पलिश्तीहरूले युद्धको निम्ति आफ्नो फौज जम्मा गरे, र यहूदाको सोकोमा भेला भए। उनीहरूले सोको र आजेकाको बीचको एपेस-दम्मीममा छाउनी हाले। शाऊल र इस्राएलीहरू पनि भेला भएर एलाहको बेँसीमा छाउनी हाले। तिनीहरूले पलिश्तीहरूका सामु पङ्क्ति बाँधे। पलिश्तीहरू एउटा डाँड़ामा र इस्राएलीहरू अर्को डाँड़ामा ठाउँ ओगटेर बसे, तिनीहरूका बीचमा एउटा बेँसी थियो।
पलिश्तीहरूको छाउनीबाट गातको गोल्यत नाउँको एक जना वीर निस्केर आयो। त्यो तीन मिटरभन्दा अल्गो थियो। त्यसको शिरमा काँसाको टोप थियो, र साठी किलो ओजन भएको काँसाको झिलम त्यसले लगाएको थियो। त्यसका खुट्टामा काँसाका झिलम थिए, र त्यसका हतियारहरूमध्ये एउटाचाहिँ काँसाको बर्छा ढाड़मा त्यसले बोक्यो। त्यसको भालाको लट्ठी कपड़ा बुन्ने जुलाहाको डन्डाजत्रो थियो, र भालाको टुप्पा, जो फलामको थियो, त्यसको ओजन सात किलो थियो। त्यसको ढाल बोक्ने त्यसको अगिअगि हिँड्थ्यो।
गोल्यत खड़ा भयो र इस्राएलको फौजलाई भन्यो, “तिमीहरू किन लड़ाइँ गर्नलाई आउँछौ? म पलिश्ती हुँ। के तिमीहरू शाऊलका सेवक होइनौ? मसँग लड्नलाई तिमीहरूको मानिस चुन। यदि एकलै लड़ेर त्यसले मलाई मार्न सक्यो भने हामी तिमीहरूका कमारा हुनेछौं। तर यदि मैले त्यसलाई जितेर मारें भने तिमीहरूले हाम्रा कमारा भएर हाम्रो सेवा गर्नुपर्नेछ। तब त्यस पलिश्तीले भन्यो, “आजको दिन म इस्राएलको फौजलाई तुच्छ गन्छु। एक जना मानिस पठाओ, र हामी लड़ौं।” जब शाऊल र इस्राएलीहरूले त्यस पलिश्तीले भनेको कुरा सुने तब तिनीहरू आत्तिए, र साह्रै खिन्न भए।
अब दाऊद यिशै भन्ने एप्रातीका छोरा थिए, जो यहूदाको बेथलेहेमका थिए। यिशैका आठ भाइ छोराहरू थिए। शाऊलको पालोमा तिनी कमजोर र वृद्ध भइसकेका थिए। तिनका जेठा, माहिला र साहिँला छोराहरूचाहिँ युद्धमा शाऊलको पछि लागेका थिए। जेठा एलीआब, माहिला अबीनादाब र साहिँला शम्मा थिए। दाऊदचाहिँ कान्छा थिए। ती पहिला तीन युवकहरू शाऊलको पछि लागेका थिए, तर त्यस बेला दाऊद शाऊलको छाउनी र बेथलेहेममा आफ्ना पिताका भेड़ाको हेरचाह गर्नलाई आउने-जाने गर्थे।
त्यो पलिश्ती बिहान र बेलुकी चालीस दिनसम्म अगि आएर आफ्नो नियत स्थानमा खड़ा हुन्थ्यो।
एक दिन यिशैले आफ्ना छोरा दाऊदलाई भने, “तिम्रा दाजुहरूका लागि यो पाँच पाथी चिउरा र यी दश वटा रोटी लिएर चाँड़ो तिनीहरूको छाउनीमा जाऊ। यी दश वटा पनीरचाहिँ तिमीले सहस्रपतिको निम्ति लैजाऊ। तिम्रा दाजुहरू कुशलै छन् कि छैनन् हेर, र तिनीहरूबाट केही आश्वासन लिएर आऊ। तिनीहरू शाऊल र इस्राएलका सबै मानिसहरूसित एलाहको बेँसीमा पलिश्तीहरूका विरुद्धमा युद्ध गर्दैछन्।”
