Ta je huliwa 1
1
1THEOFILA lö, haba tusi oge me sihnalimen a bân, me ame ha ta je ûnyi hia ame ânyâ Iesu, ke hnen hna ûne, 2ke ne o but bong adre me kap dö e hnyi drany ai, hwaban hnen hna hûna ka je aposetolo a deny Hanu Kap, wale hnyat e ame ûca: 3ke e ame ka omanenâ e ködrin ae möt, hwaban anyin mok kʼ ame osehia ohnathoâ me labö o ködrin hnyi fâte je bong, kʼ ame ha bongon dokhu dokhon Khong: 4ke hnyi ke ûen e ame tha laba mödrin me hûna ködrin a ödrin e ca he ka vese ûhedrin Jerusalema, ke ödrin e he bi ka halubahingen ûnyi ame ha bânâ Kamen, haingen, ka habe waleji öbun e long ûnyi gak: 5anyin a Ioane ame bapataiso ge köiö; ke adre me he ka bapataisoi öbun ge Hanu Kap hwaban ke je beng ae wakhalet.
6Ke ödrin e hnö e hnyi ke bong ödrin e ûkhacaköu hnyin, ka habe, Than lö, ûen dut ang u me he ka odokho hmetu at Isaraela? 7Haingen ködrin, ka habe, E ca hanymöbun he ka wâ je bong me je huna ame ip ge Kamen kʼ ame muso bi. 8E ka o but köbun Hanu Kap, me öbun e he ka tren man: mʼ öbun e he ka ohnathu nya hnyi Jerusalema, me Juda hia me Samaria ke ne o but hnyi je can hmeledrany. 9E ame ha e, me adre me hom dö e hnyi drany ai, kʼ ödrin e wâ; me ame kap e hnyi ûlâ me me ca manen bi. 10Ke ödrin e tiga ngele hnyi drany ai, kʼ ame tiga ölö thö, me wâ bi, li at ödru me tot unyidrin, ödre khaû hau: 11haingödru, ka habe, At Galilaia lö, ieû gabun öbun e ngele drany ai? ame he ka o hmetu Iesu at adre me hom unyibun hnyi drany ai, helâ me hnen hna ölö hnyi drany ai, kʼ öbun e wâ.
12Ke ödrin e hmetu but Jerusalema ai ûhedrin hnyi bucen, Elaio ien, wale ae hakekeny Jerusalema, e ûcû he ka he hnyi Sabath. 13Ke ödrin e o but, me ödrin e ölö thö ka hnyi hnyeule ethö, wale ödrin e laba hnyin; jia Peteru, me Ioane, me Iakobo, me Anederea, me Filipo, me Toma, me Batolomaio, me Mataio, me Iakobo nöku Alefaio, me Simona a Zeloti, me Juda liamekeiny me Iakobo. 14Ödrin hia e, ödrin e labö hic hnyi hnyok a khaca, tha ödrin me watamomo, me Maria hinyö Iesu, me je liamekeiny minya mē.
15Haba hnyi ûen eling, Peteru ame tot hnyi wanben je liamekeiny (haba ûseidra eling me helâke me wan haded ke twente) ke ame ha, ka habe, 16Hnyat me lakeiny lö, e ûcû he ka ohwâdâ hna sihnalimen a hia but ha adrem Hanu Kap ge hnyimö Davita ga Juda, at ame su ödra ka köt Iesu. 17Anyin adre tha aû e möhmun, ke adre khene hanymen hnyi huliwa eang. 18(Haba at e ame ûco utkânâ ge hwaban hwakecin ae kong; ke e ame ta but ame bân ban, me ame hmouca but hnyekon, me hingölö hia but tang tiny. 19Ke e khana e tavat hia adre me laba hnyi Jerusalema; me adre me hwenyi ien utkânâ eling hnyi ifucidra, kahabe, Akeledama, walang bongon, Iny dra.) 20Anyin adre sihnalimen hnyi tusi Salamo, ka habe,
Ame he ka ba wan anyin lap, Ke ba at ame he ka laba e: ke
Ame he biju ke at ka hom hanymen.
21Anyin a wale haba tavat eang adre me tha hien mʼ ohmun hnyi ta je bong hia waleji ke tiga tha otin me Than Iesu, 22hwân hnyi hna bapataiso hnö Ioane, ke ne o but hnyi bong adre me hom dö e goranyai gata, e ûcû he ka ûca ke at gadra he ka hnyi ohnatho möta möt hmetu thö a e. 23Me adre me otilâ li at, jia Josefa ke ien Basabasa, ke haba ke ien minya Juseto, me Matathia. 24Me adre me hic me ha, ka habe, Taböny Than lö, u at ame wâhmakheto ta je hnyok hia thithö, omanenâ thö kohmun at u me he ka ûca ge li at ang, 25me me he ka hnyi hanen huliwa eang, me hanymen aposetolo, waleji a degec Juda, me he ka hnyi hnen bi. 26Me adre me ugleköbâ gadru, me ame hwâdâ thö kö Matathia; me adre me tha aû e me je aposetolo a eleven.
अहिले सेलेक्ट गरिएको:
Ta je huliwa 1: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society
