Jɔn 12
12
Mary ke Yezu lanyerane
Matiyu 26:6-13; Maake 14:3-9
1Da yaredo déem na daare se ko yi Atɔgebabaŋa kuri dem to, Yezu ma vo o yi Bɛtania. Ko ye dáane mo Lazaru ya zoora. Wonto mo ye nɔɔno wolo Yezu na bi toone wone to. 2Ba ma ke wodiu ba pa‑o jei sem konto ne. Marita maa wora o ke wodiiru tem. Lazaru mo tɔge o jeini o wora o di de Yezu.
3Mary laam ma kwei terale nuga kalo yere na ye ‘Naade’ to. Ka déem ye kunkwolo yi mo, ye ka tiini ka lana. Nuga kam konto yeilo chana dedɛ. O ma kwei-ka o ma turi Yezu nɛ. O ma daare o ma o yu-ywei o guguni o nɛ sem. Terale nuga kam lwom dem ma su sɔŋɔ kom ni maama. 4Yezu kwaga tɔgena bam dedoa wolo yere na ye Judas Yisakara to de tɔge o wora. Wonto mo ye wolo na wó ba o yeigi Yezu o pa nɔɔna to. 5O na nɛ Mary na ke tei to, o ma ta o we, “Bɛ mo ye o ke konto? Dé ya wó wane dé kwei terale nuga kam dé yeigi se dé chɛ dé pa yiniga tiina. Ka sabu kom ya wó yi nɔɔno bene dedoa ŋweero mo.” 6O na tage konto to, ko dae we o jege yiniga tiina ŋwaŋa. O nam ye ŋweeno mo. Wonto mo nii ba kɔgɔ kom sabu kom baŋa ne, ye o yeini o ŋɔne-ko o lea. 7Yezu laam ma leiri o we, “Yage o yera. Ko maŋe se o tiŋi nuga kanto mo se ko taa vei a toone dɛ ne, se o ma turi a yera. 8Yiniga tiina bá ti abam tei ne. Amo nam bá taa wo abam tei ne taa taa.”
9Juu tiina kɔgɔ dedɛ ma lɔre we Yezu wo Bɛtania ne. Ba ma zaŋe ba vo da. Ba na vei to, ko dae Yezu yerane ŋwaane, se ko nam ye se ba na Lazaru wolo Yezu na bi toone wone to mo. 10Wɛ kaanem yiga tiina bam laam ma ke ni daane se ba go Lazaru de, 11kolo ŋwaane Lazaru biim dem mo tei pa Juu tiina dedɛ jwoori ba yiga tiina bam kwaga ne, ye ba daare ba sɛ Yezu.
Yezu zo Jerusalem teo wo
Matiyu 21:1-11; Maake 11:1-11; Luka 19:28-40
12Tega déem ma poore. Nɔn-kɔgɔ kolo na tu Jerusalem se ba di ba kuri dem to ma lɔre we Yezu maa beena. 13Ba ma vo ba kaare konkwara vɔɔro, ye ba nwoŋi ba maa vei se ba jeeri‑o. Ba na maa vei to, ba maa seini‑o ba we:
“Hozaana! Dé ke Wɛ lei!
Baŋa Wɛ wó swɛ wolo na tu o yere ŋwaane to swolim.
Wonto mo ye Isarele dwi tiina bam Pɛ.”#Lei 118:25-26
14Yezu ma vo o na bonaga o di, ne Wɛ tɔnɔ kom na maŋe ko ta tei we,
15“Abam balo na zoore Zion#12:15 Zion ye Jerusalem yere dedwoŋi. teo kom ne to,
á yé ta‑á kɔre foone.
Nii-na á pɛ wom,
o diini bona-pɔla mo o maa beena.”#Zekaria 9:9
16Maŋa kam konto ne, Yezu kwaga tɔgena bam ya maa wo lɔre wonnu tem konto kuri. Ko daare maŋa kam Yezu na nɛ nenɔŋ-fɔrɔ Wɛ tei ne to mo ba laam guli Wɛ tɔnɔ kom na tage o taane tei to, de nɔn-kɔgɔ kom na ke kolo ba zuli‑o to.
