LUCAS 10
10
Canchis chunga runacunata villachun cachashcamanda
1Chai jipami, canchis chunga runacunata Jesusca agllarca. Paicunataca, ishcai, ishcaimi, tucui pueblocunapi maitalla Pai rina pushtucunapi, villanajuchun ñaupachishpa cacharca. 2Paicunataca cashnami nirca:
“Granota tandachinaca, ashtaca ashtacamari tiyan. Shina cajpipash, tandachijcunaca huaquinllamari. Chaimandami, granota tandachijcunata cachamuchun, chagrayuj Taitata ninanda mañana canguichi. 3Cunanga richilla. Cangunataca, llamagucunata atujcunapaj chaupipi cacharinshnami cachajuni. 4Cucabi muchilatapash, culqui muchilatapash, chaquipi churajunatapash na apashpa rinachu canguichi. Ñambi pihuan tuparishpapash, ‘¿alillachu capangui?’ nishpa parlashpa na shayanachu canguichi. 5Maijan huasiman chayashpapash: ‘Cangunaman Taita Dios ali causaita carapachun’ nishpami chayana canguichi. 6Maijambash chaipi cushijushpa chasquij tiyashpaca, paicunapaj shungupipash cushijuimi tiyanga. Ashtahuangarin, chaita na chasquijpica, cangunamanmi chai cushijuica tigranga. 7Chai mingachij huasipi saquiringuichilla, paicuna imaguta carajpipash micunguichilla, ufianguichilla. Imata rurashpapash chaimandaca japinatami charin. Huasin huasinga na purinachu canguichi. 8Maijan puebloman chayajpi, cangunata chasquishpa micunaguta carajpica, micunallami canguichi. 9Huañujujcuna chaipi tiyajpica, alichinami canguichi. Shinallata: ‘Taita Dios mandajuj llactapi causanaca, ñami cangunapajman chayamushca’ nishpami villana canguichi. 10Maijan puebloman chayajpi, cangunata na mingachingapa munajpica, ñanman llujshishpa, cashna ninguichi: 11‘Cangunapaj pueblomanda alpa ñucanchi chaquipi catijushcatapash, cangunapaj llaquipajmi chafsishpa saquinchi. Shina cajpipash, Taita Dios mandajuj llactapi causanaca ñami cangunapajman chayamujun’ nishpa ringuichi. 12Cangunataca cashnami nini: Dios llaquichijui punllapica, chai pueblopi causajcunataca, Sodoma pueblotapash ashtahuan yalitami llaquichinga.
Na cazuj pueblocunaca, ¡aij imachari tucunga! nishcamanda
(Mat. 11:20-24)
13Corazín pueblolla, ¡aij imachari tucunguichi! Betsaida pueblolla, ¡aij imachari tucunguichi! Tiro, Sidón pueblocunapi, pipash na rurai ushanallacunata rurashca cajpica, ninanda llaquirishpa uchami Diospajman tigrarinajunman carca. Paicuna ninanda llaquirishcata ricuchingapaca, cañamuta churajushpami, uchufahuan shitarinajunman carca. 14Dios llaquichijui punllapica, Tiro, Sidón pueblocunata yalitami cangunataca llaquichinga. 15Capernaúm pueblopi causajcuna, cangunaca, ‘jahua pachaman apai tucushunllami’ yanguichimi. Ashtahuangarin, ucu pachamanmi shitai tucunguichi. 16Cangunata uyashpa cazujcunaca, Ñucatami cazunajun. Ashtahuangarin, cangunata yangapi churajcunaca, Ñucatami yangapi churanajun. Ñucata yangapi churajcunaca, Ñucata cachamujtami yangapi churanajun” nircami.
Canchis chunga runacuna tigramushcamanda
17Chai canchis chunga villajcunaca, ninanda cushijushpa tigramushpami:
“Apunchi Jesús, Cambaj shutipi ñucanchij rimajpica, ayacunapash cazushpa llujshircallami” ninajurca.
18Shina nijpimi, paicunataca cashna nirca:
“Satanastaca, jahua pachamanda rayuta shitamujshna, punchapamba urmandami ricurcani. 19Cangunamanmi, culebracunata, alacrangunata sarushpa mishachun ushaita curcani. Shinallata, cangunata fiñaj ayatapash mishachunmi ushaita curcani. Chaicunaca, cangunata imata ruraitapash na ushangachu. 20Cangunaca, ayacunata cazuchishpa llujchishpalla, na cushijunachu canguichi. Ashtahuangarin, cangunapaj shuticuna jahua pachapi quilcashca tiyajujpimi, cushijuna canguichi” nircami.
