LUCAS 12
12
Fariseocuna yachachishcacunaca levadurashnami nishcami
(Mat. 16:5-12; Mar. 8:14-21)
1Chashna nijujhuanmi, huaranga huaranga gentecuna tandanajushpa, caishuj chaishuj saruripi jundamurca. Jesusca, Paipaj yachajujcunamanmi cashna nishpa villai callarirca: “Fariseocunapaj, punguichij levadurashna, mishqui shimi, jayaj shungu canamandaca anchurinami canguichi. 2Imata pacalla rurashcapash ricuringapachami. Na yachai ushanalla ima pacallapash na tiyanllu. 3Shina cashcamandami, yana tutapi canguna tucuita parlashcataca, punllapi parlanajunga. Shinallata, huasi ucucunapi rinripilla ima parlashcatapash, tucuicuna uyachunmi huasi jahuapi shayarishpa villanajunga.
¿Pitata manllana canchi?
(Mat. 10:26-31)
4Ñuca juyashca cumbacuna, ashtahuangarin cangunataca cashnami nini: ‘Cangunapaj cuerpota huañuchijcunataca na manllanachu canguichi. Huañuchishca jipaca, ashtahuan imata ruraitapash na ushanllu. 5Shina cajpipash, canguna pita manllana cashcatami yachachigrini. Causaita quichushca jipa, ucu pachaman cachaita ushaj Diostami manllana canguichi. Ari, Paitallami manllana canguichi’ ninimi. 6¿Nachu alasyuj uchilla picha animalcunataca, ishcai uchilla culquipajlla jatunajun? Shina jatujpipash chaicunataca, shujllatapash Taita Diosca na cunganllu. 7Paica, cangunapaj umapi mashna ajcha tiyajtapash, tucuitami yupashca charin. Chaimandami runacunataca, na manllana canguichi. Cangunacarin, chai ashtaca alasyuj animalcunatapash ashtahuan yalimi canguichi.
Ñucamanda villanataca na pinganayachinachu canguichi nishcamanda
8Cangunataca cashnami nini: ‘Maijambash, shuj gentecunapaj ñaupajpi Ñucata catij cashcata villajpica, Runa Aichayuj tucushca Ñucapash, Taita Diospaj angelcunapaj ñaupajpimi, cangunataca Ñucata catijcunami’ nisha. 9Ashtahuangarin gentecunapaj ñaupajpi: ‘Na Paipajchu cani’ nijpica, Ñucapash, Taita Diospaj angelcunapaj ñaupajpica: ‘Paica na ñucapajchu’ nishami. 10Maijan cashpapash, Runa Aichayuj tucushca Ñucata na alicachishpa rimashcataca, Diosca perdonangami. Ashtahuangarin, Jucha Illaj Diospaj Espirituta na alicachishpa rimajtaca, napacha perdonangachu. 11Sinagogacunaman, juezcunapaj ñaupajman, mandajcunapaj ñaupajman, apajpica: ‘¿Imatashi tigrachisha, imatashi nisha?’ yashpaca, na manllanachu canguichi. 12Canguna imaguta rimachumbash, Jucha Illaj Diospaj Espiritumi, cangunataca ñapash yarichinga” nircami.
Ninan charij, juizu illaj runamanda
13Chai ashtacacunamanda shuj runami, Jesusta cashna nirca:
“Yachachij, ñuca huauquita herenciata chaupishpa cui nipai” nirca.
14Shina nijpimi Jesusca cashna nirca:
“¿Pita Ñucataca cangunapaj juez cachun, cangunaman chaupishpa cuchun churahuashca?” nircami.
15Cashnatapashmi nirca:
“Ricuichi, charijyanatalla munashpaca na causanachu canguichi. Imata ninanda charishpapash, chaihuan unaita causajuitaca na ushangachu” nircami.
16Cashnatapashmi yarichishpa yachachijurca: “Shuj ninan charij runapaj alpacunapica, ninandami granocunaca fucujurca. 17Shina fucujpimi chai runaca: ‘¿Imatata rurashayari? chai tucui granocunataca maipi alichitapash, na ushanachu cani’ yajurca. 18Shina cajpimi cashna yajurca: ‘Cunanga cashna rurasha: Granocunata alichina uchilla huasicunataca shitashpa, ashtahuan jatun huasicunata huasichishpa, granocunatapash, imata charishcatapash chaipi alichisha’. 19Shina rurashpaca, ñuca almataca cashna nisha: ‘Ñuca almalla, mashna huatacamanbash micushpa causangapa, ashtacatami alichishca charini. Cunanga samajushalla, ninanda micushpa, ufiashpa, ninanda cushijushpa causashalla’ nirijurcami. 20Ashtahuangarin Taita Diosca, chai runataca cashnami nirca: ‘Juizu illaj runa, cunan tutallatami cambaj almataca mañangapa shamunga. Can imata charishcatapash, ¿pimanshi saquingui?’ nircami. 21Imatapash ashtahuan charingapa munashpa, paipajlla tandachij runaca chashnami tucunga. Charij cashpapash, Taita Diospaj ñaupajpica imapash illajmi ricurin” nircami.
