LUCAS 9
9
Chunga ishcai yachajujcunata villachun cachashcamanda
(Mat. 10:5-15; Mar. 6:7-13)
1Jesusca, chunga ishcai yachajujcunata tandachishpami, tucui ayacunata llujchishpa cachachumbash, huañujujcunata alichinajuchumbash mandana ushaita cararca. 2Taita Dios mandajuj llactamanda villanajuchun, huañujujcunata alichinajuchunmi cacharca. 3Paicunataca cashnami nirca: “Ñanda ringapaca, imatallapash na apanachu canguichi. Tauna caspitapash, cucabi muchilatapash, tandatapash, culquitapash na apanachu canguichi. Jahualla churajunatapash, na ishcaita apanachu canguichi. 4Maijan huasiman yaicushpapash, chai huasipimi saquirina canguichi. Chai huasimandami, shuj puebloman llujshina canguichi. 5Maipi cashpapash, cangunata na chasquijpica, chai pueblomanda llujshishpa ringuichilla. Paicuna, napacha ali cajta ricuchingapami, cangunapaj chaquimanda alpatapash chafsishpa rina canguichi” nircami. 6Paicuna llujshishpa rinajushpaca, uchilla pueblocunapi na uyashca sumaj shimicunata villashpandi, huañujujcunata alichishpandimi, tucui llactacunata purinajurca.
Bautizaj Juanda huañuchishcamanda
(Mat. 14:1-12; Mar. 6:14-29)
7Jesús tucuita rurashpa purijujtami, Galilea llactata mandaj Herodes tetrarca uyarca. “Bautizaj Juanmi, huañushcacunamanda causarishca” nishpa huaquinguna parlanajujpimi, Herodesca imata ruraitapash na ushajurca. 8Huaquingunaca: “Eliasmari ricurimushca” ninajurcami. Shujcunaca: “Punda profetacunamanda maijambashmi causarimushca yarin” ninajurcami. 9Ashtahuangarin Herodesca cashnami nirca:
“Juanbaj umata fitichunga, ñucami mandarcani. Cunanga, imatapash rurashpa purijun runaca, ¿pita cangayari?” nircami.
Shinamandami Herodesca, Jesusta ricungapa ninanda munarca.
Picha huaranga runacunaman micuchun carashcamanda
(Mat. 14:13-21; Mar. 6:30-44; Juan 6:1-14)
10Apostolcuna tigramushpaca, paicuna tucui imatalla rurashcatami, Jesusman villanajurca. Paicunataca, Betsaida shuti puebloman chayanapi jichushca pambamanmi pushashpa rirca. 11Chaiman rinajujta gentecuna yachashpa catimujpimi, Jesusca chasquirca. Paicunamanmi, Taita Dios mandajuj llactamanda villajurca. Shinallata, huañujujcuna ali tucunata munajcunatapashmi alichijurca. 12Ña tutayajujpimi, chai chunga ishcai yachajujcunaca, Jesuspajman quimirishpa cashna ninajurca:
“Cai gentecunataca, uchilla pueblocunapi, cai muyundi pamba huasicunapi mingarishpa pacarichun, micunatapash mascagrichun cayacaman nishpa cachapailla. Caipica, jichushca pambapimi canchi” ninajurcami.
13Shina nijpimi Jesusca:
“Cangunallata micunataca caraichilla” nijpimi, paicunaca cashna ninajurca:
“Ñucanchica, picha tandaguta, ishcai pijigutallami charipanchi. Na cashpaca, cai tucui gentecunaman micunata carangapaca, ñucanchimi randingapa rina canchiman” ninajurcami.
14Picha huaranga canashna jaricunami tandanajushca carca. Shina cajpimi, Paipaj yachajujcunataca:
“Picha chunga, picha chunga tiyachipaichi” nirca.
