ይዃንስት ወንጌል 12
12
ፈወነ 12
ላይ እውነ እየሱስት ሽቱ ቓስረጘ
(ማቲ. 26፡6-13፤ ማር. 14፡3-9)
1እየሱስም ፈዝየ በልድ ችጝጠ ዋልጠ ግርቅ እዳጛንድ ጝቕም ክርጘይስ ጒሰው ኣላዛር ፅበው ቢታንየ ትጐ ፊሩ። 2ጝጊስም ድረይ ጝጭስ ኣስል፤ ማርተም ኣቭንውዝራ ዊንች፤ ኣላዛርም ጝጅቅ መዲል ጐየቍስ ላውድ ዊኑ። 3ማርያምም ጝወየድ ጭቕጘ ኪብረው ሊትር ግቨር ኣቐው ናርዶስ የነው ሽቱ ነስር እየሱስት ልኵጣኒል ኣርክፍክፍች፤ ጝርኣውር ፅቭቀይዝም ጝልኵጣንድ ዊልውልች፤ ጝኻረድም ጝንድየንትቅ እቻቑ።#ሉቃ. 7፡37-38። 4ጝክንደጢስም ላው ኣስቈረትቱ ይዅዳ የነው እግረ እየሱስት ዲቍስ ይውጡድ፦ 5«እኒን ሽቱድ ውር ቃጥ ይጝ ሻቘ ላ ዲናርዝ ቅይሽ ጊንዝቭድ ድኺዝ ይውሽቲየውድ?» ዩ። 6እኒንት ዊግተውድም ድኺዝ ኻዝን ኣዪጝቀ ቓፅጘ ዊናንስቅ፣ ጊንዝቭ እቝረነው ኸረጢትድም ፃየውድ ጘጝ ዊናንስቅ፣ ጝግል እቝርንቊስ ስⶓነው ክንድ ዊናንስቅ የጝ።
7እየሱስም፦ «እኒን ሽቱድ ይዲቭሽተነ ግርየይዝ ኣስልደው ኣቓንስቅ በጥን። 8ድኽድ ዊትርቅ ክታጅቅ እኵ፤ ያን ግን ዊትርቅ ክታጅቅ ፅበቅም።» ዩ።#ዘዳ. 15፡11።
9ኣይንድ ንቕፀቍ ኣይዅዳን እየሱስ ጝግል ፀበጘ ወሽጛንስቅ ቢታንየ ተር፤ ተርጘውድም እየሱስት ማጥን ጭቝ ኣዪጝቀ እየሱስ ክርጘይስ ጒሰው ኣላዛርትም ቓልጥጘ የጝ። 10ካኽነጣነ ኻልቅጥድ ግን ኣላዛርት ቈሽ ቁጥጘ ማኽርኽርሽ። 11ምላሰንድም ጝቍዝ ንቕፀቍ ኣይዅዳን ፊርጛ እየሱስት ኣምንጛ ዊንጛንስቅ የጝ።
እየሱስ ኽየው ክቭርዝ እየሩሳልየም ጥወጘ
(ማቲ. 21፡1-11፤ ማር. 11፡1-11፤ ሉቃ. 19፡28-40)
12ጛምርሲዝም ፈዝየ በሊል ተረው ንቕፀው ኽዝቭ እየሱስ እየሩሳልየም ተረው ኣቐጘ ወሹ። 13እንዝ ማጥን ሰልየንዙ ኻፀ ጫጝቕዝጝ ጝት ለምርጥጘ ፍ፤ ጝታድመድም ኣጕስ ሽጝ፦ «ዀሳይነ! ኣደረት ሽዝ ተረው እስራየልት ንጕስ በርክሸው የጝ» ይ።#መዝ. 118፡25-26። 14እየሱስም ድዃረት እወል ችጝ ድቃሩ፤ እንም ኣቐውድ፦ 15«እፈ ፂወንት ቝረወ! ጐውተ! እንወ ክንጕስድ ድዃረት እወሊል ድቃር ተርጡ» ይሽት ፃፍሸውድ ፋፅምሻንስ የጝ።#ዘካ. 9፡9። 16ጝክንደጥድ በውገ እኒንትቅ ኣስክሲየቍም ዊን፤ ጝማጥን ፃፍሸቊዝመ እንዛይ ጝጭስ ፃቭሽተቍ ዊቂዝ ኣጅጘውድ እየሱስ ኪብረት ግረ የጝ።
