Jɔn 11
11
Lazaru tega ye Yezu bi‑o
1-2Nɔɔno déem mo wora, o yere mo Lazaru. O maa zoore Bɛtania ne. Konto mo ye teo kolo Mary de o zembaaro Marita na zoore da to. Mary wonto mo ye wolo déem na kwei terale nuga o lwo dé Teiru wom nɛ yera ne, ye o daare o ma o yu-ywei o guguni-se to.#Luka 10:38-39; Jɔn 12:3 Wonto nabɔ mo Lazaru, ye o ba o weela. 3Mary dedaane Marita ma toŋe ni ba pa Yezu ba we, “Debam Tu, nmo badwoŋ-swono kom weela.” 4Yezu na nigi konto to, o maa we, “Jaweo konto kweelim jei bá taa ye o toone. Ko nam ke se ko pa Wɛ mo na zula. Ko maa wó pa amo Wɛ Bu wom de na zula ko ŋwaane.”
5Yezu maa jege Marita de o nyaane wom de Lazaru swono lanyerane. 6O na nigi we Lazaru weele to, o ma ke da yalei o na maŋe o zoore mɛ to, 7ye o laam daare o ta de o kwaga tɔgena bam o we, “Pa-na dé jwoori dé vo Judea.” 8O kwaga tɔgena bam ma ta ded‑o ba we, “Berem tu, Juu tiina bam daama na lage se ba dole‑m ba go to, n swei mo na? Bɛ mo ye n daa ta lage se n jwoori n vo da?” 9Yezu ma leiri-ba o we, “Ko nam jege se a vo mo. Awa fuga-yalei mo wora wea ne. Ko dae konto na? Nɔɔno ná vei wea ne, o daa ba tiri o toe, kolo ŋwaane logo kom konto pwooni dem pae o nae. 10O nam ná vei tete ne, o wó yɔɔre o taa tiri o toe mo, kolo ŋwaane pwooni tera o tei ne.”
11Yezu na tage konto to, o daa ma ta o woli da o we, “Debam badwoŋi Lazaru wo dɔɔm ne. Amo nam maa vei da se a pa o zaŋe mo.” 12O kwaga tɔgena bam ma ta ded‑o ba we, “Debam tu, o ná dɔa, ko wó gare o yera ne.” 13Yezu nam na tage tei to, o bere we Lazaru tege mo. Banto maa boŋe we ko bere we o dɔ dɔɔm tete mo. 14Yezu laam ma ta de-ba jaja o we, “Lazaru tege mo. 15Amo na tere o tei ne to mo pae a jege wopwolo abam ŋwaane. Ko wó wane ko pa á ke á wo-dedoa á sɛ-ne. Nam pa-na se dé vo o tei.” 16Tomas wolo ba na bwoŋi we ‘Yeywɛ’ to ma ta de o dwonna bam o we, “Nam pa-na se dé maama tɔge dé vo dé woli de dé Teiru wom dé te.”
17-18Yezu ma vo o yi Bɛtania. Ko bwola dedaane Jerusalem nenɛɛne mɛɛla yalei mo.#Maake 11:1 O na yi da to, o ma na we ba na kwei Lazaru ba ke to jege da yana mo. 19Juu tiina dedɛ déem ya tu se ba ke Marita de Mary lei de ba nabɔ wom toone dem. 20Marita na nigi we Yezu maa beene to, o ma nwoŋi o vo se o jeeri‑o. Mary ma maŋe sɔŋɔ ne. 21Marita na yi Yezu tei to, o ma ta o we, “Amo tu, nmo ya ná wo ywo, amo nabɔ wom ya bá te. 22De konto de, a yei we nmo ná lwoori kolo maama Wɛ tei ne, o wó ke o pa nmo.” 23Yezu ma ta ded‑o o we, “N nabɔ wom wó bi o taa ŋwe.” 24Marita ma leiri‑o o we, “Amo yei we o wó jwoori o bi dɛ dem Wɛ na wó bi twa to mo.”
25Yezu ma ta ded‑o o we, “Amo mo ye twa biim de ŋwea tu. Wolo ná ke o wo-dedoa de amo, o ná tega naa o ná ŋwe, konto tu ta wó na ŋwea.#1 Korinti 15:21-23 26Ko woli da, wolo maama ná ŋwe, ye o ná ke o wo-dedoa de amo, toone daa bá ja konto tu Wɛ yiga ne. Nmo nam sɛ konto na?” 27O ma leiri‑o o we, “Ɛɛ. Amo tu, a sɛ we nmo mo ye Wɛ Dam Tu Krista wom, ye n kwori n ye Wɛ Bu wolo na jege se o ba logo baŋa to.”#Matiyu 16:16
28Marita na tage konto o ti to, o ma jwoori o vo o na o nyaane Mary o yerane, ye o bwoŋi‑o o we, “Berem tu wom tua, ye o lage se o na‑m.” 29Mary na nigi konto to, o ma zaŋe o ke lela o nwoŋi o vo se o jeeri‑o. 30Yezu daa ta wo jei selo Marita na jeeri‑o da to mo. O ta wo yi teo kom wo. 31Juu tiina balo na wo sɔŋɔ kom ne ye ba lare de Mary se ko gane o boboŋa to ma na o na ke lela o zaŋe o nwoŋi. Ba ma zaŋe ba tɔge‑o, ye ba boŋe we o ga lage o vo yibeeli dem jeiga mo o keeri.
