ይዃንስት ወንጌል 9
9
ፈወነ 9
እየሱስ ኻርቨ ኣቕ እዅርሸው እጅር ቓዘጘ
1እየሱስም ጒደነይዝ ዲቋንድ ኻርቨ ኣቕ እዅርሸው እጅር ችጙ። 2ጝክንደጥድም፦ «ክንሰተወ! እን እጅርድ ኻርቨ ኣቕ ፋጥርሻንስ ማጥን ኽጥያት ሰራሸውድ ኣው የጝ? ጘጝ ጝቕምመ? ዊንስ ጝኣቅልድ ጛይ?» ይጝ ዋቕር። 3ጘጝም፦ «እደረት ሰቭድ ጝዝ ጋልፅሽትጠ የጝጚ ጘጝ ዊንም ጝኣቅልድ ኽጥያት ሰራሺየቍም። 4ኣውማውቅ ሰራሽ ቸላው ኻር ተራ ኣቓንስቅ፣ ጊርቅ ፅባ ይት እፃቐዊዙ ሰቭድ ሰራጨ ጥውሸኵ።#ማቲ. 5፡14፤ ይዃ. 8፡12። 5ኣልሚል ፅባ ኣልሚዙ ብርኻንድ ያን የጝ» ዩ።
6እኒንት ዊግት በር ዝቨይል ትፍ የው ጝብፅቕኒዝ ጭቀ ፃቩ፤ እጅሪዝ እልጣንድም ጭቀይዝ እቓስ፦ 7«ፊትር ሰሊዀም ጣምቅሸነው ምኝጪስ እቓጭ» ዩ። ሰሊዀም የነውድ፦ «እፃሸው» የነት የጝ፤ እጅርድየንም ፊር እቓር በር ቓለው ኣቕ ዋጥሩ።
8ጝግፂዝመ እንዝ ሚቅ ጨዋንድ ቓልጝ ዊነቊዝም፦ «እን እጅርድ እድየን ጐይ ጨዋ ዊነውድ ኣየውቀ?» ይ። 9ግቨርድ፦ «የይ ጘጝ የጝ» የ፤ ላጥድ ቈሽ፦ «ጝት ተከኵጚ ጘጝም ኣየው» ይ፤ ጘጝ ኣቓንድ፦ «ያን ይቕም የጝ» ዩ። 10ጛይም፦ «እደስለ ክእልጣንድ ኣወይጝ ቢት?» ይጝ ዋቕር። 11ጘጝም፦ «እየሱስ የነው እጅር ጭቀ ሊውስ ይእልጣንድ እቓስ በር፦ ‹ሰሊዀም ፊትር እቓጭ› ዩ፤ ያንም ፊጥ ቓጡን፤ ይእልጣንድም ቢት» ዩ። 12ጛይም፦ «ጘጝ እጅርድ ኣውል እኩ?» ይ። ጘጝም፦ «ኣርቀር! ኣርቒቀርም» ዩ።
ፈሪሳንድ ኻርቨድየን ኣወይ ቓደጘ ሚርምርጘጘ
13እንዝ ግረ ኻርቨ ዊነው እጅርድየነት ፈሪሳኒል ፊስ። 14እየሱስ ጭቀ ሊውስ ኻርቨይዝ እልጣንድ ቓዘው ግርየድ ቅዳምሲንቭት ዊኑ። 15እንዝ ማጥን ፈሪሳንድ፦ «ኣወይር ቓድሩ?» ይጝ ዋቕር፤ ጘጝም፦ «ይእልጣኒል ጭቀ ፃቩ፤ ያንም ፊጥ ኣቚዝ ቓጡን፤ ቓለነውም ቸሉን» ዩ።
16ኣይንድ ፈሪሳኒስ ላው ላውድ፦ «እን እጅርድ እደረቲስ ተረውም ኣየው፤ ምላሰንድም ቅዳምሲንቭት ኪብርዛውም» ይ፤ ላጥድ ቈሽ፦ «እደስለ ኽጥያትኘ እጅር ኣወሽ እነየው ታምርዙ ምልክት ፃቭ ቸልጣ?» ይ፤ ጛስ ጛይም ቲተቲት። 17እንዝ ማጥን ኻርቨ ዊነው እጅርድየንት ዊስጝ፦ «ክትሰ ክእልጣንድ ብዘው እጅሪዝቍዝ ወረጘ ይራ?» ይጝ ዋቕር። ጘጝም፦ «ያንሰ ነቭይ የጝ የኵና» ዩ።
18ኣይዅዳንድም ጝኣቅልድዛት ጭጝጝ ዋቕርጥጚስቅ ጘጝ ኻርቨ ኣቕ እዅርሸውድ ኣቐጘ ኣምኒየቍም ዊን። 19ጝኣቅልድዛትም፦ «ክትን፦ ‹ኻርቨ ኣቕ እዅርሹ› ይርነው ክታዅርድ እኒንመ? ነን ኣወይም ቓዱ?» ይጝ ዋቕር። 20ጛይም፦ «ጘጝ ይናዅር ኣቐጘ፣ ኻርቨ ኣቕም እዅርሸጘ ኣርቐነኵን። 21ነን ግን ኣወይ ቓለነው ቸለጘ፣ ኣውም ጝት ቓዘጘ ኣርቓይነቅም፤ ጝቕምት ዋቕርጥን፤ ጘጝ ኽየው እጅር ኣቓንስቅ ጝቕምስ ዊግተነው ቸለው የጝ» ይ። 22ጝኣቅልድ እነይጝ ዊግትጘውድ ኣይዅዳንድ እየሱስት፦ «ክርስቶስ የጝ»#9፡22 ዊንም መሲኽ። የው ኣምነው እጅር ችጝሽሽ ምኵራቢቪስ ፊስጥጘ ዊስንጝ ዊንጛንስቅ ጛት ጐውትጝ የጝ። 23እንዝ ማጥን የጝ፦ «ጘጝ ኽየው የጝ፤ ጝቕምት ዋቕርጥን» ይጘውድ።
