Lk 9

Vadondrisiwa va khume na vabiri

(Mt 10:5-15; Mrk 6:7-13)

1Yesu a hlengeleta vadondrisiwa vakwe va khume na vabiri, avanyika a ntamu ni vufumi a henhla ka mimoya hinkwayu lemimfani, ni kuholisa ka mavabyi. 2Avaruma kurera ta Mfumu wa Xikwembu Nkulukumba ni kuhanyisa timbabyi. 3Aku ku vone: n'wingatekeni ntxhumu xa ndlela, nambi yili nhonga, nambi yili nkwama, nambi drili kati, nambi yili mali, na kone n'wingatekeni swiyambalu swakutxhintxa. 4Andangwini wa kukari loko n'witlhasa van'wiyamukela, trhamisani kone n'wikota n'wisuka a tikwanini dra kone. 5Kambe loko vangan'wiyamukeli atikweni ledro humani ku drone, phumunani ntrhuri aminengeni yenu, byitava vumboni ku vone. 6A vadondrisiwa Vahumi vafamba, hi tiko ni tiko, varera Ivangeli ni kuhanyisa vhanu a mavabyi ku matlhelo hinkwawu.

Heroda aganaganeka ha Yesu

(Mt 14:1-12; Mrk 6:14-29)

7Heroda mufumi wa Galileya afa ayingela vakhanela hi hinkwaswu leswi swihumeleliki, kutani aganaganeka hikusa van'we afa vahlaya leswaku Yohana Mubabatisi apfuki kufeni, 8a van'wana afa vahlaya leswaku kuhumeleli muprofeta Eliya, avan'wana kambe vaku i mun'wana wa muprofeta wa khale apfukiki kufeni. 9Kambe Heroda aku: Mine ha byanga nivarumi vatrema a nhloko ya Yohana Mubabatisi. Xana lweyi angava mani, lweyi niyingelaka vadrungula swinyingi ha yene? Afa adjula kuvona Yesu.

Yesu aphamela xitrhungu

(Mt 14:13-21; Mrk 6:30-44; Yhn 6:1-14)

10A vapostola, loko vatlhelile, vadrungulela Yesu hinkwaswu leswi vaswiyentxiki. Yene avatekela atlhelweni, avayisa atikwanini ledri valiki i Betsayida. 11Loko a vhanu vaswitivile vamulandra kutani Yesu avayamukela, akhanela navu hita Mfumu wa Xikwembu Nkulukumba, kutani aholisa timbabyi.

12Loko a dambu driya kupeleni, a vadondrisiwa lava khume na vabiri, vatrhindrekela kusuhi na Yesu vaku: Tlhelisa a vhanu vaya wisa ni kuya djula a swakuda mitanini ni le masin'wini lawa manga kusuhi, hikusa ku mbangu lowu akuna ntxhumu. 13Yesu aku ku vone: Vanyikani a swakuda n'wine. Vone vayangula vaku: Ahina swakutlula ntlhanu wa makati ni tinhlampfi tibiri, loko swinge leswaku hifamba hine, hiyaxavela a vhanu lava hinkwavu a swakuda! 14Hikusa afa vadjula kuva ntlhanu wa makume ya madzana (5.000) ya vhanu. Kutani Yesu aku ku vadondrisiwa vakwe: Vatrhamisisani hi mintlawa ya ntlhanu wa makume (50). 15Vayingiseta, vayentxisa xiswoswo, vavatrhamisisa hinkwavu. 16Kuva loko Yesu ateka a makati laya ntlhanu ni tinhlampfi tibiri, alavisa Tilweni, atlangela. Akhemelela anyika vadondrisiwa vakwe akuva vayavela vhanu. 17Hinkwavu vada, vaxura, mfuri kuhlengeletiwa a mantlhantlha lawa masaliki, vatata khume dra swihundru na swibiri.

Petrosi ahlaya leswaku Yesu i Kriste

(Mt 16:13-19; Mrk 8:27-29)

18Siku drin'wana loko Yesu ali kukhongoteni, vuswake, a vadondrisiwa vakwe afa vatrhindrekela ku yene, avavutisa aku: Xana a vhanu vali ni mani, xana? 19Vone vayangula vaku: Vambeni vali u Yohana Mubabatisi, avan'we vali u Eliya, avan'wana vali u muprofeta mun'wana wa khale lweyi apfukiki kufeni. 20Yesu avavutisa aku: N'wine-ke, n'wili ni mani, xana? Petrosi amuyangula aku: U Kriste, lweyi arumiwiki hi Xikwembu Nkulukumba.