32Mary na vei o na Yezu na wo mɛ to, o ma to o yiga ne ye o we, “Amo tu, nmo ya ná wo ywo, a nabɔ wom ya bá te.” 33Yezu ma na o na keera, ye Juu tiina balo na tɔge ded‑o ba ba to de keera. O wo ma chɔge, ye o yera sɔɔre. 34O ma bwei-ba o we, “Abam ke‑o yei ne mo?” Ba ma leiri ba we, “Debam tu, ba n nii‑o da.”
35Yezu ma ka yi-na. 36Juu tiina bam na nɛ konto to, ba ma ta ba we, “Nii o na swoi‑o tei.” 37Ko daare badaara ma ta ba we, “Wonto nam mo puri lilwei wom yia. Ko nam ke tɛ mo ye o wo chege Lazaru toone dem?”
38Yezu ma vo yibeeli dem ni, ye o wo daa chɔge dedɛ. Yibeeli dem déem wo peo yera ne mo, ye ba ma kandwɛ-kamunu ba pe de ni. 39Yezu ma ta se ba bibili kandwɛ dem ba yage dáa ne. Too wom nakɔ Marita ma leiri o we, “Amo tu, ba na kwei‑o ba ke to jege da yana mo zem. Konto to, o wó taa tiini o lwoi.” 40Yezu ma ta ded‑o o we, “A maŋe a ta de nmo we, nmo ná ke n wo-dedoa de amo, nmo wó na Wɛ na jege dam tei to.”
41Ba ma kwei kandwɛ dem ba yage dáa ne. Yezu ma kwoni o yuu wɛɛne, ye o ta o we, “Amo Kwo, de n lei de nmo na cheigi amo taane to. 42A maŋe a yei we nmo yeini n cheigi amo taane maŋa maama. Nɔn-kɔgɔ kolo na zege ywo to ŋwaane mo amo nam tage konto, se ko pa ba sɛ we nmo mo toŋe-ne.”
43O na tage konto o ti to, o ma bwoŋi baŋa baŋa de kwor-dɛa ye o we, “Lazaru, zaŋe n nwoŋi!” 44Too wom ma zaŋe o nwoŋi, de gare-yia mo ba ya mɛ ba ba o jea de o nɛ, ye gɔrɔ de kekare o yibia. Yezu ma ta de-ba o we, “Bwoli-na gare-yia yam á yage se o wane o vo.”
Juu tiina dedɛɛra ke ni daane se ba go Yezu
Matiyu 26:1-5; Maake 14:1-2; Luka 22:1-2
45Juu tiina balo ya na tu Mary tei to ma na Yezu na bi Lazaru tei to. Ba dedɛ ma ke ba wo-dedoa ded‑o. 46Ba badaara ma jwoori ba vo Farisi tiina bam tei, ye ba daare ba ta de-ba Yezu na ke kolo to. 47Wɛ kaanem yiga tiina bam de Farisi tiina bam laam ma la daane de ba nakwa kɔgɔ kom. Ba ma bwɛ daane ba we, “Nii-na nɔɔno wonto na ke wo-kenkagela yalo maama, ye dé nam ba ke kolokolo. 48Dé ná yage‑o se o taa ke konto, nɔɔna maama wó ba ba sɛ‑o mo. Konto maa wó pa se Rom dedɛɛra bam laam ba ba chɔge wara-jei sento de dé teo kom maama.”
49Balo na bwɛ daane konto to dedoa yere mo Kayafa. Wonto mo ba kuri se o taa ye ba kaanem yuu tu wom bene dem konto wone. O ma ta de-ba o we, “Abam yeiri kolokolo. 50Dé ná pɛ nɔɔno dedoa te debam nɔɔna bam maama ŋwaane, ko wó taa lana ko pa debam ko gare dé teo kom maama ná chɔge. A fɔ vwa na?” 51Kayafa na tage konto to, ko dae o tete boboŋa mo o mɛ o ta. O nam na ye Wɛ kaanem yuu tu to mo pɛ o pworisi we, Yezu lage o te Juu tiina dwi dem maama ŋwaane mo.#Matiyu 20:28; Jɔn 18:14 52Ko nam dae we o lage o te banto dwi dem yerane ŋwaane. Ko nam daa ta ye Wɛ bia bam na jage jei maama to de ŋwaane mo, se ba wane ba ke daane ba taa ye kɔgɔ dedoa.
53Ko nam zege dɛ dem konto ne to, Juu tiina dedɛɛra bam maa lage chwoŋa se ba go Yezu. 54Konto ma pa Yezu daa ba beeri jaja Judea ne. O ma yage dáane o vo jei selo na bwola de kagoa ni to. Ko ye Efrayim ne mo o vei o zoore da de o kwaga tɔgena bam.
55Juu tiina kuri delo yere na ye Atɔgebabaŋa to déem ma daare fee se de yi. Nɔɔna dedɛ ma zaŋe teo kom jei maama ne ba vo Jerusalem se ba fɔge ba tete de Wɛ ye kuri dem ta wo yi. 56Nɔɔna bam ma beeri Yezu jei. Ba ma la daane Wɛ diga kam ne, ye ba bwei daane ba we, “O lage o ke tɛ mo? O wó ba o di kuri dem na?”
57Wɛ kaanem yiga tiina bam de Farisi tiina bam déem ya pɛ ni we, nɔɔno wolo ná yei Yezu na wo mɛ to, o jege se o ta o bere-ba mo se ba wane ba ja‑o.
अहिले सेलेक्ट गरिएको:
Jɔn 11: KBG
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020, Ghana Institute of Linguistics, Literacy and Bible Translation (GILLBT)
