Johanes 4
4
Jesus rät to eene samaritische Fru
1Aus nu de Har daut erkjand, daut de Farisäa jehieet hauden, daut Jesus mea Jinja muak un deept aus Johanes 2(wiels Jesus selfst nich deept, oba siene Jinja), 3veleet hee Judäa un jinkj wada no Galiläa. 4Hee must oba derch Samaria reisen. 5Hee kjeem en eene Staut Samarias, jenant Siechar, dichtbie biem Launt, daut Jakob sienem Sän Josef jeef. 6Doa wia oba eene Kjwal (Borm) von Jakob. Jesus wia meed von de Reis, sad sikj aum Borm dol. Daut wia om de saste Stund. 7Doa kjeem eene Fru von Samaria, Wota to schapen. Jesus säd to ar: Jeff mie to drinkjen. 8(Dan siene Jinja wieren enne Staut jegonen, om Äten to kjeepen). 9De samaritische Fru säd donn to am: Woosoo betst (frajchst) du, dee du een Jud best, von mie to drinkjen, doa ekj eene samaritische Fru sie? (Dan de Juden ha nuscht to doonen met de Samarita).
10Jesus auntwuad un säd to ar: Wan du de Gottesgow kjanen kust, un wäa daut es, dee to die sajcht: Jeff mie to drinkjen, soo wurscht du am jebedd (jefroacht) haben, un hee haud die läwendjet Wota jejäft. 11De Fru säd to am: Har, du hast kjeen Jefäss toom schapen, un de Borm es deep; von wua hast du dan daut läwendje Wota? 12Du best doch nich jrata aus ons Voda Jakob, de ons däm Borm jeef, un hee selfst drunk doarut un siene Säns un sien Vee? 13Jesus auntwuad un säd to ar: Jiedren, dee von disem Wota drinkjt, woat wada darschten; 14oba wäa emma von dit Wota drinkjen woat, daut ekj am jäwen woa, däm woat nich darschten en Eewichkjeit; oba daut Wota, daut ekj am jäwen woa, woat en am eene Wotakjwal woaren, daut em eewjen Läwen kjwalt.
15De Fru sajcht to am: Har, jeff mie dit Wota, doamet mie nich darscht un ekj nich hiahäa komen mott, om to schapen. 16Jesus säd to ar: Go han, roop dien Maun un komm hiahäa. 17De Fru auntwuad un säd: Ekj ha kjeen Maun. Jesus säd to ar: Du hast rajcht jesajcht: Ekj ha kjeen Maun; 18dan fief Mana hast du jehaut, un dee, dän du nu hast, es nich dien Maun; en däm hast du de Woarheit jesajcht. 19De Fru säd to am: Har, ekj see, daut du een Profeet best. 20Onse Vodasch haben opp disem Boajch aunjebät, un jie sajen, daut en Jerusalem de Plauz es, wua maun aunbäden mott. 21Jesus säd to ar: Fru, jleew mie, daut kjemt de Stund, doa jie noch opp disem Boajch, noch en Jerusalem däm Voda woaren aunbäden. 22Jie bäden aun un weeten (kjanen) nich, waut; wie bäden aun un weeten (kjanen), waut, dan daut Heil es vonne Juden. 23Oba doa kjemt de Stund un es nu, doa dee woarhauftje Aunbäda däm Voda em Jeist un Woarheit woaren aunbäden; dan uk de Voda sieekjt soone aus siene Aunbäda. 24Gott es een Jeist, un dee am aunbäden, motten em Jeist un Woarheit aunbäden. 25De Fru sajcht to am: Ekj weet, daut de Messias kjemt, dee doa Christus jenant woat; wan dee kjemt, woat hee ons aules dietlich moaken. 26Jesus säd to ar: Ekj sie (dee), dee met die rät.
No de Unjahoolunk met de Samaritafru: De Gloowen de Samarita – Gott siene Arnt
27Un doaräwa kjeemen siene Jinja un vewundaden sikj, daut hee met eene Fru räd. Doch säd kjeena: Waut sieekjst du? Ooda: Waut rätst du met ar? 28De Fru leet äaren Wotakruck stonen un jinkj wajch enne Staut un säd to de Lied (Menschen): 29Komt, kjikjt eenen Maun (Mensch), dee mie aules jesajcht haft, waut ekj jeemols jedonen ha; es disa veleicht de Christus? 30See jinjen ute Staut rut un kjeemen no am.