17ኣላዛርት መቃቭሪስ ጭጝ ጒሳንድ ጝጅቅ ዊነቍድቅ ክርጘይስ ጒሰጘ ሚዝርድጛ ዊን። 18ንቕፀቍ እቅም እኒን ታምርዙ ምልክትድ ፃቫንድ ወሽጛንስቅ ጝት ለምርጥጘ ፍ። 19እንዝ ማጥን ፈሪሳንድ ጛስ ጛይ፦ «ቓልድርነኵመ ነስየ ውርቅ ፃቭነ ቸላይነቅ ኣነጛ? እንወ ኣልምድቅ ጝት ቲክን ፊርኩ» ይ።
እየሱስ ጝክርጘይዝቍዝ በውርስ ድቈጘ
20በልድ ኪብርዝጥጘ እየሩሳልየም ፊርጝ ዊነቍ እቂዝ ማኽሊስም ላው ላው ግሪካን እቅ ዊን። 21ጛይም ገሊለትወ በተሰይደስ ተረው ፊልበውስ ትጐ ኣልትጝ፦ «ኣደረወ! ኣለቀይ እየሱስት ቓልነ በን ዊኑን» ይ። 22ፊልበውስም ፊር እንድርያስስ ድቁ፤ እንድርያስስመ ፊልበውስስም ላብጠ ፊርጝ እየሱስስ ድቍ።
23እየሱስም እንት ዩ፦ «እጅር ዅር ኪብረው ሰትድ ችጝኩ። 24እማን እማን የኵን፤ ዚሩ ፍረ ዝቨይል ሊቭር ክሪረውዝየ ጝርለ እዳቲ፤ ክትርሽ ግን ንቕፀቍ ፍር ፍርዝቲ።#ማቲ. 10፡39፤ 16፡25፤ ማር. 8፡35፤ ሉቃ. 9፡24፤ 17፡33። 25ጝርዅየሸንት ቀነወድቅ ድስጡ፤ እን ኣልሚስ ጝርዅየሸንት ሽክተውድ ግን ዘላልምዙ ርዅየዝ ሊሚድጡ። 26ይት ኣግልግልጠ በነውድቅ ይእግርገይል ቲክነ፤ ያን ፅበዊል ይኣገልጋይድም ፅብጡ፤ ይት ኣግልግለውድየንትም ኣይር ኪብርዝጡ።
27«ነንስ ይኒቭስሸን ጨጝቅሽርኵች፤ ወረጘ ይጨ? ‹ኣየወ! እኒን ሰቲስ ይት ቓዝመ ይጭራ?› ኣየውም፤ ተጠውድ እኒን ሚከረይዙ ሰቲዝ ማጥን የጝ። 28ኣየወ! ክሽድ ኪብርዝ።» ኣይንድም፦ «ኪብርዝኩን፤ ቈሽም ኪብርዝጭር» የው ድመ ሲመይስ ተሩ። 29ጝግል ችብርጝ ዊነቍድም እኒን ድመድ ወሽጛንድ፦ «ነጐድጓድ የጝ» ይ፤ ላጥድ ቈሽ፦ «መላክ የጝ ዊግተውድ» ይ። 30እየሱስ ግን፦ «እኒን ድመድ ተረውድ ይማጥን ኣዪጝቀ ክታማጥን የጝ። 31እኒን ኣልምድ ፊርድሸው ግርየድ ነን የጝ፤ እን ኣልሚዙ ቅመተድ ነን ቢዘ ሊቭጡ። 32ያንም ዝቨይስ ኒየ ንየስ ንየስ ያንድ እቅድዛትቅ ይቕም ትጐ ዊትርጭር» ዩ። 33እየሱስ እኒንት ዊግተውድ ኣወየው ክርጘዝ ክርጠጘ ጣቍመነት ዊኑ።
