Jɔn 10
10
‘Nayero de o pei-kɔgɔ’ taane
1Yezu déem ma maŋe memaŋe o bere nɔɔna bam o we, “A tɛ abam chega ŋwaane to, nɔɔno wolo ná zo nabwoo se o pore pei, ye o ná wo dɛ manchwoŋo ni o zo ye o ná tɔge jei sedwoŋi o chu ko wone, konto tu ye ŋweeno mo. 2Ko daare ko ná ye pei-kɔgɔ nayero wom tete, konto tu wó tɔge manchwoŋo ni dem mo o zo se o pore pei sem. 3O ná lage o zo, ba wó pore ba pa‑o. Pei sem wó lɔre o kwora. O maa wó bwoŋi o tete pei sem yera, ye o ja-se o nwoŋi. 4O ná jaane-se o nwoŋi, o maa tɔge se yiga, ye pei sem tɔge o kwaga, kolo ŋwaane se yei o kwora. 5Ko nam ná ye nɔn-gaa, se bá sɛ se tɔge‑o. Se nam wó duri se viiri mo, kolo ŋwaane se yeiri o kwora.” 6Yezu na mɛ memaŋe dem konto o bere-ba to, ba maa wo lɔre ko kuri.
7Yezu daa ma ta o we, “A tɛ abam chega ŋwaane to, amo mo ye ni delo pei sem na tɔge da to. 8Nayera balo maama na dɛ yiga ba ba ye ba lwoori amo to nye de ŋweena de venverena mo. Pei sem maa wo sɛ ba ni. 9Amo mo ye manchwoŋo ni dem. Wolo maama ná tɔge amo baŋa o zo Wɛ woro kom wo, konto tu wó na verem. O nam wó na ŋwea kalo na ywomma to, ne pei na tɔge manchwoŋo ni dem se nwoŋi se di ye se laam jwoori se zoore tei to. 10Ŋweeno ná tu o zo, o lage se o ŋɔ mo o go o di o daare o ja o chɔge. Ko nam ná ye amo, a tu se a pa nabiina mo na ŋwea de ka ywoni maama.
11Amo mo ye nayero chekke ye a swoi a nɔɔna. Nayero chekke wó sɛ se o te o pei sem ŋwaane.#Lei 23:1; Ezekeli 34:11; Mika 5:4 12Ko daare ko ná ye wolo na yere pei sem o jwoŋi sabu to, wonto dae nayero wolo na tei pei sem to. Wonto ná nɛ nywoŋ-kura na maa beena, o wó duri mo o daare pei sem. Nywoŋ-kura kam maa wó zo pei sem wo pa se jage. 13Wolo wom na tɔge pei sem o jwoŋi sabu to yiga tera se wone. Konto ŋwaane mo o wó duri o daare-se.
14Amo mo ye nayero wom chekke. Amo me de a nɔɔna bam, ye ba de me de amo, 15nenɛɛne amo Kwo na me de amo, ye amo de me ded‑o tei to. Amo maa sɛ se a te a nɔɔna bam ŋwaane, ne nayero chekke na wó te o pei sem ŋwaane tei to.#Matiyu 20:28 16Amo pei sem sedaara wora, se na tere Juu tiina kɔgɔ kom wone. Amo nam jege se a vo a kale-se mo a ja ba a ke daane. Pei sento de wó ni amo kwora. Konto to, a pei sem maama wó taa ye pei-kɔgɔ dedoa ye nayero dedoa nii-se.
17A Kwo Wɛ swoi amo, de a na sɛ se a te a pa a nɔɔna bam, se a daare a bi a na ŋwea to ŋwaane. 18Nɔɔn-nɔɔno nam bá wane o pa a ga a ŋwea. Amo tete nam mo wó kwei-ka a tiŋi dáa ne de a boboŋa. A jege chwoŋa se a pa a ŋwea kam jei. A nam ta jege chwoŋa se a jwoori a bi a daa na-ka. Mo ni delo amo Kwo na pɛ-ne se a ke to.”
19Yezu na tage konto o ti to, popɔra daa ma ba Juu tiina bam wo o taane dem ŋwaane. 20Ba dedɛ maa tɛ ba we, “Setaane mo tɔge‑o pa se o yuu tera. Bɛ mo ye á cheigi o taane?” 21Ko daare badaara maa tɛ ba we, “Setaane na tɔge nɔɔno wolo to bá wane o ta taana yanto dwoŋi. Setaane nyem bá wane o puri lilwei yia.”
