Lk 18
18
Xisindriso xa xikhongoto
1Yesu ayengeta avabyela xifaniso xa leswaku vafanekela kukhongota minkama hinkwayu vangakarali, 2aku: Afa kuni mutremi mun'we ku muti mun'we, lweyi afaka angatxhavi Xikwembu Nkulukumba; ni mhunu angahlayi ntxhumu ha yene. 3Afa kuni wansati lweyi wa mufelwa amutini wolowo, ata ku yene aku: Nilulamisele mhaka ku lweyi anitengisaka. 4Kambe kuhela nkama na angapfumeli. Kambe antrhaku ka swone atiyanakanya aku: Nambi ningatxhavi Xikwembu Nkulukumba, ningahlayi leswaku mhunu i ntxhumu, 5nitamululamisela a mhaka lweyi wa mufelwa, leswi anikarataka, suka atanitlhanyisa nhloko hi kutekisa kwake kakuta. 6Kutani Hosi yiku: Yingelani leswi swihlayiwaka hi mutremi lweyi angalulamangakiki. 7Xana Xikwembu Nkulukumba ana angalulamiseli vahlawuliwa vakwe, lava vabandlukanaka ku yene vusiku ni nhlikanhi, na alehisa mbilu ha vone? 8Nan'wibyela nili: Atahangwesa avalulamisela a mhaka yavu. Kambe xana N'wana wa Mhunu, akutlhaseni kwake, atakuma vupfumeli amisaveni xana?
Kutitrongohata xikhongotweni
9Yesu atlhela ahlaya xifaniso lexi ku van'wana lava vatidumbaka, vaku valulamile, vadrela van'wana: 10A vhanu vabiri afa vantlhantukela a Tempeleni vayakhongota. Mun'we afa ali mufarisi, a mun'wana ali muhlengisi. 11Lweyi wa mufarisi ayima atikhongotela hi le ndreni kwake aku: Xikwembu Nkulukumba nakutlangela hi leswi ningaliki swanga hi van'wana vhanu, vanga swiyivi, ni vasomboloki, ni vawoswani, nambi kuli kufana ni lweyi wa muhakelisi wa tinemba lweyi. 12Nititrona swakuda kubiri hi vhiki, ninyika swa vukhume bya hinkwaswu leswi niswikumaka. 13Kambe lweyi wa muhlengisi ayima kule, angatiyi ni kutlakuxela mahlu yake tilweni, atiba xifuva aku: We Xikwembu Nkulukumba, nidrivalele mine ninga mudohi! 14Yesu aku nan'wibyela: A muhlengisi afulameli andlwini yake na ahlayiwi lweyi wa kululama kutlula mufarisi. Hikusa mun'wana-ni-mun'wana lweyi atitlakuxaka atatrongahatiwa; kambe lweyi atitrongohataka atatlakuxiwa.
Vatrongwana ni Mfumu wa Xikwembu Nkulukumba
(Mt 19:13-15; Mrk 10:13-16)
15Kutani vatisela Yesu vatrongwana akuva avakhumba, vatiki vaswivona, a vadondrisiwa vakhwavela vhanu lavo. 16Kambe Yesu avavitana aku: Trikani vatrongwana vata ku mine, n'wingavatsimbeni. Hikusa a Mfumu wa Xikwembu Nkulukumba i wa lava vakunhati. 17Nihlayelamfuri nili ku n'wine, lweyi angayamukelikiki a Mfumu wa Xikwembu Nkulukumba swanga hi ntrongwana, angaka anganhingeni ku wone.