34ኽዝቭድም፦ «ይንስ ክርስቶስ ዘላልም ፅብጠጘ ኽጊስ ፃፍሽ ችጝንኵኑን፤ እደስለ ወረጘ የጝ ክት፦ ‹እጅር ዅር ንየስ ንየስ ይጡ› ይረውድ? እኒን እጅር ዅርድስ ኣው የጝ?» ይ።#መዝ. 110፡4፤ እሳ. 9፡7፤ ኽዝ. 37፡25፤ ዳን. 7፡14። 35እየሱስም፦ «ገነ ዊቱ ግርየ ክታግል ብርኻን እኩ፤ ጥመድ ክታግል ችጚጝቀ ብርኻንድ ፅባ ዋጥርጥርጥን፤ ጥመዝ ዋጥርጥረው እጅር ኣውል ፊርጠጘ ኣርቓውም። 36ብርኻንዝ ቝር ኣቕርናንስ ማጥን ብርኻን ፅባ እኒን ብርኻኒዝ ኣምንጥን» የው ዊሱ። እየሱስ እኒንት ዊግት ኻተት ግረ ጛጊስ ቲት ፊር ሲውርሹ።
ኣይዅዳኒዝ ኣምነቅ የነውድ
37እየሱስ ውርም እኳ እንቝጥጘ ታምራንዝቍ ምልክታን ጝታበዊል ፃቭሽም፣ ኣይዅዳንድ ጝት ኣምኒየቍም። 38እንም ነቭይ ይሳያስ፦ «ኣደረወ! ይናሚዝርነይድ ኣው ኣምኑ? ኣደረት ኻይልድስ ኣውስ ጋልፅሽቱ?» የው ዊግተው ቃልድ ፋፅምሻንስ ማጥን የጝ።#እሳ. 53፡1። 39-40ይሳያስም ቈሽ ላየ ስፍረዝ፦ «ጝታእልጣንድ ፅምርዝኩ፤ ጝታእዘንድም ዲንድንዝኩ፤ ኣቓንስቅም ጝታእልጣኒዝ ቓላቍም፤ ጝታእዘኒዝም ኣስክሳቍም፤ ያን ጛት ቓዛይቀጘም ይጐ ዋጥራቍም» የው ጋልፅኩ፤ እንዝ ማጥን ጝት ኣምነነ ብ።#እሳ. 6፡10። 41ይሳያስ እኒንት የውድ እየሱስት ክቭርድ ቓላንስቅ የጝ፤ ጝማጥንም እኒንት ዊግቱ። 42ኣነጚ ኣይዅዳነ ኻልቅጢስ ንቕፀቍድ ጝት ኣምን፤ ዊገድ ግን ፈሪሳንድ ምኵራቪስ ፊሳይጘጘ ጐውትጛንስቅ ግልፅዝ ጝማጥን ሚዝርዲየቍም። 43እንም እደረቲስ ሚዝየንሽተነው ሽ እቅዝ ሚዘንሽትጥጘ በንጛንስቅ የጝ።
44እየሱስም ጝድመድ ኣጕስ ሸው፦ «ኣውማው እጅር ይት ኣምንሽ ይት ጭቝ ኣዪጝቀ ይት እፃቐውድየንትም ኣምኑ የነት የጝ። 45ይት ቓለውድም ይት እፃቐውድየንት ቓለኵ። 46ይት ኣምነውድቅ ጥመል ጐያየጘ ያን ብርኻን ኣቕ ኣልሚል ተጥኩን። 47ይቃልድ ወሽ በር ፋፅማው እጅርድየንት ያንም ኣይቀር ፊርጠርድ፤ ያን ተጠውድ ኣልምድየንት ቓዝጨጚ ኣልምድየንት ፊርድጨም ኣየው። 48ይት ለምራዊዝመ ይቃልድየንት ነቀዊዝ ፊርደው እኩ፤ ያን ዊግጠው ቃልድ ጝቕም ኻትሸነ ግርየይዝ ፊርድጡ። 49ያን ይቕምቲስም ዊግጢቀር፤ ዊገድ ግን ይት እፃቐው ኣይር ወረጘ ዊግጣንስ፣ ኣወሽም ዊግጣንስ ማጥን ይት ኣዙ። 50ጝትዛዝድ ዘላልምዙ ርዅየል ችጝዝጠጘ ኣርቐኵን፤ እንዝ ማጥን ያን ዊግጠውድ ኣይር ይጭስ ድቈውድየንት የጝ።
अहिले सेलेक्ट गरिएको:
ይዃንስት ወንጌል 12: ኽምጣኣኪ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