Yezu bere we o de o Kwo Wɛ ye bedwe
22Ko déem ma yi se Juu tiina di ba kuri delo yere na ye ‘Apɛwɛ’ to Jerusalem ne. Ko maa ye yadɛ. 23Yezu déem ma vo Wɛ diga kam. O maa wo Solomon konkɔlɔ kom ne o kaaga. 24Juu tiina badaara laam ma ba ba zege ba gilimi‑o, ye ba bwei‑o ba we, “Nmo ye Wɛ Dam Tu wom mo na? Bɛ mo ye n pa dé jege boboŋa taa taa? Ta chega n bere debam se dé kɔ ko jworo.” 25O ma leiri-ba o we, “Amo maŋe a ta a bere abam, ye á ba sɛ a ni. Totoŋa yalo amo Kwo Wɛ na pɛ-ne se a taa ke to mo bere we a jege chega. 26Abam nam ba sɛ amo ni, kolo ŋwaane abam dae amo nyem. Abam dae amo pei sem. 27Amo pei sem yei amo kwora. Amo maa me de-se, ye se tɔge-ne. 28Amo pae a nɔɔna bam na ŋwea Wɛ tei ne mo, ye ba dwi bá ti maŋa de maŋa. Nɔɔn-nɔɔno bá wane o vere-ba amo tei ne. 29Ko ye amo Kwo Wɛ mo kwei-ba o ke a jeŋa ne. Wonto nam dwoi woŋo maama. Nɔɔn-nɔɔno bá wane o vere-ba o tei ne. 30Amo de a Kwo Wɛ ye bedwe mo.”
31Yezu na tage konto to, Juu tiina bam daa ma kwei kandwa se ba ma ba dole‑o ba go. 32O ma ta de-ba o we, “Amo Kwo toŋe-ne se a ke totoŋ-laaro dedɛ a bere abam. Totoŋa yanto wone dɔ tete mo pɛ se á kwaane se á go-ne?” 33Ba ma leiri‑o ba we, “Ko dae keim-laaro ŋwaane mo dé lage dé dole‑m dé go. Ko ye nmo na twe Wɛ yere tei to mo. Nmo ye nabiinu mo, ye n bere we n ye Wɛ.” 34O ma leiri-ba o we, “Wɛ nia tɔnɔ kolo o na tiŋi o pa abam to wone mo ko popone we, Wɛ tage de nɔɔna badwonna o we, ‘Abam ye wa mo.’#Lei 82:6 35Kolo na popone Wɛ tɔnɔ kom ne to bá wane ko taa ye kafɛ. Ko bere we Wɛ déem toŋe o kwora o pa nɔɔna bam konto, ye o bwoŋi-ba we, ‘wa’. 36Amo nam ye wolo a Kwo Wɛ na le se a ke o boboŋa, ye o daare o toŋe-ne se a ba logo baŋa to mo. Konto to, a na tage we amo ye Wɛ Bu wom to, bɛ mo ye á ba sɛ konto? Bɛ mo ye á bere-ne we a twe Wɛ yere?
37-38Abam ná maŋe á ba sɛ amo, maane-na á nii a totoŋa yam na ye tei to. Ko ná dae a Kwo Wɛ totoŋa mo a toŋa, se á yé sɛ-ne. Ko nam ná ye Wɛ totoŋa, se á sɛ totoŋa yam na bere tei to. Á ná sɛ totoŋa yam konto, á wó seene á lɔre we amo de a Kwo Wɛ me daane chekke.” 39O na tage konto to, ba daa maa lage se ba ja‑o. O ma lu ba jeŋa ne o viiri.
40Yezu déem ma jwoori o vo o bɛ Jɔdan buga kam. O ma vo jei selo Jɔn déem na yeini o pa nɔɔna sɛɛm to, o zoore dáane. 41Nɔɔna dedɛ déem maa tui o tei. Ba maa yeini ba tɛ ba we, “Jɔn nam wo ke wo-kenkagele, de dedoa de. Ko daare o na tage kolo maama Yezu ŋwaane to ye chega mo.” 42Jei sem konto ne nɔɔna dedɛ ma ke ba wo-dedoa de Yezu.
अहिले सेलेक्ट गरिएको:
Jɔn 10: KBG
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020, Ghana Institute of Linguistics, Literacy and Bible Translation (GILLBT)
