Lk 10
10
Avadondrisiwa va ntlhanu wa makume na makume mabiri na vabiri (72)
1A ntrhaku ka swone, Hosi Yesu ahlawuli van'wana va ntlhanu wa makume na makume mabiri na vabiri (72), avaruma ha vabiri-vabiri amahlweni kwake, amitini hinkwayu ni le mimbangwini hinkwayu lomu atakafamba ha kone.#10:1 A man'wana matralwa mani leswaku, ntlhanu wa makume na mabiri (70). 2Afa aku ku vone: A ntrhovelo i wukulu, kambe a vatiri i vatrongo. Kombelani-ke ku n'winyi wa ntrhovelo aruma a vatiri akutrhoveleni kwake. 3Fambani; lavisani, nin'wiruma n'wili swanga hi tihamba a makari ka timhisi. 4N'wingatekeni a nkwama, nambi yi hwama ni swifambu. Mfuri n'wingaloseni mhunu andleleni. 5A ndangu lowu n'witakanhingena ku wone, rangani n'wiku: A kurula akuve andangwini lowu. 6Loko a mhunu wa kurula ekone kolahu, a kurula kwenu kutava henhla kwake; loko ange kone kutatlhelela ku n'wine. 7Trhamisani andangwini wolowo, n'wida, n'winwa leswi vatakan'winyika swone, hikusa a mutiri afanekeli hi hakelo drakwe. N'wingasukeni n'wiya ndangwini wun'wana ni wun'wana. 8Ni loko n'winhingena a mutini wakukari ni wakukari, van'wiyamukela, danani leswi van'wibekelaka swone; 9n'wiva n'wihanyisa timbabyi leti tinga ku wone, n'wivabyela n'wiku: A Mfumu wa Xikwembu Nkulukumba wutlhasile ku n'wine. 10Kambe loko n'winhingena amutini wakukari ni wakukari vangan'wiyamukeli, humani n'wiya atindleleni ta wone, n'wiyavabyela n'wiku: 11Antrhuri wa muti wenu lowu wuhinamareliki hiwuphumunela ku n'wine. Nambi swili tanu, switivani leswaku a mfumu wa Xikwembu Nkulukumba wutlhasile. 12Yesu aku natiyisa ku n'wine leswaku: Asikwini ledro, a xikhatiso xitavevuka ku Sodoma kutlula ku muti lowo.
A miti leyi mingandrulukikiki
(Mt 11:20-24)
13Yowee Korazini! Yowee Betsayida! Hikusa a mahlolana lawa mayentxiwiki amakari kwenu, loko fanga mayentxiwi amitini ya Tiri na Sidoni, inha mindruluki khale miyambala a saka, mitola ni nora. 14Hileswo-ke ku Tiri ni le ku Sidoni kuta vevuka, akuyavanyisiweni, akutlula ku n'wine. 15Na wene Kapernawume, xana afa udjula akutitlakuxa kuyatlhasa Tilweni? Utatrongahatiwa akuya tlhasa Kheleni!
16Ntrhaku abyela a vadondrisiwa aku: Lweyi an'wiyingelaka, awa niyingela; nangweso lweyi an'widrelaka, awanidrela; mfuri lweyi anidrelaka adrela lweyi anirumiki.
Kubuya ka vadondrisiwa
17A vadondrisiwa lava va ntlhanu wa makume na makume mabiri (70), vabuya hi kutrhava vaku: Hosi, nayo mimoya lemimfani amihluliwa ha hine loko hikhanela hi vito draku: 18Yesu aku ku vone: Afa nihlalela Sathana na awa, apfa tilweni swanga hi lihati. 19Yingisetani! Nin'winyiki a ntamu wakukandretela tinyoka ni mibalana ni le henhla ka ntamu hinkwawu wa nala; akuna xa kuva xitaka n'wihona ha ntxhumu. 20Nambi swilitanu, n'winganyoxeni hi leswi a mimoya mihluliwaka ha n'wine. Kambe nyoxani hi leswi a mavito yenu matraliwiki Matilweni.
Kutrhava ka Yesu
(Mt 11:25-27; 13:16-17)
21Ankameni lowo Yesu atitrhaveli Moyeni wa kuxwenga aku: Nakukhensa Tatana, Hosi ya Tilo ni misava, hi leswi ungafihlela a tintlhari ni vayingeli a timhaka leti, we kutipfuletela ku vatrongwana. Ahina, Tatana, nakutlangela hikuva we kuyentxa hi kurandra kwaku.#10:21 A man'wana matralwa mali: hi Moya, na man'wana maku: a moyeni wakwe. 22Hinkwaswu ninyikiwi ha Tatana. Nakone akuna mhunu lweyi ativaka lweyi N'wana anga yene, loko ange Tatana: nambi lweyi Tatana anga yene, loko ange N'wana, ni lweyi a N'wana arandraka kumupfuletela yene.
