PAMUNGKAAN 49
49
Hata ni si Jakob na parpudi
1Dung i dipiohon si Jakob ma angka dakdanaknia i, didok ia ma, “Marlagut ma hamu tu lambungkon, anso hupaboa tu hamu sanga aha na giot masa tu hamu di pudian ni ari.
2Marlagut ma jana tangihon hamu ma,
ale angka anak ni si Jakob.
Parrohahon hamu ma si Israel, amangmunu.
3Si Ruben, anakku siangkaan, ho do di au hagogoan.
Parbatu na parjolo tanda na halaklahi au,
ho do na tumongam jana na gumogo sian angka dakdanakku.
4Songon aek magodang na marhusasak do ho,
tapi nada ho be sipatujoloon.
Angke didongani ho modom radingku.
Dipahodar ho podoman ni amangmu.
5Martinadohon do si Simeon dohot si Levi.
Mangasahon hajungkatan do dipake halahi sinjatana.
6Nada parsidohot au di pokat ni halahi.
Angke mamunu do halahi di hatiha ro rimas ni halahi.
Diloncingi halahi do lombu palalu-lalu tagas.
7Hona bura ma halahi di rimasna, hara ni jorbutna.
Hona bura ma halahi di rimasna, hara ni kejamna.
Paserahonku ma halahi di sude Israel.
Sarsarkononku ma halahi, di tonga-tonga ni halak pangisina.
8Anggo si Juda, pujion ni angka kahanggimu ma ho,
jomahonmu do tangkuhuk ni musumu,
jana manungkap angka kahanggimu di jolomu.
9Songon singa do si Juda.
Matehononna do soroanna, jana mulak tu asarna,
marngeat ma ia lalu modom-modom.
Nada adong umpe sahalak na puluk paorotkon ia.
10Tiopon ni si Juda ma tungkot harajaon.
Mamarenta ma pomparanna sapanjangna.
Marroan ma angka bangso pasahat somba-sombana.
Jana manungkap tanda tunduk di jolona.
11Tambatonna do anak ni halodena di bona ni anggur,
di bona ni anggur na jumengkar.
Basuonnia ma pakeannia dohot anggur,
anggur na rara songon mudar.
12Rara ma matania hara ni na minum anggur i.
Bontar ma iponnia hara ni na minum susu i.
13Si Zebulon ma na maringanan donok tu laut.
Ro ma angka kapal di topina marlabu,
lopus tu Sidon bidang ni luatna.
14Songon halode na gogo do si Isakar.
Na modom di antara ni palano.
15I noma dengganna diida ingananna i,
songon i ma antong jeges ni luat i,
mamuhung ma ia mamorsan boban,
parkarejo na hona paksa songon naposo.
16Anggo ho Dan, pimpinonmu ma bangsomu.
Lopus sarupa tu angka marga ni Israel na asing kahanggimu.
17Sai songon ulok na di dalan ma si Dan.
Songon ulok na marbisa di topi ni dalan na gogot.
Na manurbing tambihul ni kudo.
Lopus sampak sipangalombut.
18O Tuhan, hum haluaan na sian Ho do na hupainte-inte.
19Roroan ni angka pangarampas ma si Gad.
Tapi gabe si Gad do muse mangarampas halahi.
20Sian tano ni si Aser ma ro panganon na tabo.
Patut parsaulian di raja-raja.
21Si Naftali, songon ursa na malua do,
angka anakmu pe jogi tompana.
22Si Josep songon bona ni anggur na napu,
di lambung mata mual ia tubu,
angka rantingna manjurur manjarampak tu ginjang ni tembok.
23Kejam do angka tukang pana mamorangi ia,
mamana dohot mangkojar ia.
24Tapi laing hot do togu panania i,
jana tangannia tong-tong margogo,
hara ni kuaso ni Parmahan Na Gumogo,
Debata ni si Jakob dolok batu ni Israel.
25Debata ni amangmu ma mangurupi ho,
Na Gumogo i ma mamasumasu ho
marhite pasupasu sian langit na di ginjang
dohot pasupasu sian aek na di toru ni tano,
marhite anak dohot pahan-pahanan.
26Gumodang do pasupasu ni amangmu,
sian pasupasu ni angka dolok na santak tobang,
jana na tumabo sian angka tor na hot.
Sai mijur ma sude angka pasupasu i
tu ulu ni si Josep,
tu ginjang ni bohi ni na sumurung sian kahanggina.
27Si Benyamin, songon sorigala na manggasa-gasa.
Manyogot ni ari manjomak soroanna,
jana hatiha potang ari dibagi-bagi ia na nirampasna i.”
28I ma na dua bolas marga ni Israel, jana i ma na nidok ni amang ni halahi di na mandok hata parsirangan tu halahi sada-sada be.
Marujung ma ngolu ni si Jakob jana dikuburkon
29Dung i martona ma si Jakob tu angka dakdanaknia, “Santongkin nari marujung mangolungku songon ompu na umpompar au. Di lambung ni halahi ma au kuburkon hamu di bagasan liang na di ladang ni si Efron halak Het i 30di Makpela na di Habincaran ni Mamre na di tano Kanaan. Na nitobusan ni si Abraham do ladang i sian si Efron baen tano kuburan. 31Disi do dikuburkon si Abraham dohot si Sara, si Ishak dohot si Ribka; disi muse do hukuburkon si Lea. 32Ma ditobusi ladang dohot liang na disi i sian halak Het. Disi ma au kuburkon hamu.” 33Jadi dung sidung didok si Jakob tonania tu angka dakdanaknia i, dipapodom ia ma, jana marujung ma ngolunia.
လက်ရှိရွေးချယ်ထားမှု
PAMUNGKAAN 49: LAIAKB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Indonesian Bible Society