm sǝr sǝmɛ ni. 38Ama ndǝr Farisi ni, ka ndatǝdzi akuya tǝ dzǝ tara wula apǝri Yɛsu adi ta kǝtsǝnta tsiyari kǝmata tǝ dzǝ awa sǝm sǝr sǝmɛ wɛ.
39Antǝ Thlaku ka nkǝrɛ alari, “Gǝri ndzǝr Farisi, gǝri ada kǝtsǝnta hǝiya kapu ba ntasa, ama aivi akwa kuta gǝri ghǝi-ghǝi aka dlǝrpǝkur ba kǝmangarkur. 40Gǝri ndzǝ nam dlang! Hyal nam tara mǝrti bwahǝi ni, adai tsu dzǝ ani tara mǝrti bwa kutari wɛ? 41Ama ka gǝri la sǝ nam tǝ gǝri akǝri akwa kuta ntasa ni ala ndzǝ nam kura aka su, antǝ sanga su ata ndzai kǝtsǝkǝtsi ala gǝri.
42 #
Fǝr 27:30
“Bwasam ala gǝri ndzǝr Farisi, Kadǝbar gǝri ada hamnta ala Hyal pathlu akwa ntsa kumɛ nǝr kari sukwar, ba laka thlaliyir sukwar sang, ama gǝri ka ngǝla 'ya sǝ nam kal-kal ba yiɗǝ Hyal ni. Sǝ ǝni yarɛ ni ani tǝ gǝri ata 'ya kura gǝri ta ngyar sǝ yarɛ ǝndari.
43“Bwasam ala gǝri, gǝri ndzǝr Farisi, kadǝbar gǝri ada yiɗɛ vui ndzai nam aka sǝlai akwa fǝr vǝkǝr sǝlai, ba thlawardzi yarɛ akwa vui kasuku.
44“Bwasam ala gǝri, kadǝbar gǝri apa kul yarɛ nam tara kurtaka sazǝntadzi, tǝ ndzǝ ada mwari ata kǝri kura dar ta zǝndi sǝ ghyǝmbur nam akwa.”
45Pathlu akwa ntsa ndzǝ nam masǝku akwa Mabariyir Musa ni sǝnau alari, “Malǝm, akwa ndǝr ǝni tǝ gǝ tara 'ya ni, gǝ ngǝl tǝ yar akwa yɛ.”
46Yɛsu sǝnau, “Bwasam ala gǝri nam masǝku akwa mabari ni, kadǝbar gǝri ada vǝkǝr kǝl nam kǝgǝɓu tǝ kǝlari dzau ala ndzi, ama gǝri aka kǝra gǝri wala tǝ gulanda gǝri adi ada tsǝkwar kǝl ni akuya mbana tǝ dar wɛ.
47“Bwasam ala gǝri, kadǝbar gǝri ada hǝnti kulɛ yarɛ nam ɗaku ala nabi yarɛ nam tǝ kakár gǝri yarɛ ani tara tsi tǝ dar. 48Ani gǝri sakǝidatsǝni apǝri kǝ ndzai kal-kal sǝ nam tǝ kakár gǝri yarɛ tara 'ya; akuya dar kurnta nabi yarɛ, ba gǝri ka hǝnti kulǝr dar yarɛ. 49Kadǝbar ǝni, Hyal akwa bǝrkawakur ni nkǝrɛ, ‘Yi ata hyanti ala dar nabi yarɛ ba ndzǝr hya yarɛ, dar ata siya tsi ndzǝ laka ba tsan bwanai ala mbiyari tsuwɛ.’ 50Akuya ǝni antǝ ndzǝr zaman ǝni ata siya wula bwanai akuya ntǝr sanga nabi yarɛ nam tǝ ndǝ tara tsi tǝ dar tsu ata baditsǝniyir dunya, 51#Bad 4:8; 2Sǝt 24:20,21baditsǝni ata ntǝr Habila ka si ata ntǝr Zakariya, nam tǝ ndǝ tara tsi tǝni akwa ɓwanga muɓwɛ aka Vui nam Kartǝ. Dzǝri, Yi ada gha ala gǝri, ndzǝr zaman ǝni ata wula bwanai akuya sanga dar.
52“Bwasam ala gǝri gǝr nam masǝku akwa mabari yarni, Kadǝbar gǝri kǝtǝ atǝra tsǝkuramǝr mbur nyavǝr zǝndi su. Gǝri tǝ kǝra gǝri ma gǝri adi ta lǝkwa wɛ, ba gǝri kanti whalɛ ala ndzǝ nam ada lǝkwa.”
53Sakatǝ Yɛsu tara tǝra ka ngyar vui nda, antǝ malǝmǝr mabari yarni kaka ndzǝr Farisi kǝ baditsǝni damitsǝni tǝni aka yu sǝ yarɛ pam-pam hang, 54tǝ dar ada sǝkɛ akuya ka dar ngǝti tǝni akwa ndǝrɛ nam tǝ dzǝ ada gha.
अहिले सेलेक्ट गरिएको:
Luka 11: CKL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2023 Seed Company in collaboration with Language Developers and Bible Translators Association
