Ta je huliwa 2
2
1KE ame o but bong Penetekos, ödrin hia adre me tha laba hnyi dok a khaca. 2Ke ame o uthmâhmâ but lung ûnyi hnyi drany, helâ me ang ame hmuhmu, me öunongötâ thö uma hia wale ödrin e laba hnyin. 3Me ame manen dut ködrin je bohmen ae vheivhei, ke helâke meic; ke ame ve laba hudrin. 4Me ödrin e unöngöt hia thö ge Hanu Kap, me hwân he ka fuc hnyi je ve hwen hnyei bi, helâ me hnen Hanu hna ham ködrin he ka fuc.
5Ke e hu tavat Juda adre me outen Khong, adre me laba hnyi Jerusalema, ûhedra hnyi ta je hnyei hia eang hmeledrany. 6Ke adre me long ut lung eling, me ame ûkhacaköu thö tavat ae se hia, ke adre me lâiâ gan hmâ, anyin adre me long ödrin e fuc hnyi je ve hodra bi. 7Me adre me ve uthmâhmâ me lâiâ, me ba, ka habe, Wâ bi, ca at Galilaia hia bi hnyat ang? 8Ke a hawa ate me ve ling ödrin hnyi ve hwen hota bi adre hnöku öta hnyin? 9At Parathia, me Madai, me Elama, me tavat adre me laba hnyi Mesopotamia, me Juda, me Kapadokia, me Ponoto, me Asia, 10me Ferugia, me Pamefulia, me Aigupito, me je hnyei hnyi Libua hakekeny Kurene, me je atkanyua ûhedra Roma, at Juda me tavat adre me tha hmi mödra, 11at Kerete, ma Arabic, ate me ling ödrin ödrin e fuc hnyi je ve hwen ita, kʼ ödrin e ha ge ta je huliwa ae man anyin Khong. 12Ke ödra hia adre me uthmâhmâ, me loloâ, me ûhnenamököuâ, ka habe, ieû bongon ûnyi eang? 13Ke haba keihen adre me ûhiö, ka habe, A ijem gânâ waina ae teb ûnyi hnyat ang.
14Ke haba Peteru ame tha tot me hnyat a eleven, me ha göranyâ, ka habe, Öbun at Juda, me öbun hia tavat öbun e laba hnyi Jerusalema, wâhmakhmeto ju öbun ûnyi eang, ke long ju öbun hok hofuc. 15Anyin a ca monu bi hnyat ang ge waina, helâ me hnobun hna ûnykûme; ke tiga awa a kuniny ang; 16ke walang hofuc a ha perofeta Joela, ka habe,
17Haingen Khong, ka habe, Hnyi ta je bong a biliny,
Oge me he ka hingâlâ hanuk hon tavat hia thithö:
Ke amer he lakubun obaga me wahlu ka perofeta,
Ke ame he lakubun wahidröu ka wâ je hna omanenâ,
Kʼ ame he wahingatibun ka bwo ta je bwi.
18Eke, hnyi ta je bong eling oge me he ka hingâlâ hon lathnyabaik obaga me omomo
Hanuk; me adre me he ka perofeta.
19Ke oge me he ka omanenâ je ûöman ethö hnyi drany,
Ke ta je haten eang hmeledrany;
Wale dra, me meic, me hai ame sâ goranyai;
20Adre me he ka bödra ka wia seûno me me lit bi,
Me tehi me me dra,
Me ame he ka o but bong bongon Than,
Wale bong ae gan me lung:
21Ke ame he ka möt tavat hia adre me he ka hawâ ien Than.
22At Isaraela lö, long ju öbun hofuc ang: Haba Iesu at Nazareta, at a ohnathoâ köbun hnen Khong ge je huliwa ae gan me je ûöman me je haten, waleji hnen Khong hna ânyâ ûnyi gan hnyi wanböbun, ke manen e köbun; 23wale at adre me hna but ûnyi hnyi musi wisa me wâ bânâ hnen Khong, kʼ öbun e hia but osatauroâ me hlingâ hnen hnyamen tavat adre me hanyâûâ hnanyibu: 24kʼ ame omelö hmetu thö e, me thang ut ta je toiny mok; anyin ae ca khana unyi eling he ka ohmâ e. 25Anyin a hâiâ e Davita, ka habe,
Oge me wâ bala Than hnyi hnyimakök;
Anyin a e but hnyi ke keihen a metök, mʼ adre me ca he ka bwebweli nya.
