LUCAS 11
11
Diosta mañanata, Jesús yachachishcamanda
(Mat. 6:9-15; 7:7-11)
1Jesusca shuj pambapimi Diosta mañangapa rirca. Ña mañaita tucuchishca jipami, Paipaj yachajujcunamanda shujca cashna nirca:
“Apunchi Jesús, Diosta imashna mañanata yachachihuai nipanchimi. Bautizaj Juanbash, paipaj yachajujcunataca, Diosta mañachun yachachijmi carca” nircami.
2Shina nijpimi Jesusca cashna nirca:
“Diosta mañajushpaca, cashnami nina canguichi: ‘Jahua pachapi tiyajuj ñucanchi Taitalla, Cambaj shutiguca jucha illajmi ni tucushca cachun. Can mandanaca ucha chayamushpami ali canman. Imashnami jahua pachapica, Can munashcashna ruranajun, chashnallata cai pachapipash, Can munashcashna ruranajushpami ali canman. 3Punllandi ñucanchi micunagutaca, cunan punllapash carahuailla. 4Ñucanchi ima na alita rurashcata perdonashcashna, ñucanchi ima juchata rurashcatapash perdonahuailla. Juchapi urmachun ama saquihuanguichu. Ima na alita ruranamandapash jarcahuangui’ nishpami mañana canguichi” nircami.
5Shinallata Jesusca, cashnatapashmi nirca: “Cangunapaj huasiman shuj cumba runagu chaupi tuta shamushpami, cashna nijunman: ‘Taitalla quimsa tandaguta mañachihuai. 6Ñucapaj rijsij runagumi, caru llactamanda chaira chayamun. Imaguta caraitapash na ushapanichu’ nijunmanmi. 7Shina nijpica, ucumanda cashna nishpami tigrachinman: ‘Ama fiñachihuaichu. Pungutapash, ña ali vichashcami. Huahuacunapash, ñami ali puñunajun. Canman mañachingapa jataritaca na ushanichu’ nijunmanmi. 8Cangunataca cashnami nini: Mañachingapa na jatarijushpapash, cumba runagu ama yapata fiñachijuchunmi, imata mañashcata cungapa jatarinman. 9Cashnatapashmi nini: Diosta mañaichi, Paica carangallami. Mascaichi, taringuichimi. Punguta huajtachishpa cayaichi, Paica pascangallami. 10Diosta tucui mañajcunaca japingami, mascajpash taringami, punguta huajtachishpapash pascajpi yaicungami. 11¿Maijan taitata cangunapaj huahuacuna: ‘Tandaguta carahuai’ nishpa mañajpica, rumita caranguichiman? Na cashpaca: ‘Pijiguta carahuai’ nijpipash, ¿pijipaj randica culebratara caranguichimanllu? 12Shinallata ‘Lulunguta carahuai’ nijpipash, ¿alacran jurutara caranguichimanllu? 13Cangunaca na alicuna cashpapash, huahuacuna mañajpica, imatapash aligutami caranata yachanguichi. Jahua pachapi cangunapaj Taitacarin, jucha illaj Paipaj Espirituta mañajpica, ¿nachu caranman?” nircami.
Huasi ucupura fiñanajushpaca, paipurallatami tucuringa
(Mat. 12:22-30; Mar. 3:20-27)
14Upaman tigrachishpa charijuj ayatami Jesusca llujchishpa cacharca, Chai aya llujshijhuanmi chai runaguca ñapash rimarca. Chaita ricushpami, gentecunaca ninanda manllarirca. 15Ashtahuangarin huaquingunaca cashnami ninajurca:
“Cai runaca, ayacunata mandaj Beelzebupaj* ushaihuanmi, ayacunataca llujchishpa cachan” ninajurcami.
16Huaquingunaca, juchachingapallami, jahua pachamanda pipash na rurai ushanallacunata rurashpa ricuchi ninajurca.