Jesusca ninandami cushijushca
(Mat. 11:25-27; 13:16-17)
21Shina nishpallami Jesusca, Diospaj Espíritu ninan cushijuita cujpi, cashna nirca: “Jahua pachatapash, cai pachatapash Mandajuj, Ñuca Taitalla. Canga, alipacha yachajushcacunaman, alita yarishpa causanajujcunamambash, cai yachajunataca na ricuchircanguichu. Ashtahuangarin huahuashna, na jatun tucushpa causajcunaman yachachishcamandami, Candaca ninanda alicachini. Ari Ñuca Taitalla, Canga chashna rurangapami munarcangui. 22Ñuca Taitami, tucuita Ñucamanlla carahuashca. Pipaj Churi cajtapash, gentecunaca na yachahuanllu, Ñuca Taitallami yachan. Ñuca Taitatapash, pipash na rijsinllu. Ñucallami, Paipaj Churi cashpa rijsini. Shinallata, Taitataca Churi rijsichijpillami rijsinajun” nircami. 23Jesusca, Paipaj yachajujcunata tigrarishpa ricushpami, paicunatalla cashna nirca: “Canguna ricunajushcata shujcunapash paicunapaj ñavihuan ricushpaca, ninanda cushijuchun ninimi. 24Cangunataca cashnami nini: Canguna cunanbi ricunajushcataca, profetacunapash, jatun mandajcunapash, ninandami ricungapa munanajushca carca. Shina ricungapa munashpapash, paicunaca na ricurcachu. Shinallata, canguna cunanbi uyanajundapash, ninandami uyanayachirca. Shina cashpapash, paicunaca na uyarcachu” nircami.
Samaria llactapimi ninan ali runagu tiyashca
25Ricuichi, mandashca shimita yachachij shuj runami, Jesusta juchachingapa cashna nishpa shayarirca:
“Yachachij, causaita causagrinata ñuca japingapaca, ¿imatata rurana capani,?” nircami.
26Shina nijpimi Jesusca cashna nirca:
“Mandashcapica, ¿ima nishpata quilcashca? ¿ima nijujtata quilca catishcangui?” nircami.
27Chai runaca, cashna nishpami tigrachirca:
“Mandashcapica cashnami nijun: ‘Canda Mandaj Taita Diostaca, cambaj tucui shunguhuan, cambaj tucui almahuan, cambaj tucui ushaihuan, cambaj tucui yuyaihuanmi juyana cangui. Cambaj cumbatapash, can juyarinshnallatami juyana cangui’ nijunmi” nircami.
28Shina nijpimi Jesusca cashna nirca:
“Aligutapachami tigrachingui. Chaita rurashpaca causanguipachami” nircami.
29Ashtahuangarin chai runaca, paillata alipi ricuringapa munashpami, Jesustaca:
“¿Pita ñuca cumbayari?” nishpa tapurca.
30Shina tapujpimi Jesusca, cashna nirca:
“Shuj runagumi Jerusalenmanda, Jericó puebloman urai rijurca. Paitaca, shuhuacuna japishpami, ima charishcatapash, churajushcatapash tucuilla quichushpa, ñalla huañungacaman macashpa, saquishpa rirca. 31Chai ñandallatami, shuj sacerdotepash urai shamujurca. Ashtahuangarin, chai runaguta ricushpapash, yalishpa rircallami. 32Shinallata shuj levita runapash, chai ñandallatami rijurca. Chai runapash, chai macai tucushca runaguta ricushpapash, yalishpa rircallami. 33Ashtahuangarin, Samaria llactamanda shuj runaca, chai ñanda rijushpami, macai tucushca sirijuj runagupajman quimirishpa ninanda llaquirca. 34Shina llaquishpami, chai runagupajman quimirishpa, chugricunapica aceitehuan, vinohuan javishpa, finduhuan pilluchirca. Chai jipaca, paipaj burrugupi churashpami, mingarina huasiman apashpa ricuriajurca. 35Samaria llactamanda runaca, chai cayandi punlla rigrijushpaca, chai huasiyuj runamanmi, ishcai denario culquita saquirca. Shina saquishpaca, cashnami nirca: ‘Cai runaguta ali ricuriapangui. Cai culqui na pactajpipash, ñuca tigramushpaca cupashallami’ nircami. 36¿Chai quimsa runacunamandaca, maijanda shuhuacuna macashca chai runagutaca, llaquishpa yanapashcanga?” nircami. 37Shina nijpimi, chai runaca:
“Macai tucushca runaguta llaquij runami alita rurashca yanimi” nirca.
Shina nijpimi Jesusca:
“Cambash, chashnallata shujcunata llaquishpa causagrilla” nirca.
Martandi, Mariandi causaj huasimanmi Jesusca rishca
38Jesús rijushpaca, shuj uchilla pueblomanmi chayarca. Chaipimi Martaca, paipaj huasipi mingachirca. 39Chai huarmipaj ñañaca Mariami carca. Mariaca, Jesuspaj ñaupajpi tiyarishpami, Jesús villajujtaca aligutapacha uyajurca. 40Ashtahuangarin Martaca, huasipi ruranacunahuanmi musparijurca. Paica, Jesuspajman quimirishpami cashna nijurca:
“Apunchi Jesús, ñucalla tucuita rurajuchun saquishpa, ñuca ñaña tiyajujtaca, ¿nachu ricungui? ‘yanapagri’ nipayari” nircami.
41Shina nijpimi Jesusca cashna nirca:
“Marta, Marta. Canga, imatapash ruranata yariajllami musparishpa purijungui. 42Ashtahuangarin, imaguta cashpapash shujtallami rurana cangui. Mariaca, ashtahuan aliguta ruranatami mascashca. Chaitaca pipash na quichungachu” nircami.
လက်ရှိရွေးချယ်ထားမှု
LUCAS 10: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