Yesu ativisa kufa ni kupfuka kwake akufeni

(Mt 16:20-28; Mrk 8:30—9:1)

21Yesu avalaya ngopfu akuva vangabyeli mhunu a mhaka leyo. 22Aku ku vone: N'wana wa mhunu atatwisiwa kuvaviseka ngopfu, adreliwa hi vakulukumba ni vaprista lava vakulu ni vadondrisi va Nawu. Vatamudlaya, kambe atapfuka hi siku dra vuraru.

23Kutani aku ku hinkwavu: Loko mhunu adjula kuva mudondrisiwa wanga, aatiyale, aatirwexe xihambano xakwe hi siku drin'wana-ni-drin'wana, kutani anilandra. 24Hikusa lweyi arandraka a kuhuluxa a vutomi byake atabyilahla, kambe lweyi atakalahla a vutomi byake ha mine, atabyihuluxa. 25Xana swingamupfuna yini a mhunu loko angafuya a misava hinkwayu, ava atilahla, atihona ha vuswake? 26Lweyi atakavani tingana ha mine ni hi maritu yanga, na yene N'wana wa Mhunu atava ni tingana ha yene, loko atabuya hi kuphatima kwake ni kuphatima ka Tatana wakwe, ni ka tintrumi ta kuhlawuleka. 27Nihlayelamfuri nili ku n'wine: van'we lava vanga kola vangatifa, na vangasinavona a Mfumu wa Xikwembu Nkulukumba.

Kundrulutiwa ka liso dra Yesu

(Mt 17:1-8; Mrk 9:2-8)

28Afa swidjula kuva ntlhanu wa masiku na mararu a ntrhaku ka maritu lawo, Yesu antlhantukela anhaveni akuya khongota. Ateki Petrosi, na Yohana na Yakobe. 29Loko ali kari akhongota, a mavonekela ya liso drakwe mandruluka, ni swiyambalu swake swindruluka ntlhohe, swiphatima. 30Kuhumelela vavanuna vabiri vakhanela na yene. Veva Moxe na Eliya, 31afa vatrandreliwi hi kuphatima ka Matilo, vakhanela hi kusuka ka Yesu amisaveni leyi, loku kutakava Yerusalema. 32Kambe Petrosi ni vanakulobye afa vani vurongo ngopfu, loko vasisimuka, vavona kuphatima ka Yesu ni ka vavanuna vabiri lava afaka vali na yene. 33Loko a vhanu lavaya vatravukani na Yesu, Petrosi aku: Mudondrisi, i swa hombe hitrhamisa kola! Hitahamba mintronga miraru; wun'we wuva waku, wun'wana wuva wa Moxe, wun'wana wuva wa Eliya, kambe Petrosi afa angaswitivi leswi ahlayaka swone. 34Aku na ahahlaya leswo, ka kutlhasa a tlavi drivafukumeta, kutani vatxhava akunhingeneni kwavu atlavini. 35Kutani atlavini kutwala a ritu driku: Lweyi i N'wananga lweyi nimurandraka, muyingisetani. 36Loko a ritu drimiyelile, Yesu akumiwa na ali swake. Kutani a vadondrisiwa vamiyela, vangadrunguleli mhunu leswi vaswivoniki, hi masiku lawo.

Yesu ahanyisa a ntrongwana wa moya lowu mfani

(Mt 17:14-18; Mrk 9:14-27)

37Hi siku ledri drintlhantamaka, loko vafulamela vapfa anhaveni, a xitrhungu lexi xikulu xihumelela xitlhangaveta Yesu. 38Mun'we wanuna a makari ka vhanu abandlukana hi ntamu aku: Mudondrisi, nakukhongota lavisa a n'wananga, hikusa hi yelweyi ntsena ninga na yene; 39a moya lowu mfani wamukhoma, abandlukana xikan'we, wumutrekatrekisa, wumutlhutlhisa ni duvi. Wumuxanisa wungamutriki antrhunxeka. 40Nikombeli a vadondrisiwa vaku akuva vahlongola a moya lowo, kambe vahlulekile. 41Yesu ayanguli aku: Yowee, vhanu lava vangalikina kupfumela, vakusomboloka! Xana nitava na n'wine, nin'wilehisela a mbilu kutlhasa drini? Buyisa n'wanaku halenu. 42Loko a ntrongwana ahatrhindrekela ku Yesu, a moya lowu mfani wumutlatlalata, wumutrekatrekisa. Kambe Yesu akhwavela a moya lowu mfani, aholisa ntrongwana amutlhelisela ku tatana wakwe. 43Kutani hinkwavu vahlamala hi vukulu bya ntamu wa Xikwembu Nkulukumba.