15Paicunaca, chashna nishcashnami tucui gentecunata tiyachinajurca. 16Jesusca, picha tandaguta, ishcai pijiguta japishpami, jahua pachata ricushpa, Diosta pashi nirca. Chaitaca, asha asha chaupishpami, chai gentecunaman carachun, Paipaj yachajujcunaman curca. 17Shina carajpimi tucuicunallata, na munangacaman micurca. Paicuna na micui ushashcataca, chunga ishcai canasta jundatami tandachinajurca.
Pedroca: “Cristomi cangui” nishcami
(Mat. 16:13-20; Mar. 8:27-30)
18Jesusca, anchurishpa rishpa Diosta mañajujpi, Paipaj yachajujcunapash quimirimujpimi, cashna nishpa tapurca:
“Gentecunaca Ñucataca, ¿pi yashpashi ricuhuan?” nishpami tapurca.
19Shina nijpimi, cashna nishpa tigrachinajurca:
“Huaquingunaca, Bautizaj Juanmi yanajunmi. Shujcunaca, Eliasmi yanajunmi. Cutin shujcunaca, punda profetacunamanda maijambashmi causarimushca yanajunmi” ninajurcami.
20Shina ninajujpimi Jesusca:
“Cutin cangunaca, ¿pi yahuanguichita?” nirca.
Shina tapujpimi Pedroca cashna nirca:
“Taita Dios cachamushca Cristomi cangui” nirca.
Jesusca, Pai huañunata villashcamanda
(Mat. 16:21-28; Mar. 8:31—9:1)
21Ashtahuangarin Jesusca, “chaitaca pimambash napacha villanachu canguichi” nishpami shinllitapacha mandarca.
22Paica cashnami nirca:
“Runa Aichayuj tucushca Ñucaca, ninanda llaquichi tucunapachami cani. Mandaj ancianocunapash, sacerdotecunata mandajcunapash, mandashca Shimita yachachijcunapash, ninanda na ricunayachishpami, huañuchihuanga. Shina cashpapash, quimsa punllahuanga causarishallami” nircami.
23Shinallata, tucuicunatami cashna nirca:
“Maijan Ñucata catingapa munashpaca, paipaj munai causaitaca saquishpa, punllandi cruzta aparishpallami, cati ushanga. 24Maijan cashpapash, Paipaj causaita ashtahuan juyashpaca, chingaitami chinganga. Ashtahuangarin, Ñucata catijushcamanda huañuchi tucushpaca quishpiringami. 25Shuj runaca, cai pachapi ima tiyajtapash, tucuita japishpa charijyashpapash, paillata huaglishpa, na cashpaca chingaita chingagrishpaca, ¿ima alita cangayari? 26Ashtahuangarin Ñucamanda, Ñuca villashca shimicunamanda, pinganayachishpami shujcunaman na villanga. Chaimandami Runa Aichayuj tucushca Ñucapaj, Ñuca Taitapaj, angelcunapaj punchapamba ushaihuan shamushpa, maijan pinganayachindaca pingaichisha. 27Na llullashpami, cangunataca cashna nini: Caipi shayanajujcunamanda huaquingunaca, nara huañushpallatami Taita Dios mandajuj llactataca, ricunguichi” nircami.
Jesusca punchapamba tucushpami ricurishca
(Mat. 17:1-8; Mar. 9:2-8)
28Shina villajushca pusaj punllashna jipaca, cashnami tucurca: Pedrota, Juanda, Jacobota pushashpami Jesusca, Diosta mañangapa urcuman vichai rirca. 29Chaipi mañajujpimi, ñavipash shujman tigrashpa, churajushcapash yuraj yuraj punchapamba ricurirca. 30Chaipica, ishcai runacuna Jesushuan parlanajunmi ñapash ricurirca. Shujca Moisés, shujca Eliasmi carca. 31Paicunaca, punchapamba chaupipi shayanajushpami, Jerusalenbi huañuchi tucunapacha cashcata villanajurca. 32Pedroca, paipaj cumbacunandimi, puñuihuan na ushanajurca. Shina cashpapash, Jesús punchapamba shayajujta, ishcai runacuna Paihuan shayanajujtapash ricunajurcami. 33Jesushuan shayanajushcacuna anchurishpa rijpimi Pedroca, Jesusta cashna nirca:
“Yachachij, Ñucanchica alipajmari shamupashcanchi, Cunanga quimsa chugllagutami rurashun nipanchi. Shujtaca canman, shujtaca Moisesman, shujtaca Eliasmanmi ruragrinchi” nircami.
