Lk 8

Vavasati lava afaka vapfuna Yesu

1A ntrhaku ka swone, Yesu atifambela hi miti ni mitana, a dondrisa Ivangeli ya Mfumu wa Xikwembu Nkulukumba. Lava va khume na vabiri afa vafamba na yene, 2ni vavasati va kuhlawa lava afaka vahanyisiwi ku mimoya leyi mimfani ni le vuvabyini. A makari kwavu afa kuna Maria lweyi valiki i Magadala, lweyi afaka kuhumi ku yene a mimoya leyi mimfani ya ntlhanu na mibiri, 3na Yowana nkata Kuza, a ndruna ya Heroda, na Suzana, ni van'wana lava vanyingi lava afaka vapfuna Yesu ni vadondrisiwa vakwe hi leswi afaka vali naswu.

Xifaniso xa mubyali

(Mt 13:1-9; Mrk 4:1-9)

4A vhanu lava vanyingi afa vahuma amitini, vahlengeletana, vatata vona Yesu. Kutani a vadrungulela xifaniso lexi aku: 5A mubyali a humi ayabyala a mbewu yake. A kubyaleni kwake tin'we timbewu tiweli andleleni, tikandreteliwa hi vhanu, kutani a tinyanyana titida. 6A tin'wana tiwela amisaveni ya maribye; kutani tiku tamila tibuna hi kupfumala ntrhongo. 7A tin'wana tiyawela a makari ka mitwa; kutani a mitwa mikula kun'we ni timbewu mitikamanyeta tifa. 8Kambe axin'wana xiyenge xa timbewu tiwela amisaveni leminene, kutani timila, tinyika ntrhovelo wa kuxonga, tinyika dzana dra tinhleke yin'wana ni yin'wana. Kuku loko Yesu ahlayi leswo, atlakuxa a ritu aku: Lweyi angani tindleve ayingelisise!

Nkongometo wa swifaniso

(Mt 13:10-17; Mrk 4:10-12)

9A vadondrisiwa vavutisa Yesu a xifaniso lexiya leswaku xidjula kuhlaya yini. 10Yene ayangula aku ku vone: N'wine n'winyikiwi a kutiva swihundla swa Mfumu wa Xikwembu Nkulukumba, kambe ku van'wana nikhanela hi swifaniso, akuva nambi valavisa vangavoni, nambi vayingela vangayingelisisi.

Yesu atlhamuxela xifaniso xa mubyali

(Mt 13:18-23; Mrk 4:13-20)

11A xifaniso lexi xidjula kuhlaya leswi: A mbewu i Ritu dra Xikwembu Nkulukumba. 12A xiyenge lexi xiweliki andleleni, hi lava vayingeliki a Ritu dra Xikwembu Nkulukumba, kambe kuta Diyavulosi ata susa a ritu atimbilwini tavu, leswaku vangatipfumela, kutani vahanyisiwa. 13Kambe a mbewu leyi yiweliki amisaveni ya maribye, hi lava vayingelaka a ritu, vadriyamukela hi kutrhava. Kambe vangena mitru ya kuyanela; vapfumela hi nkama wutrongo; kambe ankameni wa ndringo vatrika, vatlhelela ntrhaku. 14A mbewu leyi yiweliki mitweni hi lava vadriyingeliki, kambe ha kutrongo-kutrongo vatrika kukhongota hi mihlatiyelo ya vutomi, ni vukosi, ni kutitrhavela hi swa vutomi kutani hi ndlela leyi vanganyiki mihandru. 15A mbewu leyi yiweliki misaveni leminene, hi vhanu lava yingelaka a ritu hi timbilu leti tinene, vayingiseta kutani vadribekisa, vatiya vanyika a ntrhovelo wunene.

Xifaniso xa livaningo

(Mt 4:21-25)

16Akuna mhunu lwyi alumekaka a motre, ntrhaku awufukumeta hi xibya, kumbe awubeka hansi ka vunanu, kambe awuhayeka ahenhla, akuva lava vanhingenaka vavona livaningo. 17Hikusa akuna xa ntxhumu lexi xifihliwiki xingatiki fukumuliwa; nakone hinkwaswu leswi inga xihundla, switibyiwa swiva swibekiwa alivaleni. 18Hikolahu tivonelani, n'wiyingelisisa swinene; hikusa lweyi anganaswu, ata nyikiwa ngopfu; kambe lweyi angeke naswu, ata tekeliwa ni leswi ayanakanyaka leswaku anaswu.

