भजनसंग्रह 144:1-7

मेरो रक्षक, परमप्रभुको प्रशंसा गर! उहाँले मलाई लडाइँको लागि तालिम दिनुहुन्‍छ र युद्धको लागि मलाई तयार पार्नुहुन्‍छ। उहाँ मेरो रक्षक र बचाउनुहुने, मेरो आश्रय र मुक्तिदाता हुनुहुन्‍छ र आफ्‍नो रक्षाको लागि म उहाँमाथि भरोसा राख्‍दछु। उहाँले जाति-जातिहरूलाई दमन गरेर मेरो अधीनमा गराउनुहुन्‍छ। हे परमप्रभु, मानिस को हो र तपाईंले त्यसको वास्ता गर्नुहुन्‍छ? मरणशील मानिसलाई किन ध्‍यान दिनुहुन्‍छ? ऊ एक मुट्ठी सासझैँ छ, उसको आयु हटिजाने छायाँजस्‍तो छ। हे परमप्रभु, आकाश फारेर तपाईं ओर्लनुहोस्, पर्वतहरूलाई छुनुहोस् र तिनीहरूले धुवाँ निकाल्‍नेछन्। बिजुली चम्‍काउनुहोस् र आफ्‍ना शत्रुहरूलाई छिन्‍न-भिन्‍न पार्नुहोस्; काँड हानेर तिनीहरूलाई धपाउनुहोस्। माथिबाट ओर्लनुहोस्, गहिरा पानीबाट तानेर मलाई निकाल्‍नुहोस् र मलाई बचाउनुहोस्; विदेशीहरूको शक्तिबाट मलाई छुटकारा दिनुहोस्।