Luka 10
10
Yɛsu Hyanǝba Murfwɛ Thlani Kapu Sǝɗɛ ni
1Aghǝla ǝni Thlaku ni tsarba ndzi murfuthlani kapu sǝɗɛ damwa, dzǝ ka hyanǝba tǝ dar sǝɗǝ sǝɗɛ, ka dar mwari kǝmata dza alǝkwa kǝlara mǝlmɛ ba vui nam tǝ dzǝ ada bara mwara alǝkwa. 2#Mat 9:37,38Dzǝ ka nkǝrɛ ala dar, “Dlǝ kari fwaku ni hang ama ndzǝr kǝthlǝrari nkyiɗu. Ka gǝri kǝgyǝ Thlakǝr dlǝ kari fwaku ni, kadǝbar ka dzǝ hyanti ndzǝr kǝthlǝr akwa fwakǝrni ni. 3#Mat 10:16Mwaramɛ! Yi ada hyanǝ tǝ gǝri alǝba apa madar agam yarɛ akwa ntsa kǝyar ntaku yarɛ. 4Ta gǝri ta kǝl kwapa wala ngǝrkǝr wala ɓǝɓai yarɛ; ba ta gǝri ta thlawar kǝlara ndǝ ata kǝra whalɛ.
5“Sakatǝ gǝri livi akwa kǝi, tangkǝma ka gǝri nkǝrɛ, ‘Ndzai lapiya ala kǝi ǝni.’ 6Ma ndǝr yiɗǝ ndzai lapiya adai akwanda, ndzai lapiyar gǝri ata ndzai ata kǝrari; ma adi wɛ, ata ɓakta ɓiti ka si ala gǝri. 7#1Kwa 9:14; 1Tim 5:18Ka gǝri ndzai tsu akwa kǝi ǝnda, ka gǝri sǝmɛ ba sa kǝlara sǝ nam tǝ dar la gǝri, akuya ndǝr kǝthlǝr dzǝ mǝzi ka dzǝ dlutsi wadzǝɓarni. Ta gǝri ta mwari tsǝdzǝ ata kǝi ata kǝi.
8“Sakatǝ gǝri lǝkwa mǝlmǝ ba dar ka dlutsi tǝ gǝri, ka gǝri sǝmɛ sǝ nam tǝ dar vi akǝma gǝri. 9Ka gǝri mbǝti ndzǝ nam kura kalang-kalang akwanda ba ka gǝri gha ala dar, ‘Kuhyikur Hyal ni kǝ si kudzǝghɛ adzǝ gǝri.’ 10#'YaSu 13:51Ama sakatǝ gǝri lǝkwa mǝlmǝ ba dar ta dlu tǝ gǝri wɛ, ka gǝri mwari akwa whalɛ nǝr kuta mǝlmǝ ǝnda ka gǝri nkǝrɛ, 11#Mat 10:7-14; Mar 6:8-11; Luk 9:3-5‘Wala bǝrbǝrǝr mǝlmɛ nam tara putǝdzi ata thlǝla yarni yar ɓukǝr ala gǝri sǝr gǝri. Ama ka gǝri zǝndi ǝni apǝri dzǝri: Kuhyikur Hyal kǝ si kudzǝghɛ adzǝ gǝri.’ 12#Bad 19:24-28; Mat 11:24; Mat 10:15Yi ada gha ala gǝri, apǝri ata vǝrǝr haka Hyal ata tsanti kǝtǝrdzi hang ala Saudaum ta mǝlmǝ nda.
13 #
Isa 23:1-18; Izǝ 26:1—28:26; Dzay 3:4-8; Amw 1:9,10; Zak 9:2-4 “Bwasam ala gǝ, Kwarasinu! Bwasam, ala gǝ, Bathsaida! Akuya ma sǝr ndati yarɛ nam tǝ ndǝ 'ya akwa gɛ ma ndǝ kara 'ya akwa Taya ba Sidaun, antǝ sakani dar kǝ tubi tsu din, tǝ dar ada ndzai akwa daza ba pukǝr pǝndzu ala kǝr dar. 14Ama ata ndzai butu ala Taya ba Sidaun vǝr haka ni ta ala gǝri. 15#Isa 14:13-15Ba gǝ, Kafarnahum, ndǝ ata haɓǝti tǝngɛ atahyal ya? A'a! Gǝ ata lǝghǝl akwa vui ndzaiyir ndzǝ ntǝnti.