Vandangu wa Yesu

(Mt 12:46-50; Mrk 3:31-35)

19A Mamana wa Yesu ni vamakwavu vata ku yene, vahluleka kuya kusuhi ni laha anga kone, hinkonta ya vunyingi bya vhanu. 20Kutani amun'we mhunu ativisa Yesu aku: A mamana waku ni vamakwenu va le handle, vadjula kukuvona. 21Kutani yene aku: A mamana wanga ni vamakweru hi lava vayingelaka a ritu dra Xikwembu Nkulukumba, vava vadriyentxa.

Yesu arulisa xidzedze

(Mt 8:23-27; Mrk 4:35-41)

22Drin'wana siku, Yesu anhingena abyatrhwini kun'we ni vadondrisiwa vakwe, aku ku vone: Ahiweleleni halahaya ka tiva. Va hanga suka,#8:22 Kuhlayiwa tiva dra Galileya. A tiko ledri dringa ku tlhelo drin'wana dra tiva afa kutrhama lava vangeke va-Yuda. 23loko vali kari vatremakanya a tiva, Yesu akhutriyela. Kutani a xidzedze xa ntamu xihumelela ativeni, a byatrhu dritala hi mati, kutani vava khombyeni dra kutika ka byatrhu. 24Kutani a vadondrisiwa vayapfuxa Yesu vaku: Mudondrisi! Mudondrisi! Ha suva! Yene apfuka, akhwavela a mheho ni mavimbi, hinkwaswu swimiyela, kuvani kurula. 25Ntrhaku aku ku vadondrisiwa: Xana a kupfumela kwenu kukwini? Vone varurumela hi kutxhava, vahlamala, kutani vavutisana vaku: Xana lweyi i mani-ke, leswi aleletaka ni timheho ni mati, swimuyingiseta!

Kuhanyisiwa ka mhunu wa mimoya lemimfani

(Mt 8:28-34; Mrk 5:1-20)

26Kutani vatlhasa atikweni dra Gerasi ledringa halahaya ka tiva ledri lavisaniki na Galileya. 27Loko Yesu aha huma abyatrhwini, atlhangavetiwa hi mun'we wanuna lweyi apfaka mutini, afaka ani mademoni. Afa kuli khale angayambali ntxhumu, angatrhami kaya, ntsena atrhama amaxireni. 28Loko avona Yesu, awa hi matrolo amahlweni kwake abandlukana aku: A mhaka yanga hi yini ku mine na wene Yesu, N'wana wa Xikwembu Nkulukumba wa le henhla-henhla! Nakukhongota, unganixanise! 29Ahlayi leswi hikusa Yesu afa aleleti moya lowu mfani leswaku wuhuma ku yene. Minkama minyingi a moya lowu mfani afa wumukhoma, kutani afa vamutrimba mavoko ni minenge hi timpetxana, akuva arula, kambe afa aswitrhova, kutani a moya lowo afa wumutrutrumelisa mimbangwini ya hula. 30Yesu amuvutisa aku: A vito draku umani? Yene aku: Ni butrhu. Ahlayi leswi hikusa afa mi minyingi a mimoya leyi afaka minhingeni ku yene, 31Kutani a mimoya leyo mikombeli Yesu akuva angamileleti leswaku miya mbangwini wa kuyeta.

32Afa kuni ntlhambi wa tinguluve, leti afaka tida ambangwini lowo, a mimoya mi mukhongota leswaku amitrika minhingena ku tone, kutani Yesu a mipfumelela. 33A mimoya lemimfani mihuma amhunwini lweyo, kutani minhingena atinguluveni, a ntlhambi wutrutrumela aligingirini wuya titxukumeta tiveni wutika kone.

