Lk 7
7
Yesu ahanyisa nandra wa ndruna ya mu-Roma
(Mt 8:5-13)
1Loko Yesu aheti kuhlaya a maritu lawo avhanwini aya Kapernawume. 2Kone afa kutrhama a ndruna ya mu-Roma, leyi afaka yini nandra lweyi afaka yimurandra ngopfu, afaka avabya ali kusuhi ni kufa. 3Loko lweyi wa ndruna ayingela kukhaneliwa ha Yesu, aruma vakulukumba va va-Yuda, vaya mukhongota leswaku ata, atatahanyisa nandra wakwe. 4Vone-ke vatlhasa ku Yesu vamukhongota ngopfu vaku: A ndruna leyi yifanekeli kupfuniwa, 5hikusa yirandra tiko dra kweru, na kone yihi yakeli ni sinagoga. 6Yesu afamba navu, loko ahali kule ni yindlu, a ndruna yiruma vanakulobye vayamubyela vaku: Hosi, ungatikarate, hikusa anifanekelanga akuva unhingena andlwini yanga. 7Na mine, anititwanga na nili lweyi ningani mfanelo ya kuta kutlhangaveta ha byanga. Ntsena leleta hi ritu, akuva a nandra wanga aholisiwa. 8Hikusa na mine ni mhunu lweyi afumiwaka hi vambeni, nini vatameli vamatlhari a hansi kwanga. Loko niku ku mun'we wavu: Famba, awafamba; loko niku kumun'wanyana: Tana, awata, ni loko niku kunandra wanga: Tira leswi, awaswitira. 9Yesu loko aswiyingela, ahlamala, andruluka, alavisa vhanu lava afaka vamulandra, aku: Nili, aningikuma kupfumela ka kufana ni ka mhunu lweyi aIsrayeleni. 10Loko vatlheleli kaya a varumiwa va ndruna vayakuma a nandra na ali ntomi.
Yesu apfuxa kufeni n'wana wa nsati wa mufelwa
11Ntrhaku ka leswo, Yesu aya mutini lowu valiki i Nayini, na ani vadondrisiwa vakwe ni vhanu vanyingi. 12Atiki atlhasa kusuhi ni muti, avona na kurwaliwi ntrumbu vaya kuwulahleni, afa ali n'wana wa mun'we ku mamana wakwe, lweyi afaka ali mufelwa. A vhanu lava vanyingi va muti lowu afa vamuheketa. 13Loko a Hosi yivona a mufelwa, yimutwela vurombe, yiku ku yene: Ungadrili. 14Yahanga trhindrekela yikhumba lihlaka, lava varwaliki lone vayima. Kutani Yesu aku ku mufi: Wandrisanyana, nili ku wene, pfuka! 15Lweyi wakufa apfuka atrhama, asungula kuvulavula. Kutani Yesu amunyika ku mamana wakwe. 16Loko vavoni leswi vakhomiwa hi kutxhava hinkwavu vasungula kutwalisa Xikwembu Nkulukumba vaku: A muprofeta lwenkulu ahumeleli a makari kweru! Vatlhela vaku: Xikwembu Nkulukumba ayendreli tiko drakwe! 17A ritu ledro, ledri vahlayiki drone ha Yesu, dri twala Yudeya hinkwadru ni le matikweni lawa manga kusuhi na drone, vativa leswi swiyentxiwiki ha Yesu.
Ta varumiwa va Yohana Mubabatisi ku Yesu (Mt 11:2-19)
18A vadondrisiwa va Yohana Mubabatisi vayi mudrungulela hinkwaswu leswi vaswivoniki. 19Kutani avitani vadondrisiwa vabiri avaruma ku Hosi vaya vutisa leswaku: Xana hi wene lweyi afanelaka kuta, kumbe hahafanekela kurindrela mun'wana? 20A varumiwa va Yohana Mubabatisi vatlhasa ku Yesu, vaku: Yohana Mubabatisi ahirumi akuva hikuvutisa leswaku xana hi wene lweyi afanelaka kuta, kumbe haha fanekela a kurindrela mun'wana? 21Hi nkama wolowo Yesu ahanyisa a vhanu vanyingi, avuvabyini byavu ni le kuxanisekeni kwavu hi mimoya lemimfani, anyika vanyingi lava kufa-mahlu akuva vavona. 22Kolahu aku ku vone: Fambani n'wiyabyela Yohana leswi n'wiswivoniki ni leswi n'wiswiyingeliki: Lava vakufa mahlu vatlhela vavona, lava va kukhuta vatifambela, lava va nhlokonho vabasisiwa, lava va kufa tindleve vatlhela vayingela, lava vakufa vapfuka, a swisiwana swidrunguleliwa Ivangeli. 23Akatekile lweyi angakhunguvanyekiki ha mine.