17Nɔɔna balo déem na wo Yezu tei ne ye o bi Lazaru toone wone to ya maŋe ba ta ba bere teo kom nɔɔna bam o na ke tei o bwoŋi Lazaru se o nwoŋi yibeeli dem wone to. 18Ko ye konto ŋwaane mo nɔn-kɔgɔ kom nwoŋi teo kom ne ba jeeri‑o, ba na nigi we o ke wo-kenkagele dem konto to ŋwaane. 19Farisi tiina bam laam maa tɛ daane ba we, “Á nɛa, debam bere dé bá na kolokolo. Nii-na! Logo kom nɔɔna bam maama mo tɔge o kwaga.”
Yezu tage o toone dem taane
20 Girisi tiina balo déem na tɔge ba vo Jerusalem se ba di kuri dem ba zuli Wɛ to badaara déem ma vo Filipi tei.#Jɔn 1:43-45 21Wonto nwoŋi Galili teo kolo yere na ye Bɛtasida to mo. Ba ma ta ded‑o ba we, “Debam lage se dé na Yezu mo.” 22Filipi ma sɛ ye o vo o ta o bere Anduru. Banto balei ma vo ba ta ba bere Yezu.
23Yezu ma ta de-ba o we, “Maŋa kam laam yia se Wɛ pa Nabiin-bu wom na nenɔŋ-fɔrɔ. 24A tɛ abam chega ŋwaane to, nmo ná jege men-bu dedoa se n du, ye n ná dugi-de tega ne, de wó nwoŋi de ke bia dedɛ. Nmo nam ná jege-de ye n wo dugi, de ta wó taa ye de yerane mo taa. Nmo ná wo sɛ se n ke-de tega ne, n bá‑n na nyɔɔre de baŋa ne. 25Wolo ná swoi o tete ŋwea, konto tu bá na ŋwea Wɛ tei ne. Wolo nam ná ve o ŋwea logo konto ne, kotu wó taa jege ŋwea Wɛ tei ne se ko taa vei wuu. 26Wolo maama ná lage se o toŋe amo totoŋa, konto tu jege se o tɔge amo kwaga mo. Konto wó pa se amo na wo mɛ to, se a tontoŋeno wom de taa tɔge o wora. Wolo maama ná toŋe amo totoŋa, amo Kwo wó pa kotu na zula.”
27Yezu ta ma ta o we, “Amo bochare mo maga. Amo nam wó ta bɛ mo? A nam wó lwoori a Kwo se o che amo se a yé zo chanɛɛre dento wone mo na? Aawo. Ko ye konto ŋwaane mo amo maŋe a ba se a na toone dem konto.#Matiyu 26:39 28A nam wó lwoori a Kwo se o pa o yere zaŋe de zula mo.” Kwora laam ma ŋɔɔne Wɛ telaao ne ka we, “Amo maŋe a pa a yere dem zaŋe de zula, ye a nam ta wó ke konto.”
29Nɔn-kɔgɔ kolo na zege da to ma ni kwora kam, ye ba ta ba we, doa mo mumuna. Badaara maa we, ko ye maleka mo ŋɔɔne de Yezu. 30Yezu ma ta de-ba o we, “Ko dae amo ŋwaane mo kwora kanto ŋɔɔne, se ko ye abam ŋwaane mo. 31Maŋa kam yia se Wɛ di nabiina taane. Ba maa wó zeili logo baŋa dedɛɛro wom. 32Ko nam ná ye amo, ba ná kwei-ne ba zeiŋi wɛɛne, amo wó pa se nabiina maama ba amo tei.” 33O na tage konto to, o bere o na lage o te cham toone tei to mo.#Jɔn 3:14; 18:32
34Kɔgɔ kom nɔɔna ma leiri‑o ba we, “Ko ná ye Wɛ Dam Tu Krista wom, nia yalo Wɛ na tiŋi o pa debam to bere we o jege se o taa wora mo taa wuu. Bɛ nam mo ye n ta n we, ba jege se ba kwei Nabiin-bu wom ba zeiŋi wɛɛne? Nmo na tage Nabiin-bu wom taane to, wɔ mo konto?” 35Yezu ma ta o tete taane o leiri-ba o we, “Pwooni bá tiini de dáane abam tei ne. Pwooni dem ta na wo á tei ne to, se á ta‑á via, se lim dem yé ba de yi abam. Wolo na vei lim wone to yeiri o na lage o vo mɛ to. 36Pwooni dem ta na wo á tei ne to, se á sɛ wolo wom na ye pwooni dem to, se á daare á ta‑á ye pwooni dem bia.”
