LUCAS 13
13
Diospajman na tigrarishpaca chingagringuichimi nishcami
1Chai punllacunami, huaquin runacunata Jesuspajman shamushpaca, Galilea llactamanda runacuna Diosman animalcunata huañuchishpa rupachinajujpi, Pilato imashna huañuchichun cachashcata villajurcami.
2Shina villajpimi Jesusca: “Cangunaca, chai Galilea llactamanda runacunaca, ashtahuan yali juchayuj cashpami chashna huañuchi tucushcanga, ¿yanguichichu? 3Cangunataca cashnami nini: Napacha chashnachu. Ashtahuangarin, cangunapash tucuicunallata na llaquirishpa Diospajman tigrarishpaca, huañunguichimi. 4Shinallata, Siloé jatun torre shitarishpa llapijpi, chunga pusaj huañushcacunaca, Jerusalenbi causajcunata yali ashtahuan juchayuj cashpami huañuchi tucushcanga, ¿yanguichichu? 5Cangunataca cashnami nini: Napacha chashnachu. Ashtahuangarin, ninanda llaquirishpa Diospajman na tigrarishpaca, tucuicunami paicunashnallata huañunguichi” nircami.
Na fucuj higo yuramanda
6Cashnahuambash yarichishpami yachachijurca: “Shuj runaca paipaj alpapica higo tarpushcatami charirca. Ashtahuangarin, chai yurapi fucushcata pallangapa rishpaca, imatapash na tarircachu. 7Shinamandami, tarpuj runataca cashna nirca: ‘Quimsa huatata, cai yuramanda pallangapa shamujushpapash nimatapash na tarinichu, cuchushpa shitailla, yangallatami, alpata huaglichijun’ nircami. 8Shina nijpimi, tarpuj runaca cashna nirca: ‘Cunan huatagutaca saquipaira, taitalla. Chai yura muyundita allashpa, huanuguta churapasha. 9Shina rurajpica, aliguta fucungapashchari. Na fucujpica, cuchupanguilla’ nishpami tigrachirca” nircami.
Samana punllapimi Jesusca, huañujuj huarmita alichishca
10Samana punllapimi Jesusca, sinagogapi yachachijurca. 11Chaipica, ña chunga pusaj huatata huañujujlla huarmimi tiyajurca. Chai huarmica, aya jundashpa curcuyachishca cajpimi, imashna ali shayaritaca na usharca. 12Chaita ricushpami Jesusca, chai huarmita cayashpa cashna nirca:
“Ñami chai ungüitaca anchuchi tucushcangui” nirca.
13Shina nishpami Jesusca, chai huarmipaj umapi maquita churarca. Shina churanhuan ali shayarishpami, Taita Diostaca ninanda alicachijurca. 14Samana punllapi Jesús chashna alichijpimi, sinagogapi mandaj runaca, ninandapacha fiñashpa gentecunataca cashna nijurca:
“Imata rurangapapash, sucta punllatami charinchi. Chai punllacunapimi, alichihuai ningapaca shamuna canguichi. Samana punllapica, na shamunachu canguichi” nircami.
15Shina nijpimi Apunchi Jesusca, cashna nijurca:
“Mishqui shimi, jayaj shungu. Cangunaca samana punlla cajpipash, maijan cashpapash, ¿nachu huagrata cashpapash, burruta cashpapash corralmanda cacharishpa, yacuta ufiachingapa ringuichi? 16Cai huarmica, Abrahammanda mirai ushigumi. Ña chunga pusaj huatatami Satanasca huatashca charijurca. Samana punlla cajpipash, ¿nachu paitaca huatashca charijujmanda cacharichina carcani?” nircami.
17Jesús chashna nijpimi, Paita na ricunayachij runacunaca, tucuilla pingai tucurca. Ashtahuangarin tucuilla gentecunami, chashna juyailla rurajta ricushpaca ninanda cushijunajurca.
Mostaza muyumanda yarichishpami yachachishca
(Mat. 13:31-32; Mar. 4:30-32)
18Jesusca cashnami nirca: “Taita Dios mandajuj llactaca, ¿imaman rijchajta canga? ¿Imahuan chimbapurashpata yachachisha? 19Dios mandajujca, shuj runa paipaj alpapi mostaza muyuta tarpushcashnami. Chai muyu viñashpa jatun quiru tucujpimi, alasyu animalcunaca malquicunapi tazinda rurashpa causanajun” nircami.