Vafuyi ni Mfumu wa Xikwembu Nkulukumba
(Mt 19:16-30; Mrk 10:17-31)
18Mun'we wa ndruna avutisi Yesu aku: Mudondrisi lweyi munene, xana nitayentxa yini akuva nida pfindla dra vutomi lebyi byingahelikiki? 19Yesu aku ku yene: Xana unihlayela yini lweyi munene? Akuna lweyi munene loko angali Xikwembu Nkulukumba ntsena. 20#Lavisa: Khm 20:12-16; Mlw 5:16-20. Wamitiva a milawu leyi miliki: Ungayentxi vumbuye, ungadlayi, ungayivi, ungahumexi vumboni bya kuhemba, txhava tatana waku ni mamana waku. 21Kambe yene aku: Nabekisi hinkwaswu leswo na nahali ntrongo. 22Atiki awaswiyingela, Yesu aku ku yene: Kusali xin'we lexi uxipfumalaka: xavisa hinkwaswu leswi unganaswu, uyavela swisiwana. Hi kone utakava ni nhlengwe a matilweni. Hi kone ungataka, unilandra. 23Atiki ayingela leswo, avaviseka ngopfu, hikusa afa afuyi ngopfu.
24Yesu loko amulavisa aku: Swanonon'hwa ku lava vangani vukosi akunhingena aNfun'wini wa Xikwembu Nkulukumba. 25Swanabyala akuva kamela drinhingena hi moya wa ximari, akutlula loko mufuyi anhingena aNfun'wini wa Xikwembu Nkulukumba. 26Lava afaka vaswiyingela vaku: Loko swilitanu, hi mani lweyi angahulukaka xana? 27Kambe Yesu ayanguli aku: Leswi swingakotekiki ku vhanu, ku Xikwembu Nkulukumba swakoteka.
28Petrosi aku: vona, hitriki sweru hikulandra. 29Yesu aku ku vone: Nihlayelamfuri nili ku n'wine, akuna mhunu lweyi atrikiki yindlu, kumbe nsati, kumbe vamakwavu, kumbe vapswali, kumbe vana, hinkonta ya Mfumu wa Xikwembu Nkulukumba, 30angatiki yamukela leswi switlulaka ngopfu ankameni lowu, na ankameni lowu wutaka atakuma vutomi lebyi byingahelikiki.
Yesu atlhela akhanela hikufa ni kupfuka kwake
(Mt 20:17-19; Mrk 10:32-34)
31Yesu atekiki lava vakhume na vabiri, aku ku vone: Vonani, hintlhantukela Yerusalema; kutani kutahetiseka hinkwaswu leswi switraliwiki hi vaprofeta hi tlhelo dra N'wana wa Mhunu. 32Hikusa atanyiketiwa ku va-Matiko, ahlekiwa, asandriwa, athukeliwa mari. 33Vataku vamupswhita hi minkhavi, vamudlaya; kambe hi siku dra vuraru atapfuka. 34Kambe a vadondrisiwa avayingelanga ntxhumu ku swone; afa ritu ledro drifihlekile ku vone, vakohla hi leswi aswihlayiki.
Kuhanyisiwa ka wa kufa-mahlu
(Mt 20:29-34; Mrk 10:46-52)
35Kuti loko Yesu atrhindrekela Yeriko, mun'we mhunu wa kufa-mahlu afa trhami hi le ndleleni, akombela. 36Ayingela xitrhungu lexi xikhalutaka, avutisa leswaku, i mpswini leswo. 37Vamubyela leswaku i Yesu wa le Nazarete akhalutaka. 38Yene, abandlukana aku: Yesu, N'wana Davida, niyentxele vurombe! 39Kambe lava afaka varangi mahlweni, vamukhwavela vaku a amiyele. Kambe yene ayengesa abandlukana ngopfu aku: N'wana Davida, niyentxele vurombe! 40Yesu ayima aku avamutise ku yene; loko atrhindrekelile, Yesu amuvutisa: 41Xana urandra leswaku nikuyentxela yini? Yene aku: Hosi, leswaku nitlhela nivona. 42Yesu aku ku yene: Tlhela uvona! A kupfumela kwaku kukuhanyisile. 43Kutani, hi nomu-lo atlhela avona; ahanga mulandra, atwalisa Xikwembu Nkulukumba. Loko vaswivonile, a vatiko hinkwavu vatwalisa Xikwembu Nkulukumba.
अहिले सेलेक्ट गरिएको:
Lk 18: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