16 #
Mat 10:40; Mar 9:37; Luk 9:48; Yaw 13:20 “Kǝlara ndǝ nam tara ngati ndǝrǝr gǝri, dzǝ kǝ ngati ndǝrǝrna; kǝlara ndɛ tsuwɛ nam tara ngǝla tǝ gǝri, dzǝ ngǝla tǝra; antǝ kǝlara ndǝ nam tara ngǝla tǝra, dzǝ ngǝla ndǝ nam tara hyanti tǝra.”
17Ndzǝ murfuthlani kapu sǝɗǝ ni dar kalaktsǝni ka si aka kutsari ba dar nkǝrɛ, “Thlaku, wala mambǝl yarɛ nam kulɗa ma ada kǝlǝngkǝr ala yar akwa thlǝma gǝ.”
18Yɛsu ka sǝnau ala dar, “Yi wula Satan tara ɗǝghǝl atahyal apa makǝi. 19#Zab 91:13Yi la gǝri wada tǝ gǝri ata nyaɓu pwapu yarɛ ba yidɛ yarɛ, ba ka gǝri sǝmkǝr ata kǝra sanga dǝnar dawa ni; sǝ adi nam ata 'yanta tǝ gǝri wɛ. 20Ama ta gǝri ta kutsari akuya tǝ mambǝl yarɛ nam kulɗa ni ada kǝlǝngkǝr ala gǝri mai; ama ka gǝri kutsari apǝri thlǝma gǝri kǝ rǝbwaidzi atahyal.”
21Akwa saka ǝnda Yɛsu, ghǝi-ghǝi aka kutsari atar Mambǝl Kartǝ ni, nkǝrɛ, “Yi ada hǝm tǝngɛ Bana, gǝ nam Thlakǝr atahyal ba dai, kadǝbar tǝ gǝ ɗǝwar sǝ ǝni yarni ala ndzǝ nam bǝrkawa ba ndzǝ nam aka zǝndi su, ba gǝ ka tsanǝba tǝ dar ala madausai. A, Bana, akuya ǝni ani sǝ nam ɗaku tǝ gǝ yiɗɛ.
22 #
Yaw 3:35;
Yaw 10:15
“Sanga su Bana kǝ lai. Ndǝ adi nam tara zǝndi wa ani Zǝr ni wɛ, tar Tada ni, ba ndǝ adi nam tara zǝndi wa ani Tada ni wɛ, tar Zǝr ni ba ndzǝ nam tǝ Zǝr ni tara tsarba ka tsanǝba tǝni.”
23Antǝ Yɛsu ka mbaltǝ kǝrni tǝbwar ndzǝr nuwurni ka nkǝrɛ ala dar ɗǝwa-ɗǝwa apǝri, “Sǝr kutsari ala ntsɛ nam tara wula sǝ nam tǝ gǝri wula! 24Akuya Yi ada gha ala gǝri apǝri nabi yarɛ hang ba kuhyi yarɛ bara ka dar wula sǝ nam tǝ gǝri wuti ama dar ta wula wɛ, ba ka dar ngati sǝ nam tǝ gǝri ngati ama dar ta ngati wɛ.”
Karabu nǝr Ndǝr Samariya Nam Ɗaku ni
25 #
Mat 22:35-40; Mar 12:28-34 Vǝr laka ndǝ masǝku akwa Mabariyir Musa ka hyati akuya ka dzǝ nkǝrti Yɛsu. Dzǝ ka yuwɛ, “Malǝm, mi tǝ Yi awa 'ya ka Yi ɓui mpikǝ nam kura kurkuri?”
26Yɛsu ka sǝnau alari, “Mǝ tǝ ndǝ rǝbwai akwa Mabariyir Musa? Mǝmi tǝ gǝri ada kǝratsǝni?”
27 #
Mab 6:5;
Fǝr 19:18
Dzǝ ka sǝnau: “ ‘Ka gǝ yiɗɛ Thlaku Hyalǝr ngɛ aka sanga ɗǝfa ba aka sanga sangura gɛ ba aka sanga dǝnar ngɛ ba aka sanga hankala gɛ’; ba, ‘Ka gǝ yiɗɛ ntǝwhulǝr ngɛ apa kǝrngɛ.’ ”
28 #
Fǝr 18:5
Yɛsu ka kalaktsǝni alari. “Dzǝra gǝ; ka gǝ 'ya ǝni gǝ ata ɓui mpikɛ.”