17Ashtahuangarin Jesusca, paicuna chashna yarinajujta yachashpami cashna nijurca:
“Mandajpura fiñanajushpa shicanyarishpaca, chai llactaca llaquinayaitami tucurinman. Shinallata, huasi ucupuracuna fiñanajushpaca, shicanyarishpami tucurinman. 18Chashnallata, Satanás* mandajuj ayacuna, paicunapura fiñanajushpa shicanyarijpica, ¿paica mandajunmanllachu? ‘Beelzebupaj* ushaihuanmi, ayacunata llujchishpa cachajun’ ninajujpimi cashna nijuni. 19Beelzebupaj ushaihuan ayacunata Ñuca llujchishpa cachajujpica, ¿pipaj ushaihuanda cangunapaj yachajujcunaca, ayacunata llujchishpa cachanajun? Shinamandami, paicunallata cangunapaj juezcuna tucunga. 20Ashtahuangarin, Taita Dios ushaita carajpi, ayacunata Ñuca llujchijushpaca, Taita Dios mandajuj llactapi causana, cangunapajman chayamushcatami ricuchijuni. 21Alipacha alichirishca runa, mandashpa tiyajuna huasita ricujujpica, ima tiyashcapash ali tiyajungallami. 22Shina cajpipash, paitapash ashtahuan yali shinlli runa shamushpa, macashpa yalishpaca, macanajungapa imata charishcatapash, paipaj ima tiyashcatapash quichushpami apanga.
23Maijambash na Ñucahuan cashpaca, Ñucata fiñajmi. Maijambash na Ñucahuan tandachishpaca, calpachitarami calpachin.
Ayata llujchijpipash cutin tigranllami
(Mat. 12:43-45)
24Mapata rurachij aya shuj runamanda llujshishpaca, chaquishca pambacunapi samangapa mascashpa purijushpapash na tarishpami: ‘Ñuca llujshimushca huasimanllata, cutin tigrashalla’ nishpa tigran. 25Shina tigrashpaca, aliguta fichashca, juyailla alichishcatami tarigrin. 26Chashna tarishpaca, chai ayaca paitapash yali ashtahuan millai ayacunata, canchispurata pushangapami rin. Chai ayacunaca, chai runapi yaicushpaca, punda causajushcatapash yali na alimanmi tigrachin” nircami.
Ninan cushijuita charinamanda
27Chashna nishpa Jesús villajujpillatami, shuj huarmica gentecunapaj chaupimanda shinllita caparirca:
“Vijsayuj tucushpa canda ungushpa chuchuchishpa viñachij mamaca ninanda alicachi tucushcami” nijurcami.
28Shina nijpimi Jesusca cashna nirca:
“Taita Diospaj Shimita uyashpa pactachijcunami, ashtahuan ninan cushijuita charinga” nijurcami.
Jatun na ali miraicunaca, imatapash rurashpa ricuchijuchunmi munashca
(Mat. 12:38-42)
29Ashtaca gentecuna tandanajushpa jundamujpimi, Jesusca cashna nirca:
“Cunan miraicunaca, jatun na alicunamari. Chaimandami, pipash na rurai ushanallacunata ricungapa munashpapash, chaicunataca napacha ricunajunga. Jonás imashnami tucurca, chashnatallami ricunga. 30Jonasta imashnami Nínive pueblopi causajcuna ricurca, chashnatallami cunan viñaicunapash Runa Aichayuj tucushca Ñucataca ricuhuanga. 31Alipacha yachaihuan Salomón yachachijujta uyangapaca, urai llactata jatun mandaj huarmimi, caru caru llactamanda shamurca. Chai huarmimi, Dios llaquichijui punllapica, cunan mirai runacunataca: ‘Ninanda llaquichi tucunapachami canguichi’ ningapa jataringa. Ñucami, Salomondapash yali caipi cani. 32Nínive pueblopi causajcunaca, Jonás villajpimi ninanda llaquirishpa Diospajman tigrarirca. Paicunami Dios llaquichijui punllapica, cunan miraicunataca: ‘Ninanda llaquichi tucunapachami canguichi’ ningapa jataringa. Ñucami, Jonastapash yali caipi cani.
Ñavica, cuerpopaj michami nishcamanda
(Mat. 6:22-23)
33Michata japichishpaca, na pipash pacalla cajón ucupica churanllu. Ashtahuangarin, huasi ucuman yaicujcuna ricushpa yaicuchunmi, michata churanapi churan. 34Cuerpopaj michaguca ñavimi. Shinamandami, cambaj ñavi ali cajpica, tucuilla cambaj cuerpopash michashna punchayachijunga. Ashtahuangarin, cambaj ñavi na ali cajpica, cambaj tucuilla cuerpopashmi yana yanapi causajunga. 35Ricui, cambi tiyajuj michagura, yana yanaman tigrashca canman. 36Cambaj tucuilla cuerpopi micha junda cashpaca, imallapash na yanapishna cangachu. Shina cashpami, lamparapi japichishca michashna punchayachi ushangui” nircami.
