ይዃንስት ወንጌል 11
11
ፈወነ 11
ኣላዛር ክረጘ
1ቢታንየ ፅበው ኣላዛር የነው ላው እጅር ፅዊት ዊኑ፤ ቢታንየ ማርያምስመ ጝርስን ማርተስታ ኪው ዊንች። 2እኝቸን ማርያም፣ ኣደረት ሽቱ ቓስረይ፣ ጝልኵድየንትም ጝርኣውር ፅቭቀይዝ ዊልውልደይሸን ጚ፤ ፅዊተው እጅርድም ጝርዝን ዊኑ። 3እንዛይ ጝፅንድም፦ «ኣደረወ! ክቀንደው ክወደጅድ ፅዊትኩ» ይጝ እየሱስትል እፃ በርስ። 4እየሱስም እኒንት ወሻንድ፦ «እኒን ፅውዘድ እደረት ዅር ጝዝ ኪብራንስመ እደረስም ክቭር ኣቓንስ ማጥን የጝጚ፣ ክርጘል ችጝዘውም ኣየው» ዩ።
5እየሱስም ማርተስመ ጝርስን ማርያምስ ኣላዛርትም ቀነው ዊኑ። 6ኣቕሽም ኣላዛርት ፅዊተነውድ ወሻንድ ጝዊነው ስፍረይል ሊጘ ግርቅ ደዩ። 7እንዝ ግረ ጝክንደጥድዛት፦ «እንደ ገነ ይዅዳ ኻግሪል ፊርነ» ዩ። 8ጝክንደጥድም፦ «ክንሰተወ! ኣይዅዳንድ እንዝ ሚቅ ክት ቁጡጘ ደምዝጛ ዊን፤ እደስለ እንደ ገነመ ዊስር ፊርተ?» ይ። 9እየሱስም፦ «ጊርቅ የነውድ ፅጭ ሊጘ ሰት ኣየውቀ? ጊርቅዝ ፃጘው እጅርድ እን ኣልሚዙ ብርኻንድ ቓለው ኣቓንስቅ ፅጋራውም። 10ኻርዝ ፃጘውድ ግን ብርኻን እጀው ኣቓንስቅ ፅጋረኵ» የው ዊሱ።
11ጛጭስ እኒንት ዊግተት ግረ፦ «ይናወደጅ ኣላዛር ዝመውርኩ፤ ያን ግን ጝዝመዊስ ጒስጨ ፊጨ የጝ» ዩ። 12ጝክንደጥድም፦ «ኣደረወ! ዝመውር ኣቐውዝየስ ቓድጡ» ይ። 13እየሱስ እኒንት ዊግተውድ ኣላዛርት ክርጘይዝቍዝ ዊኑ፤ ጛጭስ ግን ዝመውዝ ማጥን ዊግተው ተኩ። 14እንዝ ማጥን ጋልፅ፦ «ኣላዛር ክርኩ፤ 15ክትን ኣምንድርናንስ ማጥን ጝግል ዊኒቀር ኣቐነዊዝ ክታማጥን ዲስ የኵን፤ ነን ግን ጝጐ ፊርነ» የው ድቁ። 16ኣይንድ ዲድመስ ይሽተው ተውማስ ላጥ ክንደጥድዛት፦ «ይንም ጝጅቅ ክርናንስ ማጥን ፊርነ» ዩ።
እየሱስ ኣላዛርት ፅንት ዲብሰጘ
17እየሱስም ጝግል ችጛንድ ኣላዛር ዲቭሽተት ሲዘ ግርቅ ኣቕ ዊኑ። 18ቢታንየም እየሩሳልየምቲስ እክልድረውድ ሻቘ ኪለው ሚትር ኣጠ የጝ። 19ንቕፀቍ ኣይዅዳንም ማርተስመ ማርያምስ ጝታዝንትቍዝ ዲብስጥጘ ተርጝ ዊን። 20ማርተም እየሱስ ተረጘ ወሽራንድ፣ ጝት ለምርተ ጕር ፍች፤ ማርያም ግን ጝኒል እዳቕር ዊንች።
