Johanes 2
2
De Kjast en Kana
1Aum dredden Dach wia enne Kjast en Kana en Galiläa; un Jesus siene Mutta wia uk doa. 2Doa wieren oba uk Jesus met siene Jinja to Kjast enjeloden. 3Un aus doa de Wien aula wia, säd Jesus siene Mutta to am: Dee ha kjeenen Wien. 4Jesus säd to ar: Waut ha ekj met die to doonen, Fru? Miene Stund es noch nich jekomen. 5Siene Mutta sajcht to de Deena: Wautemma hee junt sajen woat, daut doot.
6Doa wieren oba 6 steenane Wotakrucken oppjestalt, no de judsche Reinjungsväaschreften, wuavon eene jiedre twee ooda dree Mot nenn kunnen. 7Jesus säd to an: Felt de Krucken met Wota. Un see felden dee bot bowen. 8Un hee säd to an: Nu schapt en brinjt daut däm Kjäakjenmeista. Un see brochten (deeden) daut. 9Aus oba de Kjäakjenmeista daut Wota jeschmakjt haud, daut Wien jeworden wia, (un hee wist nich, wuahäa dee wia (es), de Deena oba, dee daut Wota jeschapt hauden, wisten daut), roopt de Kjäakjenmeista dän Briegaum 10un säd to am: Jiedra Mensch sat ieescht däm gooden Wien väa, un wan see bedrunken jeworden sent, ieescht dan dän biljen; du hast dän gooden Wien bot nu oppbewoat. 11Dit wia de Aunfank von Wundatieekjen dee Jesus muak en Kana en Galiläa un openboad siene Harlichkjeit, un siene Jinja jleewden aun am.
12No däm jinkj hee rauf no Kapernaum, hee un siene Mutta un siene Breeda un siene Jinja, un doa bleewen see een poa (weinje) Doag.
Jesus reinicht dän Tempel
13Un de Juden äa Passafast wia dichtbie, un Jesus jinkj nopp no Jerusalem. 14Un hee funk em Tempel {Mat.4,5} dee Ossen un Schop un Duwen vekoften, uk de Jeltwakjsla doa setten. 15Un hee muak eene Pitsch von Strenj un juach dee aula utem Tempel rut, soo aus de Schop un uk de Ossen; un daut Jelt de Wakjsla schedd hee ut, un schmeet äare Descha om; 16un to de Duwenhendla säd hee: Nämt dise von hia wajch, moakt nich mien Voda sien Hus to eenem Haundelshus. 17Siene Jinja [oba] dochten doaraun, daut jeschräwen steit: «De Iewa om dien Hus haft mie vetäat». {Ps.69,10}
18De Juden auntwuaden un säden to am: Waut fa een Tieekjen wiest du ons, daut du dise Dinj deist? 19Jesus auntwuad un säd to an: Bräakjt disem Tempel dol (auf), un en dree Doag woa ekj däm opprechten (oppbuen). 20Doa säden de Juden: 46 Joa wort aun disem Tempel jebut, un du west däm en dree Doag opprechten? 21Hee oba räd von sien Lief aus een Tempel. 22Aus hee donn utem Doot oppjestonen wia, dochten siene Jinja doaraun, daut hee dit jesajcht haud, un see jleewden de Schreft un däm Wuat, daut Jesus jesajcht haud.
23Oba aus hee en Jerusalem wia, oppem Passafast, jleewden väle aun sienen Nomen, aus see siene Tieekjen sagen, dee hee deed. 24Oba Jesus selfst vetrud sikj an nich aun, wiels hee aula kjand 25un nich needich haud, daut irjentwäa Zeichnis von däm Mensch jeef; dan hee wist selfst, waut em Mensch wia.
अहिले सेलेक्ट गरिएको:
Johanes 2: PBJHF
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© SW-Radio e.V.