Imatapash ninanda munashpa na musparinachu canguichi, nishcamanda
(Mat. 6:25-34)
22Chai jipallami, Paipaj yachajujcunataca cashna nirca: “Cangunataca cashnami nini: ‘¿Imatata micusha, imatata churajusha?’ nishpaca cangunapaj causaimandaca na musparinachu canguichi. 23Cangunapaj causaica, micunatapash ashtahuan yali aligumi. Shinallata cuerpopash, churajunataca ashtahuan yali aligumi. 24Urpicunata ricushpami, caita yarina canguichi: Paicunaca na tarpunajunllu, granotapash na tandachinajunllu. Granocunata alichingapa shuj huasitapash na charinllu. Paicuna micuchunga, Taita Diosmi caramujun. ¿Nachu cangunaca, chai urpicunatapash yali canguichi? 25Cangunapuramanda maijambash ashtahuan jatunyangapa munanajushpapash, ¿maijanshi shuj codotallapash mirachita ushanguichi? 26Chaitallapash na ushashpaca, ¿imashpata ashtahuan munashpa musparinajunguichi? 27Lirio sisacuna imashna viñajta ricushpami yarina canguichi: Chai sisacunaca, na imatapash ruranajunllu, na puchanajunllu. Ashtahuangarin cashnami nini: Salomonga, ninan charij cashpapash, chai shuj sisagushna punchapambaguta churajuitaca na usharcachu. 28Taita Diosmi, pambapi jihuagutapash juyailla viñachishpa sisachin. Shina cajpipash, cayapaca cuchushpa, hornopi rupachinllami. Jahua shungulla crishpa causajcuna, ¿nachu cangunamangarin ashtahuan caramunga? 29Cangunaca, imatata micusha, imatata ufiasha yashpaca na musparinachu canguichi. Na chaicunatalla yariashpa, llaquilla purinachu canguichi. 30Cai pachapajtalla rurashpa causanajuj gentecunami, tucui chaicunatalla yariashpa causanajun. Ashtahuangarin, cangunapaj Taitaca, cangunapaj ima illajtapash ñami yachan. 31Ashtahuangarin cangunaca, Taita Dios mandajpi causanatami mascana canguichi. Shina cajpimi, tucui imata charichumbash, jahuan jahuan caramunga.
Jahua pachapi charij canamanda
(Mat. 6:19-21)
32Ñuca tandachishca huahuacuna, cangunaca ashalla cashpapash na manllanachu canguichi. Cangunapaj Taitaca, cangunamanmi mandanataca cungapa munashca. 33Ima charishcatapash jatushpa, imagutapash na charijcunaman caraichi. Na tucurinalla muchilacunata ruraichi. Chashnami, Jahua pachapi charij cangapa tucuita rurashpa alichinguichi. Chaipica shuhuacunapash na yaicungachu, polilla jurucunapash na micushpa tucuchingachu. 34Maipi imata charishpapash, shungupica chaita yariajllami puringuichi.
Rijchariajshna shuyajuj runamanda
35Alichirishcalla, michacunatapash japichishcallami chapariyana canguichi. 36Cazarai micuicunamanda paicunata mandaj tigramushpa, cayajpi punguta ñapash pascangapa shuyajuj runacunashnami shuyana canguichi. 37Chashna alichirishcalla shuyanajujta paicunata mandaj japij shamujpica, chai runacunaca ninandami cushijunga. Na llullashpami cashna nini: Paica, paipajta rurajcunata ali chasquishpami, tiyachishpa, micunata paipacha caranga. 38Chaupi tuta cashpa, punllayajujta cashpapash, rijchariyajujta paicunata mandaj japij shamujpimi, chai runacunaca ninanda cushijunga. 39Ashtahuan cashnatapash yarichi: Shuhua shamunata huasiyuj yachashpaca, paipaj huasita utujushpa ama shuhuachunmi rijchariaj pacarinman. 40Shinallatami cangunapash, alichirishcalla shuyana canguichi, Ashtahuangarin, Runa Aichayuj tucushca Ñucapash, cungashcapimi ñapash shamusha” nircami.