भोलिपल्ट बिहानै दाऊदले भेड़ाहरू कसैको हेरचाहमा छोड़ेर यिशैले अह्राएअनुसार आफ्नो काममा हिँड़े। सेना युद्ध-ध्वनि लगाउँदै आ-आफ्नो स्थान लिइरहेको बेलामा तिनी छाउनीमा पुगे। इस्राएलीहरू र पलिश्तीहरूले एक-अर्काको सामुन्ने पङ्क्ति बाँधिरहेका थिए। सामान राख्नेको जिम्मामा आफ्नो सामान दिएर पङ्क्ति बाँधेको ठाउँमा दाऊद कुदेर गए र दाजुहरूलाई ढोग गरे। जब दाऊद तिनीहरूसँग कुरा गरिरहेका थिए, तब गातको त्यो पलिश्ती वीर गोल्यत आफ्नो फौजदेखि बाहिर निस्केर अघिझैँ हाँक दिन लाग्यो। अनि त्यसले भनेको कुरा दाऊदले सुने।
जब इस्राएलीहरूले त्यस मानिसलाई देखे, तब तिनीहरू ठूलो डरले भागे। तिनीहरूले भने, “हेर त, यो मानिस दिनैपिच्छे आएर इस्राएललाई धम्की दिन्छ। त्यसलाई मार्ने मानिसलाई राजाले प्रचुर इनाम दिनुहुनेछ, आफ्नी छोरी पनि त्यससँग विवाह गरिदिनुहुनेछ अनि त्यसको घरानालाई इस्राएलमा अनिवार्य करबाट मुक्त गरिदिनुहुनेछ।”
दाऊदले छेउछाउका मानिसहरूतिर फर्केर भने, “यस पलिश्तीलाई मार्ने र इस्राएलको अपमान हटाउने मानिसलाई के गरिदिने त? जीवित परमेश्वरको सेनालाई तुच्छ भन्ने त्यो खतना नभएको पलिश्तीचाहिँ को हो र?”
त्यसलाई मार्ने मानिसलाई के गरिनेछ भनी मानिसहरूले दाऊदलाई दोहोर्याएर बताए।
मानिसहरूसँग दाऊद कुरा गरिरहेका तिनका जेठा दाजु एलीआबले सुने, र उनी रीसले चूर भए। उनले दाऊदलाई यसो भनेर सोधे, “तँ यहाँ के गरिरहेछस्? वनमा भएका ती अलिकता भेड़ाहरू हेर्न तैंले कसलाई जिम्मा दिएर आइस्? म तँलाई चिन्दछु, घमण्डी र दुष्ट हृदय भएको। तँ लड़ाइँ हेर्नलाई मात्र आएको होस्!”
दाऊदले भने “मैले अहिले के गरेको छु र? मैले बोल्नु पनि नहुने?” उनीबाट एकातिर लागेर तिनी मानिसहरूकहाँ गए, र त्यही प्रश्न दोहोर्याए, र सबैले तिनलाई त्यही जवाफ दिए। दाऊदले भनेको कुरा अरूहरूका कानमा पुग्यो, र त्यो कुरा शाऊलकहाँ पुर्याइयो, अनि उनले तिनलाई बोलाए।
दाऊदले शाऊललाई भने, “त्यस पलिश्तीको कारण कोही पनि हताश नहोऊन्। म गएर त्यस पलिश्तीसँग लड्नेछु।”
शाऊलले जवाफ दिए, “तिमी गएर त्यस पलिश्तीसँग लड्न सक्नेछैनौ। तिमी त ठिटा मात्र छौ, र त्योचाहिँ जीवनभरि नै लड़ाइँ गर्दैआएको छ।”
तर दाऊदले शाऊललाई भने, “हजूर, म मेरा पिताका भेड़ाहरूको हेरचाह गर्दैआएको छु। जब सिंह अथवा भालूले आएर बगालबाट भेड़ा बोकेर लैजान्थ्यो, तब म त्यसको पछि गई त्यसलाई आक्रमण गरेर त्यसको मुखबाट त्यस शिकारलाई छुटाउँथे। यदि मलाई आक्रमण गर्नलाई त्यो फर्क्यो भने म त्यसको रौँ समातेर कुटी-कुटी त्यसलाई मार्थें। मैले सिंह र भालू दुवैलाई मारेको छु। यस बेखतनाको पलिश्तीको दशा तिनीहरूकोभन्दा असल हुनेछैन, किनकि त्यसले जीवित परमेश्वरको सेनालाई विरोध गरेको छ। सिंह र भालूदेखि बचाउनुहुने परमप्रभुले यस पलिश्तीको हातदेखि पनि मलाई बचाउनुहुनेछ।”
शाऊलले भने, “त्यसो भए जाऊ, र परमप्रभु तिमीसँग होऊन्।”
बाइबल एप
बाल बाइबल एप
