Lk 17
17
Ta swikhunguvanyisu
(Mt 18:6-7,21-22; Mrk 9:42)
1Yesu aku ku vadondrisiwa vakwe: Aswikoteki kuva swikhunguvanyiso swingati, kambe yowee lweyi swihumelelaka ha yene. 2Afa swingava swinene ku yene loko vamutrimbelela ribye dra kusila anhan'wini, ava atxukumetiwa likhulwini, kunge kukhunguvanyisa mun'we ku lavatrongo lava. 3Tivonelani! Loko makwenu akudohelile, mulaye. Loko atisola, mudrivalele. 4Ni loko akudohela ka ntlhanu na kubiri hi siku, atlhela ata ku wene ka ntlhanu na kubiri, aku natisola, uta mudrivalela.
5Kutani a vapostola vaku ku Hosi: Hi yengeselele kupfumela. 6A Hosi yiku: Loko fanga n'wini kupfumela loko kange hi nhleke ya sinapi, afa n'wingaku ku nkuwa lowu: Tisimule uyatisimeka likhulwini; afa wuta n'wiyingela.
7Xana hi wini ku n'wine lweyi angani nandra lweyi amudrimelaka, kumbe amubyiselaka, anaka loko abuya apfa masin'wini, aku ku yene: Hangwesa, utrhindrekela, utrhama kudeni? 8Xana angopfu ana angaku ku yene: Bekisa leswi nitakalalela ha swone; tikhame likhalu, unitirela nikota niheta kuda ni kunwa, a ntrhaku utada, utanwa na wene? 9Xana atatlangela nandra, leswi atiriki leswi amuleletiki swone? 10Hiswoswo na n'wine, loko n'wiyentxi hinkwaswu leswi n'wileletiwiki swone hi Xikwembu Nkulukumba, hlayani n'wiku: Hi malandra, hiyentxi ntsena leswi afaka hifanela kuyentxa swone.
Kuhanyisiwa ka khume dra timbabyi ta nhlokonho
11Loko Yesu ali kari akongoma a Yerusalema, atremakanya hi le makari ka Samariya na Galileya. 12Aku na ahanhingena ku mun'we muti, a vavanuna lava khume vanhlokonho vamutlhangaveta. Vayima hi le kule, 13vatlakuxa maritu vaku: Yesu, Mudondrisi, hiyentxele lirere! 14Yesu atiki awavavona, aku ku vone: Fambani n'wiya tivonekisa ku vaprista. Vaku na vahafamba vahanyisiwa. 15Kambe mun'we ku vone, atiki avona leswaku ahanyisiwile, atlhelela ntrhaku na twalisa Xikwembu Nkulukumba hi ritu ledrakutlakuka. 16Awa hi mombo aminengeni ya Yesu, amutlangela. Nakasi afa ali mu-Samariya. 17Yesu avutisa aku: Xana ava hanyisiwanga na vali khume? Lava ntlhanu na mune vakwini-ke? 18Avakumekanga lava vakotiki kutlhelela ntrhaku, vatata twalisa Xikwembu Nkulukumba, loko ange lweyi ntsena, lweyi anga wa matiko? 19Ahangaku ku yene: Sekeleka utifambela. A kupfumela kwaku ku kuhanyisile.
Kuta ka Mfumu wa Xikwembu Nkulukumba
(Mt 24:23-28,37-41)
20Yesu avutisiwiki hi van'we va vafarisi leswaku xana a Mfumu wa Xikwembu Nkulukumba wutata drini siku. Yesu avayangula aku: A Mfumu wa Xikwembu awuti ha kuvoniwa. 21Ana vangahlayi: Leswaku wukola, kumbe wulahaya. Hikusa lavisani a Mfumu wa Xikwembu Nkulukumba wule makari kwenu.
22Ayengesa aku ku vadondrisiwa vakwe: A masiku matata lawa n'witaka navela kuvona siku drin'we ku masiku ya N'wana wa Mhunu, kambe n'wingaka n'wingadrivoni. 23Vataku ku n'wine: Lavisani, hilweyi halenu, kumbe alahaya. N'wingayeneni, n'wingavalandreni, 24hikusa swanga hileswi alihati lihatimaka ku tlhelo drin'we dra tilo, atava tanu a N'wana wa Mhunu A sikwini drakwe. 25Kambe swifanekeli aranga atwisiwa kuvaviseka loku kukulu, ava adreliwa hi vhanu va nkama lowu.
26Kutani swanga hi leswi swingahumelela minkameni ya Nowa, switava tanu ni le minkameni ya N'wana wa Mhunu. 27Afa vada, vanwa, valovola, valovota, kuko kutlhasa siku ledri Nowa anga nhingena angalaweni ha drone. A ntita yita yivasuvisa hinkwavu. 28Hiswoswo, switava swanga hi le masikwini ya Loti: afa vada, vanwa, vaxava vaxavisa, vabyala, vayaka. 29Kambe hi siku ledri Loti angahuma Sodoma ha drone, kuve ni ndrilo ni xivavula, swipfa tilweni, swivasuvisa hinkwavu, 30switayentxisa xiswoswo hi siku ledri N'wana wa Mhunu ataka pfuleteleka ha drone.
31A sikwini ledro, lweyi angahenhla ka yindlu, na nhundru yake yili ndlwini, angatxhuki axika ayayiteka. Naye lweyi angamasin'wini, angatxhuki atlhelela ku leswi swinga ntrhaku. 32Drimukani nkata Loti! 33Lweyi adjulaka kutilondrela vutomi byake, atabyilahla; kambe lweyi ataka byilahla, atatlhela abyihuluxa. 34Nan'wibyela; avusikwini lebyo, vabiri vatava vayetleli ku vunanu byin'we; a mun'we ata tekiwa, a mun'we asiyiwa. 35A vavasati vabiri vatava vasila mbangu mun'we; a mun'we atatekiwa, a mun'wana asiyiwa. [ 36Ku vhanu vabiri vatakava masin'wini; kutatekiwa mun'we a mun'wana asiyiwa.]#17:36 A ndrimana ya 36 ayikumeki ku matralwa manyingi ya khale. 37A vadondrisiwa vamuvutisa vaku: Switava kwini xana, we Hosi? Aku ku vone: Lomu ntrumbu wunga kone, hi lomu makhoti matakahlengeletana kone.
अहिले सेलेक्ट गरिएको:
Lk 17: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
