PAMUNGKAAN 50
50
1Manungkap ma si Josep tu amangnia i jana tangis ma ia mangummai bohina i. 2Jadi didok si Josep ma anso nilapu dohot parmasak bangke ni amangna i. 3Opat pulu ari honokna mangkarejohon i, somal do songon i honokna mangalapuhon parmasak tu bangke. Marsiluluton ma halak Mesir hara ni si Jakob, pitu pulu ari honokna.
4Dung salpu na marsiluluton i, didok si Josep ma tu angka pagawe ni raja i, “Palalu hamu ma jolo tonangkon tu raja i, 5‘Di na marayak marujung ngolu ni amanta hami, disuru ia do anso hujanjihon tusia mandok angkon dikuburkon ia di bagasan kuburan na dung sidung diparade ia di tano Kanaan. Jadi hara ni i, na mangido isin ma au di raja i anso kehe au jolo manguburkon damang i. Dung sidung, manigor mulak pe au.’ ”
6Jadi didok raja i ma, “Kehe ma da ho manguburkon amanta i songon na nitonahonnia i tu ho.”
7Jadi kehe ma si Josep laho manguburkon amangnia i. Sude pagawe ni raja, angka bagian hatobangon sian bagas godang dohot sude halak na godang di Mesir, laing dohot ma kehe mandongani si Josep. 8Halahi na sabagas pe, dohot angka kahanggina bope angka sisolkotnia na asing laing kehe do. Hum angka dakdanak na menek-menek dohot angka pahan-pahanan ni halahi noma na tading di Gosen. 9Dohot muse do angka parangan na markudo dohot na markareta, jadi gabe ginjang sajo do na kehe i mudur-udur.
10Dung lalu halahi tu inganan pardegean na di Atat di Habincaran ni Batang aek Jordan, mangandungi ma halahi disi mangangguk godang. Dipatupa si Josep ma horja siluluton disi pitu ari honokna. 11Di na niida halak Kanaan horja siluluton na di Atat i, didok halahi ma, “Songon on ma lakna tongamna horja siluluton di halak Mesir!” I ma dalanna umbaen na margoar inganan i, Abel-Misraim.#50:11 ABEL-MISRAIM: Sarupa do pandok ni goar on di hata Ibrani na mandok “horja siluluton ni halak Mesir”.
12Songon i ma dibaen angka dakdanak ni si Jakob laho patuluskon na nitonahonnia i tu halahi. 13Dioban halahi ma bangkena i tu Kanaan jana dikuburkon halahi di bagasan liang Makpela, di Habincaran ni Mamre, di ladang na nitobusan ni si Abraham sian si Efron halak Het i baen tano kuburan. 14Dung sidung ditanom si Josep amangnia i, mulak ma ia tu Mesir rap dohot angka kahangginia i dohot sude angka na mangihutkon ia di na manguburkon amangnia i.
Dipasonang si Josep roha ni angka kahangginia
15Jadi dung jumolo amang ni halahi i, didok angka kahangginia i ma, “Bia do betak sai hosom dope roha ni si Josep mida hita jana betak na sangkapkononnia do dalan mamaloskon tu hita sude hajahatan na tabaen i tusia najolo i?” 16Jadi ditonahon halahi ma tu si Josep, “Dompak so marujung ngolu ni amanta, 17didok ia do tu hami anso hami dok tu ho songon on, ‘Ampuni ma hasalaan ni angka angkangmi di na nibaen ni halahi na jahat tu ho.’ Antong, saonnari pe sesa ma dosanami i, hami angka naposo ni Debata na nipasomba-somba ni amanta hamu i.” Tangis do si Josep di na nijagitnia tona ni amangna i.
18Jadi marroan ma angka angkangnia i somba-somba tu jolonia jana didok halahi ma, “Naposomu ma hami.”
19Tapi didok si Josep ma tu halahi, “Ulang pola mabiar hamu; harana nanggo Debata au. 20Haru pe na dung satahi hian hamu laho mambaen na jat tu au, hape diuba Debata do hajahatan i gabe tu hadengganan, anso marhaluaan bahat halak na mangolu saonnari markite-hite pangalaho na masa na salpu i. 21Ulang gamang hamu. Sarihononku do ngolumunu dohot ngolu ni angka dakdanakmunu.” Songon i ma dibaen si Josep paposkon roha ni halahi di bagasan hata na lambok, jadi mangonai do i tu roha ni halahi.
Marujung mangolu ni si Josep
22Laing di Mesir noma si Josep maringanan rap dohot angka kahangginia i; marumur do ia saratus sampulu taon di na marujung ngolunia. 23Sanga dope diida ia anak dohot pahompu ni si Efraim. Jabat muse dope diangkat ia angka dakdanak ni si Makir, i ma pahompunia sian si Manase gabe dakdanaknia sandiri. 24Didok ia ma tu kahangginia i, “Donok noma ajalku, tapi pasti Debata do manyarihon dohot mamimpin hamu ruar sian luat on, tu luat na nijanjihonNia mardongan sumpa tu si Abraham, si Ishak dohot si Jakob.” 25Jadi disuru si Josep ma bangsonia i marsumpa ning ia ma, “Janjihon hamu ma tu au, muda dipimpin Debata hamu mulak tu luat i, angkon dohot do obanonmunu saring-saringku.” 26Dung i marujung mangolu ni si Josep di na marumur ia saratus sampulu taon. Dibaen halahi ma angka pulung-pulungan ni parmasak tu bangkenia i jana dibaen halahi ma di bagasan poti ni na mate.
လက်ရှိရွေးချယ်ထားမှု
PAMUNGKAAN 50: LAIAKB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Indonesian Bible Society