23Andrulukeliki ku vadondrisiwa nave swavu, aku: Makatekile a mahlu lawa mavonaka leswi n'wiswivonaka. 24Hikusa nan'wibyela leswaku a vaprofeta lava vanyingi ni vafumi va swirandrile ku vona leswi n'wiswivonaka kambe avaswivonanga; ni kuyingela leswi n'wiswiyingelaka, kambe avaswiyingelanga.
Musamariya wa lilondro
25A mun'we wa mudondrisi wa Nawu, asekeleka adjula a kudringa Yesu aku: Mudondrisi, xana akuva nitakuma a vutomi lebyi byingahelikiki hi loko niyentxa yini xana? 26Yesu aku ku yene: Kutraliwi yini anawini, xana uwuhlayisa ku yini? 27#Lavisa Mlw 6:5; Lv 19:18. Ayangula aku: Utarandra Hosi Xikwembu Nkulukumba waku hi mbilu yaku hinkwayu, ni hi hika draku hinkwadru, ni hi ntamu waku hinkwawu, ni hi kuyanakanya kwaku hinkwaku. Urandra ni mhunukuloni swanga hi loko utirandra. 28Yesu aku ku yene: Uyanguli swone. Yentxa swoleswo, utahanya. 29Kambe a mudondrisi wa Nawu hi kudjula kutilulamisa, aku ku Yesu: A mhunukulori i mani? 30Yesu amuyanguli aku: A mun'we mhunu afa afulamela, apfa Yerusalema aya Yeriko. Awa amandleni ya tinsulavoya, timususa a swiyambalu, timubalesa timbanga, tisuka timusiya ne kusuhi ni kufa. 31Kahangahumelela leswaku mun'we wa muprista afulamela hi ndlela yoleyo. Kuti loko amuvona, atingawula. 32Hi swoswo lweyi wa Mulevi na yene, akhaluta hi mbangu lowo, amuvona, atingawula. 33Kambe a mun'we mu-Samariya lweyi ayendraka atlhasa kolahu, amuvona, amutwela vurombe. 34Atrhindrekela, amutrimbelela timbanga, atitxhela hi mafura ni vhinyo. Kutani a mukhandriyisa ku xifuyu xakwe, amuyisa andlwini ya vayendri, a mulondra kone.#10:34 A mafura afa mani nturo wa ku miyeta ku vavisa na a vinyu afa dritirela aku dlaya vuhlungu. 35Byiku byaxa, a humexa a matxheleni mabiri, anyika lweyi wa n'winyi wa yindlu, aku: Mulondre, nikondra nibuya, nitakutlhelisela ni leswi utakaswihumexa kutlula leswi.
36Yesu aku ku mudondrisi wa Nawu: Xana hi wini ku lava vararu lweyi utakaku avi mhunukulobye wa lweyi angawela amandleni ya tinsulavoya xana? 37Aku: Hi lweyi angamuyentxela lilondro. Yesu ahangaku ku yene: Famba uya yentxisa xiswoswo na wene.
Yesu andangwini wa Marta na Maria
38Akufambeni ka Yesu ni vadondrisiwa vakwe, anhingeni a mutanini wun'we, kutani lweyi wansati a vito drakwe afaka ali Marta ayamukela Yesu andangwini wakwe. 39Afa ani makwavu lweyi a vito drakwe afaka ali Maria, lweyi angayatrhama aminengeni ya Hosi, ayingela ritu dra Yone. 40Kambe Marta afa adrivatiwa hi mintiro leyi minyingi, atrhindrekela ku Yesu aku: Hosi, xana ahi ntxhumu ku wene loko makweru anitrika nitira vuswanga, xana? Mubyele atatanipfunisa. 41Kambe Yesu ayangula aku ku yene: Marta, Marta, utihlatiyelisela yini, utikarata hi leswi swinyingi, 42kasi i xin'we ntsena lexi xidjulekaka. Kambe Maria atihlawuleli a yavelo ledri drinene ledri angatikitekeliwa.
अहिले सेलेक्ट गरिएको:
Lk 10: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