Yesu atlhela ativisa hita kufa kwake

(Mt 17:22-23; Mrk 9:30-32)

Vaku na vahahlamala hinkwavu hi hinkwaswu leswi Yesu afaka aswitira, aku ku vadondrisiwa vakwe: 44Yingisetani swinene leswi atindleveni tenu: A N'wana wa Mhunu atanyiketiwa amandleni ya vhanu. 45Kambe vone avayingelelisanga leswi afaka aswihlaya, hikusa afa angasina vatlhavukanyisa akuva vayingelisisa; hinkwavu afa vatxhava a kuvutisa ku Yesu akuva avatlhamuxela.

Lweyi nkulu a Mfun'wini wa Matilo

(Mt 18:1-5; Mrk 9:33-37)

46Kutani kusungula akukanetana makari ka vadondrisiwa, hileswaku i mani lwenkulu ku vone. 47Yesu, ativiki leswi afaka vapimisa swone, ateka a ntrongwana, amuyimisa kusuhi na yene, 48aku ku vone: Lweyi ayamukelaka a ntrongwana wanga hi lweyi hi vito dranga, awaniyamukela, ni lweyi aniyamukelaka, ayamukela lweyi anirumiki. Hikusa lweyi atitrongohataka amakari kwenu hinkwenu, hi yene lweyi anga nkulu.

Lweyi angayalanikiki na hine i weru

(Mrk 9:38-40)

49Yohana aku: Mudondrisi, havoni mun'we lweyi ahlongolaka mimoya lemimfani hi vito draku, kutani himutsimbile hikusa ahi wakweru. 50Yesu aku ku yene: N'wingamutsimbeni, hikusa lweyi angayalanikiki na hine ayima na hine.

Vasamariya vayala kuyamukela Yesu

51Loko nkama wa kutlakuxiwa ka Yesu atilweni wukusuhi a tiyisa mbilu akongoma Yerusalema. 52Aruma vadondrisiwa amahlweni lava vangaya mutini wa va-Samariya akuva vaya bekisela a kutlhasa ka Yesu. 53Kambe a va-Samariya vayala kumuyamukela, hikusa afa vativa leswaku Yesu akongomi Yerusalema. 54Loko a vadondrisiwa vakwe, Yakobe na Yohana vavoni leswi vaku: Hosi, xana waswirandra akuva hileleta leswaku kuxika a ndrilo wa le tilweni wuvaheta?#9:54 A man'wana matralwa mayengesela leswaku: swanga leswi Eliya angayentxa swone. 55Kutani Yesu andrulukeliki ku vone avatshinya.#9:55 A man'wana matralwa mayengesela leswaku: ava aku: N'wine an'wiwutivi a moya lowu n'winga wa wone; hikusa a N'wana wa Mhunu angatelanga kutatahahlula a vutomi bya vhanu, kambe im'na, a kubyihuluxa. Lavisa Lk 19:10. 56Vahangaya ku mun'wana mutana.

Lava varambiwaka a kulandra Yesu

(Mt 8:19-22)

57Loko vali ndleleni, amun'we mhunu aku ku Yesu: Nitakulandra hinkwaku lomu uta kaya kone. 58Yesu aku ku yene: A mabuwana mani mimpala, ni tinyanyana tini vusaka, kambe a N'wana wa Mhunu angana laha angadamaka nhloko yake kone. 59Aku ku mun'wana: Nilandre. Yelweyo aku: Hosi, nipfumelele niranga hi kuya lahla a tatana wanga. 60Yesu aku ku yene: Trika vafi valahla a vafi vavu, wene famba uya tivisa ta Mfumu wa Xikwembu Nkulukumba. 61A mun'wana aku: Hosi, nidjula kukulandra, kambe akusungula nipfumelele, niranga niyalelela a va le kaya kwanga. 62Yesu aku ku yene: A mhunu lweyi abekaka a voko xikon'wini, atlhela alavisa a ntrhaku, angafaneliwi hi Mfumu wa Xikwembu Nkulukumba.

अहिले सेलेक्ट गरिएको:

Lk 9: NTX2007

हाइलाइट

शेयर गर्नुहोस्

कपी गर्नुहोस्