ይዃንስት ወንጌል 10
10
ፈወነ 10
እየሱስ ቀሰው ምቓ የጝ
1እየሱስም ቈሽ፦ «እማን እማን የኵን! ቢቂዝ መድሪል ሚረይዝ ኣዪጝቀ ላየዝ ጥወውድቅ ቓፅጘ፣ ወምበዲም የጝ። 2ሚረይዝ ጥወውድ ግን ቢቂዝ ምቓ የጝ። 3ጝጭስ ሚረይዙ ሊሚደተድ ብዘኵ፤ ቢቅድም ጝድምሽፅድ ወሽጘኵ፤ ጘጝም ጝቢቅድ ጝታይተሽዝ ጭጘኵ፤ ቃዋም ቢዘይል ፊሰኵ። 4ጝቕምት ቢቅድ ፊስ በር ጝታበው በዊል ፊረኵ፤ ጝቢቅድም ጝድመድ ኣርቐቍ ኣጛንስቅ ጝት ቲክንጘኵ። 5ላየይዙ ድመድ ግን ኣርቓቍ ኣጛንስቅ ሰይጘኵጚ ጝት ቲክናቍም።» 6እየሱስም እኒን ተከድ ድቁ፤ ጛይ ግን ጘጝ ዊግተውድየንት ኣስክሲየቍም።
7እንዝ ማጥን እየሱስ እንደ ገነ፦ «እማን እማን የኵን፤ ቢቂዙ ሚረድ ያን የጝ። 8ይበውገ ተረቍድቅ ቓፅጝ ወምበዲጥም ጛይ፤ ቢቅድ ግን ጛት ወሺየቍም። 9ሚረድ ያን የጝ፤ ይጐቱ ፃቭ ጥወውድቅ ቓድጡ፤ ጥውጡ፤ ፍጡ፤ ውላቐነ ስፍረም ችጝጡ። 10ቓፅጘድ ተረውድ ስጠ፣ ዝውጠ፣ ድስጠም ጭቝ የጝ፤ ያን ግን ተጠውድ ጛጭስ ርዅየ ኣቓንስ፣ ቲርፍርፈው ርዅየም ችጛንስ ማጥን የጝ።
11«ቀሰው ምቓድ ያን የጝ፤ ቀሰው ምቓ ጝርዅየድ ጝቢቂዝ ቺ ዲቍስ ይወኵ። 12ቢቅድ ጝቍ ኣየቍ ቅፅሩ ምቓድ ግን ተኵለ ተራንድ ቓላንድ ቢቅድ ማል ሰየኵ፤ ተኵለድም ቢቅድ ናጥቀኵ፤ ቢትነኵም። 13ማል ሰየውድም ቢቅድ ጝቍ ኣየቍ ኣጛንስቅ ግድ እጀው ኣቓንስቅ የጝ። 14-15ቀሰው ምቓድ ያን የጝ፤ ኣይር ይት ኣርቓንትጘ ያንም ኣይርት ኣርቓንትጘ ይቕምት ቢቅድዛት ኣርቐኵን፤ ይቢቅድም ይት ኣርቕጘኵ፤ ይርዅየሸንትም ይቢቂዝ ቺ ዲቍስ ይወኵን።#ማቲ. 11፡27፤ ሉቃ. 22፡33፤ ዘሊ. 24፡16። 16እኒን መድሪስ ኣየቍ ላጥ ቢቅም እኵ፤ ጛትም ነስጨ ጥውሸኵ፤ ጛይም ይድመድ ወሽጥቍ፤ ላው መጝገም ኣጥቍ፤ ምቓድም ላው ኣጡ። 17እንዝ ማጥን ይር ይት ቀነኵ፤ ምላሰንድም ይኒቭስሸንት ዲቍስ ይወኵን፤ ዲቍስ ይወት ግረ ቈሽ ዊስ ጒጭር። 18ይርዅየሸንት ይቕም ይፍቃድዝ ዲቍስ ይዊቀውዝየ ጝርት ይጊስ ፊሰው ኣውማውም እጀው፤ ይርዅየሸንት ዲቍስን ይወነውዝመ ዊስን ጕየነውዝዙ ስልጣን ፃቀር የጝ፤ እኒን ትዛዝድየንት ይርቲስ ለምጥኩን።»
19እኒን ዊገይዝቍዝም ኣይዅዳንድ እንደ ገነ ጛስ ጛይ ቲተቲት። 20ጛጊስም እክሰቍ እቅድ፦ «ጋኒንዝ ፃይሸው ጕቑረ የጝ፤ ውር ፃቭትርነ ጝት ወሽርና?» ይ። 21ላጥድ ግን፦ «እኒን ጋኒንዝ ፃይሸው እጅርዙ ዊገም ኣየው፤ ጋኒንመ ኻርቨዙ እልጣን ብዘነው ቸለወ?» ይ።
ኣይዅዳኒዙ ኣምነቅ የነውድ
