एस्‍तर 5:1-8

उपवास राखेको तेस्रो दिन एस्‍तरले आफ्‍ना राजसी वस्‍त्र लगाइन् र गएर महलको भित्री चोकमा सिंहासन राखेको कोठातिर हेरेर उभिइन्। राजा कोठाभित्र ढोकातिर फर्केर सिंहासनमा बसेका थिए। राजाले जब एस्‍तर रानीलाई बाहिर उभिरहेकी देखे, तिनले राजाको निगाह पाइन्। राजाले तिनीतर्फ सुनको राजदण्‍ड पसारे। तिनी अघि सरिन् र राजदण्‍डको टुप्‍पो छोइन्। “रानी एस्‍तर, के कुरा छ?” राजाले सोधे, “के चाहियो, मलाई भन र तिमीले पाउनेछौ। आधा राज्‍य नै भए पनि तिमीलाई दिनेछु।” एस्‍तरले जवाफ दिइन्, “राजाको दया हुन्‍छ भने हजुरको निम्‍ति मैले तयार गरेको भोजमा आज राती हामानसित हजुरको सवारी होस्।” राजाले एस्‍तरका पाहुना भई जानलाई छिट्टै आउनू भनी हामानलाई आज्ञा गरे। राजा र हामान एस्‍तरका भोजमा गए। दाखमद्य पिउँदै गर्दा राजाले तिनलाई सोधे, “तिमी के चाहन्‍छौ, मलाई भन र त्‍यो तिमीले पाउनेछौ। मेरो आधा राज्‍य नै माग्‍यौ भने पनि त्‍यो तिमीलाई दिनेछु।” एस्‍तरले उत्तर दिइन्, “राजाले मेरो बिन्‍ती ग्रहण गर्नुहुन्‍छ भने भोलि फेरि हजुरको निम्‍ति मैले तयार गरेको भोजमा हामानसित हजुरको सवारी होस्। त्‍यही बेला म के चाहन्‍छु, हजुरलाई बिन्‍ती गर्नेछु।”