Shina nishpami Pedroca, paillata imata nijushcatapash na yacharca. 34Shina nijujpillatami fuyu pillushpa, paicunataca ñapash quilparca. Chaimi paicunaca ninanda manllarinajurca. 35Chai fuyu ucumandaca, cashna rimajmi uyarirca:
“Caimi, Ñuca juyashca Churigu. Paitami, uyana canguichi” nircami.
36Shina rimamuj uyarishca jipaca, Jesuslla shayajushcatami ricunajurca. Paicunaca, imata ricushcatapash chai punllacunapica, pimambash na villashpami upalla purinajurca.
Aya jundashca huambratami Jesusca alichishca
(Mat. 17:14-21; Mar. 9:14-29)
37Cayandi punlla, urcumanda urai shamunajujpimi, ashtaca gentecuna Jesusta tuparingapa shamunajurca.
38Paicunapaj chaupimanda, shuj runa ninanda caparishpaca cashnami nirca:
“Yachachij, ñuca churiguta alichipai. Cai huahuatallami charipani. 39Paitaca, aya jundashpami, cungashcapi ninanda caparichin. Shinallata, ninandapacha chujchuchishpami, babasta shitachimupan. Caiman chaiman shitashpami, ashacamanlla saquishpa rin. 40‘Ayata llujchipaichi’ nishpami, cambaj yachajujcunataca mañaparcani. Ashtahuangarin paicunaca, na llujchi usharcachu” nircami.
41Shina nijpimi Jesusca cashna nirca:
“Na ali crij millai gentecunamanda miraicuna. ¿Ima punllacamanda cangunahuanga cashna causashpa llaquirijushallayari?” nishpaca:
“Cambaj churiguta apamui” nircami.
42Jesuspajman chai huambragu quimirijujpimi, ayaca, alpapi shitashpa ninandapacha chujchuchirca. Ashtahuangarin Jesusca, mapata rurachij ayata ninanda rimashpami, chai huambramandaca llujchirca. Shina alichishpami, paipaj taitaman apachun curca.
43Taita Dios ninan ushaihuan chashna rurashcata ricushpami, tucuicuna manllarinajurca.
Jesusca cutinmi Pai huañunata villajushca
(Mat. 17:22-23; Mar. 9:30-32)
Tucui imatapash rurajta ricushpa, tucuicuna manllarijpimi Jesusca, Paipaj yachajujcunata cashna nirca:
44“Cashna Ñuca villajujtaca na cungashpami, aligutapacha yariana canguichi. Ashtahuangarin, Runa Aichayuj tucushca Ñucataca, runacunapaj maquipi japichihuangami” nircami.
45Imamanda chashna nijtapash, paicunapaj yuyaica quilpashcashna cashpami, na yachai usharca. Imashpa chai shimicunata nishcata tapungapapash ninandami manllarca.
“¿Maijanshi ashtahuan yali ali canchi?” ninajushcami
(Mat. 18:1-5; Mar. 9:33-37)
46Chai jipami Jesuspaj yachajujcunaca, “¿maijanshi ashtahuan yali ali canchi?” yanajurca.
