Johanes 3
3
Jesus rät met Nikodemus
1Doa wia oba een Mensch ut de Farisäa, sien Nomen wia Nikodemus, een Bowaschta vonne Juden. 2Disa kjeem no am (Jesus) enne Nacht un säd to am: Rabi, wie weeten, daut du een Liera best, von Gott jekomen, dan kjeena kaun dise Tieekjens doonen, dee du deist, buta Gott es met am. 3Jesus auntwuad un säd to am: Woarhauft, woarhauft, saj ekj die: Daut es dan, wäa nich vom nieen jebuaren (von Bowen - wadajebuaren) woat, soo kaun hee daut Rikj Gottes nich seenen.
4Nikodemus säd to am: Woo kaun een Mensch jebuaren woaren, wan hee oolt es? Kaun hee toom tweede mol em Muttalief nengonen un jebuaren woaren? 5Jesus auntwuad: Woarhauft, woarhauft, saj ekj die: Daut es dan, wäa nich ut Wota un Jeist jebuaren woat, soo kaun hee nich en daut Rikj Gottes nenn komen. 6Waut utem Fleesch jebuaren es, es Fleesch, un waut utem Jeist jebuaren es, es Jeist. 7Wunda die nich, daut ekj die saj: Jie motten vom nieen (bowen) jebuaren woaren. 8De Wint blost, wua hee well, un du hieescht sien ruzhen, oba du weetst nich, wuahäa hee kjemt, un wuahan hee jeit, soo es jiedra, dee utem Jeist jebuaren es.
9Nikodemus auntwuad un säd to am: Woo kaun soowaut passieren? 10Jesus auntwuad un säd to am: Du best de Liera en Israel un weetst dit nich? 11Woarhauft, woarhauft, saj ekj die: Wie räden, waut wie weeten, un zeijen, waut wie jeseenen ha, un ons Zeichnis näm jie nich aun. 12Wan ekj junt daut Irdische jesajcht ha, un jie jleewen nich, woo woa jie jleewen, wan ekj junt von daut Himlische sajen woa? 13Un kjeena es nopp jestäajen en dän Himmel, aus blooss dee utem Himmel raufjestäajen es, de Menschensän, dee em Himmel es. 14Un soo aus Moses enne Wieste de Schlang nohecht hoof, soo mott de Menschensän nohecht jehowen woaren, 15om daut jiedra, dee aun am jleeft, [nich veloaren gonen, oba] eewjet Läwen ha. 16Dan soo haft Gott de Welt jeleeft, daut hee sienen eenjebuarnen Sän jeef, om daut jiedra (aula), dee aun am jleeft, nich veloaren jeit, oba eewjet Läwen haft. 17Dan Gott haft sienen Sän nich enne Welt jeschekjt, om daut hee de Welt rechten saul, oba daut de Welt derch am jerat woat. 18Wäa aun am jleeft, woat nich jerecht, wäa oba nich jleeft, es aul jerecht, wiels hee nich jejleeft haft aun dän Nomen vom enjebuarnen Sän Gottes. 19Dit oba es daut Jerecht, daut daut Licht enne Welt jekomen es, un de Menschen haben de Diestanis mea jeleeft aus daut Licht, dan äare Woakjen wieren bees. 20Dan jiedra, de Beeset deit, haust daut Licht un kjemt nich nom Licht, om daut siene Woakjen nich bloosjestalt (opjedakjt, verendach) woaren. 21Oba wäa de Woarheit deit, kjemt nom Licht, om daut siene Woakjen openboa woaren, daut dee en Gott jedonen sent.
Noch een Zeichnis von Johanes dän Deepa äwa Jesus
22No däm kjeem Jesus un siene Jinja em judischen Launt, un doa bleef hee met an un deept. 23Oba uk Johanes deept en Änon, bie Salim, wiels doa väl Wota wia, un de (Menschen) kjeemen doahan un see worden jedeept. 24Dan Johanes wia noch nich em Jefenkjnis jeschmäten.
25Doa gaufet eene Strietfroag unja Johanes siene Jinja met eenem Jud äwa de Reinjunk. 26Un see kjeemen no Johanes un säden to am: Rabi, dee aun jantsied Jordan bie die wia, däm du Zeichnis jeefst, kjikj, dee deept, un aula komen no am. 27Johanes auntwuad un säd: Een Mensch kaun nuscht kjrieen,buta daut woat am vom Himmel jejäft. 28Jie selfst jäwen mie Zeichnis, daut ekj säd: Ekj sie nich de Christus, oba daut ekj ver am jeschekjt sie. 29Dee de Brut haft, es de Briegaum; oba däm Briegaum sien Frint, dee doa steit un am hieet, es sea froo äwa däm Briegaum siene Stemm; dise miene Freid es erfelt. 30Hee mott waussen (toonämen), ekj oba mott aufnämen. 31Dee von bowen kjemt, es äwa aulem; dee vonne Ieed es, es vonne Ieed un rät vonne Ieed. Dee vom (utem) Himmel kjemt, es äwa aule(m), 32[un] waut hee jeseenen un jehieet haft, daut bezeicht hee, un sien Zeichnis nemt kjeena aun. 33Wäa sien Zeichnis aunnemt (aunjenomen haft), haft bestädicht, daut Gott woarhauftich es. 34Dan dee, däm Gott jeschekjt haft, rät de Wieed Gottes, dan Gott jeft dän Jeist nich nom Mot. 35De Voda es däm Sän goot un haft aules en siene Haunt jejäft. 36Wäa aun dän Sän jleeft, haft eewjet Läwen; wäa oba dän Sän nich jleeft (nich horcht), woat daut Läwen nich seenen, de Oaja (Wutt) Gottes blieft opp am.
अहिले सेलेक्ट गरिएको:
Johanes 3: PBJHF
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© SW-Radio e.V.