Levadurahuan yarichishpa yachachishcamanda
(Mat. 13:33)
20Jesusca cashnatapashmi nirca: “Taita Dios mandajuj llactataca, ¿imahuanda chimbapurasha? 21Dios mandajujca, quimsa batea junda jacupi shuj huarmi levadurata chapushpa, tucuilla masa punguingacaman pacashpa churashcashnami” nijurcami.
Quichiji punguta yaicunatami Jesusca yachachishca
(Mat. 7:13-14,21-23)
22Jerusalenman Jesús rijushpaca, pueblocunapipash, uchilla llactacunapipash, yachachishpandimi rijurca. 23Paita shuj runa tapushpaca:
“¿Apunchi Jesús, huaquingunallachu quishpiri ushanga imashi?” nircami.
Shina nijpimi Jesusca cashna nirca:
24“Quichiji punguta yaicungapaca, shinlli tucunami canguichi. Cangunataca cashnami nini: Ashtacacunami chaiman yaicungapa munashpapash, na ushanajun. 25Huasiyuj runa punguta vichashca jipami canguna: ‘Mingachihuai taita, punguta pascapai’ nishpa caparinajunguichi. Ashtahuangarin huasiyuj taitaca: ‘Cangunaca maimandachari canguichipash’ ningami. 26Shina nijpimi cangunaca, cashna ni callaringuichi: ‘Canhuanmi micushpa, ufiashpa tiyanajun carcanchi. Ñucanchi plazacunapimi, canga yachachishpa purircangui’ ninguichimi. 27Ashtahuangarin Paica cashnami ninga: ‘Cangunataca, maimanda cajtapash na rijsinichu nijunica. Tucuillamari na alita rurajcuna canguichi, Ñuca ñaupamanda anchurichi’ ningami. 28Abrahambash, Isaacpash, Jacobpash, tucui profetacunapash, Taita Dios mandajuj llactapi cajta ricushpa, cangunaca na chaiman cayachi tucushcata yachashpami, ninanda llaquirishpa, quirutapash canirinajunguichi. 29Indi llujshimujmanda, indi huashajunmandapash, janajmanda, uramandapashmi gentecunaca, Taita Dios mandajuj llactapi micungapa tandanajunga. 30Ricuichi, huashaman churai tucushcacunaca, pundapimi churai tucunga. Shinallata, pundapi churai tucushcacunaca, huashamanmi churai tucunga” nijurcami.
Jerusalenbi causajcunata llaquishpami, Jesusca huacashca
(Mat. 23:37-39)
31Chai punllallatami, huaquin fariseocuna shamushpa, Jesustaca cashna ninajurca:
“Herodesca, Canda huañuchingapami munajun. Caimandaca llujshishpa ucha rilla” ninajurcami.
32Ashtahuangarin Jesusca, paicunataca cashnami nijurca:
“Richi, atujshna causaj chai runaman cashna nishpa villagrichi: ‘Cunambash, cayapash gentecunamanda ayacunata llujchishpa, huañujujcunatapash alichijusharami. Quimsa punllapimi, Ñuca imata ruranatapash tucuchisha nijunmi’ nigrichi. 33Ashtahuangarin cunambash, cayapash, cayandipash, cai ñandaca catishpa rijunallami cani. Profetaca, Jerusalenmanda llujshishpa shuj llactacunapica na huañungachu. 34¡Jerusalén, Jerusalén! ¡Canga, profetacunata huañuchijmari cangui! ¡Canman villachun Dios cachamushca runacunatapash, rumicunahuan huañuchijmari cangui! ¡Shuj atalpa, paipaj huahua pollocunata ugllajshnami, cangunataca cutin cutin tandachingapa munarcani! Ashtahuangarin cangunami na munarcanguichi. 35Ricuichi, cangunapaj huasica jichushcamari. Candaca cashnami nini: ‘Jatun Diospaj shutipi shamujujca, ninanda alicachi tucushca cachun’ nina punllacuna chayamungacamanmi, Ñucataca na ricuhuanguichi” nircami.
လက်ရှိရွေးချယ်ထားမှု
LUCAS 13: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
