भजनसंग्रह 106:43-48

धेरै चोटि परमप्रभुले आफ्‍ना प्रजाको उद्धार गर्नुभयो, तर तिनीहरूले उहाँप्रति विद्रोह गर्न नै रोजे र पापमा गहिरोसित डुबिगए। तरै पनि जब तिनीहरूले पुकारे, परमप्रभुले सुन्‍नुभयो र तिनीहरूका दु:ख-कष्‍टलाई हेर्नुभयो। तिनीहरूको खातिर उहाँले आफ्‍ना करार याद गर्नुभयो र आफ्‍ना महान् प्रेमको कारणले तिनीहरूप्रति कोमल हुनुभयो। तिनीहरूलाई सताउनेहरू सबैलाई उहाँले तिनीहरूलाई टिठ्याउने तुल्‍याउनुभयो। हे परमप्रभु, हाम्रा परमेश्‍वर, हामीलाई बचाउनुहोस् र जाति-जातिका बीचबाट हामीलाई फर्काई ल्‍याउनुहोस्, तब हामी धन्‍यवादी हुनेछौं र तपाईंको पवित्र नामको प्रशंसा गर्नेछौं। परमप्रभु इस्राएलका परमेश्‍वरको प्रशंसा गर, अहिले र सदासर्वदा उहाँको प्रशंसा गर। प्रत्‍येकले भनोस्, “आमेन।”