LUCAS 14
14
Punguishca huañujuj runatami Jesusca alichishca
1Samana punllapimi cashna tucurca: Mandaj fariseo runapaj huasipimi Jesusca micungapa yaicurca. Chaipimi paicunaca, Jesús imata rurajta pacalla ricurianajurca. 2Chaipica, punguishpa huañujuj runagumi Jesuspaj ñaupajpi tiyajurca. 3Jesusca, mandashca shimita yachachijcunata, fariseocunatapashmi cashna nirca:
“Samana punlla cajpipash huañujujtaca, ¿nachu alichinalla canga?” nircami.
4Ashtahuangarin paicunaca, upalla tiyanajurcallami. Jesusca chai huañujuj runagutaca, maquimanda japishpa alichishpami, cayacaman nishpa cacharca. 5Chai fariseocunata ricushpami cashna nirca:
“Cangunapaj burru cashpa, huagra cashpa, pugyupi huashajujpica. Cangunaca, samana punlla cajpipash, ¿nachu, ucha llujchingapa ringuichiman?” nircami.
6Shina nijpica, imatapash na tigrachi usharcachu.
Cazarai bodaman cayai tucushcamanda
7Micuiman cayajpi shamuj runacunaca, ñaupajpi tiyaringapa mascanajujta ricushpami Jesusca, cashna yarichishpa yachachijurca:
8“Cazarai micuicunaman maijambash cayajpi rishpaca, ama ñaupapi ashtahuan ali tiyarinapi tiyaringuichichu. pactara candapash yali alicachi tucushca runatara cayashca canman. 9Ishcandita shamupaichi nishpa cayaj huasiyuj shamushpara: ‘Pai tiyarichun, caimanda anchuripai’ ninman. Shina nijpira, pingai tucushpa, huashaman tiyaringapa ringuiman. 10Ashtahuangarin, chai micuiman cayajpi rishpaca, huashaman tiyaringui. Chaipi tiyajujta huasiyuj runa ricushpami: ‘Caiguman tiyarij shamupai cumbagu’ nishpa pushanga. Shina tiyachijpimi, canhuan micushpa tiyajcunaca, alicachishpa ricunga. 11Maijambash jatun tucushpa causajcunaca pingaichi tucungami. Ashtahuangarin, na jatun tucushpa causajcunami jatunyachi tucunga” nircami.
12Micuiman cayaj runatapash cashnami nijurca:
“Ima micuita rurashpapash, chishi micuita rurashpapash, cambaj cumbacunata, cambaj huauquicunata, cambaj ayllucunata, muyundi causaj charijcunataca na cayanachu cangui. Paicunaca, micuita rurashpa, canda cayashpami can carashcataca cutin tigrachinga. 13Ashtahuangarin jatun micuita rurajushpaca, imagutapash na charijcunata, maqui illajcunata, jangacunata, ñausacunatami cayana cangui. 14Shina rurashpaca, ninandami cushijungui. Paicunaca, canman na tigrachi ushangachu. Shina cajpipash, can carashcamandaca, alitalla rurajcuna causarina punllapimi japingui” nircami.
Chishi jatun micuimanda yarichishpami yachachishca
15Cashna yachachijunda uyashpami, Jesushuan chaipi micushpa tiyanajuncunamanda shuj runaca, cashna nirca:
“Taita Dios mandajuj llactapi micungapa rijcunaca, ninandapachami cushijunga” nircami.
16Shina nijpimi Jesusca cashna nirca:
“Shuj runaca, chishi jatun micuita rurajushpami ashtacacunata cayachirca. 17Ña chishi micuna chayajpimi paipajta rurajtaca: ‘Ña tucuita alichishcallami, micungapa shamupaichilla’ nichun cacharca. 18Shina nishpa cayajpimi, tucuicuna caita chaita ninajurca. Shuj runaca cashnami nirca: Shuj jatun alpatami randiparcani. Chaita ricungapa rinami cani. Na shamui ushapanichu nirca. 19Shuj runapash cashnami nirca: Picha yunta huagratami randircani. Chaicunahuan yapushpa ricugrijunirami. Chaimandami: Na shamui ushapani, nircami. 20Cutin shuj runaca cashnami nirca: Chairallami cazararcani. Chaimandami: Na shamui ushapani nirca. 21Chashna nijpi, chai runa tigrashpami, paita mandajman tucuita villarca. Chaimandami, huasiyuj taitaca ninanda fiñarishpa, paipajta rurajtaca, cashna nirca: ‘Shina cashpaca cunanga, ñangunaman, plazacunaman rishpa, imagutapash na charijcunata, maqui illajcunata, jangacunata, ñausacunata ucha pushamugripai’ nirca. 22Shinallata, chai runaca: ‘Ñucata mandaj, can mandashcashna ñami pushamuni, shinapash ucupica nara jundanllu’ nircami. 23Shina nijpimi mandajca, paipajta ruraj runataca, cashna nirca: ‘Ñangunata, pirca huashacunata rishpa, cai ñuca huasipi jundamuchunga, munai na munai pushamugrilla’ nircami. 24Cangunataca cashnami nini: ‘Pundata Ñuca cayashca runacunaca, cai micunataca napacha micungachu’” nircami.
Cristota catijpica fiñanamanda
(Mat. 10:37-38)
25Ashtaca gentecuna Jesushuan pacta rinajujpimi, Paica tigrarishpa cashna nirca:
26“Maijan cashpapash Ñucata catingapa munashpaca, paipaj taitata, mamata, paipaj huarmita, huahuacunata, paipaj huauquicunata, panicunata, paipaj causaitapash na Ñucata yali llaquishpallami, Ñucapaj yachajuj tucui ushanga. 27Maijan cashpapash, paipaj cruzta aparijshna Ñucata na catishpaca, napacha Ñucapaj yachajuj cai ushangachu. 28Cangunapuramanda maijambash jatun huasita rurangapa munashpaca, tucuchingacaman pactana, na pactanatapash, ¿nachu chaitara ricunguichiman? 29Yangata huasichi callarishpa, ashata callarishcalla na tucurishca shayajujta ricushpami tucuicuna, chai runataca asishpa ricunajunga. 30Shina asishpami: ‘Cai runaca, huasichingapa callarishpapash, na tucuchi ushashpami saquishca’ ninajunga. 31Shinallata, chunga huaranga macanajuj runacunata jatun mandajca, ishcai chunga huaranga macanajuj runacunapaj jatun mandajhuan macanajungapa rina cashpaca, ¿nachu aliguta yaringapara tiyarinman? 32Na macanajui usharina cajpica, caishuj mandaj carupi cajpillatami, imashnallapash ali tucupashun nigrichun, jatun mandajpaj randi rimajcunata cachanman. 33Chashnallatami maijambash cangunapuramanda imata charishcata na saquishpaca, Ñucapaj yachajuj caitaca napacha ushanguichi.
Cachi amindayashpaca, imapapash na alichu nishcami
(Mat. 5:13; Mar. 9:50)
34Cachica alimi. Ashtahuangarin cachi amindayashca cajpica, ¿imahuanshi mishquichinga? 35Aminda cajpica, alpapi shitangapapash, huanuta tandachishcapi churangapapash na alichu. Canllapimi yanga shitanga. Uyangapa rinrita charishpaca, aliguta uyaichi” nircami.
လက်ရှိရွေးချယ်ထားမှု
LUCAS 14: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