Mandajta na cazuj runamanda
(Mat. 24:45-51)
41Chashna villajpimi Pedroca cashna nirca:
“Apunchi Jesús, ¿ñucanchimanllachu chashna yarichishpa yachachijungui, na cashpaca tucuicunamanllu chashna nijungui?” nircami.
42Shina nijpimi Apunchi Jesusca cashna nirca:
“¿Maijanda chai aliguta cazushpa, aliguta yarishpa pactachij mayordomo canga? Paitami ‘Ñuca huasita ricupangui. Micunata carana chayajpica, ñucapajta rurajcunaman carapangui’ nishpami, paita mandajca mingashpa saquin. 43Chashna tucuita rurashpa pactachijujta mandaj japij shamujpimi, chai runaca ninanda cushijunga. 44Na llullashpami cashna nini: Chai runagumanmi, pai imata charishcatapash, tucuilla minganga. 45Ashtahuangarin, chai runaca paipaj shungupica: ‘Ñuca mandajca, na ucha shamunllu’ nijungami. Shina nijushpami, mandajpajta ruraj jaricunatapash, huarmicunatapash macai callaringa. Shinallata, micushpa, ufiashpa, machashpami purijunga. 46Ima punlla, ima pacha shamunatapash na yachashca chashna purijujpillatami, paita mandajca ñapash shamunga. Shina shamushpami, chai runataca ninandapacha llaquichishca jipaca, na cazujcunahuan causachun tandachinga. 47Mandaj imata rurachun munashcata ali yachashpata na pactachij runaca, ninandami asti tucunga. 48Ashtahuangarin, na yachaimanda na alita rurashca cashpaca, ashatallami asti tucunga. Maijanmambash: ‘Ashtacata cushca cashpaca, ashtacatallatami cuhuai’ ninga. ‘Imatapash ashtahuan rurachun mingashca cashpaca, ashtahuan rurashcata ricuchihuai’ ningami.
Jesús yachachishcata uyashpa caita chaita yanajushcamanda
(Mat. 10:34-36)
49Cai pachapi ninata japichingapami shamurcani. Cunanga, ña rupajujpica, ¿imatata ashtahuanga munasha? 50Ninan llaquita apashpami bautizarinara cani, ¡chai punlla pactamunamandami, ninanda llaquirini! 51Cai pachapi causajcuna ¿llaqui illaj causaita charichun shamushca yanguichiman? Cangunataca cashnami nini: Chaita cungapaca, na shamurcanichu. Ashtahuangarin, fiñanajushpa causachunmi shamurcani. 52Cunanmandaca, shuj huasipi causaj pichapuracunaca, shicanyaringami. Quimsacunaca, ishcaipuratami fiñanga. Ishcaicunaca, quimsapuratami fiñanga. 53Taitapash churihuan, churipash taitahuan, mamapash ushihuan, ushipash mamahuan, suegrapash jachunhuan, jachumbash suegrahuan fiñanajushpami shicanyaringa” nircami.
Cunanbi ima tucujujtapash, ¿imashpata na yachanguichi?
(Mat. 16:1-4; Mar. 8:11-13)
54Chai ashtaca gentecunatami cashnatapash nirca: “Cangunaca, indi huashajunmanda fuyu llujshimujta ricushpaca: ‘Ñami tamiagrin’ ninguichimi. Canguna nishcashna tamianllami. 55Shinallata, urata huaira shamujpica: ‘Indishpa cunuchigrinmi’ ninguichimi. Canguna nishcashnallata pactanllami. 56¡Mishqui shimi, jayaj shungucuna! Cangunaca jahua pachata, cai pachata ricushpami, imatapash yachanguichi. Shina cashpapash, cunanbi ima tucujujtaca, ¿imashpata na yachai ushanguichi?
Canda fiñaj runahuanga, ali tucunami cangui nishcamanda
(Mat. 5:25-26)
57¿Imashpata, ali cajtapash, na ali cajtapash cangunallata na ali ricunguichi? 58Mandajpaj ñaupajman pipash canda juchachishpa apajujpica, ñanda rijushpallata paihuanga ali tucunata yarinami cangui. pactarallapash aisashpa juezpajman apajpi, chai juezca chapajman cujpi, paica prezuna huasipi churagrinman. 59Candaca cashnami nini: Prezuna huasimandaca, llujshingapa culquita cungacaman na llujshi ushanguichu” nircami.
လက်ရှိရွေးချယ်ထားမှု
LUCAS 12: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