29Ama ndǝ masǝku akwa Mabariyir Musa ni ada bara tsanti kǝrni apǝri dzǝ kal-kal, dzǝ ka yu Yɛsu apǝri, “Wa ani ntǝwhulǝrna?”
30Yɛsu ka kalaktsǝni alari, “Ndǝ laka adai nam tara hyati akwa Ursalima tǝ dzǝ ata tǝra akwa Dzarikau, sakatǝ dzǝ kǝɓai kaka ndzǝr fa whalɛ. Dar ka fai kariyirni, ka dlaɓu tǝni dar ka tǝrar dar ka ngyar tǝni ata nya nti. 31Kura aka yakǝn fǝrist laka ka nuti whal ǝnda, ama sakatǝ dzǝ tara wula ndǝ ni, dzǝ ka pǝranta ata ngwama ndǝ ni dzǝ ka kwatsǝniyirni. 32Tsu apani, ndǝr Lawi laka, ka si adzǝ vui ni, sakatǝ dzǝ tara wula ndǝ ni, dzǝ ka pǝranta ata ngwama ndǝ ni dzǝ ka kwatsǝniyirni. 33#2Sǝt 28:15Ama ndǝr Samariya laka, ata kǝra buraburá ata whal ǝndari, dzǝ ka si adzǝ vui nam tǝ ndǝ ni ati; ba sakatǝ dzǝ tara wula tǝni, ka kali tǝni. 34Dzǝ ka mwari adzǝni ka puti mal aka yimǝr inabi ata mbǝlku yarɛ nam ata dzari, dzǝ ka bari aka sǝr mbwa mbǝlku. Antǝ dzǝ ka vuti ndǝ ni ata hǝiya kwararni, dzǝ ka mwari aka dza akwa kǝiyir dlu mǝthlǝɓi nǝr agǝri ba dzǝ ka wulhǝ tǝni. 35Sǝbar arpɛ dzǝ ka faba dinariyus sǝɗɛ ka la ndǝr wul kǝi ni. Dzǝ ka nkǝrɛ, ‘Ka gǝ wul tǝni alai ma sakatǝ Yi kalaktsǝni ka si, Yi ata nkyinta ala gǝ kǝlara sǝ nam tǝ gǝ tara santa.’ ”
36Ata dǝntari, Yɛsu ka yuwɛ ndǝ masǝku akwa mabari Musa ni apǝri, “Ala ɗǝngar ngɛ, ndǝ madi akwa ntsa ndzi makǝr ni ani tara ndzai ntǝwhulɛ ala ndǝ nam tǝ ndzǝr fa whalɛ tara fai tǝni ni?”
37Ndǝ masǝku akwa mabari ni ka kalaktsǝni alari, “Ndǝ nam tara 'ya kǝtǝrdzi alari ni.”
Yɛsu ka gha alari, “Mwari, ka gǝ lǝka 'ya tsu apani.”
Yɛsu Ahar Marthla ba Maryamu
38 #
Yaw 11:1
Sakatǝ Yɛsu ba ndzǝr nuwurni ata kǝra mwari akwa whalɛ, dzǝ ka si akwa mǝlmǝ nkyiɗu laka vui nam tǝ mwala laka tǝ thlǝmari Marthla ka dlutsi tǝni aharni. 39Dzǝ aka nkwar angǝri nam tǝ thlǝmari Maryamu, nam tara ndzai ata thlǝla Thlaku ni tǝ dzǝ ada sǝthlǝmɛ ala sǝ nam tǝ Yɛsu ada nkǝrɛ. 40Ama kǝra Marthla kǝlntadzi ka 'ya kǝthlǝr ɗǝmhǝ sǝr dlu mǝthlǝɓi. Dzǝ ka si adzǝ Yɛsu dzǝ ka yu tǝni, “Thlaku, gǝ adi ada ɗǝnga tǝ nkwar mana ngyar tǝra tǝ Yi ani ada 'ya kǝthlǝr yarni Yi duku ni wɛ? Nkǝrɛ alari ka dzǝ siya mbana tǝra!”
41Ama Thlaku ka sǝnau alari, “Marthla, Marthla, gǝ ada damitsǝni kǝrngɛ ba hankala gǝ ada hyati ka sǝ hang, 42ama ɗiɗi sǝ duku ani tǝ ndɛ ada bara. Maryamu tsarba sǝ nam ani ɗaku, ba ndɛ adi ata dlutsi akari wɛ.”
अहिले सेलेक्ट गरिएको:
Luka 10: CKL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2023 Seed Company in collaboration with Language Developers and Bible Translators Association