22እየሩሳልየምስም መቅደስ ጝኒዝ ታድስሸነይዙ በልድ ኪብርሸው ግርየድ ችጙ፤ ወቅትድም ጫረ ዊኑ። 23እየሱስም መቅደስ ጝኒል ሰለሙንት ዋጥርጥረነ ጒደነይዝ ዋጥርጥራ ዊኑ። 24ኣይዅዳንድም እየሱስት ኪብጝ፦ «ኣውን ኣሽ የጝ ይናእዘንድ ሲቅልድር ፅብረውድ? ክት ክርስቶስ ኣርሽ ጋልፅር ድቍ» ይ። 25ጘጝም፦ «ያንሰ ድቍ ኣቈ ዊኑን! ክትን ግን ኣምናይርነቅም፤ ይርት ሽዝ ሰራጨው እኒን ታምርዙ ምልክትድ ይጭስ ሚዝርደኵ። 26ክትን ግን ይቢቂስ ኣይርነቅ ኣቕርናንስቅ ይት ኣምናይርነቅም። 27ይቢቅድ ይድመድ ወሽጘኵ፤ ያንም ጛት ኣርቐኵን፤ ጛይም ይት ቲክንጘኵ። 28ያን ጛጭስ ዘላልምዙ ርዅየ ይውጭር፤ እንዝ ማጥን ስሪስቅ ድዛቍም፤ ጛት ይናኒስ ናጥቅ ፊሰው ኣውማውም እጀው። 29ጛት ይጭስ ነየው ይር እጝቂስቅ ዲቈኵ፤ ይርት ናኒስ ጛት ናጥቅጠ ቸለው ኣውማውም እጀው። 30ይስመ ኣይርስ ላው የጝ» ዩ።
31ኣይዅዳንድም ኣይንድ እንደ ገነ ድድብጥጘ ቕርጘ ጕይ። 32እየሱስም፦ «ይርቲስ ንቕፀው ቀሰው ሰቭ ቓሊስኩን፤ ጛጊስ ኣውየን ዊገይዝቍዝ ይጝ ይት ጣዝትርነ በንርነውድ?» ዩ። 33ኣይዅዳንድም፦ «ይን ክት ጣዝነ በንነውድ እደረት ዛሽራንስቅ የጝጚ ሰራሽረው ቀሰው ሰቪዝቍዝም ኣየው፤ እንም፣ ክት እጅር ኣቕር ፅብራ ክቕምት ኣምላክ ፃቭራንስቅ የጝ» ይ። 34እየሱስም፦ «ውረ ክታኽጊዝ፦ ‹ያን ክትን ኣምላካን የጝ ዩን› ይሽት ፃፍሽ እጀውቀ?#መዝ. 82፡6። 35እደስለ እደረት ቃልድ ጝታጐ ተረቍ እቅድዛት፦ ‹ኣምላካን› የውዝየ፣ ቅዱሳን መፃፋንድ ይጘውድም ሸርሻው ኣቐውዝየ፣ 36ውር ቃጥ የጝ ኣይር ቀድሰውድየንት፣ ኣልሚልም እፃቐውድየንት፦ ‹ያን እደረት ዅር የጝ› ዩዝ፦ ‹እደረት ዛሸኵ› ይርነውድ? 37ያን ይርት ሰቭድ ሰራጨቅ ኣቐውዝየ ይት ኣምንትርነ። 38ሰራጨር ኣቐውዝየ ግን ይት ኣምኒርንሽ እኳ ኣይር ይግል ፅበጘ፣ ያንም ኣይርትል ፅበጘ፣ ኣርቕርናንስመ ኣስክስርናንስ ማጥን ይሰቪዝ ኣምንጥን» ዩ። 39ጛይም እንደ ገነ ፃይጥጘ በን፤ ጘጝ ግን ጝታማኽሊስ ኣምልጥ ፊሩ።
40ጝጊስም ዮርዳኖስ ዊርቨይዝ እጂ ከር እንዝ ሚቅ ይዃንስ ጣምቃ ዊነው ስፍረይል ፊሩ፤ ጝግልም ሳብጡ።#ይዃ. 1፡28። 41ንቕፀቍ እቅም ጝጐ ፊርጝ፦ «ይዃንስ ውረውረ ታምርም ፃቪየው፤ ዊገድ ግን እን እጅሪዝ ማጥን ዊግተው ዊገድቅ እማን ዊኑ» ይ። 42ጝጊስም ንቕፀቍ እቅ ጝት ኣምን።
अहिले सेलेक्ट गरिएको:
ይዃንስት ወንጌል 10: ኽምጣኣኪ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