Mandashca shimita yachachijcunatapash, fariseocunatapashmi Jesusca na alicachishpa rimashca
(Mat. 23:1-36; Mar. 12:38-40; Luc. 20:45-47)
37Jesús ña rimashpa tucuchinhuanmi, shuj fariseo runaca, paihuan micungapa ripashun nijurca. Shina pushajpi rishpami Jesusca huasiman yaicushpa micungapa tiyarijurca. 38Chaipimi, maquita na maillashpa micungapa tiyarinda ricushpa, fariseo runaca manllarirca. 39Shina manllarijpimi Apunchi Jesusca, cashna nirca:
“Fariseocuna, cangunaca vasotapash, platotapash huashatalla maillanatami yachanguichi. Ashtahuangarin, shungu ucupica shuhuana yuyaihuan, imatapash na alita rurana yuyaihuanlla jundami canguichi. 40Juizu illajcuna. ¿Nachu shungu ucutapash, jahuallatapash paillata churarca? 41Canguna imata charishcatapash, shujcunaman carashpami mapa illaj saquiringuichi. 42¡Aij fariseocunalla! Mentatapash, rudatapash, micunapi churana jihuatapash, chungamanda shujgutami, Diosman caranata yachanguichi. Shina cashpapash, alitalla ruranata, Taita Diosta juyanatapash saquishpami causanguichi. Chashna ruranataca, aliguta pactachishpami, Diosman caranatapash na saquishpa causana canguichi. 43¡Aij fariseocunalla! Cangunaca, sinagogacunapipash, ñaupajpillami tiyaringapa munanguichi. Shinallata, plazacunapipash, alicachinajuchunmi munanguichi. 44¡Aij mandashca Shimita yachachijcunalla, fariseocunalla! Cangunaca mishqui shimi, jayaj shungucunami canguichi. Cangunaca, huañushcata pambashpa, gentecuna ama ricuchun quilpashpa saquishcashnami canguichi. Chashna cajpimi gentecunaca, chai jahuata purinajushpapash, imatapash na yachan” nircami.
45Shina nijpimi, mandashca shimita yachachijcunamanda shuj runaca, cashna nirca:
“Yachachij, cashna nijushpaca ñucanchitapashmari pingaichijungui” nircami.
46Shina nijpimi Jesusca cashna nirca:
“Mandashca shimita yachachij cangunapash, ¡aij imachari tucunguichi! Cangunaca jatun quipita na ushajta apachinshnami, na pactachi ushanallacunata yachachinguichi. Cangunallata chai quipitaca, dedohuanllapash na tacarijshnami, na pactachi ushanguichi. 47¡Aij cangunaca! Cangunapaj ñaupa taitacuna, profetacunata huañuchishpa pambashca bovedacunatami cutin tigrashpa shayachinajunguichi. 48Shinamandami, cangunapaj ñaupa taitacuna chashna rurashcataca alitami rurashca nishpa ricuchinajunguichi. Paicunapacha huañuchishpa pambashca bovedacunatami, cangunaca cutin mushujta ruranajunguichi. 49Shina cajpimi Taita Diosca, Paipaj ali yachaihuan cashna nirca: ‘Profetacunata, apostolcunata cachamushami. Paicunataca, huaquingunataca huañuchingami, huaquingunataca catiriyashpami llaquichinga’ nircami. 50Cai pachata rurashca punllamandapachami, tucuilla profetacunata huañuchinajurca. Chashna rurashpa yahuarta jichashcamandami, cunan viñaicunataca ninanda llaquichijunga. 51Abelta huañuchi callarishpaca, Zacariascamanmi huañuchinajurca. Chai runagutaca, altarhuan, Diospaj huasihuan tiyajuj chaupipimi huañuchinajurca. Chashna cashcamandami, cunan viñaicunataca ninanda llaquichinga. 52Mandashca shimita yachachijcuna, cangunaca ¡aij imachari tucunguichi! Cangunaca, alipacha yachajungapa pascanatami charinajunguichi. Chashna cashpapash, cangunapash na yachajushpa, shujcuna yachajungapa munajpipash jarcashpami causanguichi” nircami.
53Shina nijujpimi, mandashca Shimita yachachijcunapash, fariseocunapash Jesustaca ninanda fiñashpa, imatapash caita chaita tapuj tucunajurca. 54Imatapash na alita tigrachijpica, juchachishpa llaquichingapami, chapariyashpa chashna tapuj tucunajurca.
လက်ရှိရွေးချယ်ထားမှု
LUCAS 11: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