47Paicunapaj shungupi chashna yanajushcata yachashpami Jesusca, shuj huahuata maquimanda aisamushpa, paicunahuan shayachirca. 48Chaipimi paicunataca cashna nirca:
“Maijambash cai huahuaguta Ñuca shutipi chasquishpaca, Ñucatami chasquinajun. Shinallata maijambash Ñucata chasquishpaca, Ñucata cachamuj Taitatapashmi chasquinajun. Ashtahuangarin, maijanmi cangunapurapi huahuagushna causajun, chaimari ashtahuan yali jatun” nircami.
Maijambash ñucanchita na fiñashpaca, ñucanchipurallatami
(Mar. 9:38-40)
49Chai jipami Juanga, cashna nishpa tigrachirca:
“Yachachij, shuj runatami Cambaj shutipi rimashpa, ayacunata llujchijurca. Paitaca, na ñucanchihuan cumba tucushpa catijujpimi, ‘ama chashna ruraichu’ nishpa jarcarcanchi” nircami.
50Shina nijpimi Jesusca cashna nirca:
“Na jarcashpa, saquinallami canguichi. Maijambash ñucanchita na fiñashpaca, ñucanchipurallatami” nircami.
Jacobota, Juanda Jesús shinllita tacurishcamanda
51Jahua pachaman apai tucuna punllacuna chayamujujpimi Jesusca, Jerusalenman rinapacha cajpi chaiman ri callarirca. 52Jesusta ñaupashpa richunmi villajcunata cacharca. Paicunaca, Samaria llacta, shuj uchilla puebloman yaicushpami, Jesús chaiman chayachun, tucuita alichingapa rinajurca. 53Ashtahuangarin, Jerusalenman rijujta yachashpami, na mingachingapa munanajurca. 54Jesuspaj yachajujcuna chaita ricushpami Jacobopash, Juanbash cashna ninajurca:
“Apunchi Jesús, ¿nachu Elías rurashcashna, jahua pachamanda nina urmamushpa tucuchijuchun mañachun munapangui?” ninajurcami.
55Shina nijpimi Jesusca, tigrarishpa shinllita rimashpa cashna nirca:
“Cangunaca, pipaj espíritu rimachijtapash, na yachashcamari canguichi. 56Runa Aichayuj tucushca Ñucami, gentecunata quishpichingapa shamurcani, na tucuchingapa shamurcanichu” nircami.
Shina nishpallami paicunaca, shuj uchilla puebloman rirca.
Jesusta catingapa munajcunamanda
(Mat. 8:18-22)
57Paicuna rinajujpimi shuj runaca, ñambi cashna nirca:
“Apunchi Jesús, Can maita rijujpipash catipashallami” nircami.
58Shina nijpimi Jesusca cashna nirca:
“Añascunapash, paicuna causana utujuta charinmi. Jahuata rij alasyuj animalcunapash, tazinda charinmi. Ashtahuangarin, Runa Aichayuj tucushca Ñucami, umaguta maipi samangapallapash na charini” nircami.
59Shina nishpami Jesusca, shuj runataca:
“Ñucata catihuai” nirca.
Shina nijpimi chai runaca cashna nirca:
“Apunchi Jesús, ñuca taitata pambanarami capani” nirca.
60Shina nijpimi Jesusca cashna nirca:
“Huañushcashna causajpura huañujpica pambanajuchun saquilla. Ashtahuangarin canga, Taita Dios mandajpi causanamanda villangapa ri” nircami. 61Shina nijpimi shuj runapash cashna nirca:
“Apunchi Jesús, Canda catisha nipanimi. Ñuca huasipi causajcunatara, ‘cayacaman’ nishpa tigramugripasha.” nircami.
62Shina nijpimi Jesusca cashna nirca:
“Maijan runapash yapujushpaca, na huashaman tigrashpa ricushpandi yapunllu. Chashna cashpaca, Taita Dios mandajujpi causaitaca, napacha ushangachu” nircami.
လက်ရှိရွေးချယ်ထားမှု
LUCAS 9: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