21ማርተም እየሱስት፦ «ኣደረወ! ክት እንል ዊንዳን ይዝን ክርጠም ዊኒየው። 22ነንም ኣቕሽ ክት ጨውረውድየንትቅ እደረ ክጭስ ነይጡ ኣቐጘ ኣርቐኵን» ይች። 23እየሱስም፦ «ክዝን ክርጘይስ ጕጡ» ዩ። 24ማርተም፦ «ክርጘይስ ጐነው ኻትሸነ ግርየይዝ ጕጠጘ ኣርቐኵን» ይች። 25እየሱስም፦ «ክርጘይስ ጐነዝመ ርዅየዝ ያን የጝ፤ ይት ኣምነውድቅ ክርሽም እኳ ርዅየዝ ፅብጡ። 26ርዅየዝ ፅበው፣ ይትም ኣምነውድቅ፣ ስሪስቅ ክራውም፤ እኒንት ኣምንደኵመ?» ዩ። 27ጚይም፦ «የይ ክንሰተወ! ክት ኣልሚል ተትረር ክርስቶስ እደረት ዅር ኣረጘ ኣምነኵን» ይች።
28እኒንት ይር በትርም ዋጥርድር ፊትር ጝርስት ጝሪለ ጭጝር፦ «ክንሰተድ ተርኩ፤ ክትም ጭጘኵ» ይች። 29ማርያምም እኒንት ወሽራንድ በውዝ ጕር ጝጐ ፊርች። 30እየሱስም ኣይንድ ማርተ ጝት ለምትረው ስፍረይል ዊኑ፤ ኪዊልም ጥዊየው ዊኑ። 31ጝርት ዲብስጛ ጝኒል ዊነቍ ኣይዅዳንድም ጕን ይር ፍረጘ ቓልጛንድ መቃቭሪል ፊትር ሊዝተ ተክሩዝ ጝርት ቲክንጝ ፊር።
32ማርያምም እየሱስ ፅበዊል ፊትር ጝት ቓልዳንድ ጝልኲል ሊቭር፦ «ኣደረወ! ክት እንል ዊንዳን ይዝን ክርጠም ዊኒየው» ይች። 33እየሱስም ጚ ሊዝራንድ፣ ጝርት ቲክንጝ ተረቍ ኣይዅዳንድም ሊዝጛንድ ቓላንድ፣ ጝመንፈሲዝ ኽዝንዝ ጭቕጘ ኻውክሽ፦ 34«ኣውል የጝ ዲቭርነውድ?» ዩ። ጛይም፦ «ኣደረወ! ለው ተትር ቓላ» ይ። 35እየሱስም ጝእርድ ቅብሱ። 36ኣይዅዳንድም፦ «ኣወሽ ቀነው ዊነጘ ቓልድርነኵመ?» ይ። 37ጛጊስም ላው ላውድ፦ «እኒን ኻርቨይዝ እልጣንድ ቓዘውድ እኒንትስ ክራየጘ ፃቭጠ ቸላውመ ዊኑ?» ይ።
እየሱስ ኣላዛርት ክርጘይስ ጒሰጘ
38እየሱስም ጭቕጘ ኻዝና መቃቭሪል ፊሩ፤ መቃቭርድም ቕርጘዝ ዲቭሽተው ጋ ዊኑ። 39ጘጝም፦ «ቕርጘድ ጕይጥን» ዩ። ክረዊዝ ጝስን ማርተም፦ «ኣደረወ! ነንመ ክረት ሲዘ ግርቅ ኣቓንስቅ ኻርጠ የጝ» ይች። 40እየሱስም፦ « ‹ኣምንደውዝየ እደረት ክቭርድ ቓልትር› የር ድቊቀርቀ?» ዩ። 41ጛይም ቕርጘድ ጕይ። ጘጝም ጝእልጣንድ ኒየ ጕይ፦ «ኣየወ! ይት ወሽራንስቅ ሚዝየንዘኵን። 42ዊትርቅም ይት ወሽረር ኣረጘ ኣርቐኵን፤ ዊገድ ግን እኒንት ዊግጠውድ እንል ችብረቍድ ይት እፃረርድ ክት ኣረጘ ኣርቕጥጘ ማጥን የር የጝ» ዩ። 43እኒንት ዊግተት ግረ ጝድመድ ኣጕስ ሸው፦ «ኣላዛርወ! ለው ፍ!» የው ዊግቱ። 44ክረውድም ጝናንጣኒዝመ ጝልኵጣኒዝ ሚግንዝዝ ጊንሽተጘ፣ ጝጋፅድም ፃርቀዝ ጣጥምሸጘ መቃቭሪስ ፉ። እየሱስም፦ «ጊንዝሽተው ኣልቨድየንት እክስጥንነ ፊርነ» ዩ።