34A vabyisi vatinguluve loko vavoni leswi swihumeleliki, vatrutruma, vayabika mutini ni le masin'wini. 35A vhanu vahuma akuya vona leswi swihumeleliki. Loko vatlhasi lomu afaka kuna Yesu, vakuma a mhunu lweyi a mimoya mihumiki ku yene atrhamisi minengeni ya Yesu, na ayambalile, atlharihile; kutani vatxhava. 36Lava vaswivoniki, vavadrungulela leswi lweyi wa mimoya ahanyisisiwiki xiswone. 37A vhanu hinkwavu va tiko dra Gerasi vasungula kukhongota Yesu leswaku asuka lahaya, hikusa afa vatxhava ngopfu, xiswoswo Yesu anhingena abyatrhwini, afamba. 38A mhunu lweyi a mimoya mihumiki ku yene, a mukhongota akuva amupfumelela akuva afamba na yene, kambe Yesu a mutlhelisa aku ku yene: 39Tlhelela a kaya kwaku, uyadrungula hinkwaswu leswi Xikwembu Nkulukumba akuyentxeliki swone. A mhunu lweyo afamba adrungula mutini hinkwawu leswi Yesu a muyentxiliki swone.

Kupfuxiwa kufeni ka n'wana Yayirosi, ni kuhanyisiwa ka mbabyi

(Mt 9:18-26; Mrk 5:21-43)

40Loko Yesu atlhelile, a vhanu vamuyamukela hi kunyoxa hikusa hinkwavu afa vamurindrelile. 41Kutani kutlhasa mun'we wanuna, lweyi valiki i Yayirosi, lweyi afaka ali mufambisi wa sinagoga. Awiki minengeni ya Yesu, amukhongota akuva aya mutini wakwe 42hikusa afa ani n'wana wamun'we wanhwanyana, afaka ani khume dra malembe na mabiri, afaka ali kusuhi ni kufa. Loko Yesu afamba aswitrhungu afa swimukamanyeta. 43A makari ka vhanu afa kuni wansati lweyi avabyiki ha khume dra malembe na mabiri, hi vuvabyi bya kuhalaka a ngati, (afaka ahangalasi mali yake hinkwayu hi tin'anga), kambe afa kungena mhunu lweyi angamuhanyisaka. 44Atrhindrekela hi le ntrhaku ka Yesu, akhumba makhaxa ya xiyambalu xakwe; a kuhalaka ka ngati kuyima kolahu. 45Kutani Yesu aku: Hi mani lweyi anikhumbiki? Hinkwavu valandrula. Petrosi aku: Mudondrisi, a vhanu vakukamanyeta vakususumeta! 46Kambe Yesu asindrisa aku: A mhunu anikhumbile, hikusa nitwi leswaku kuhuma ntamu ku mine. 47Lweyi wansati atiki avona leswaku angakoti kutifihla, ata hi kururumela, awa amahlweni ka Yesu atihlaya amahlweni ka hinkwavu leswi swimuyentxiki amukhumba ni leswi ahanyisiwiki xikan'we. 48Yesu aku ku yene: N'wananga, a kupfumela kwaku ku kuhanyisile. Famba hi kurula.

49Yesu aku na ahakhanela, kutlhasa mun'wana murumiwa aku ku mufambisi wa sinagoga, A n'wanaku afile, ungahakarati Mudondrisi. 50Loko Yesu aswiyingelile aku: Ungatxhavi, pfumela ntsena, a n'wanaku atahanya. 51Loko atlhasi amutini anhingena, angapfumeleli mhunu a kunhingena na yene andlwini, loko vange va Petrosi, Yohana, na Yakobe ni vabeleki va nhwanyana. 52Hinkwavu afa vamudrilela hi xiviti kambe Yesu aku ku vone: N'wingadrileni, hikusa a nhwanyana anga fanga ekutriyela. 53Hinkwavu vamuhleka, hikusa afa vaswitiva leswaku afile. 54Kutani Yesu, amukhoma hi voko ahlaya hi ritu dra ntamu aku: Nhwanyana pfuka! 55Kutani yene atlhela ahanya; kolahu asekeleka. Kutani Yesu aleleta leswaku vamunyika a swakuda. 56A vabeleki vakwe vahlamala ngopfu, kambe Yesu avaleleta leswaku vangabyeli mhunu leswi swihumeleliki.

अहिले सेलेक्ट गरिएको:

Lk 8: NTX2007

हाइलाइट

शेयर गर्नुहोस्

कपी गर्नुहोस्