24ፈሪሳንድም ኻርቨ ዊነው እጅርድየንት ሊጘት ጭጝጝ፦ «እፈ እጅር ክተ! እደረት ኪብርዝ፤ እን እጅርድ ኽጥያትኘ ኣቐጘ ይን ኣርቕነኵን» ይ። 25ጘጝም፦ «ያና ጘጝ ኽጥያትኘ እጅር ኣቐነውድ ኣርቐቅም፤ ዊገድ ግን ያን ኻርቨ ዊነጘ፣ ነንም ቓለነው ቸለጘ፣ ላው ዊገ እኒንት ጭቝ ኣርቐኵን» ዩ። 26ጛይም፦ «ወረጘ የጝ ፃቨውድ? ክእልጥጛንድስ ኣወሽ የጝ ብዘውድ?» ይ። 27ጘጝም፦ «በውርስ ድቁን፤ ክትን ግን ወሽትርነ በኒርነቅም፤ እደስለ ውር ፃቭትርነ ሊጘት ወሽትርነ በንርና? ክትንምመ ጝክንደጥ ኣትርነ በንርኑ?» ዩ። 28ጛይም ኣይንድ፦ «እን እጅሪዝ ክንደተድስ ክት የጝ፤ ይንስ ሙሴት ክንደጥ የጝ። 29እደረ ሙሴት ዊግተጘ ኣርቕነኵን፤ እን እጅርድ ግን ኣዊስ ተረጘ እኳ ኣርቓይነቅም» ይጛ ዛሽ። 30ጘጝም፦ «ክትን ጝት ኣዊስ ተረጘ ኣርቐቅ የነውድ ዲንቅሰው ዊገ የጝ፤ ኣነጚ ይእልጣንድ ብዘውድ ጘጝ የጝ። 31እደረ ጝት ጐውተቊዝመ ጝፍቃድድ ፋፅመቊዛት ወሸኵጚ ኽጥያትኝጥድ ወሻየጘ ኣርቕነኵን። 32‹ኻርቨ ኣቕ እዅርሸው እጅሪዝ እልጣንድ ቓዙ› የነው ዊገ ኣልም ፋጥርሸት ኪርም ወይሽትም ኣርቓው። 33እን እጅርድ እደረቲስ ኣየው ኣቓን ውርቅ ፃቭጠ ቸላውም ዊኑ» ዩ። 34ጛይም፦ «እፈ ክዅለመነድቅ ኽጥያትዝ ስርሽር እኵርሽረር ክተ! ክትመ ይናት ክንስተ በንሩ?» ይጝ ምኵራቪስ ቢዘ ጅግዝ።
እዘንዙ ኻርቭነይ
35እየሱስም እጅርድየንት ጅግዝጘጘ ወሹ፤ ጝት ችጛንድም፦ «ክት እደረት ዅርት#9፡35 ላው ላው ኽፅምትቍ ብራንጥድ፦ «እጅር ዅርት» ይጘኵ። ኣምንትርመ? ዩ። 36እጅርድየንም፦ «ኣደረወ! ጝት ኣምንጨ ማጥን ጘጝ ኣው የጝ?» ዩ። 37እየሱስም፦ «ቓልድርኵሩ፤ ነንም ክጅቅ ዊግተውድ ጘጝ የጝ» ዩ። 38እጅርድየንም፦ «ኣደረወ! ኣምነኵን» የው ሲግዱ። 39እየሱስም፦ «ያን ኻርብድ ቓልጛንስ፣ ቓለቍድ ቈሽ ኻርብጛንስ እን ኣልሚል ፍርድዝ ተጥኩን» ዩ። 40ጝግል ዊነቍ ፈሪሳኒስም ላው ላውድ እኒንት ወሽጛንድ፦ «እደስለ ይንም ኻርብ የጝ የነትመ?» ይ። 41እየሱስም፦ «ኻርብ ኣቕርናንስ ኽጥያትም ኣጠ ዊኒየው፤ ነን ግን ቓልነኵን ይርነቅ ኣቕርናንስቅ ክታኽጥያትድ ፅበጘ ፅብጡ» ዩ።
अहिले सेलेक्ट गरिएको:
ይዃንስት ወንጌል 9: ኽምጣኣኪ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