Yesu a khanela ha Yohana Mubabatisi
24Loko a varumiwa va Yohana vafambile, Yesu asungula a kukhanela ni vhanu ha Yohana aku: Xana n'wahumi n'wiyavona yini ahuleni? A lihlanga loli trekatrekisiwaka hi mheho xana? 25Loko swinge tanu n'wihumeli kuyavona yini xana? A mhunu lweyi ayambaliki a swiyambalu swakuxonga? N'waswitiva leswaku lava yambalaka a swiyambalu swa lisima ni lava vatinyoxelaka, va le tindlwini ta vufumi. 26Kambe, n'wihumeli kuyavona yini xana? A muprofeta xana? Ahina, nan'wibyela, yene hi lweyi atlulaka ni muprofeta, 27Yohana hi yelweyi matralwa mahlayaka ha yene leswaku:
Mine, niruma a murumiwa wanga amahlweni kwaku,
akuva akubekisela ndlela.
28 # Lavisa Mlk 3:1. Nan'wibyela leswaku: amakari ka vavanuna hinkwavu anga kone ni mun'we lweyi atlulaka Yohana Mubabatisi hi vukulu. Kambe lweyi ntrongo ngopfu aNfun'wini wa Xikwembu Nkulukumba i nkulu ngopfu kumutlula.
29Hinkwavu lava vayingeliki Yohana ni vahakelisi va tinemba lava vababatisiwiki ha yene, vakhensa a kululama ka Xikwembu Nkulukumba. 30Kambe a vafarisi ni vadondrisi va Nawu vadreli kurandra ka Xikwembu Nkulukumba hikuva vangadjuli kubabatisiwa ha Yohana.
31Nitafanisa a vhanu va nkama lowu ha yini? Vafana na yini xana? 32Vafana ni vatrongwana lava vatrhamisiki vatlanga ahubyeni, na vanakulobye vabandlukana vaku:
Hin'witxhayeli xitiloti kambe an'wikinanga,
hi yimbeleli tinsimu ta nkosi, kambe an'widrilanga.
33Hikusa Yohana Mubabatisi ati na angadi kati, anganwi vhinyo, n'wine n'witi ani moya lowumfani. 34Loko a N'wana wa Mhunu ati na ada, anwa, n'wiku: Vonani wa magolo ni mpopswi, nakulobye wa vahlengisi. 35Kambe a kululama ka vutlhari kukombisiwi ku vana va byone hinkwavu.
Yesu a kaya ka Simoni mufarisi
36Amun'we wa mufarisi arambi Yesu akuva atatada. Hi loko Yesu aya ndlwini yake atrhamisa atafuleni. 37Loko mun'we wansati wa mudohi lweyi afaka ali kone mutini wolowo ativi leswaku Yesu atrhami akudeni andlwini ya mufarisi, abuyisa a khuwana dra mhemba na dritali hi mafura yakunun'hwela. 38Ayima hi le ntrhaku ka Yesu aminengeni yake, adrila, asungula kutranisa minenge yake hi minyembeti, amisula hi misisi yake, aminyunta, a mitota hi mafura. 39Atiki Simoni mufarisi aswivona, apimisa aku: Loko fanga mhunu lweyi ali muprofeta, ana aswitivile leswaku a nsati lweyi amukhumbaka i mhunu muni, ni leswaku i mudohi. 40Yesu aku ku mufarisi: We Simoni nini mhaka leyi nidjulaka a kukubyela yone. Yene aku: yihlaye, Mudondrisi. 41Yesu aku: Afa kuna vhanu vabiri, afaka vani nandru ku mun'we wa mufuyi. Mun'we afa ani nandru wa mali ya ntlhanu wa madzana ya timali, mun'wana ali ni ntlhanu wa makume. 42Leswi afaka vangaswikoti a kuhakela, lweyi wa mufuyi avadrivalela nandru hi vubiri byavu. Nibyele, xana hi wini lweyi atakahundrisa a kumurandra? 43Simoni ayangula aku: Nipimisa leswaku hi lweyi adrivaleliwiki nandru lowu wukulu. Yesu aku ku yene: Uhlayelamfuri. 44Kutani andruluka alavisa lweyi wansati, aku ku Simoni: Wamuvona a wansati lweyi? Ninhingeni andlwini yaku, awuninyikanga mati yakuhlamba minenge, kambe yene anihlampswi a minenge hi minyembeti yake, ava amisula hi misisi yake. 45Awunilosanga hi kuninyunta, kasi yene kusukela loko ninhingenile, angatrikanga a kuninyunta a minenge. 46Awutotanga nhloko yanga hi mafura, kasi yene anitoti a minenge hi mafura yakunun'hwela. 47Hileswo-ke nili ku wene, a swidoho swake leswi swinyingi swidrivaleliwile ku yene, hikusa anirandri ngopfu. Kambe a mhunu lweyi adrivaleliwaka kutrongo, akombisa kutrongo a lirandru. 48Ahangaku ku lweyi wansati: Udrivaleliwi swidoho swaku. 49Avarambiwa van'wana lava afaka vali kone vasungula a kuvutisana vaku: Hi mani lweyi drivalelaka ni swidoho?
50Kambe Yesu aku ku lweyi wansati: A kupfumela kwaku kukuhanyisile. Muka hi kurula.
अहिले सेलेक्ट गरिएको:
Lk 7: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