31Entweschen [oba] bedden am siene Jinja un säden: Rabi, at. 32Oba hee säd to an: Ekj ha eene Moltiet to äten, dee jie nich kjanen. 33Donn säden de Jinja to eenaunda: Haft am irjentwäa to äten jebrocht? 34Jesus säd to an: Miene Moltiet es, daut ekj däm sien Wellen doo, dee mie jeschekjt haft, un sien Woakj vollbrinj (toenj brinj). 35Saj jie nich: Doa sent noch 4 Moonat, un de Eifst kjemt? Kjikjt, ekj saj junt: Häft june Uagen opp un kjikjt de Koagel aun, dan dee sent aul witt (Riep) to Arnt. 36Dee doa arnten deit, kjricht Loon, un saumelt Frucht toom eewjen Läwen, om daut beid, dee doa seit un dee doa arnt, tojlikj sikj freien. 37Dan hia es de Spruch woa: Een aundra es daut, de doa seit, un een aundra, de doa arnt. 38Ekj ha junt jeschekjt, to arnten, wuaraun jie nich jeoabeit ha; aundre ha jeoabeit, un jie sent en äare Oabeit enjestäajen.
39Oba ut jane Staut jleewden väl von de Samarita aun am om de Fru äare Wieed haulwen, dee doa zeijd: Hee haft mie aules jesajcht, waut ekj jedonen ha. 40Aus donn de Samarita no am kjeemen, bedden see am, bie an to bliewen; un hee bleef doa twee Doag. 41Un noch väl mea jleewden aun am wäajen siene Wieed; 42un see säden to de Fru: Wie jleewen nich mea wäajen diene Räd, dan wie selfst haben jehieet un weeten, daut disa woarhauft de Heilant de Welt es.
De Sän von eenen kjennichlichen Beaumten woat jeheelt
43Oba om twee Doag jinkj hee von doa wajch no Galiläa; 44dan Jesus selfst bezeijd, daut een Profeet em ieejnen Vodalaunt (Vodastaut) kjeene Iea haft. 45Aus hee donn no Galiläa kjeem, naumen de Galiläa am opp, doa see aules jeseenen hauden, waut hee en Jerusalem oppem Fast jedonen haud; uk see kjeemen toom Fast.
46Hee kjeem donn wada no Kana en Galiläa, wua hee daut Wota to Wien jemoakt haud. Un doa wia een Kjennichsbeaumta, däm sien Sän wia Krank, en Kapernaum. 47Aus disa jehieet haud, daut Jesus von Judäa no Galiläa jekomen wia, jinkj hee no am han un bedd [am], daut hee doch rauf kjeem, om sienen Sän to heelen; dan dee lach aum Stoawen. 48Donn säd Jesus to am: Wan jie nich Tieekjens un Wunda seenen, soo woa jie nich jleewen. 49De Kjennichsbeaumta säd to am: Har, komm rauf, ea mien Kjint stoaft! 50Jesus sajcht to am: Go han, dien Sän läft.
De Maun (Mensch) jleewd aun daut Wuat, daut Jesus to am säd, un jinkj han (trigj). 51Oba aus hee trigj jinkj (oppem Trigjwajch wia), kjeemen siene Kjnajchts un säden, daut sien Sän läft. 52Donn fruach hee an om woone Stund, wanea daut met am wia bäta jeworden; un see säden to am: Jistren to de säwende Stund veleet am daut Feeba. 53Donn erkjand de Voda, dautet en dee Stund wia, aus Jesus to am säd: Dien Sän läft. Un hee jleewd, hee un sien gaunzet Hus (Famielje). 54Dit deed Jesus wada aus daut tweede Tieekjen, aus hee ut Judäa no Galiläa jekomen wia.
अहिले सेलेक्ट गरिएको:
Johanes 4: PBJHF
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© SW-Radio e.V.