26Wale me me senyin hnyekuk kʼ ame hobâ bohmök;
Ke ame he unyik ka menâ ju me gejon:
27Anyin a u me ca he bi ka hna but hanuk hnyin hedis,
U me ca he ka hna but Atâm ae Kap he ka wâ hna bobot.
28U je hia but omanenâ könya je gethen deny möt;
Ke u me he ka ounöngöti nya ge senyin hnyi hnyimâkâm.
29Hnyat me lakeiny lö, oge me behâiâ wia Davita pateriaka köbun, ka habe, a mokcu, ke adre hia but konâm, ke e unyita hon ke ne o but hnyi bong ang. 30Anyin a e perofeta, ke e ame wâhmakhmeto a ga hia but Khong khemanyin kâu a e ame he ka ip ke at hon anyin theron ûnyi hnyi mâtrâniny; 31me haba Davita ame wâ bânâ e, kʼ ame ha ge möt hmetu anyi Keriso, a gʼ adre me ca he ka hna degecâ e bi ka hnyi Hedis, kʼ ame ca he unyin ka wâ bobot. 32Haba Khong ame omelö hmetu Iesu, ke ohmun hia ang je hnyat ohnatho. 33Ke walang ang e ame laba goranyai ûnyi ge hnyam a metân Khong, kʼ ame hia but kap ûnyi ge Kamen Hanu Kap waleji e ame ha bânâ, me e ame hingâlâ but ûnyi ang öbun e wâ me long. 34Anyin a ca ölö ka hnyi drany Davita: ke e ame ha, ka habe
Haingen Than ka Tuhok, ka habe, Laba ju hnyi ke keihen a metök,
35Ke ne o but oge me he ka wia ta je iwahnaihmiony möu me taben li cam.
36Anyin a wale, e so e he lap anyi Isaraela hia ka wâhmakhmeto a gʼ ame hia but Khong wia Iesu at öbun e osatauroâ me me Than me Keriso.
37Adre me long e, me ame dâ but je hnyekudra, me adre me ha kö Peteru me ta je aposetolo, ka habe, Hnyat me lakeiny lo, ieû hanymöhmun he ka ânyâ? 38Haingö Peteru kodra, ka habe, Ietra ju, mʼ adre me ve bapataisoi öbun hnyi iö Iesu Keriso, mʼ adre me thang degecâ but anyibun ta je hulo; me öbun e he bi ka kap bwihlany a Hanu Kap. 39Anyin a haba hna ha bânâ, me hnân hobi köbun me je lakubun, me hobi kâu hnyat a ödra sâkâu, wale hnyat hia ame he Than a Khonguta ka hawâ kâu. 40Haba Peteru ame khetâ, kʼ ame khöû kodra ge ta je hofuc ae se hia, haingen, ka habe, Omeli öbun dö ûnyi hnyi dö eang ae hwali. 41Ke adre me bapataisoâ tavat adre me kap hwan: me adre me bihanen kodra hnyi bong eling helâ me theri thauzan tavat 42Ke adre me tethmâ hnyi hna ûne hnen je aposetolo, me tha hnyok, me susubâ areto me hic.
43Ke ame o but ot ka tavat hia: ke se hia ta je ûöman me haten ame ânyâ hnen je aposetolo. 44Ke ame tha laba tavat hia adre me labageju, ke adre me ve ip anyidra ta je ûnyi, me ka tha anyidra thibi; 45ke adre me ve ûco idra ta hnyei, ke ta je omjehedra, me ve khenâ oûco ka tavat hia ae theduoc. 46Ke adre me laba bala me hnyok a khaca hnyin uma kap hnyi je bong, me susubâ areto hnyi ke uma me ke uma, me an ö ʼdra jeû me senyin me hnyok a khaca, 47me oganâ Khong, ke ame betenge gadra tavat hia. Ke haba Than ame bi hanen kodra hnyi je bong tavat adre me he ka möt.
अहिले सेलेक्ट गरिएको:
Ta je huliwa 2: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society