ኣይዅዳንድ እየሱስት ቁጥጘ ኣድምጘጘ
(ማቲ. 26፡1-5፤ ማር. 14፡1-2፤ ሉቃ. 22፡1-2)
45ማርያምት ዲብስጥጘ ተርጝ ዊነቍ ኣይዅዳኒስም እክሰቍድ እየሱስ ፃቨውድየንት ቓልጛንድ ጝት ኣምን። 46ላው ላውድ ግን ፊርጝ ጘጝ ፃቨው ዊገድየንት ፈሪሳኒዝ ድቍ። 47እንዝ ማጥን ካኽነጣነ ኻልቅጢዝመ ፈሪሳኒዝ ኣይዅዳኒዙ ሸጐውድየንት ኣኸቨ ጭጝጝ፦ «እን እጅርድየን ንቕፀቍ ታምራንዝቍ ምልክታን ፃቫ ኣቓንስቅ ውር ፃቭናን ቺዝጡ? 48ዝም ይን በርናን፣ እጅርድቅ ጝት ኣምንጠ የጝ፤ ረውማንድም ተርጝ ይናኻግሪዝመ#11፡48 ዊንም ይናመቅደስ ጝኒዝመ። ይናኽዝቪዝ ድስጥጘ የጝ» ይ።
49ጝታማኽሊስም ላውድ ጚ ኣምረየንስ ካኽነጣነ ኻልቀ ዊነው ቀያፈ የነውድ፦ «እፈ ክትን ውርም ኣርቓይርነቅ! 50ኽዝቭድቅ ድዘነዊስ ሽ ኽዝቪዝ ማጥን ላው እጅር ክራን ቺዝጠጘመ ኣስክሳይርነቀ?» ዩ። 51እኒንትም ዊግተውድ ጝቕምቲስ ፊስም ኣየው ዊኑ፤ ዊገድ ግን ጚ ኣምረየንስ ካኽነጣነ ኻልቀ ዊናንስቅ እየሱስ ኽዝቪዝ ማጥን ክርጠ ጥውሸው ኣቐጘ ቓሊሳንድ እኒን ትንቪትድ ዊግቱ። 52ክረውድም ጘጝ ኽዝቪዝ ማጥን ጭቝ ኣዪጝቀ ቢትንሸቍ እደረት ቝርድዛትም ላው ፃቭ ኣኽቭጠ የጝ። 53ኣቓንስቅም ጚ ግርየየንቲስ ኪርምጝ ጝት ቁጥጘ ኣድም።
54እንዝ ማጥን እየሱስ ኣይንቲስ ኪርም ኣይዅዳኒዝ ማኽሊዝ ግልፅዝ ዋጥርጥሪየውም፤ ዊገድ ግን ጝጊስ ፍ በራኸይዝ ጋቢል ፅብረይ የፍርየም የነይ ኻትመትል ፊሩ፤ ጝግልም ጝክንደጢጅቅ ሳብጡ።
55ኣይዅዳኒዙ ፈዝየድም ችጝጠ ጓንድ በልድ ችጘነዊዝ በውገ ዊር የነዊዙ ስረትድ ፋፅምጥጘ ንቕፀቍ እቅ ጝታይተኻግሪስ እየሩሳልየም ፍ። 56እየሱስትም ደምዝጛ ዊን፤ መቅደስ ጝኒልም ችብርጝ ጛስ ጛይ፦ «ወረጘ ይርና? በሊል ተራውመ ኣጢ?» ይ። 57ካኽነጣነ ኻልቅጢዝመ ፈሪሳኒዝ ግን እየሱስት ፃይጥጘ በንጝ ጝት ቓለው እጅር ፅብሽ ጛጭስ ጣቍማንስ ኣዝጝ ዊን።
अहिले सेलेक्ट गरिएको:
ይዃንስት ወንጌል 11: ኽምጣኣኪ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