Yezu déem na tage wonnu tem konto o ti to, o ma vo o seigi o tete ba tei ne. 37O déem ya ke wo-kenkagela dedɛ ba yibia ne. De konto de, ba ta wo sɛ‑o. 38Konto ma pa se kolo Wɛ sampwora Izaya déem na tage to ji chega. O déem tage faŋa faŋa o we:
“Yuu-tu Baŋa Wɛ,
debam na tɔɔle kwora kalo dé bere nɔɔna to mo,
wɔ mo sɛ we ka seene ka ye chega?
Dé Teiru wom na bere o dam dem na ye tei to,
wɔ nam mo lɔre-de chekke?”#Izaya 53:1
39Konto ŋwaane mo nɔɔna bam wo wane ba sɛ Yezu taane dem. Kokuri to, Izaya ta tage o we:
40“Wonto mo dwei ba yia,
ye o pa ba boboŋa jei,
se ba yia yam yé wane ya taa nae,
se ba boboŋa yam de yé wane ya lɔre Wɛ taane dem kuri,
se ba yé pipiri ba sɛ Wɛ se o pa ba na fɔgem.”#Izaya 6:10
41Izaya déem tage dé Teiru wom taane konto, kolo ŋwaane o wuuri o lɔre Yezu nenɔŋ-fɔrɔ kom na ye tei ye o ta wo tu logo baŋa to mo.#Izaya 6:1
42De konto de, Juu tiina yiga tiina dedɛ ke ba wo-dedoa de Yezu. Ba na kɔre Farisi tiina bam to ŋwaane mo ba wo ŋɔɔne-ko jaja, ba na wó zeili-ba ba jeerim diga kam ne to ŋwaane. 43Ba na ke tei to bere we, ba swoi se nabiina taa zuli-ba ko dwoi Wɛ wo ná pwoli de-ba.
Yezu tu se o vere nabiina
44Yezu déem ma ta de kwor-dɛa o we, “Wolo na ke o wo-dedoa de amo to, ko dae we o sɛ amo yerane mo, se ko ye wolo wom na toŋe-ne to de mo o sɛ. 45Wolo na nɛ amo to nɛ wolo wom na toŋe-ne to mo. 46Amo tu logo baŋa ye a jege pwooni a pae nabiina, se wolo maama na sɛ amo to daa yé taa zoore lim wone. 47Wolo ná nigi amo taane dem ye o ba sɛ o toŋe o tɔge-de, amo tete bá chɔge konto tu, kolo ŋwaane amo na tu to, ko dae se a di nabiina taane a chɔge-ba. Ko nam ye se a vere-ba a yage mo. 48Wolo ná ve amo ye o ba jwoŋi amo taane dem, konto tu jege wolo wom na wó chɔge‑o to. Taane delo amo na ŋɔɔne a bere nɔɔna to mo wó zaŋe logo baŋa kweelim dɛ dem ne de bere we konto tu ba jege bora. 49Ko nam dae amo tete boboŋa mo a ŋɔɔna. A Kwo wolo na toŋe-ne to nam mo pɛ-ne ni se a wane a ta kwora kalo o boboŋa na lage to, ye o ta bere-ne a na wó ŋɔɔne-ka tei to. 50Amo nam yei we balo na tɔge ni delo a Kwo Wɛ na pɛ-ne se a ŋɔɔne to wó na ŋwe-doŋa o tei ne. Amo na yeini a ŋɔɔne tei maama mo ye a Kwo na tage kolo o bere-ne to.”
अहिले सेलेक्ट गरिएको:
Jɔn 12: KBG
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020, Ghana Institute of Linguistics, Literacy and Bible Translation (GILLBT)
